ISAMBILILO 49
Ifyo Mwingacita pa Kuti mu Lupwa Lwenu Muleba Insansa—Ulubali 1
Abantu nge lyo baupana fye bafwaya ukuti bakatwalilile ukuba ne nsansa mu cupo cabo nga filya bali ne nsansa pa bushiku baleupana. Ifyo bafwaya kuti fyacitika. Abena Kristu abaupana pa myaka iingi kabili abakonka ifyo Baibo ilanda balimona ukuti abaupana kuti batwalilila ukuba ne nsansa mu cupo.
1. Finshi Baibo ilanda ukuti e fyo abalume balingile ukulacita?
Yehova alilanda ukuti umwaume e mutwe wa lupwa. (Belengeni Abena Efese 5:23.) Yehova enekela umulume ukulapingula bwino pa fintu pa kuti aba mu lupwa bonse baleba ne nsansa. Baibo yeba abalume ukuti: “Muletwalilila ukutemwa abakashi benu.” (Abena Efese 5:25) Bushe umulume kuti alanga shani ukuti alitemwa umwina mwakwe? Umulume uwatemwa umwina mwakwe alaba ne cikuuku kuli ena ilyo bali pa ng’anda na lintu bali pa bantu. Alamucingilila no kulenga aleba ne nsansa, kabili alesha apapela amaka yakwe ukulamusakamana muli fyonse. (1 Timote 5:8) Ne cacindama sana, alamusakamana mu fya kwa Lesa. (Mateo 4:4) Ku ca kumwenako, kuti alepepela pamo no mwina mwakwe no kulabelengela pamo nankwe Baibo. Nga ca kuti umulume alesakamana bwino umwina mwakwe, alatwalilila ukuba cibusa wa kwa Yehova.—Belengeni 1 Petro 3:7.
2. Finshi Baibo ilanda ukuti e fyo abakashi balingile ukulacita?
Baibo itila umukashi: “afwile ukuba no mucinshi sana ku mulume wakwe.” (Abena Efese 5:33) Bushe abakashi kuti balanga shani ukuti baliba no mucinshi sana ku balume babo? Balingile ukulatontonkanya pa mibele iisuma iyo abalume babo bakwata, na pa fyo besha na maka ukulabasakamana no kusakamana abana babo. Na kabili kuti balanga ukuti balicindika abena mwabo nga balebatungilila ilyo bapingula pa fintu e lyo no kuba ne cikuuku ilyo balelanda nabo nelyo ilyo balelanda pali bena ku bantu bambi. Bafwile ukucita ifi nangu ca kuti abena mwabo tabapepa Yehova.
3. Bushe abaupana kuti bakosha shani icupo cabo?
Baibo ilanda pa baupana ukuti: “Aba babili bakaba umubili umo.” (Mateo 19:5) Kanshi bafwile ukwesha na maka ukukanacita nangu cimo icingalenga baleka ukutemwana. Pa kuti batwalilile ukutemwana, bafwile ukulaba pamo inshita iitali, ukulalanshanya ukwabula ukupita mu mbali, no kulalanda ifili ku mukoshi. Na kabili tabafwile ukuleka icili conse nelyo umuntu uuli onse ukucindama ukucila abena mwabo, kano fye Yehova. Cimbi icingalenga batwalilila ukutemwana kukanaba sana ifibusa no mwaume nelyo umwanakashi uushili mwina mwabo.
SAMBILILENI NA FIMBI
Moneni amashinte ya mafunde ayengalenga icupo cenu cakosa.
4. Mwe balume, muletemwa abakashi benu no kubasunga bwino
Baibo itila “abalume bafwile ukulatemwa abakashi babo kwati mibili yabo.” (Abena Efese 5:28, 29) Ni mwi aya mashiwi yalola? Tambeni VIDIO, lyena lanshanyeni icipusho cakonkapo.
Ni nshila nshi shimo isho umulume engalangilamo ukuti alitemwa umwina mwakwe kabili alamusakamana bwino?
