IFIPANDE IFIKALAMBA | BUSHE SATANA EKO ABA?
Bushe Tulingile Ukulatiina Satana?
Carbon monoxide taimoneka kabili yalibipa, ifi fine e fyo na Satana aba
Umwela wa carbon monoxide taumoneka kabili taununka. Abantu tabeshiba no kwishiba ukuti balepeema carbon monoxide. Nalimo abantu ukucila hafu abafwa kuli sumu mu calo conse bafwa kuli uyu wine mwela. Nomba ici tacilingile ukututiinya iyo. Kwaliba ifingafwa abantu ukwishiba ukuti mu mwela muli carbon monoxide kabili kuti baicingilila. Abantu abengi balabika ifya kubafwa ukwishiba ukuti umo bali muli carbon monoxide kabili nga baishiba, balacitapo cimo.
Satana na o kuti twamupashanya ku mwela wa carbon monoxide. Tamoneka, abantu tacibangukila ukwishiba ukuti alebalufya, kabili mubi icine cine. Lelo Lesa alitubikilako ifya kutwafwa. Nga tulekonka ifi Lesa atubikilako, ninshi tatwakaletiina Satana.
Amaka ya kuisalila. Pali Yakobo 4:7 patila: “Kaaneni Satana Kaseebanya, na o akafulumuka kuli imwe.” Nangu ca kuti Satana alikwata amaka, te kuti amupatikishe ukucita ifyo mushilefwaya. Ni mwe mufwile ukusalapo. Pali 1 Petro 5:9 patila: “Mukaanyeni [Satana], beni abakosa ndi mu citetekelo.” Ibukisheni ukuti ilyo Yesu akeene amatunko yatatu, Satana alimushile. (Mateo 4:11) Na imwe bene, kuti mwakaana amatunko ya kwa Satana.
Bucibusa na Lesa. Pali Yakobo 4:8, Baibolo itukoselesha ukuti: “Palameni kuli Lesa.” Yehova umwine e ufwaya ukuti mube ifibusa fyakwe. Finshi mufwile ukucita pa kuti mube cibusa wa kwa Lesa? Ico mufwile ukucita kutendeka ukusambilila sana pali ena mu Baibolo. (Yohane 17:3) Ifyo mukalasambilila pali Yehova fikalenga ukuti mukamutemwe, kabili uko kutemwa kukalenga mukalecita ukufwaya kwakwe. (1 Yohane 5:3) Bushe Shinwe wa mu muulu akacita shani nga mwamupalama? Yakobo atwalilila ukuti, “[Lesa] akapalama kuli imwe.”
Yehova alibikako ifingalenga mwacingililwa
Ubulayo bwa kumucingilila. Pa Amapinda 18:10 patila: “Ishina Yehova lupungu ulwakosa. E mo umulungami abutukila no kucingililwa.” Ici tacilepilibula ukuti ishina lya kwa Lesa cipuuta. Lelo, cilepilibula ukuti abacindika ishina lya kwa Lesa kuti balilila kuli ena no kucingililwa pa nshita iili yonse.
Ica kumwenako icisuma. Pa Imilimo 19:19 paliba ilyashi ilisuma ililanda pa basangwike Abena Kristu abaleikala mu Efese, patila: “Abengi abalecita ifinjelengwe balonganike amabuuku yabo no kuyoca pa menso ya bonse. Kabili bapendele umutengo wa yako, basanga ukuti yalingene ne ndalama sha silfere 50,000.”a Balya Bena Kristu balyonawile fyonse ifyo balebomfya pa kupupa imipashi, te mulandu no mutengo wa fiko. Ici ca kumwenako kuti catwafwa nga nshi. Cino calo calyobelwa no kupupa imipashi. Nangu fye fintu ifyo babomfya pa kupupa imipashi ifimoneka kwati tafyabipa, na fyo kuti fyalenga twalatungululwa ne mipashi. Calicindama ukupoosa ifintu fya musango yu, nangu fibe ifya mutengo.—Amalango 18:10-12.
Ba Rogelio, abo tulandilepo mu cipande ca kubalilapo, tabasumine ukuti Satana e ko aba ukutula fye na ku bwaice mpaka bafisha ne myaka 50. Lelo, balishilealuka. Mulandu nshi? Bebukisha ukuti: “Uyu e muku wa kubalilapo nashitile Baibolo. Ifyo nasambilile muli Baibolo fyalengele nshininkishe ukuti Satana eko aba. Filya fine nasambilile filancingilila na ino nshita pa kuti Satana tambeleleke.”
“Ifyo nasambilile muli Baibolo fyalengele nshininkishe ukuti Satana eko aba. Filya fine nasambilile filancingilila na pali ino nshita pa kuti Satana”
Bushe te kuti mutemwe ukwikala mu calo pa nshita ilyo Satana ashakabeko? Na imwe bene kuti mwaisaikalamo. Baibolo yalisobela inshita ilyo Satana, uulufya abantu abengi, ‘bakamupoosa muli bemba wa mulilo umwaba na mabwe ya mingu.’ (Ukusokolola 20:10) Kwena, umulilo na mabwe ya mingu te kuti yoce icibumbwa icishimoneka. Kanshi bemba wa mulilo emininako ukonaulwa umuyayaya. Satana bakamonaula umuyayaya. Ala abantu abatemwa Lesa bakasansamuka nga nshi!
Lelo pali ino nshita, mufwile ukutwalilila ukusambilila pali Yehova ne fyo afwaya.b Elenganyeni ukuti eko muli ilyo “Satana ashakabeko!”
a Nga ca kuti ishi ndalama sha silfere shali ma denari ya bena Roma, ninshi kuti shalingana ne ndalama shalefola abantu 50,000 pa bushiku bumo, kanshi shali ni ndalama ishingi nga nshi!
b Nga mulefwaya ukwishibilapo na fimbi pali Satana na pa kupupa imipashi, belengeni icipandwa 10 mu citabo citila Bushe Cinshi Baibolo Isambilisha? Kuti mwapoka ici citabo ku Nte sha kwa Yehova.