Imikeni Ubuyo bwa Kutungululako Isambililo lya Baibolo
1 “Inuneni amenso yenu no kumona amabala, ukuti yabuutila ukulobolola.” (Yoh. 4:35) Aya mashiwi ayo Yesu Kristu alandile yalikuma Abena Kristu muno nshiku pantu ifi fine e fyo cili pali lelo.
2 Abafumacumi abafwaya ukusambilila ifyo Yehova afwaya bacili balesangwa. Kuti mwamwena fye ku mpendwa ipya iya masambililo ya Baibolo ayatungulwilwe mu Zambia uyu mwaka wa mulimo uwapwile, yaali 240,839, e lyo ababatishiwe na bo baali impendwa 9,349. Nga cine cine mulefwaya sana ukulatungulula isambililo lya Baibolo, finshi mwingacita?
3 Imikeni Ubuyo: Intanshi, imikeni ubuyo bwa kutendeka no kulatungulula isambililo lya Baibolo lyonse. Muleibukisha ubu buyo lyonse nga muli mu mulimo wa mwi bala. Apo umulimo wesu fwe Bena Kristu wa kusambilisha no kushimikila, ifwe bonse tufwile ukwesha apapela amaka yesu ukulabombako umulimo wa kutungulula amasambililo ya Baibolo.—Mat. 24:14; 28:19, 20.
4 Fimbi Ifyo Mulingile Ukulaibukisha: Bakasabankanya ba Bufumu fye bonse bafwile ukulapepa no mutima onse. Limo tulasanga abantu aba kuti balapepa kuli Lesa ukuti abafwe ukusanga uwingabafwa ukwishiba Baibolo. Ala lipaalo nga nshi nga ca kuti Yehova atutuma ku kufwaya abantu ba musango uyu no kutampa ukubasambilisha!—Hag. 2:7; Imil. 10:1, 2.
5 Nkashi umo alipepele ukuti alefwaya ukukwata isambililo lya Baibolo kabili abikile amatrakiti pa lwalala pa ncito apo abomba aya kuti Bushe Kuti Mwatemwa Ukwishibilapo na Fimbi Pali Baibolo? Umwanakashi umo alibuulilepo trakiti imo, abelengamo, atampa no kulemba ku numa ya trakiti apo balombela isambililo lya Baibolo, nkashi alilandile nankwe kabili ifyo fine e fyo atendeke ne sambililo lya Baibolo.
6 Bakasabankanya banensu abaishiba ifya kutendeka no kutungulula amasambililo ya Baibolo kuti batwafwa ukufikilisha ipange lyesu ilya kutungulula isambililo lya Baibolo. Mulepepa kuli Lesa ukuti alemupaala ilyo mulefwaya isambililo lya Baibolo, kabili bomfyeni inshila fye yonse iingamwafwa ukufikilisha ipange lyenu. Nakalimo na imwe kuti mwaba ne nsansa sha kulatungululako isambililo lya Baibolo.