Mulandu Nshi Tufwila?
“Pa muulu wa tupili ponse nomba patalala, pa tuntongolilo twa miti yonse tauleumfwapo icilepeema; utuuni natulaala ku miti: lolela; mu kwangufyanya nobe uli no kutuusha ngo tu twine.”—AMASHIWI YA KWA JOHANN WOLFGANG VON GOETHE, KEMBA WA MISHIKAKULO UMWINA GERMANY.
1, 2. (a) Bushe abantunse bapangilwe no kufwaisha kwa musango nshi? (b) Musango nshi uwa bumi abantunse babili aba kubalilapo baipakishe?
LESA apangile abantunse no kufulukisha ukwikala kuli pe na pe. Na kuba Baibolo itila abikile “mu mitima yabo amano ya kufwaya iciyayaya.” (Lukala Milandu 3:11, Beck) Lelo Lesa tapelele fye pa kupeela abantunse ukufwaisha kwa kwikala abomi kuli pe na pe. Abapeele ne shuko lya kuti kuti baikala kuli pe na pe.
2 Abafyashi besu aba kubalilapo, Adamu na Efa, babumbilwe abapwililika, ababula akalema mu muntontonkanya na mu mubili. (Amalango 32:4) Elenganyeni—ukwikala ukwabula ukukalipwa kwa mutatakuya, tabaali na mwenso wa kubombomanika nelyo amasakamika! Na kabili, Lesa ababikile mu mushi wayemba uwa paradise. Lesa afwaile ukuti umuntu akekale kuli pe na pe no kuti mu kupita kwa nshita isonde likesulemo ubufyashi bwapwililika. (Ukutendeka 1:31; 2:15) Inga kanshi mulandu nshi tufwila?
Bucintomfwa Bwalete Mfwa
3. Bushe ni pi pashintilile ubumi bwa ciyayaya kuli Adamu na Efa?
3 Lesa akambishe Adamu ati: “Umuti onse wa mwi bala, ukulya ulelyako: lelo umuti wa kulengo kwishibo busuma no bubi te kuti ulyeko: pantu mu bushiku walyako ukufwa ukafwa.” (Ukutendeka 2:16, 17) Kanshi ubumi bwa ciyayaya ubwa kwa Adamu na Efa bwalikwete ifyalefwaikwa; bwashintilile pa cumfwila kuli Lesa.
4. Lintu Adamu na Efa babembwike, mulandu nshi balufiishe icilolelo ca kwikala kuli pe na pe mu Paradise?
4 Ku ca bulanda, nangu cibe fyo, Adamu na Efa balipulile ifunde lya kwa Lesa. (Ukutendeka 3:1-6) Pa kukaanaumfwila, basangwike ababembu, pantu “ulubembu bupulumushi.” (1 Yohane 3:4) Pali uyo mulandu Adamu na Efa tabakwete na kabili ifilolelo fya bumi bwa ciyayaya. Mulandu nshi? Pantu “icilambu ca lubembu ni mfwa.” (Abena Roma 6:23) E co, lintu Lesa alepingula Adamu na Efa, atile: “Uli lukungu, kabili ku lukungu e ko ukabwelela.” Abafyashi besu aba kubalilapo lyene balitamfiwe mu mushi wabo uwa Paradise. Pa bushiku bwine Adamu na Efa babembwike, baingile mu nshila ya kuya panono panono ku mfwa kabili ukukanabwelele numa.—Ukutendeka 3:19, 23, 24.
“Imfwa Yayambukile ku Bantu Bonse”
5. Ni shani fintu imfwa yasalanganine ku bantu bonse?
5 Ulubembu nomba lwalipampamikwe pa mfyalo sha kwa Adamu na Efa. E co, tabaali na kufyala abana bapwililika iyo, nga fintu fye ne cikombola catundama cishingafumya icipe catambalala. (Yobo 14:4) Cine cine, ukufyalwa kwa muntu ukuli konse kushinina fye ukuti abafyashi besu aba kubalilapo balilufishe ubumi bwapwililika no bumi bwa ciyayaya ubwabo abene no bwa bana babo. Umutumwa wa Bwina Kristu Paulo alembele ati: “Filya ulubembu lwaingilile mu muntu umo pano isonde, ne mfwa yaingilile mu lubembu; e fyo ne mfwa yayambukile ku bantu bonse, pantu bonse balibembwike.”—Abena Roma 5:12; linganyeniko Ilumbo 51:5.
6. Mulandu nshi tufwila?
6 Ilelo basayantisti tabaishiba umulandu wine wine untu abantunse bakotela no kufwa. Nangu cibe fyo, Baibolo ilondololo kuti ico tufwila ni pa mulandu wa kuti twafyalwa ababembu, ukupyana iyi mibele ukufuma ku bafyashi besu abantunse ba kubalilapo. Lelo bushe cinshi cicitika nga twafwa?