Ukubomfya Ukulamuka kwa Kunashanasha Pa Kufika pa Mutima

ISHIWI “ukunashanasha” talyumfwika bwino ku bengi. Mu kutontonkanya kwa umo kuti lyaumfwika kwati musulwishi uupatikisha nelyo ukusulwisha ukwaelenganishiwa ku kubepa uuleshita nelyo ukumubeleleka. Nangu fye ni muli Baibolo, imfundo ya kunashanasha limo limo tayumfwika bwino, ukulangilila ukubotelesha nelyo ukulufya. Ku ca kumwenako, umutumwa wa Bwina Kristu Paulo alembele ku bena Galatia ukuti: “Mwalebutuka bwino. Nani uwamuleseshe ukuumfwe cine? Ukunashiwa uku takwafuma mu wamwita.” (Abena Galatia 5:7, 8) Paulo na kabili asokele abena Kolose ukukanaleka uuli onse ‘ukubacenjesha ku kunashanasha.’ (Abena Kolose 2:4) Ukunashanasha kwa musango yo kushintilila pa milandile ya bucenjeshi iya bufi.

Nangu ni fyo, muli kalata wakwe uwa cibili kuli Timote, umutumwa Paulo abomfeshe imfundo ya kunashanasha mu mano yapusanako. Alembele ukuti: ‘Ikalilila muli ifyo wasambilile ne fyo wanashiweko ukutetekela, ukwishiba abo wasambilileko.’ (2 Timote 3:14) Ukusoso kuti ifyo ‘wanashiweko ukutetekela,’ takulepilibula ukuti Timote alebelelekwa kuli nyina na nakulu, abo aasambilileko icine ca mu Malembo.—2 Timote 1:5.a

Lintu ali mu cifungo mu Roma, Paulo ashimikishe ku bengi, ‘ukufuma ku lucelo no kufika ku cungulo . . . ukwesho kubanashanasha pa lwa kwa Yesu, ukutula ku Malango ya kwa Mose na bakasesema.’ (Imilimo 28:23) Bushe Paulo aalekopeka bakakutika bakwe? Napacepa! Cine cine, kanshi, ukunashanasha te lyonse kwalubana.

Nga lyabomfiwa mu nshila isuma ishiwi lya ciGriki ilyapilibulwa ‘nasha’ lipilibula ukushinina, ukwalula umuntontonkanya ukupitila mu kupelulula kusuma, ukwa mano. Muli fyo kasambilisha kuti alundulula Amalembo aishiba, ukubomfya ukunashanasha ku kulenga bambi ukukanatwishika icine ca Baibolo. (2 Timote 2:15) Cine cine, ici e co ubutumikishi bwa kwa Paulo bwaishibikilweko. Nangu fye ni Demetri kafula wa silfere, uwatungile ifisambilisho fya Bwina Kristu ukube fya bufi, alimwene ukuti “te [mu] Efese mweka iyo, lelo ni cinga na monse mu Asia, uyu Paulo nanasha no kusangula abantu ibumba likalamba, pa kusoso kuti, te milungu iyo, iyacitwa ku minwe.”—Imilimo 19:26.

Ukunashanasha mu Butumikishi

Yesu Kristu akambishe abakonshi bakwe ukuti: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya Mupashi wa mushilo: mulebasambilisha ukubaka fyonse ifyo namwebele. Kabili, moneni, ine nakulaba na imwe ukufika na pa kupwa kwa nshita.” (Mateo 28:19, 20) Mu fyalo ukucila 230, Inte sha kwa Yehova baleumfwila ili kambisho. Cila mweshi mu mwaka wa mulimo uwa 1997, batungulwile pali avareji amasambililo ya Baibolo aya mu ng’anda 4,552,589 mwi sonde lyonse.

Nga ca kuti mulatungulula isambililo lya Baibolo ilya mu ng’anda, pambi kuti mwaenekela amafya ayengakabila ukubomfya ukulamuka kwa kunashanasha. Ku ca kumwenako, tutile pe sambililo lyenu ilikonkelepo, mwaipushiwa icipusho pali Bulesa Butatu. Ni shani nga ca kuti mwalishiba ukuti umusambi wenu alisumina muli ici cifundisho? Kuti mwamupeela ulupapulo ululanda pali uyo mulandu. Pa numa alubelenga, kuti mwasango kuti nanashiwa ukusumina ukuti Lesa na Yesu tababa cimo cine. Lelo nga acili nakwata ifipusho, ni nshila nshi mwingafilondolwelamo?

