Bushe Tufwile Ukucetekela Fye Ifyo Tumona?
Bamo batila, “Te kuti twishibe icishinka pali Lesa ne fyo ifintu fikaba ku ntanshi nangu ca kutila Abena Kristu na ba mu mipepele imbi balalandapo sana. Kwena nga kuti twaishiba ifi fintu, ninshi te pali ino nshita.”—BERTRAND RUSSELL UWASOMA AMANO YA BANTUNSE, E WALANDILE AYA MASHIWI MU 1953.
UMUNTU umo uwasumine amashiwi ayali pa mulu, ni Thomas Huxley uwasambilile sana pa nama. Huxley, afyelwe mu 1825, kabili ali pano calo inshita imo ine na Charles Darwin, uwasumine sana ukuti abantu basangwike fye ukufuma ku finama. Mu 1863, Huxley alembele ukutila tasangapo icishinka icili conse icilanga ukutila kwaliba Lesa “uwatutemwa kabili uutusakamana nga fintu Abena Kristu balanda.”
Abantu abengi pali lelo balasumina ifyalandile aba baume babili abo abantu bacindike sana pantu na bengi batila, bacetekela fye ifyo balemona. Batila, ukusumina ukuti umuntu e ko aba nelyo ukuti icintu e ko caba ukwabula no kucimona buwelewele.
Bushe Baibolo itila tufwile ukusumina fye ukuti Lesa e ko aba ukwabula ifya kutulanga? Te fyo isambilisha. Baibolo itila bupumbu ukusumina icintu ukwabula ukwishiba ifishinka. Isosa ukuti: “Uwapelwa amano atetekele cebo conse; lelo uwacenjela amwensekeshe nyantilo shakwe.”—Amapinda 14:15.
Inga Lesa, bushe kwaliba ifilanga ukutila e ko aba, no kuti alitutemwa kabili alatusakamana?
Lesa Alitulanga Imibele Yakwe
Ilyo Paulo uwalembele amabuuku yamo aya mu Baibolo alelanda ne bumba lya bena Atena abasambilile sana, asosele ukuti, Lesa ‘alengele pano calo na fyonse ifyabapo.’ Paulo aebele ibumba aleshimikila ilyali sana ne fikansa, ukuti, Lesa alibika amano ku bantu no kutila “taba kutali kuli ifwe bonse.”—Imilimo 17:24-27.
Mulandu nshi Paulo asuminine sana ukutila Lesa e ko aba no kuti alasakamana abantu abo abumba? Paulo alilandile umulandu umo ilyo alembele kalata ku bena Kristu banankwe aba mu musumba wa Roma. Alandile pali Lesa ukutila: ‘Imibele yakwe iishimoneka ilamonwa bwino bwino ukutula fye pa kubumbwa kwa pano calo, pa kuti baiilukila ku fyalengwa.’—Abena Roma 1:20.
Ifipande fyakonkapo fyalalanda pa mibele ya kwa Lesa itatu iyo twingamona bwino bwino ku fyo abumba. Nga mwabelenga pali iyi mibele, muipushe mwe bene ukutila, ‘Bushe finshi nalacitapo ifi nasambilila iyi mibele ya kwa Lesa?
[Amashiwi pe bula 3]
Baibolo taisambilisha ukutila tufwile ukusumina muli Lesa ukwabula ukwishiba ifishinka ifilanga ukuti e ko aba