Ukulongana kwa Muputule Ukupya

Tufwile ukutwalilila ukufwala ifya kufwala fya ku mupashi no kubakilila ubuKristu bwesu muli shino nshiku isha kulekelesha isha cino calo cabipa. (Ukus. 16:15) E ico, umutwe wa kulongana kwa muputule ukwa mwaka wa 2006 uuleti “Fwaleni Ubuntu Bupya,” naulinga icine cine.—Kol. 3:10.

Ubushiku bwa Kubalilapo: Ilyashi lya kulekanina ilya kuti “Lekeni Ubuntu Bupya Bumoneke,” likalanda pa fyo ukufwala ubuntu bupya kwingatwafwa muli fyonse. Bushe kuti twafwala shani ubuntu bupya? Ici e cikalandwapo mu malyashi yabili aya kulekelesha pa bushiku bwa kubalilapo ayakalatila “Isalapuleni pa Kuti Mule-etetula Sana pa Fyacindama” e lyo na “Amasambililo Ayalenga Umuntu Ukuba no Buntu Bupya.”

Ubushiku bwa Bubili: Ifyo ubuntu bupya bukuma imilandile yesu, e cikalandwapo mu lyashi lya kulekanina ilya bubili ilikalatila “Ukuba no Lulimi lwa ba Mano.” Umutwe wa lyashi lya cintubwingi ukatila “Bushe Mulecimfya Umubifi?” Ili lyashi likalanda sana pa bucindami bwa kwishiba bwino imicenjelo ya kwa Satana. Amalyashi yabili aya kulekelesha pa kulongana ayakatila, “Mube Ababula Akabi ku fya Pano Calo” na “Ukulalenga Cipya Cipya Ubuntu Bwesu Ubwa mu Kati Cila Bushiku,” yakatwafwa ukukanaba ne mibele e lyo ne myendele ifulwisha Lesa no kutwalilila ukupepa Yehova.

Ifyo tulefwaisha ukwisapokelela uku kukoselesha ukukatwafwa ukufwala ubuntu bupya!