Bushe Tukacicita na Kabili? Ubwite na Bumbi Ubwa Bapainiya ba Kwafwilisha
1 Bushe tukacicita na kabili? Bushe tukabombako bupainiya bwa kwafwilisha mu nshita ya Cibukisho? Ica mu kati ica Ubutumikishi Bwesu Ubwa Bufumu ubwa February 1997 icakwete umutwe mu filembo ifikalamba uwaleti “Bapainiya ba Kwafwilisha 6,000—Balefwaikwa,” calitucebwishe. Twali abashininwa ukuti mwali no kupoosako amano kuli bulya bwite. Lintu lipoti wa mulimo wa March 1997 alonganikwe, twali ne nsansa ukwishiba ukuti 6,414 balibombeleko bupainiya bwa kwafwilisha! Nga ca kuti twalunda ku mpendwa ya bapainiya ba nshita yonse 6,990 na bapainiya baibela 117 abacitile lipoti ulya mweshi, tusanga ukuti mupepi na maperesenti 16 aya bakasabankanya bonse balibombeleko bupainiya. Bushe tukacicita na kabili mu nshite yi iya Cibukisho?
2 Tuletasha mu nsansa bonse abaibikilisheko ku kwingilishako umulimo wabo uwa mwi bala umwaka wapwile. Cili icamonekesha ukuti, bonse icamukuntile cali kutemwa mwatemwa Yehova Lesa na banenu. (Luka 10:27; 2 Pet. 1:5-8) Bakasabankanya mu mibele yalekanalekana mu bumi baliteulwike ku kuleka babombeko bupainiya bwa kwafwilisha. Mu cilonganino cimo, bakasabankanya 51 balibombeleko bupainiya bonse mu mweshi umo wine, ukusanshako ne cinabwingi ca baeluda, nyina no mwana uuli ne myeshi 15, nkashi uwalekele incito no kusanga incito ya nshita lubali ku kuleka abombeko bupainiya, na nkashi umukalamba uushatalile abombako bupainiya. Kangalila wa muputule alembele ukuti: “Kuli ukuibikilishako kwa maka mu mulimo wa kushimikila . . . Ici tacileambukila fye umo tubombela lelo ifilonganino naficincimuka nga nshi. Bamunyina baleipakisha ukwishibana bwino no kumona ifya kufumamo fisuma mu butumikishi.”
3 Abacaice na bo balibombeleko mu nshita ya Cibukisho. Kasabankanya ushabatishiwa uuli ne myaka 13 aleenekela inshita akalangisha ukuipeela kwakwe kuli Yehova. Pa numa ya kubatishiwa mu February, alembele pa lwa kufwaisha kwakwe ukuti akabombeko bupainiya bwa kwafwilisha mu March ati: “Ukwabula icili conse ica kundesha, apo pene fye nalipeele baeluda formu. . . . Ifyo twaipakishe ifingi nga tafyacitike akubula imwe ukutulaalika mu kutemwa ukuti tubombeko bupainiya. Ndatasha Yehova pa kukwata ili shuko ilya kuba pa [makana] ya baankwileko.” Alimika ubuyo bwa kubombako na kabili.
4 Napamo mwali pali ba 6,414 ababombeleko bupainiya bwa kwafwilisha mu March yapwile, nelyo ba 6,532 mu April, nelyo 7,695 mu May. Bushe mukacicita na kabili uno mwaka? Nga ca kuti mwalifililwe ukubombako bupainiya mu nshita ya cibukisho iyapwile, bushe kuti mwabombako uno mwaka? Bushe kuti twacila pa mpendwa ya 7,695, iya babombeleko bupainiya bwa kwafwilisha mu May 1997? Iyo yali ni mpendwa yakulisha iya bapainiya ba kwafwilisha mu mweshi umo mu Zambia.
5 Pooseni Amano Kuli April na May: Uno mwaka, Icibukisho cikabako pa Cibelushi, April 11, ukulenga April ukuba umweshi wawamisha uwa kwingilishako umulimo mu butumikishi. (2 Kor. 5:14, 15) Mu nshiku sha kubalilapo 11 mu mweshi, tukapoosa amano ku kulaalika abalefwaya ukwishiba icine abengi ukusangwa ku Cibukisho ukulingana na po twingapesha. Nga ca kuti mulepanga ukubombako bupainiya bwa kwafwilisha, shi peeleni baeluda formu mu kubangilila ilyo ubushiku bwa kutendeka tabulafika.—1 Kor. 14:40.
