Samweni Muli Yehova no Kwanga
LYONSE lintu umulimo umo uwacindama wabombelwapo bwino no kupwishishiwa, kulaba ukusamwa. Programu wa kupwisha isukulu uwaliko pa March 13, 1999, pa Watchtower Educational Center ku Patterson, New York kali kashita ka kusamwa ku bana be sukulu 48 aba mwi kalasi lyalenga 106 ilya Watchtower Bible School of Gilead.
Ukulandapo kwa kwiswila na Munyina Theodore Jaracz, uwa mwi Bumba Litungulula, uwapwile isukulu mwi kalasi lyalenga 7, kabili uwali ceyamani wa programu wa kupwisha isukulu, akomaile pa mashiwi ya pa Amalumbo 32:11 aya kuti: “Samweni muli Yehova, no kwanga, mwe balungama.” Pa kulanda umulandu calingile ukuti bonse abasangilweko basamwe, atile: “Ni pa mulandu wa fyo Yehova alebomfya abalungama, ukusanshako abasambi ba mwi kalasi lyalenga 106 ilya Gileadi, e mulandu tufwile ukusaminwa pali kano kashita.” Ca cine ukuti abasambi balipekenye pa kuti bengasangwa kwi Sukulu lya Gileadi kabili balipilikite no mukoosha pa kuti bengafikapo ukuba bamishonari, lelo ni Yehova e walengele ukuti fyonse fipwishishiwe bwino bwino. (Amapinda 21:5; 27:1) Munyina Jaracz akomailepo ukuti, e mulandu wine tufwile ‘ukusaminwa muli Yehova.’
Pa basangilweko ku Patterson pali balupwa capamo na beni abo abasambi balaalike ukufuma ku fyalo 12 ku kwisaimwena aka kashita ka kusamwa. Ukusamwa kwalimonekeshe ilyo abasangilweko 5,198 balelolela ukuti programu atendeke, ukusanshako no lupwa lwa Bethel ulwa ku Brooklyn, ku Patterson, na ku Wallkill, abaletambila pali vidio no kukutika kuli programu.
Bakonkomeshiwa Ukulasamwa Lyonse
Ilyo Munyina Jaracz apwile ukulandapo kwa kwiswila, aitile kalanda wa kubalilapo pali basano abapekenye ukukonkomesha kwa kukoselesha ukwa mu Malembo ku balepwishe Sukulu lya Gileadi na kuli bonse abasangilweko.
Uwabalilepo ukulanda ni Munyina William Malenfant, uwapwile isukulu mwi kalasi lyalenga 34 ilya Gileadi, ino nshita ni kaafwa muli Komiti wa Kusambilisha uwe Bumba Litungulula. Apo ilyashi lyakwe lyaleti: “‘Conse Cine’ Te Mupu!” ilyashimpilwe pali Lukala Milandu 1:2, aipwishe ukuti: “Bushe Solomone aloseshe mu kuti ifintu fyonse fye, cine cine mupu?” Ayaswike ukuti: “Awe. Solomone aloseshe mu kuti fyonse ifyo abantunse babombela mu kusuula Lesa, imilimo yonse iyapusana ne fyo Lesa afwaya—fyonse mupu.” Fyalipusana no kubombela Lesa wa cine, Yehova, ukusambilila Icebo cakwe, Baibolo, no kusambilishako bambi. Ukucite fi fyonse te mupu. Lesa takalabe imilimo ya musango yo iya babomfi bakwe. (AbaHebere 6:10) Na kuba, nelyo twaponenwa na kayofi, umweo wa babile ba kwa Lesa “ukabo wafungilwa mu mfunga ya mweo pamo na Yehova.” (1 Samwele 25:29) We mashiwi nobe ulawama! Ukwibukisha ifi fishinka kuti kwaafwa abapepa Yehova bonse ukulasamwa lyonse.
Munyina John Barr, uwa mwi Bumba Litungulula akoseleshe abalepwisha isukulu mu lyashi lyakwe ilyaleti “Bekelweni Muli Bumishonari Bwenu.” Atile Yehova Lesa lyonse alikatamika bumishonari. “E mulimo walengele sana Yehova ukulanga ukuti alitemwa aba pano isonde. Atumine Umwana wakwe uwafyalwa eka ukwisa pali lino isonde. Yesu ali e mishonari wakulisha, solwesolwe muli bumishonari.” Kwena abalepwisha isukulu bafwile ukutontonkanyapo pa fyo Yesu ateulwike pa kuti engabomba bwino umulimo pano isonde, lelo na nomba kwaliba ubunonshi bufuma mu mulimo wa bumishonari bwa kwa Yesu ku balefwaya. Nga fintu Munyina Barr alandile, icilenga ukubomba mulandu wa kuti na Yesu alepekelwa mu mulimo wa kwa Lesa, kabili alepekelwa na bana ba bantu. (Amapinda 8:30, 31) Munyina Barr akoseleshe abalepwisha isukulu ukutwalilila mu mulimo, pa mulandu wa kuti balebekelwamo, te kushipikisha fye kweka. Apapeete abalepwisha isukulu ukuti: “Shintilileni pali Yehova; takamulekeleshe.”—Amalumbo 55:22.
