Imikalile ya Mutelelwe ku Ciyayaya

NGA mwaumfwa umubili ukukaba, mulanwo muti pa kuti umutwe uleke ubukali nalimo no kubomfya amenshi makasa ku kutalalikako umubili. Lelo nangu cingati umuti na menshi makasa filacefyanyako ifishibilo fya bulwele, tafimulenga ukwishiba icilengele umubili ukukaba. Kabili nga namulwalisha, mukabila ukundapwa kuli dokota uwaishiba.

Abantunse balilwala ubulwele bwa kubulwo mutelelwe. Kwena, tulacitapo fimo ifinganashako ubukali bwa fishibilo fya bulwele pa nshita inono, lelo uwingondapa ubulwele muntu uwaishiba bwino icilengele. Kabili takwaba uwaishiba bwino abantunse kano fye Kabumba wesu, Yehova Lesa. Alishibo kuti imikalile yesu tayaba no mutelelwe pa mulandu wa mafya ya kutuletelela.

Intendekelo ya Mutelelwe Iyaonawilwe

Icebo ca kwa Lesa cilondolola ukuti Yehova apangile abantu ba kubalilapo babili abapwililika no kubabika mu ncende ya mutelelwe. Tapali icalebasakamika. Lesa alefwaya abantunse ukwikala muli paradise ku ciyayaya mu mutelelwe wa cine cine. Mu bwikalo bwa kubalilapo mwali “umuti onse uo bengatemwo kumona kabili uwawama ku kulya.” Moneni ukuti balipeelwe fyonse fintu balekabila lwa ku mubili na mu nkuntu, pantu incende yalondolwele nge yo “bengatemwo kumona.” Ici nangu cibe shani calolele mu kuti abantu ba kubalilapo babili babikilwe mu ncende yabalengele ukumfwo kuti bali mu mikalile ya mutelelwe, iyabulamo amasakamika.—Ukutendeka 2:9.

Adamu na Efa balikeene ukuteka kwa kutemwa ukwa kwa Lesa, e co bailetele abene ukutwishika, ukumfwo mwenso, insoni, aba mulandu, no kubulwo mutelelwe. Ilyo Adamu akeene Lesa, alisumine ukuti ‘alitiinine.’ Abantunse ba kubalilapo bafwele amabula no kusokama pa kuti bemoneka ku cinso ca kwa Kabumba wabo uwa kutemwa, untu kale bali nankwe bucibusa bwapalamisha kabili ubwa kunonsha.—Ukutendeka 3:1-5, 8-10.

Imifwaile ya kubalilapo iya kwa Yehova tayaaluka. Baibolo isoso kuti Kabumba wesu ni Lesa wa kutemwa, uukalenga abantunse ba cumfwila ukubwesha isonde kuli paradise no kwikalamo mu mutelelwe umuyayaya. Ukupitila muli kasesema Esaya, alayo kuti: ‘Ndelenge myulu ipya, ne calo cipya! . . . sekeleleni no kwanga pe pe.’ (Esaya 65:17, 18) Umutumwa Petro asosele pa lwa myulu ipya ne calo cipya ukuti: “Mwaikalo bulungami.”—2 Petro 3:13.

Fikabako shani? Ukupitila mu buteko bwa kwa Yehova. Ubu e Bufumu Yesu Kristu aebele abakonshi bakwe ukupepela ati: “Shifwe wa mu muulu, ishina lyenu libelwe akatiina. Ubufumu bwenu bwise. Ukufwaya kwenu kucitwe pano nse nga mu muulu.”—Mateo 6:9, 10.

Ubufumu bwa kwa Lesa bukonaula imitekele ya bantunse na mu kutemwa ukuleta imifwaile ya kwa Lesa mwi sonde lyonse. (Daniele 2:44) Takwakabe ukutwishika, umwenso, insoni, ukumfwa uwa mulandu, no kubulwo umutelelwe ifyacusha abantunse ukutula pali Adamu. Ukulingana na Baibolo, ubu Bufumu buli mupepi. Ne lelo, abafuluka Ubufumu bwa kwa Lesa balasanga umutelelwe muli cino calo cabulwamo umutelelwe.

