Bushe Mwali Kwisa Lyonse Ili?

TAPAKOKWELE ukutula apo nabatishiwilwe ilyo baeluda banjipwishe nga kuti natemwa ukubombesha mu mulimo wa kubila imbila nsuma. Pa 4 May mu 1992, naliile mu kukumana kwaibela uko bapekanishishe abaipekenye ukuya mu kubombela ukwali ukukabila. Ubushiku bwakonkelepo, ine na munyina twali no kulabomba nankwe twalikuukile ku cabu ca Batumi mu citungu ca Ajaria.

Nalyumfwile sana umwenso pa muku wa kubalilapo ilyo twaile mu kushimikila mu Batumi. Naleyipusha nati, ‘Bushe finshi mfwile ukucita pa kutendeka ukulanda na bantu?’ Nalipapile sana ilyo umwanakashi natendekelepo ukubilako imbila nsuma atile: “Bushe mwali kwisa lyonse ili?” Alitemenwe sana kabili alefwaya ukwishibilapo na fimbi ica kuti ubushiku bwakonkelepo twalitendeke ukumusambilisha Baibolo.

Ilyo tatulaya ku Batumi, balitupeele ama adresi ya balefwaya ukusambilila Baibolo kuli iyi ncende. Apo tatwaishibe bwino uyu musumba, twaleipusha abo twalekumanya mu musebo ukutulanga uko tulefwaya ukuya. Abengi balefilwa ukutulanga pantu tapakokwele apo bayalwilile amashina ya misebo muli uyu musumba, lelo aba bantu baletemwa ifyo twalebebako pali Baibolo. Tapapitile ne nshita, twaletungulula amasambililo ya Baibolo ayalekwata abantu 10 ukufika ku 15 mwi bumba limo.

Ilyo papitile fye imyeshi 4 ukutula apo twailile kuli uyu musumba, abantu ukucila pali 40 balitendeke ukulalongana lyonse. E ico twayipwishe atuti, ‘Ni bani bakalasakamana aba abatendeke ukulongana?’ Kwali ifimfulunganya pa kati ka bashilika ba mu Georgia na balelwisha ubuteko mu citungu ca Abkhazia, ne ci calengele bonse abo twalelongana nabo ku cilonganino twafumine ukukuukila uko twalebombela ku Batumi. Icilonganino icipya icakwete baeluda na bapainiya calipangilwe mu bushiku fye bumo!