Bushe Baibolo Kuti Yangafwa Nga Nalilwala Amasakamika?

Ifyo Baibolo yasuka ici cipusho

Ee, pantu uwingatwafwa bwino sana ilyo tuli na masakamika ni “Lesa, Uusansamusha no kukoselesha kabili uulenga abantu ukuba ne nsansa kabili uulenga abasakamikwa ukusekelela.”​—2 Abena Korinti 7:​6, ukulingana na Baibolo ya The Amplified Bible.

Ifyo Lesa afwa abalwala amasakamika

• Amaka. Lesa tapwisha amafya mukwata pa kutila fye mube ne nsansa, lelo alasuka amapepo yenu pa ku kupeela amaka ya kushipikisha. (Abena Filipi 4:13) Tamufwile ukutwishika ukuti Lesa te kuti asuke amapepo yenu, pantu Baibolo itila: “Yehova ali mupepi ku baba ne mitima ya bulanda; kabili apususha abasakamikwa imitima.” (Amalumbo 34:18) Na kuba Lesa kuti aumfwa amapepo yenu ilyo mulemulomba, nangu ca kuti mwafilwa ukumweba bwino bwino ifyo muleyumfwa.​—Abena Roma 8:​26, 27.

• Ifya kumwenako fisuma. Umuntu umo uwalembeleko Baibolo apepele kuli Lesa ati: ‘Nakuuta kuli imwe mwe Yehova ilyo ndi umwashika.” Uyu kalemba wa Baibolo uwali no bulanda nga nshi, alisansamushiwe ilyo aibukishe ukuti Lesa alatwelela imembu. Lelo aebele Lesa ukuti: “Imembu nga e sho mulolekesha, mwe Jah, Mwe Yehova, nani uwingeminina? Pantu kuli imwe kwaba ukwelela kwa cine, Pa kuti abantu bamubele akatiina.”​—Amalumbo 130:​1, 3, 4.

• Isubilo. Lesa alatusansamusha kabili alitulaya ukuti akafumyapo amafya yonse ayalenga abantu ukusakamikwa. Ilyo akafikilisha ubu bulayo, “ifya kale [ukubikako no kusakamikwa] fikalabwa, kabili tafyakese na mu mutima.”​—Esaya 65:17.

Icishibisho: Nangu ca kutila Inte sha kwa Yehova balishiba ukuti Lesa kuti abafwa nga na balwala amasakamika, nga balwa balaya ku cipatala. (Marko 2:17) Fwe Nte sha kwa Yehova tatweba abantu umuti uo bafwile ukubomfya; lelo cila muntu afwile ukusalapo ifyo alefwaya ukuti bamundape.