6 Apantu May yakwata impela sha mulungu shisano, bakasabankanya abaya ku sukulu nelyo ababomba incito ya ku mubili iya kuwisha akasuba kuti cabangukila ukubomba bupainiya bwa kwafwilisha ulya mweshi. Ukupitila mu kutantika amaawala 10 mu mulimo wa mwi bala pa mpela ya mulungu umo na umo, kuti mwakabila fye ukutantika amaawala 10 aya kulundapo mu mweshi ku kufika pa maawala 60 ayalekabilwa.
7 Mu April na May, tukalatambika ukulembesha kwa Ulupungu lwa kwa Kalinda. Bamagazini kuti batambikwa ku bafilwa ukulembesha. Ici cifwile ukukoselesha abengi aba ifwe ukubombako bupainiya. Mulandu nshi twasosela ico? Bamagazini tabaafya ukutambika kabili tulaipakisha ilyo tulebomba na bene mu butumikishi. Kuti babomfiwa bwino mu mbali shonse isha mulimo—ku ng’anda ne ng’anda na kwi tuuka ne tuuka, pamo no kulanshanya na bantu mu musebo, umo bemika bamotoka, na mu maparka na mu bunte bwa mu lyashi. Icacindamisha ca kuti, Ulupungu lwa kwa Kalinda na Loleni! fisumbula icine ca Bufumu. Fitonta pa kufikilishiwa kwa masesemo ya Baibolo, ukushininkisha ukuti Ubufumu bwa kwa Lesa buleteka. Na kabili filafika na pa mitima ya bakabelenga ukupitila mu kulanda pa lwa fyo abantu bakabila icine cine. Nga twatontonkanya pa fyo ubumi bwesu bwaambukilwa na ba bamagazini bacindamisha, tukalengwa ukulangisha ukupimpa kwesu ilyo tuletambika ukulembesha Ulupungu lwa kwa Kalinda mu April na May.
8 Abalembesha nelyo ukupokako bamagazini kuti basambilila ifingi pa lwa kwa Yehova kabili na bo kuti bakwata umucinshi wa kusenda ishina lya kwa Yehova. (Rom. 10:13) Mu kupekanishisha uyu mulimo ukalamba uwa bamagazini, mukanonkelamo mu kupituluka muli ifi fipande: “Ulupungu lwa kwa Kalinda na Loleni!—Bamagazini Ba Pa Nshita Yalinga Abakwate Cine” (Ulupungu lwa kwa Kalinda ulwa January 1, 1994) “Bomfya Bamagazini Besu Bwino nga Nshi” (Ubutumikishi Bwesu Ubwa Bufumu ubwa September 1995), na “Ipekanishisheni Imipeelele Yenu mwe Bene iya Bamagazini” (Ubutumikishi Bwesu Ubwa Bufumu ubwa October 1996).
9 Baeluda Tungululeni: Ku kwaafwa bakasabankanya abengi abalebombako bupainiya umwaka wapwile, baeluda mu cilonganino cimo basalilepo Icibelushi cimo mu mweshi ngo bushiku bwaibela ubwa mulimo ku cilonganino conse. Balipekenye ukukumana pa nshita shalekanalekana mu bushiku, ukulenga bonse mu cilonganino ukukwata ishuko lya kushimikila mu nshila shalekanalekana. Ishi shasanshishemo ukushimikila mu fifulo fya makwebo, ukushimikila mu musebo, ukuya ku ng’anda ne ng’anda, ukubwelela ku bo balanshenye na bo, ukulemba bakalata, no kushimikila pali lamya. Ukwankulako kwali ukusuma nga nshi mu kuba na bakasabankanya 117 ukubombako umulimo wa mwi bala mu bushiku bumo. Bapoosele amaawala yonse 521 mu butumikishi kabili bashalike bamagazini 617, amabroshuwa, ne fitabo! Insansa sha ico Cibelushi shafikile na pa Mulungu, mu kuba ne mpendwa ikalamba nga nshi iya basangilweko pa Kulongana kwa pa Cintubwingi na pe Sambililo lya Ulupungu lwa kwa Kalinda.