Cindamikeni Ifya ku Mupashi Intanshi

Davidi ali mubomfi wa kwa Lesa uwaishibe fintu cumfwika ukuba no mwenso no kuba mu bwafya. Lelo nga fintu calembwa pa Ilumbo 4:8 Davidi atile: “Ndesendamo mutende, na kabili ndelaalo tulo; pantu imwe, mwe Yehova, nelyo ndi neka munengo kwikalo mutelelwe.” Yehova alengele Davidi ukwikalo mutelelwe nangu cingati Davidi inshita shimo aleba na mafya. Bushe kuti twasambililako fimo kuli Davidi? Kuti twakwatako shani umutelelwe nangu twaikala mu calo umwabulo mutelelwe?

Moneni icalembwa ca mu Ukutendeka pa lwa kwa Adamu na Efa. Ni lilali balekele ukumfwa umutelelwe? Ni lintu fye bakeene bucibusa na Kabumba no kukaana ukwikala ukulingana ne mifwaile akwatila abantunse. E co nga tatukeene ubu bucibusa nga fintu bacitile, ne lelo kuti twaikala mu mutelelwe nga nshi ukupitila mu kuba na bucibusa bwapalamisha na Yehova no kwesha ukwikala ukulingana no kufwaya kwakwe.

Ukwishiba Yehova ukupitila mu kusambilila Baibolo kuti kwatwaafwa ukumfwikisha imifwaile ya bumi. E lyeka fye twingomfwikisha fintu twaba nga bantunse no mulandu twabela pa calo. Kuti twaikala mu mutelelwe nga twatemwa Lesa, ukwishiba imifwaile akwatila abantunse, no kumfwikisha fintu twabimbwamo. E fyo Paul asangile imyaka iingi iyapitapo.

Paul afyalilwe no kukushiwa pali cimo ica fishi fyaba lwa mupepi na Germany. Pa mulandu wa fintu abafyashi bakwe bapitilemo mu Nkondo ya Calo iya Cibili, ulupwa lwakwe talwapooseleko amano ku fya mapepo. Paul alanda fintu aali ku bulumendo ati: “Tapali fintu nasuminemo kabili nshacindike abantu. Nalekolwa sana imiku ibili nelyo itatu cila mulungu pa kuti ndabeko amafya nakwete. Nshaleikala umutende.”

Lyene Paul alilanshenye ne Nte ya kwa Yehova. Paul alecite fikansa sana, lelo icasosele Nte camulengele ukutontonkanyapo. Nte atile: “Takwaba icintu icaiishilako fye icine.” Mu mashiwi yambi, fyonse ifyo tumona mu bubumbo fyapangilwe na Kabumba.

Paul atile: “Nalitontonkenyepo imiku ne miku.” E co Paul atendeke ukusambilila Baibolo ne Nte sha kwa Yehova kabili aishibe Yehova. Asumino kuti: “Nga kufumyako abafyashi bandi, ni Yehova eka e wabalilepo ukungaafwa mu mikalile yandi.” Paul abatishiwe nge Nte mu 1977 kabili atila: “Nomba nalishibe cine cine imifwaile ya bumi. Ndaipakisha ukwikala ukulingana no kufwaya kwa kwa Yehova. Ndekala mu mutelelwe pantu tapali icingancitikila no lupwa lwandi ico Yehova ashingapikulula ku ntanshi.”