Kutikisheni. Ici cikamwaafwa ukwishiba ifyo umusambi wenu aishibapo kale pa co mulelandapo. Ku ca kumwenako, nga ca kuti umusambi wenu atila, “Nasumina muli Bulesa Butatu,” apo pene kuti mwatendeka ukulanshanya kwa mu Malembo pa kushinina ukuti ici cifundisho tacalungama. Lelo ifisumino fya pali Bulesa Butatu fyalipusanapusana. Umusambi wenu nalimo asumina mu capusanininako fye ku cintu mwingalondolola nge cifundisho ca Bulesa Butatu. E fyo caba na ku fisumino fimbi, pamo nga ukufyalwa cipya cipya, ukuti umweo taufwa, ne pusukilo. E co kutikisheni ilyo mushilalanda. Mwitunganya fye ifya kutunganya pa co umusambi asuminamo.—Amapinda 18:13.

Ipusheni ifipusho. Ifi kuti fyasanshamo ukwipusho kuti: ‘Bushe lyonse mwalisumina muli Bulesa Butatu? Bushe mwalitala amufwailisha bwino bwino pa lwa co Baibolo isosa pali uyu mulandu? Nga ca kuti Lesa alipendelwamo muli bulesa butatu, bushe Icebo cakwe, Baibolo, tacingatweba pa lwa ico bwino bwino kabili ukwabulo kulamba?’ Pa kufundo musambi, mulepeemwinako limo limo ku kwipusha ifipusho pamo nge fi: ‘Bushe ifyo twasambilila ukufika pali ino nshita mulefyumfwa ukubamo amano?’ ‘Bushe mwasuminishako kuli ubu bulondoloshi?’ Ukupitila mu kulamuka kwenu ukwa kwipusha ifipusho, mulenga umusambi ukulalandapo ilyo mulesambilila. Tafwile ukulakutika fye kuli imwe ilyo mulekolobonda mu mulandu.

Pelulushanyeni Bwino. Ku ca kumwenako, lintu mulelanshanya icifundisho ca Bulesa Butatu, kuti mwasosa ku musambi wenu ukuti: ‘Ilyo Yesu abatishiwe, ishiwi lyafumine mu muulu, aliti, “Ni we mwana wandi, Uwatemwikwa.” Nga cine cine Lesa aali pe sonde alebatishiwa, bushe kuti asansule shiwi lyakwe ukulifisha ku muulu no kulibwesha pa kuti ayo mashiwi yomfwike pe sonde? Bushe ico te kuti cilufye abantu? Bushe Lesa “uushibepa,” kuti acite cintu ca musango yo ica kukopeka?’—Luka 3:21, 22; Tito 1:1, 2.

Ukupelulula kusuma ukupeelwa mu kushilimuka ilingi line kulabomba bwino. Langulukeni ica kumwenako ca mwanakashi uo twalaito kuti Barbara. Ukutula fye ku bwaice, asumine ukuti Yesu ni Lesa kabili alipendelwako kuli bulesa butatu ubwasanshishemo no mupashi wa mushilo. Lelo umo uwa Nte sha kwa Yehova amwebele ukuti Lesa na Yesu bantu babili abapusana, kabili amulangile amalembo ku kushinina ukulanda kwakwe.b Barbara taali na kusuusha Baibolo. Pa nshita imo ine, alipumfyanishiwe. Na kuba, alisumine nga nshi icifundisho ca kuti kwaba Balesa Batatu.

Nte mu kutekanya apelulwile na Barbara. Amwipwishe ati, “Nga mulefwaya ukunjeba ukuti abantu babili balilingana, kuti mwalangilile co mu lupwa ukubomfya cinshi?” Barbara atala atontonkanya cinono e lyo ayasuka ati: “Kuti nabomfya bamunyina babili.” Nte ayankulako ati, “Mwalungika. Nakalimo kuti mwabomfya fye na bampundu bapalana. Lelo mu kutusambilisha ukumona Lesa nga Wishi no mwine Yesu nga Umwana, cinshi aalesambilisha?” Barbara asunguka sana, kabili ayasuka ukuti, “Naumfwa. Alelondolola umo ngo mukalamba kabili uukwete amaka yacililepo.”

Nte ayasuko kuti, “Ee, na baYuda abalekutika kuli Yesu, abaikeleko pa nshita ya fikolwe, bafwile basondwelele cimo cine.” Pa kuti icishinka cakwe cumfwike, uyu Nte asondwelele ukuti: “Nga ca kuti ifwe twabomfya icilangililo ca musango yo icaumfwika bwino pa kusambilisha ukulingana—ica bamunyina nelyo bampundu bapalana—cine cine Yesu, Kasambilisha Mukalamba, na o wine nga e fyo acitile. Mu cifulo ca ico, abomfeshe amashiwi ya ‘tata’ na ‘umwana’ pa kulondolola ukwampana kwali pali wena na Lesa.”

Kwi pele pele Barbara alyumfwile icishinka, kabili alicisumiine. Balimufikile pa mutima ukubomfya ukulamuka kwa kunashanasha.

