Afweni Bambi Ukuba “Aba Cumfwila ku Mutima”
1. Cinshi Yehova afwaya kuli bakapepa bakwe?
1 Icumfwila calicindama sana pa kupepa Yehova mu nshila asuminisha. (Amala. 12:28; 1 Pet. 1:14-16) Nomba line, ubupingushi bwa kwa Lesa bukesa “pa bashaishiba Lesa na bashinakila imbila nsuma.” (2 Tes. 1:8) Kuti twayafwa shani bambi ‘ukulaumfwila ku mutima’ ifyo Baibolo isambilisha?—Rom. 6:17.
2. Mulandu nshi cabela icacindama ukwafwa bambi ukuba ne citetekelo cakosa?
2 Pa Kubafwa Ukukusha Icitetekelo no Kutemwa: Mu Malembo, icumfwila calyampana sana ne citetekelo. Umutumwa Paulo alandile pe “funde lya kwa Lesa wa muyayaya ku kuleta icumfwila ku citetekelo.” (Rom. 16:26) Ibuuku lya AbaHebere icipandwa 11 lilanda pa bantu abengi abaaba ifya kumwenako ifya citetekelo. Icitetekelo ca bengi pali aba calengele bacita ukufwaya kwa kwa Yehova. (Heb. 11:7, 8, 17) Lelo bucintomfwa bwayampana no kubulwe citetekelo. (Yoh. 3:36; Heb. 3:18, 19) Tulekabila ukwishiba bwino sana ifya kubomfya Icebo ca kwa Lesa pa kuti twafwe bambi ukukwata icitetekelo icingafumamo icumfwila.—2 Tim. 2:15; Yako. 2:14, 17.
3. (a) Bushe icumfwila cayampana shani no kutemwa? (b) Ni shani twingafwa abasambi ba Baibolo ukutemwa Yehova?
3 Icumfwila na kabili calyampana no kutemwa Lesa. (Amala. 5:10; 11:1, 22; 30:16) Pali 1 Yohane 5:3 patila: “Pantu uku e kutemwa Lesa, ukuti tubake amafunde yakwe; kabili amafunde yakwe tayaba cisendo.” Ni shani twingafwa abasambi ba Baibolo ukutemwa Yehova? Ilyo mulesambilila moneni apo mwingafwa umusambi ukutemwa imibele ya kwa Yehova. Landeni pa fyo muyumfwa pali Lesa. Afweni umusambi ukulatontonkanya pa fyo engapanga bucibusa na Yehova. Na kuba, ukutemwa Yehova kukalenga bambi, ukusanshako na ifwe ukulamumfwila ku mutima.—Mat. 22:37.
4. (a) Kuli ifwe fwe balesambilisha, mulandu nshi ukuba ne cumfwila kwacindamina? (b) Cinshi tufwile ukucita pa kuba no “mutima wa kuumfwa?”
4 Pa Kuba ica Kumwenako: Pa kuti twafwe bambi ukuumfwila imbila nsuma, kano na ifwe tuli ne cumfwila. Lelo, tulekabila ukutulukusha na maka pa kuti tube no “mutima wa kuumfwa.” (1 Isha. 3:9; Amapi. 4:23) Cinshi mwingacita pa kukwata umutima wa kuumfwa? Isusheni umutima wenu ne fya kulya fya ku mupashi ukupitila mwi sambililo lya Baibolo ilya lyonse no kusangwa mu kulongana. (Amalu. 1:1, 2; Heb. 10:24, 25) Palameni ku bantu ababika imitima yabo mu kupepa kwa cine. (Amapi. 13:20) Shimikileni inshita yonse no bufwayo bwa kwafwa abantu mu ncende mushimikilamo. Pepeeni kuli Yehova ukuti amwafwe ukuba no mutima usuma. (Amalu. 86:11) Talukeni ifintu ifingonaula umutima wenu, pamo nge fyakusekesha ifya bucisenene nelyo ifya lukaakala. Twalilileni ukucita ifintu ifimupalamika kuli Lesa ne fikosha bucibusa bwenu na wena.—Yako. 4:7, 8.
5. Aba cumfwila balepaalwa shani?
5 Yehova alaile abantu bakwe aba ku kale ukuti amapaalo yakesa pali bene nga bakuutika kwi shiwi lyakwe. (Amala. 28:1, 2) Na lelo line, Yehova alepaala sana ‘abamunakila nga kateeka.’ (Imil. 5:32) Ukupitila mu fyo tucita ne fyo tusambilisha, kuti twaafwa bambi ukuba ne cumfwila ku mutima.