10 Pa Kulongana kwa Mulimo kumo na kumo mu April na May, icilonganino cifwile ukucinkulwako inshita na kuntu ukukumana kwa mulimo wa mwi bala kukalabela mu mulungu uleisa, na kucilisha nga kuliko ukutantika ukwalundwapo pali kulya kubako lyonse. Bapainiya ba nshita yonse pamo na bakasabankanya abashili bapainiya ba kwafwilisha balekoseleshiwa ukutungilila uku kutantika kwa kukumana kwa mabumba ukulingana ne mibele yabo.
11 Kangalila wa mulimo akakabila ukukumana na munyina uupeela ififulo fya kubombelamo ku kupekanya ukubombela mu fifulo fishibombelwamo ilingi. Kuti mwacilapo ukupoosa amano ku bashisangilwe pa ng’anda na ku kushimikila mu musebo na kwi tuuka ne tuuka. Kuti mwakomaila pa lwa kushimikila icungulo bushiku. Mufwile ukukwata bamagazini balinga ku kubomfya mu mibombele yaingilishiwako.
12 Bakasabankanya Abengi Kuti Bafikapo: Sentensi wa kubalilapo pali formu wa balefwaya ukubombako bupainiya bwa kwafwilisha atila: “Pa mulandu wa kutemwa kwandi ukwa kuli Yehova no kufwaisha kwandi ukwa kwafwilisha bambi ukwishiba pa lwa wene ne mifwaile yakwe iya kutemwa, kuti natemwa ukwingilishako ukwakanamo kwandi mu mulimo wa mwi bala pa kulembwa nga painiya wa kwafwilisha.” Ukutemwa Yehova no kufwaya ukwaafwa bambi lwa ku mupashi e fikalamba ifitulenga ukuipeela. (1 Tim. 4:8, 10) Pa kufikapo ku kuba painiya wa kwafwilisha, umo afwile ukuba uwabatishiwa, uwakwata imibele isuma, uwingakumanisha ukubomba amaawala 60 mu butumikishi mu mweshi umo. Ilyo bonse ifwe tulelanguluka pa mibele yesu, bushe bamo aba ifwe abashabombako bupainiya kuti babombako uno mwaka mu April nelyo May?
13 Abengi mu cilonganino kuti basanga ifyo na bo kuti babombako bupainiya nga bamona bambi balembesha abakwata imibele yapalako ku yabo. Abana be sukulu, abakalamba, ababomba incito ya ku mubili iya kuwisha akasuba, ukusanshako baeluda na babomfi batumikila, na bambi balitunguluka muli bupainiya bwa kwafwilisha. Umukashi wa bana babili uubomba incito ya kuwisha akasuba alifikile pa maawala 60, ashalike bamagazini 108, no kutendeka amasambililo ya Baibolo yatatu mu mweshi umo uwa bupainiya bwa kwafwilisha. Bushe acitile shani? Alebomfya inshita ya kutuusha ku ncito ku kushimikila mu cifulo mupepi no ko abombela, aleshimikila ukupitila mu kulemba bakalata, aleshimikila no ko bemika bamotoka na mu musebo. Na kabili ubushiku bumo cila mulungu ilyo ashilebomba alebubomfya bwino ukupitila mu kubombela pamo ne cilonganino mu mulimo wa mwi bala. Nangu cingati pa kutendeka aletontonkanya ukuti bupainiya bwa kwafwilisha cintu ashingacita, mu kuba no kukoselesha ukufuma kuli bambi no kutantika kubomba, alicimfishe amafya.
14 Yesu alaile abasambi bakwe ukuti: “Ikoli lyandi lyalyanguka, ne cisendo candi calipepuka.” (Mat. 11:30) Uyo e wali umutwe mu cipande ca kukoselesha ica mu Ulupungu lwa kwa Kalinda ulwa August 15, 1995. Icipande cilanda pa lwa kwa nkashi uwalebomba incito ya ku mubili iya kuwisha akasuba, iya kutitikisha nga nshi. Bushe aletontonkanya ifyo te kuti abombeko bupainiya bwa kwafwilisha? Iyo. Na kuba, alibombeleko bupainiya bwa kwafwilisha cila mweshi. Mulandu nshi? Ni pa mulandu wa kuti aleyumfwa ifyo bupainiya cine cine bwalimwafwile ukushikatala. Ukwaafwa abantu ilyo balesambilila icine ca Baibolo no kubamona balealuka mu bumi ku kuleka Lesa abasenamine calemuletela sana ubuseko mu bumi bwakwe ubwapamfiwa.—Amapi. 10:22.