Ifyo Mwingacitapo pa Kuyumfwa kwa Bambi

Ilingi line ifisumino fya mipepele ifyapampamikwa sana filafika pa nkuntu. Langulukeni pa lwa kwa Edna, Katolika wakamamo na menshi. Abeshikulu bakwe abapungwe bamulondolwelele ubushininkisho bwaumfwika ubwa mu Malembo ubwa kuti Lesa na Yesu te muntu umo. Edna aliteseshe ifyo aumfwile. Nangu cibe fyo, mu cikuuku lelo mu kushipa atile: “Nasumina muli Lesa Tata, Lesa Mwana, na Mweo Mutakatifu.”

Napamo mwalikumanyapo icapalako. Abengi bamona ififundisho fya mipepele yabo kwati fya kubeshibilako. Pa kunasha abasambi ba Baibolo aba musango yo, fingi fikabilwa ukucila ukulalanda fye ifishinka mu kukanacincimuka nangu ukulakonkanya fye amalembo ayaleshinina ukuti imimwene ya umo yalilubana. Aba musango yo kuti baafwilishiwa bwino nga ca kuti mu kulamuka kwa kunashanasha twabikamo ne cililishi. (Linganyeniko Abena Roma 12:15; Abena Kolose 3:12.) Kwena, kasambilisha uubomba bwino afwile abo washininwa icine cine. Ku ca kumwenako, Paulo abomfeshe insoselo pamo nga “Ndesuubila” na “Ninjishiba, kabili ninsuubila kuli Shikulu Yesu.” (Abena Roma 8:38; 14:14) Nangu ni fyo, pa kulondolola ukushininwa kwesu, imilandile ya pa fisambilisho fyesu taifwile ukumfwika kwati tuleilungamika, kabili tatufwile ukubomfya umusaalula nelyo ukusuusha pa kulondolola icine ca Baibolo. Ukwabulo kutwishika tatwingatemwa ukukalifya umusambi nelyo fye ukumusaalula.—Amapinda 12:18.

Icacilapo kubomba bwino kucindika ifisumino fya musambi no kucindika insambu shakwe isha kusumina muli fyene. Icingatwafwa caba kuicefya. Kasambilisha uwa bupete taimono kuti alicila pa musambi mu cifyalilwa fye. (Luka 18:9-14; Abena Filipi 2:3, 4) Ukunashanasha kwa bukapepa kusanshamo umusango wa kuicefya, uyo, na cine, uutila: ‘Yehova mu nkumbu shakwe alingafwa ukwishiba ici. Lekeni ncilondolole kuli imwe.’

Paulo alembele ku Bena Kristu banankwe mu Korinti, ati: “Ifyanso fya bulwi bwesu te fya buntunse, lelo fya maka muli Lesa ku kuwisha amalinga ayakosa; tuwisha ifya fikansa, na conse icasansabala icaimikwa ku kukaanyo kwishiba Lesa, kabili tutwala amapange yonse muli bunkole ku cumfwila ca kuli Kristu.” (2 Abena Korinti 10:4, 5) Ilelo, Inte sha kwa Yehova balebomfya Icebo ca kwa Lesa ku kuwisha ififundisho fya bufi ifyakosa pamo ne ncitilo ne mibele ifyayafya ukuleka ififulwisha Lesa. (1 Abena Korinti 6:9-11) Ilyo balecite fyo, Inte sha kwa Yehova bebukisha ukuti Yehova mu kutemwa alibatekanishisha. Fintu baaba aba nsansa ukukwata Icebo cakwe, Baibolo, no kubomfya ici cibombelo cakwatisha amaka ku kuwisha ifisambilisho fya bufi no kufika pa mitima ukubomfya ukulamuka kwa kunashanasha!

[Amafutunoti]

[Akabokoshi pe bula 23]

Ukufika pa Mutima wa Musambi Wenu

◻ Pepeleni ubutungulushi bwa kwa Yehova pa kufika pa mutima wa musambi wa Baibolo.—Nehemia 2:4, 5; Esaya 50:4.

◻ Fwailisheni ico umusambi asuminamo no mulandu icisambilisho ca bufi cingamonekela icisuma kuli wena.—Imilimo 17:22, 23.

◻ Mu cikuuku, na mu kutekanya, lundululeni ukulanshanya kwa mu Malembo ukwabulo kufuma ku fyo bonse musuminishenyepo.—Imilimo 17:24-34.

◻ Nga cingacitika, kosheni icine ca Baibolo pa kubomfya ifilangililo fingabomba.—Marko 4:33, 34.

◻ Ebeni umusambi ubusuma bwaba mu kusambilila ukwishiba kwalungika ukufuma mu Baibolo.—1 Timote 2:3, 4; 2 Timote 3:14, 15.