Belengeni Abena Kolose 3:12, lyena lanshanyeni ici cipusho:
Mibele nshi iisuma iyo umulume alingile ukukwata?
5. Mwe bakashi, muletemwa abena mwenu kabili mulebacindika
Baibo yeba abakashi ukulacindika abena mwabo, nampo nga balabombela Yehova nelyo iyo. Belengeni 1 Petro 3:1, 2, lyena lanshanyeni aya mepusho:
Nga ca kuti abena mwenu tababombela Yehova, ukwabula no kutwishika mulafwaya ukuti bakatendeke ukumubombela. Bushe mulemona ukuti finshi fingafwa abena mwenu ukutendeka ukubombela Yehova, bushe kulabashimikila lyonse nelyo kuba ne mibele iisuma no kulabacindika? Cinshi mwalandila ifyo?
Abalume na bakashi kuti balepingula bwino pa fintu nga balebombela pamo. Na lyo line, inshita shimo umukashi te kuti asumine ifyo umulume alanda. Nga tasuminisheko ifyo umulume alanda, kuti alanda ifyo aletontonkanya mucinshi mucinshi, lelo alingile ukwishiba ukuti Yehova alipeela umulume insambu sha kupingula ifingawamina ulupwa. Afwile ukulaesha na maka ukutungilila umwina mwakwe nga apingula fimo. Umukashi nga alecita ifi, mu lupwa lwabo mukaba insansa. Belengeni 1 Petro 3:3-5, lyena lanshanyeni ici cipusho:
Bushe Yehova omfwa shani nga ca kuti umukashi alecindika umwina mwakwe?
6. Kuti mwapwisha amafya mu cupo cenu
Takwaba icupo icapwililika. Kanshi abaupana balingile ukulabombela pamo pa kuti bapwishe amafya. Tambeni VIDIO, lyena lanshanyeni amepusho yakonkapo.
Muli vidio twatamba, finshi mwacimona ifyacilanga ukuti abaupana tabalecitila ifintu pamo?
Finshi bacitile pa kuti bakoshe icupo cabo?
Belengeni 1 Abena Korinti 10:24 na Abena Kolose 3:13. Pa numa ya kubelenga ilembo limo na limo, lanshanyeni ici cipusho:
Bushe ukukonka ifyaba pali ili ilembo kuti kwakosha shani icupo?
Baibo itila tufwile ukulacindikana. Cimo ico tufwile ukucita pa kulanga ukuti twalicindika abena mwesu kuba ne cikuuku kuli bena. Belengeni Abena Roma 12:10, lyena lanshanyeni aya mepusho:
Bushe abaupana balingile ukulalolela ukuti abena mwabo ebo babalilepo ukubacindika? Cinshi mwa-asukila ifyo?
ABANTU BAMO BATILA: “Ine na bena mwandi tatwatemwana nge fyo twatemwanene kale.”
Kuti mwalondolwela shani abalanda ifi, ukuti Baibo kuti yabafwa ukutwalilila ukutemwana?
IFYO MUSAMBILILE
Abalume na bakashi kuti batwalilila ukuba ne nsansa mu cupo cabo nga ca kuti baletemwana, balecindikana, kabili balebomfya amashinte ya mafunde ya mu Baibo.
Ukupitulukamo
Finshi umulume afwile ukulacita pa kuti mu cupo mube insansa?
Finshi umukashi afwile ukulacita pa kuti mu cupo mube insansa?
Nga ca kuti mwalyupa nelyo ukuupwa, mashinte nshi aya mafunde ya mu Baibo ayengamwafwa ukukosha icupo cenu?
ISHIBILENIPO NA FIMBI
Moneni fimo ifyo mwingacita ifingalenga mwaba ne nsansa mu lupwa.
Tambeni vidio ya lwimbo pa kuti mumone ubusuma bwaba mu kubomfya amashinte ya mafunde ya mu Baibo mu cupo.
Moneni umo calola ukulanakila umulume, uwakwata umulimo wa kutungulula ulupwa.
Tambeni vidio pa kuti mumone ifyo Baibo ingafwa abaupana.