15 Ukuipusula kwa pa lwesu ukuli konse no kuteuluka kubapo ku kuleka umo abombeko bupainiya filalambulwa apakalamba ukupitila mu mapaalo tuipakisha. Pa lwa fyo akumenye muli bupainiya bwa kwafwilisha nkashi alembele ukuti: “Bwanengele ukukanaitontomeshapo lelo ukucilapo ukutonta pa kwaafwa bambi. . . . Ndekoselesha abengabombako ukubombako.”
16 Ukutantika Kusuma Kulakabilwa: Pe bula lya kulekelesha ilya ici ca mu kati, natulangilila na kabili inshila sha kupashanyako ishali mu Ubutumikishi Bwesu Ubwa Bufumu ubwa February 1997. Napamo inshila imo pali ishi nailinga imibele yenu. Ilyo mulepitulukamo, mulelanguluka pa mibombele yenu iya lyonse cila mweshi. Milimo nshi pa ng’anda iingabombelwapo libela ilyo mushilatendeka ukubombako bupainiya nelyo iyo mwingesabombelapo pa numa ya kucita bupainiya? Bushe inshita shimo mupoosa ku fya kusekesha, ukukokoloka nelyo fimbi ifya kulesha icitendwe kuti yafumishiwapo? Mu cifulo ca kulolesha pa maawala yonse 60 ayalekabilwa, mutantike amaawala ya kukwata cila bushiku nelyo cila mulungu. Maawala fye yabili cila bushiku nelyo 15 cila mulungu ayakabilwa ku kubombako bupainiya. Moneni pa nshila sha kupashanyako isha kutantikilamo, mubule icilembelo, no kumona ifyo mwingacita ukulosha ku kutantika kwa pa lwenu ukwa nshila ingabomba bwino kuli imwe no lupwa lwenu.
17 Ukwankulako kusuma no kuibikilishako ukwa butumikishi uko icilonganino calangishe umwaka wapwile kwacincimwishe painiya wa nshita yonse umo uwalembele ukuti: “Ndetasha sana pa kukoselesha kwenu ukwabamo kutemwa ku kuibikilishako pa kutungilila bupainiya bwa kwafwilisha. . . . Ukutantika kwenu uko mwatubulwile kwaafwile abengi abashatalabombapo bupainiya ukumona ukuti na bo kuti babombako. . . . Ndi uwa nsansa sana ukuba ulubali lwa kuteyanya kwa kwa Yehova no kukonka ukutungulula kwabamo insansa ukwa musha wa cishinka kabili uwashilimuka.”
18 Amapinda 21:5 yatulaya ukuti: “Amapange ya wacincila yatwala ku kutuntumika.” Amapinda 16:3 yatukoselesha ukuti: “Konkomwena pali Yehova imilimo yobe, e lyo yakapampamikwa amapange yobe.” Ee ukupitila mu kusansha Yehova mu kupingulapo kwesu ilyo tulepepa no kushintilila pali wene mu kukosa ukutwaafwa ukutunguluka, kuti twashininkisha ukuti tukabombako bupainiya bwa kwafwilisha. Kuti caba ifyo pa numa ya kumona ukuti ukutantika kwesu kwabomba bwino mu mweshi umo nelyo ibili ilyo tulebombako bupainiya bwa kwafwilisha, kuti twashila na pa kabokoshi pali formu wa balefwaya ukubombako bupainiya bwa kwafwilisha apatila: “Langilila pano nga wingatemwa ukubomba mu kutwalilila nga painiya wa kwafwilisha ukufikila icishibisho calundwako.” Kwena, kuti twalolela ukubombako bupainiya bwa kwafwilisha na kabili mu August, ilyo kukaba impela sha mulungu ishituntulu shisano. Ilyo tukalapwisha umwaka wa mulimo mu August, tukabombesha capamo kukuleka uuli onse abombeshe mu butumikishi.
