Ukutemwa kwa Cine Ukwa Bena Kristu Takupwa

Ba Igor: Bonse twali mwi bumba limo line ilya ba Nte ilyabelele mwi tauni lya Tkvarcheli mu citungu ca Abkhazia. Apo icilonganino umwafumine ibumba lyesu cabelele apalepele amakilomita 85 ukufuma mu musumba wa Jvari, naleya ku Tkvarcheli mu kusenda impapulo she bumba lyesu cila mweshi. Mu 1992, ilyo ubuteko bwa Soviet Union bwapaatukene fye, icitungu ca Abkhazia calefwaya ukutendeka ukulaitungulula. Kwali inkondo pa kati ka balelwisha ubuteko na bashilika ba mu Georgia kabili iyi nkondo yalengele ifintu ukwafya sana.

Ba Gizo: Nabatishiwe ne myaka 21 ninshi kwashele umwaka umo ukuti inkondo itendeke. Ilyo inkondo yatendeke, bamunyinefwe bali no mwenso icine cine kabili tabaishibe ifyo bali no kulabila imbila nsuma. Nomba ba Igor bakacema abasuma, balitukoseleshe ilyo batile: “Iyi e nshita abantu balekabila sana aba kubasansamusha. Tukatwalilila fye ukuba abakosa mu fya kwa Lesa nga ca kuti tatulekele ukubila imbila nsuma.” Kanshi mu mucenjelo, twalitwalilile ukulakoselesha abena mupalamano ukubomfya Icebo ca kwa Lesa.

Ba Igor: Apo kwali inkondo, twalilekele ukubomfya inshila iyo twalebomfya lyonse pa kuya na pa kubwela mu kusenda impapulo ku Jvari. Nakuliile muli ici citungu, kanshi nalishibe inshila iya kupitamo mu mabala ya tii na mu mpili. Na lyo line, ukupita muli iyi nshila kwali kuibika mu kapoosa mweo pantu limo mwaleba ifipondo kabili nga twalinyantile pa tupata uto baleshiika. Apo nshalefwaya bamunyinefwe ukufwilamo, naleya fye neka ku Jvari umuku umo cila mweshi. Yehova alingafwile ukulasenda ifya kulya fya ku mupashi pa nshita iyalinga ifyaletwafwa ukutwalilila ukuba abakosa mu fya kwa Lesa.

Nangu ca kuti mu Tkvarcheli mwi tauni naleikala tamwali inkondo, tabasuminishe ukulatwalamo ifintu nelyo abantu bambi ukuyamo, kanshi twalitendeke ukulacula umulandu ne nkondo. Ilyo inshita ya mpepo yalepalamina, tatwakwete sana ifya kulya kabili twalisakamene pa fyo twali no kulaikala. Twalitemenwe sana ilyo bamunyinefwe mu Jvari baipeeleshe ukutwafwa no kutupeelako ifya kulya.

Ba Gizo: Bushiku bumo, ba Igor balitulombele nga kuti tulebomfya ing’anda yesu ukulasungilamo ifya kulya ifyo bamunyinefwe baleleta. Balefwaya ukulafumya ifya kulya ku Jvari. Twalisakamene nga ca kuti bali no kulaenda fye bwino pantu bali no kulapita sana pali bakapokola abaceeceeta imyotoka kabili nga bali no kukumanya ifipondo na bapupu pa nshila.—Yoh. 15:13.

Twalitemenwe nga nshi ilyo ba Igor babwelele pa numa ya nshiku ishinono kabili bali fye bwino sana ninshi nabesusha ne fya kulya mu motoka ifyo twali no kulya mu nshita ya mpepo yonse! Pali ilya nshita ifintu fyayafishe, twaliimwenene ukuti ukutemwa kwa cine ukwa Bena Kristu takupwa.—1 Kor. 13:8.