Programu Ipya Iya Kulongana Kwaibela

Umutwe wa kulongana kwaibela mu mwaka wa mulimo uwa 2009 uletila ‘Mulebika Amano ku Mulimo Wenu . . . , pa Kuti Mukaupwishe Bwino Bwino,’ kabili ufumine pa Abena Kolose 4:17. Fwe Bena Kristu tulakonka sana uku kufunda. Ico tufwaisha kubomba umulimo wesu ne cishinka nga fintu fye Yesu na o wine abombele. (Yoh. 17:4) Umutumwa Paulo na o atushiliile ica kumwenako icishaiwamina nga nshi pa fya kubomba uyu mulimo. Alikoselepo nga nshi ukupwisha umulimo wakwe uwa kushimikila.—Imil. 20:24.

Ilyashi lya kwa kangalila wa muputule likatusambilisha ifyo bakasabankanya abalekanalekana balecimfya amafya mu mulimo. E lyo ilyashi lya kuti “Mulesakamana Ifyo Mulebyala” likatufunda ifya kwafwa bwino bwino ‘abalemenena ku bumi bwa muyayaya.’ (Imil. 13:48) Mu lyashi lyakwe ilya kubalilapo ilikalatila “Ifyo Tulanga Ukuti Tuli Babomfi ba kwa Lesa,” kalanda uukalaimininako iofeshi akalanda pa cikomo ne cikomo ica pali 2 Abena Korinti 6:1-10. Akasuba, akalanda ilyashi ilikalatila “Cindamikeni Nga Nshi Umulimo Wenu.” Nangu cikabe shani, kwena mukanonkelamo nga nshi mu malyashi ayakalati “Abanono na Bakalamba Balasanga Insansa Ilyo Balebomba Umulimo wa Bukabila,” e lyo ne lya kuti “Imisepela Abapwisha Umulimo Wabo.” Abalefwaya ukubatishiwa pa kulongana kwa muputule nangu ukulongana kwaibela balingile ukwishibisha bwangu kangalila wa kutangilila. Ilyashi na limbi ilyo tukwata pa kulongana konse ukubikako no kulongana kwa citungu, kusambilila Ulupungu lwa kwa Kalinda. Mwikasha magazini yenu iya kusambililamo mu mulungu wa kulongana kwaibela.

Ilyo tulebika amano ku kubomba umulimo twapeelwa, tulesha na maka ukushininkisha ukuti ifintu fimbi tafitupumbwile ku mulimo uo Yehova atupeela. Ukufunda konse ukwa mu Cebo ca kwa Lesa uko tukapokelela pa kulongana kwaibela kulingile ukutwafwa bonse ukwishiba ifyo tulingile ukucita pa kuti twingaba abashikatala no kubika amano ku mulimo wesu pa kuti twingaubomba bwino bwino.