Kalanda wakonkelepo, Lloyd Barry, na o uwa mwi Bumba Litungulula, alandile ilyashi lyaleti: “Ukwendela mwi Shina lya kwa Yehova Umuyayaya.” Apo lintu apwile Isukulu lya Gileadi mwi kalasi lyalenga 11, alibombelepo bumishonari ukucila pa myaka 25 ku Japan, Munyina Barry ashimike ifyalekumanya bamishonari ba mu myaka ya kale na mafya balepitamo. Mano nshi ayabomba ayo apandileko abalepwisha Isukulu? Atile: “Bakilileni bumupashi bwenu, e cacindamisha. Na kabili, sambilileni ululimi ne ntambi. Bekalamutiina. Bombesheni; mwinaka nelyo ukutompoka.” Munyina Barry aebele abalepwisha isukulu ukuti mu fyalo fya cilendo umo bakaya mu kubombela bakasangamo abantu abendela mwi shina lya tulesa ne milungu ifyalekanalekana, kabili abacinkwileko amashiwi ya kwa Mika aya kuti: “Inko shonse sha bantu shendela ulo no lu mwi shina lya mulungu wa luko, lelo ifwe twakulaendela mwi shina lya kwa Yehova Lesa wesu umuyayaya umuyayaya.” (Mika 4:5) Ica kumwenako ca babombelepo kale bumishonari cine cine cilacincisha nga nshi ababomfi ba kwa Lesa bonse ukulaendela mwi shina lya kwa Yehova no kumubombela muli bucishinka.
Uwakonkelepo ni kafundisha we Sukulu lya Gileadi, Lawrence Bowen. Ilyashi lyakwe lyali cipusho ca kuti: “Mukaba Abantu ba Musango Nshi?” Alondolwele ukuti ukubomba bwino umulimo wa kwa Lesa kwashintilila pa citetekelo no kucetekela Yehova. Ukushintilila umupwilapo pali Yehova kwalengele Imfumu Asa ukucimfya umulalo wa balwani 1,000,000. Nalyo line, kasesema Asaria acinkwileko ilya Mfumu ukulashintilila lyonse pali Yehova, ilyo amwebele ati: “Yehova ali kuli imwe ilyo imwe muli kuli wene.” (2 Imilandu 14:9-12; 15:1, 2) Apo ishina lya kwa Lesa, Yehova, lyalola mu kuti uwingacita conse ico alefwaya ku kufikilisha imifwaile yakwe, ico calola mu kuti, kuti aba Kapayanya, Kacingilila nelyo fye Kaputunkanya, bamishonari abashintilila pali Yehova kabili ababomba ukulingana ne fyo alefwaya bakabomba bwino bumishonari. (Ukufuma 3:14) Munyina Bowen asondwelele ukuti: “Mwilaba, nga mulecita ifyo Yehova afwaya, akamupa amaka ya kucimfya fyonse pa kuti mwingatwalilila mu mulimo.”
Uwalandile ilyashi lya kulekelesha mu ciputulwa ca malyashi ni Wallace Liverance, uwali mishonari kale, nomba ni kalemba we Sukulu lya Gileadi. Ilyashi lyakwe ilyaleti: “Lekeni Icebo ca kwa Lesa Cilebomba no Kuba ica Mweo Muli Imwe,” lyalandile pa bukombe nelyo ubulayo bwa kwa Lesa ubufikilishiwa lyonse. (AbaHebere 4:12) Cilaalula ubumi bwa bacisuminisha ukubaalula. (1 Abena Tesalonika 2:13) Kuti twalenga shani ico cebo catwalilila ica mweo no kulabomba muli ifwe? Ukupitila mwi sambililo lya mukoosha ilya Baibolo. Munyina Liverance acinkwileko abalepwisha isukulu inshila sha kusambilila Baibolo isho basambilile mwi Sukulu lya Gileadi, umwali ukubelenga no kulondolola amalembo, e lyo no kwishiba ifya kubomfya Icebo ca kwa Lesa. Ayambwile amashiwi yalandile Albert Schroeder, uwa mwi Bumba Litungulula uwali ceyamani muli komiti uwaimike Isukulu lya Gileadi imyaka 50 iyapitapo, atile: “Kuti waumfwikisha fyonse ifyo Icebo ca kwa Lesa cilelandapo nga ca kuti wabelenga na mashiwi yashingulwikeko.” Ukusambilila Icebo ca kwa Lesa muli iyi nshila kulenga cene ica mweo kabili cilatwalilila ukubomba muli ifwe.
