Ifyo Icine Citulenga Ukuba Abantungwa
1 Inshita imo, Yesu aebele abaYuda bamucetekele ukuti: “Mukeshibe cine, ne cine cikamulenga abantungwa.” (Yoh. 8:32) Alelanda pa buntungwa bwacila pa nsambu sha bekala calo, ubuntungwa bwa bantu bonse.—abakankaala nelyo abapiina, abasambilila nelyo abashasambilila. Yesu asambilishe icine cali no kuleta ubuntungwa ukufuma mu busha bwa lubembu ne mfwa. Nga fintu Yesu alandile ukuti, “umuntu onse uucito lubembu, musha wa lubembu.” (Yoh. 8:34) Mwandi tulafulukisha inshita ilyo abantunse bonse abacumfwila ‘bakalubulwa ku busha bwa kubola no kukwata ubuntungwa bwa bukata ubwa bana ba kwa Lesa.’—Rom. 8:21.
2 Icine cilanda pali Yesu no mulimo wakwe uwa kufishapo ubufwayo bwa kwa Lesa cilaleta ubu buntungwa. Cisanshamo ukwishiba ilambo lya cilubula ilyo atulile pa mulandu wesu. (Rom. 3:24) Na nomba line, ukusumina icine ca mu Baibolo no kunakila cene kutulenga ukuipakisha ubuntungwa bwalinga ukufuma ku mwenso, ukubulwa isubilo, na ku micitile yonse iyabipa.
3 Ukulubulwa ku Mwenso no Kubulwa Isubilo: Tatufwile kubulwa isubilo pa mulandu wa filecitika mu calo pantu twalyumfwikisha umulandu ububifi bwabelako kabili twalishiba no kuti nomba line buli no kufumishiwapo pe sonde. (Amalu. 37:10, 11; 2 Tim. 3:1; Ukus. 12:12) Kabili, icine cilatulubula ku fisambilisho fya bufi pa lwa bafwa. Twalishiba ukuti abafwa te kuti batucite icabipa, tabaya uko balungulushiwa umuyayaya, no kuti Lesa talenga abantu ukufwa no kubasenda pa kuti abe nabo mu bufumu bwa mipashi.—Luk. Mil. 9:5; Imil. 24:15.
4 Icine ca musango uyu cakoseshe wishi na nyina ilyo umwana afwile mu busanso. Nyina atile: “Tapali icingapyana pa mwana wesu mpaka fye tukamumone na kabili ilyo akabuuka. Lelo natwishiba ukuti ukukalipwa kwesu kwa pa nshita fye inono.”
5 Ukulubulwa ku Micitile Yabipa: Icine ca mu Baibolo kuti cayalula ukutontonkanya kwa muntu no buntu bwakwe, ukumulenga alubulwa ku mafya yengacincintilwa. (Efes. 4:20-24) Ubufumacumi no kubombesha kuti fyayafwa mu kupwisha ubupiina. (Amapi. 13:4) Ukutemwa kwine kwine kulakosha icumfwano na bambi. (Kol. 3:13, 14) Ukucindika bumutwe bwa Bwina Kristu kulacefyako amafya mu lupwa. (Efes. 5:33–6:1) Ukutaluka kuli bucakolwa, bucisenene, fwaka, ne miti ikola kulenga ubumi ukuwama.—Amapi. 7:21-23; 23:29, 30; 2 Kor. 7:1.
6 Umulumendo umo calimwafishe ukuleka ukubomfya imiti ikola iyo abomfeshe pa myaka 9. Bushiku bumo akumenye kasabankanya waleshimikila mu musebo. Apokeleko impapulo, no kupangana nankwe ati akamutandalile pa ng’anda pa mwakwe. Isambililo lya Baibolo lyalitendeke. Ilyo papitile imyeshi ibili uyu mwaume alekele ukubomfya imiti ikola, kabili pa numa ya kusambilila imyeshi 8, alibatishiwe. Ilyo umukalamba wakwe umwaume na bukwe bwakwe bamwene ukuti aleka ukubomfya imiti ikola, na bo batendeke ukusambilila Baibolo.
7 Afweni Bambi Ukusanga Ubuntungwa: Abatekwa ubusha ku fisambilisho fya bufi pa nshita yalepa kuti cabakosela ukumfwikisha ubuntungwa bwaba mu Cebo ca kwa Lesa. Kafundisha alingile ukubombesha no kupekanya bwino pa kufika abantu pa mitima. (2 Tim. 4:2, 5) Ino te nshita ya kunashako umulimo wesu uwa “kubilisha kuli bankole ukulubuka.” (Esa. 61:1) Ubuntungwa bwa Bena Kristu bwalicindama. Ukusanga ubu buntungwa kukaleta umweo wa muyayaya.—1 Tim. 4:16.