Kuti twasambililako finshi kuli ci ica kukumanya? Paul ayanshishe ubwafya bwabipisha ubwa mu nkuntu ubwa kubulwo mutelelwe pa kupoosa amano ku fya ku mupashi, lelo te pa fyuma. Alundulwile bucibusa bwapalamisha na Kabumba. E bucibusa amamilioni ya Nte sha kwa Yehova baipakisha na Kabumba. Bubapeela ubukose ububaafwa ukuipusula lintu balebomba na bantu bambi. Inte sha kwa Yehova shibomfya inshita ya shiko ukutandalila abantu ku kubaafwa ukwikala mu mutelelwe wa cine cine pa kupoosa amano ku fya ku mupashi. Lelo Inte tashishimikila fye.

“Pepa Kuli Lesa obe, Yehova”

Lintu umumana wa Oder mu July 1997 wabunshishe incende ikalamba iya ku kapinda ka ku kuso aka ku Bulaya, Inte sha kwa Yehova ku Germany shalyumfwile ubusanso bwaponene aba ku calo ca mupepi ica Poland. Bali no kucitapo cinshi? Inte sha mu musumba wa Berlin ne sha kumbi shalilangishe bukapekape bushaiwamina pa kusangwilako ukucila pa madola 116,000 mu nshiku fye ishinono.

Inte shaishiba ukukuula amayanda shalimine pa lwa shiko ubulendo muli bamotoka ubwa maawala 6 ukufuma ku Berlin no kuya ku citungu cabela ku Wrocław, mu Poland. Mwi tauni ilinono, amayanda ayengi yalyonawilwe cibi. Ing’anda ya lupwa lwa Nte yalibunshiwe ukucila pa mamita 6. Umwana mwanakashi alepanga ukupwa umweshi wakonkelepo no kwikala muli ilya ine ng’anda no mulume. Finshi fyali no kucitwa ku kwaafwa ulupwa ukuwamya ing’anda, no kwaafwilisha ulupwa ulo mupepi ne fipe fyonse fyaonaike?

Ilyo ilyeshi lyapwile, umwina mupalamano amupumishe ati: “Pepa kuli Lesa obe, Yehova, tumone nga kuti akwaafwa.” Fintu umwina mupalamano apapushiwe lintu bamotoka abengi ukufuma ku Germany baishile pa ng’anda ya lupwa lwa Nte! Muli bamotoka mwafumine abashaishibikwe abatendeke ukuwamya ing’anda. Umwina mupalamano aipwishe ati: “Ni bani aba? Ni bani bashitile ifya kuwamisha?” Ulupwa lwa Nte lwalondolwele ukuti baali ni bamunyina ba ku mupashi kabili aba beni e bashitile ne fya kuwamisha. Abekashi ba mwi tauni balepapa fye ilyo balewamya ing’anda. No bwinga bwaliko pa bushiku batantike.

Ulu lupwa lwasangile ukuti ukuba muli bumunyina bwa Nte sha kwa Yehova ubwa mwi sonde bulalenga ukumwenamo lwa ku mupashi no kukwato mutelelwe muli ici calo cabulo mutelelwe. Te beka bayafwilishe. Mu ncende yonse iyabundile, balibawamishe amayanda na Mayanda ya Bufumu. Baliwemye na mayanda ya bashili Nte, kabili balitashishe nga nshi.

Ubulungami, Ukuba Tondolo no Mutelelwe

Fintu tutasha dokota lintu umubili waleko kukaba kabili twatendeka ukumfwa bwino! Fintu tukatasha Kabumba wesu lintu Ubufumu bwa kwa Lesa bukafumyapo ubwafya bwa bantunse ubwa kubulwo mutelelwe! Cine cine, e watulaya imikalile ya mu “bulungami, ukuba tondolo no [mutelelwe, NW] umuyayaya.” Fintu ubo bulayo bwawama!—Esaya 32:17.

[Amashiwi pe bula 10]

Kuti twayansho bwafya bwabipisha ubwa mu nkuntu ubwa kubulwo mutelelwe pa kupoosa amano ku fya ku mupashi, lelo te pa fyuma

[Icikope pe bula 8, 9]

Lesa alilaya icalo cipya umo abantunse bakekala umutelelwe umuyayaya