Ukwipusha ne fya Kukumanya Ifisuma nga Nshi
Ilyo amalyashi yapwile, ibumba lyaumfwileko ifya kukumanya ifisuma nga nshi ukufuma ku basambi. Uwatungulwile ni Mark Noumair uwali kale mishonari ino nshita ni kafundisha we Sukulu lya Gileadi, abasambi bamo bashimike no kulangilila ifyo babombeshe ukushimikila ku bantu mu nshila shalekanalekana. Bamo balitendeke amasambililo ya Baibolo no kulayatungulula pa mulandu wa kuti balelolekesha ifyo umuntu alemoneka, ukumfwikisha ifyo alelanda no kulanga sana ukutemwa. Muli fyo, abasambi ‘baleimona abene ne sambilisho lyabo’ kabili balefwaisha ukwafwa bambi ukunonka ipusukilo.—1 Timote 4:16.
Balandile pa mitubululo ishaifulila iingabomfiwa, kabili ukusekelela kwaba muli bumishonari kwalimonekeshe pantu kwali na bamunyina ababelesha, abalekanshiwa mwi sukulu lya baba mu makomiti ya musambo ilyabelele pa Watchtower Educational Center. Bamunyina babili, Samuel Herd na Robert Johnson ababombela pa maofeshi yakalamba, e batungulwile ulu lubali lwacincimuka ulwa programu ukwipusha abafumine ku maofeshi ya Sosaite ku Bolivia, Zimbabwe, Nicaragua, Central African Republic, Dominican Republic, Papua New Guinea, na ku Cameroon.
Ilyo pafumine ifya kukumanya no kwipusha, Munyina Gerrit Lösch, uwali mwi kalasi lyalenga 41 ilya Gileadi, uwaba nomba mwi Bumba Litungulula, alandile ilyashi lya kucincimusha ilya kapela mpako, ilyaleti: “Bushe ‘Mwalitemwikwa’?” Pa kutendeka fye, Munyina Lösch acinkwileko abalepwisha isukulu ukuti Yesu, Umwana wapwililika uwa kwa Lesa, alipatilwe ku bantu, “ali uwasuulwa kabili uwakankambwa.” (Esaya 53:3) Kanshi teti tupape na lelo line ukuti mu fyalo ifingi bamishonari balasuulwa no kukankambwa. Lubali lumbi, mu myaka iishaifulila iya bunkole ku Babele, Kabumba ukupitila muli malaika aitile Daniele imiku itatu ukuti “uwatemwikwa.” (Daniele 9:23; 10:11, 19) Cinshi calengele Daniele ukutemwikwa? Tanashisheko ifishinte fya Baibolo ilyo alesambilila intambi sha bena Babele; ali uwa cishinka muli fyonse, tabomfeshe icifulo bamulashikepo ku kunonkelamo; kabili ali umusambi wapimpa uwa Cebo ca kwa Lesa. (Daniele 1:8, 9; 6:4; 9:2) Na kabili alepepa kuli Yehova lyonse, kabili alelumbanya Lesa pali fyonse ifyo alebomba. (Daniele 2:20) Nga bakonka ica kumwenako ca kwa Daniele, ababomfi ba kwa Lesa kuti baba abatemwikwa, bakatemwikwa maka maka kuli Yehova Lesa, ku calo te sana.
Ku nsondwelelo ya programu wa kucincimusha lwa ku mupashi, ceyamani abelengeleko ubukombe bumo bumo ubwafumine mwi sonde lyonse. Lyene bonse abaupana 24 bapokelele amadiploma, kabili icalo baleya mu kubombelako calibilishiwe. Na kuli pele pele, uwaiminineko abasambi banankwe abelengele kalata balembeele Ibumba Litungulula no lupwa lwa Bethel, uwa kutasha pa fyo bakanshiwe no kupangashiwa mu myeshi isano iyo baikele kulya.
Pa kusondwelela programu, ‘ukusekelela no kutootela’ kwaleumfwika mwi bumba cilya lyalasalangana.—Nehemia 12:27, NW.
[Akabokoshi pe bula 27]
Ukulondolola Ikalasi
Ifyalo bafumineko: 10
Ifyalo batuminweko: 19
Abasambi bonse: 48
Abaupana: 24
Avareji wa myaka bakwete: 33
Avareji wa myaka mu cine: 16
Avareji wa myaka mu mulimo wa nshita yonse: 13
[Icikope pe bula 25]
Ikalasi Lyalenga 106 Ilyalepwisha Isukulu lya Watchtower Bible School of Gilead
Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gaute, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.