19 Yesu asobele ukuti: “Uuntetekela, imilimo iyo ine ncita na o akacita, kabili akacite milimo iyacilapo pali iyi.” (Yoh. 14:12) Lishuko lyesu ilyawamisha ilya kuba bakabomba banankwe aba kwa Lesa ilyo ubu busesemo bulefikilishiwa apakalamba. Ino e nshita ya kushimikila imbila nsuma no mukoosha sana, ukubomfya bwino inshita pa kuti tubombeko uyu mulimo. (1 Kor. 3:9; Kol. 4:5) Ukubombako umulimo wa bupainiya bwa kwafwilisha ilingi ukulingana na po twingapesha ni nshila yawamisha iya kubombelamo umulimo wesu nga bakabila ba Bufumu. Tulelolela ukumona ifyo ulwimbo lwa malumbo lukakula ukufuma kuli bapainiya ba kwafwilisha muli iyi nshita ya Cibukisho. (Ilu. 27:6) Lintu twatontonkanya pa fyafuminemo umwaka wapwile, tulelanguluka atuti, ‘Bushe tukacicita na kabili?’ Tuli abashininkisha ukuti tukacicita!
[Akabokoshi pe bula 3]
Bushe Kuti Mwabombako Bupainiya bwa Kwafwilisha?
“Iili yonse imibele ya pa lobe, nga walibatishiwa, yaliba mu kwiminina kusuma, kuti watantika ukukumanya ififwaikwa fya kupoosa amaawala 60 pa mweshi mu butumikishi bwa mwi bala kabili wacetekele fyo kuti wabomba umweshi umo nelyo iyafulilako nga painiya wa kwafwilisha, baeluda pa cilonganino kuti basekelelo kulanguluko kwipusha kobe pali ili shuko lya mulimo.”—Abateyanishiwa ku Kupwilikisha Ubutumikishi Bwesu, ibula 114.
[Akabokoshi pe bula 6]
Ukutantika Imibombele ya Bupainiya bwa Kwafwilisha
Ifya Kumwenako fya Fintu Mwingatantika Amaawala 15 aya Mulimo wa mwi Bala Cila Mulungu
Ulucelo—Pali Cimo ukufika pa Cibelushi
Pa Mulungu kuti papyanikishiwapo no bushiku ubuli bonse
Ubushiku Inshita Amaawala
Pali Cimo Ulucelo 2 1⁄2
Pali Cibili Ulucelo 2 1⁄2
Pali Citatu Ulucelo 2 1⁄2
Pali Cine Ulucelo 2 1⁄2
Pali Cisano Ulucelo 2 1⁄2
Pa Cibelushi Ulucelo 2 1⁄2
Amaawala Yonse: 15
Inshiku Shibili Ishituntulu
Inshiku ishili shonse shibili mu mulungu kuti shasalwa
Ubushiku Inshita Amaawala
Pali Citatu Akasuba Konse 7 1⁄2
Pa Cibelushi Akasuba Konse 7 1⁄2
Amaawala Yonse: 15
Ifyungulo Bushiku Fibili ne Mpela ya Mulungu
Inshiku ishili shonse shibili mu mulungu icungulo kuti shasalwa
Ubushiku Inshita Amaawala
Pali Cimo Icungulo Bushiku 1 1⁄2
Pali Citatu Icungulo Bushiku 1 1⁄2
Pa Cibelushi Akasuba Konse 8
Pa Mulungu Ulucelo nelyo Icungulo 4
Amaawala Yonse: 15
Inshiku sha mu Mulungu Akasuba ne Cibelushi
Pa Mulungu kuti mwapyanikapo ubushiku ubuli bonse
Ubushiku Inshita Amaawala
Pali Cimo Akasuba 2
Pali Cibili Akasuba 2
Pali Citatu Akasuba 2
Pali Cine Akasuba 2
Pali Cisano Akasuba 2
Pa Cibelushi Akasuba Konse 5
Amaawala Yonse: 15
Ukutantika kwa Mulimo Ukwa pa Lwandi
Pingulenipo impendwa ya maawala ku ciputulwa cimo cimo
Ubushiku Inshita Amaawala
Pali Cimo
Pali Cibili
Pali Citatu
Pali Cine
Pali Cisano
Pa Cibelushi
Pa Mulungu
Amaawala Yonse: 15