Kuti Mwaikala Umuyayaya pe Sonde

ILI LISUBILO ILISUMA SANA! Kabumba wesu alitulaya ukuti akatupeela umweo wa muyayaya pano pene pe sonde. Na lyo line, abengi bamona kwati ifi te kuti ficitike. Balanda ukuti ‘bonse fye tukafwa. Umuntu fye uuli onse nga afyalwa, ninshi akafwa.’ Bambi nabo batila kuti baikala umuyayaya, lelo te kuti bekale umuyayaya pe sonde. Balanda ukutila, kuti waba fye no mweo wa muyayaya nga ca kuti wafwa no kuya ku muulu. Bushe mwaishibapo shani?

Ilyo mushilayasuka ici icipusho, moneni ifyo Baibolo yayasuka aya amepusho yatatu: Bushe ifyo umuntu apangwa filanga ukuti afwile ukwikala imyaka inga? Bushe Lesa alefwaya ukuti sonde libe shani kabili alefwaya abantu baleikala shani? Bushe imfwa yaishilebako shani?

IFYO UMUNTU APANGWA

Pa fibumbwa fyonse ifyo Lesa abumba pa calo, umuntu aliibela. Aibela shani? Baibolo ilanda ukuti umuntu fye e wapangwa mu “cipasho” ca kwa Lesa. (Ukutendeka 1:26, 27) Bushe aya mashiwi yalola mwi? Yalola mu kuti, umuntu alikwata imibele iyo Lesa akwata, pamo nga ukutemwa no mulinganya.

Na kabili, umuntu alikwata amano, alatontonkanya, aleshiba icisuma ne cibi kabili e wingaba fye cibusa wa kwa Lesa. E mulandu wine tutashisha nga twamona ifyo Lesa apanga bwino ifya mu muulu ne fya pe sonde, nga twamona ifyo abantu bapanga no kulenga, nelyo twaumfwa inyimbo e lyo na mashiwi ayasuma. Na kabili, abantu e bengapepa fye Kabumba. Ifi twalandapo fyonse filangilila fye ifyo abantu bapusana ne fibumbwa fimbi ifya pano isonde.

Tontonkanyeni pali ici: Cinshi Lesa apangiile abantu mu nshila ya kuti baletwalilila fye ukwishibilako ifintu no kubelako ne mibele iisuma nga ca kuti alefwaya baleikala fye imyaka iinono? Icalengele Lesa apange abantu muli iyi nshila, ni co alefwaya baleba ne nsansa ilyo baleikala umuyayaya pe sonde.

IFYO LESA ALEFWAYA ISONDE UKUBA NE FYO ALEFWAYA ABANTU UKULAIKALA

Bamo balanda ukuti Lesa talefwaya abantu baleikala umuyayaya pe sonde. Batila Lesa apangile isonde ukuti abantu baleikalapo fye inshita inono pa kuti alemona abalingile ukuyaikala umuyayaya ku muulu. Nga ca kuti ifi balanda fya cine, ninshi Lesa e walenga ukuti pe sonde pabe ifyabipa. Nomba ifi te fyo aba. Baibolo ilanda pali Lesa ukuti: ‘taaba na lufyengo; Alilungama kabili alitambalala.’—Amalango 32:4.

Baibolo yalilanda pa co Lesa apangiile isonde ukuti: “Imyulu yena, myulu ya kwa Yehova, lelo icalo apeela ku bana ba bantu.” (Amalumbo 115:16) Lesa apangile isonde ukuti lilemoneka bwino, no kuti abantu baleikalamo, kabili alibikilemo na fyonse ifyo tukabila pa kuti tuleikala bwino no kuba ne nsansa.—Ukutendeka 2:8, 9.

“Imyulu yena, myulu ya kwa Yehova, Lelo icalo apeela ku bana ba bantu.”—Amalumbo 115:16.

Baibolo na kabili yalilanda pa co Lesa abumbiile abantu. Aebele abantu ba kubalilapo ukuti “fuleni, kumaneni pe sonde no kulimapo, kabili muleteka . . . fyonse ifya mweo ifikulika pe sonde.” (Ukutendeka 1:28) Uyu umulimo abapeele uwa kuteka ifya mweo no kulenga isonde lyonse ukuba Paradaise wali uwacindama. Adamu na Efa e lyo na bana abo bali no kukwata, bali no kulaikala umuyayaya pe sonde, te ku muulu iyo.

CINSHI TUFWILA?

Nomba cinshi tufwila? Baibolo ilanda ukuti, icibumbwa ca mupashi cimo, ico batendeke ukwita ukuti Satana Kaseebanya, tacalefwaya ukuti ifyo Lesa afwaya filecitika. Acitile shani ifi?

Ilyo Satana apondweke, alilengele na bafyashi besu aba kubalilapo, Adamu na Efa, bapondokela Lesa. Ilyo Satana abebele ukuti Lesa talefwaya ukuti baleisalilapo ukucita ifisuma ne fibi, basalilepo ukuba ku lubali lwa kwa Satana. Cinshi cacitike ilyo bapondokeele Lesa? Mu kupita kwa nshita, balifwile nga fintu Lesa abebele. Na kabili tabali no kulaikala umuyayaya mu Paradaise pe sonde.—Ukutendeka 2:17; 3:1-6; 5:5.

Ifyo Adamu na Efa bacitile fyalilenga abantu bonse ukuculilamo. Icebo ca kwa Lesa citila: “Ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse.” (Abena Roma 5:12) Kanshi Lesa talefwaya ukuti tulefwa, lelo icilenga tulefwa ni co twalipyana ulubembu ne mfwa ku bafyashi besu aba kubalilapo.

KUTI MWAIKALA UMUYAYAYA PE SONDE

Filya Adamu na Efa bapondokeele Lesa mu Edeni tafyalengele Lesa aluule ifyo alefwaya abantu baleikala ne fyo alefwaya isonde ukuba. Apo Lesa alitutemwa kabili aliba no mulinganya, aliteyenye inshila ya kutulubwilamo ku citiipu ca lubembu ne mfwa. Umutumwa Paulo alembele ukuti: “Icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.” (Abena Roma 6:23) Ukutemwa Lesa atemwa abantu kwalengele “apeele Umwana wakwe uwafyalwa eka [Yesu Kristu], ukuti onse uumutetekela ekonaika lelo akabe no mweo wa muyayaya.” (Yohane 3:16) Filya Yesu atufwilile fikalenga tukakwate fyonse ifyo Adamu alufishe ilyo abembwike.a

Nomba line fye ubulayo bwa kwa Lesa ubwa kuti isonde likabe paradaise buli no kufikilishiwa. Kuti mwaisaikala umuyayaya mu paradaise nga mulekonka amashiwi Yesu alandile ayatila: “Ingilileni pa mpongolo iyacepa; pantu umusebo uwaya ku bonaushi walipabuka kabili ukalamba, kabili bengi abapitamo; lelo impongolo iyacepa, no musebo uwaya ku bumi walicepa nga nshi kabili banono abausanga.” (Mateo 7:13, 14) Ifyo musalapo ukucita e fikalenga mukekale umuyayaya nelyo iyo. Kanshi finshi mulingile ukucita?