Bombeleni Yehova Muli Bucishinka

“Ku wa bucishinka imwe [Yehova] mukabomba muli bucishinka.”—2 SAMWELE 22:26, NW.

1. Ni shani fintu Yehova abomba na abo aba bucishinka kuli wene?

YEHOVA te kuti alipilwe pali fyonse ifyo acitila abantu bakwe. (Ilumbo 116:12) Fintu fyawama ifya bupe fyakwe ifya ku mupashi na ku mubili ne nkumbu shabondoka! Imfumu Davidi iya kwa Israele wa pa kale aishibe ukuti Lesa na kabili abomba muli bucishinka kuli abo aba bucishinka kuli wene. Davidi asosele ifyo mu lwimbo ashikile “mu bushiku Yehova amupokolwele mu minwe ya balwani bakwe bonse, na mu minwe ya [Mfumu] Shauli.”—2 Samwele 22:1.

2. Fishinka nshi fimo ifyapeelwa mu lwimbo lwa kwa Davidi ulwalembwa muli 2 Samwele icipandwa 22?

² Davidi atendeke ulwimbo lwakwe (ulwapalana na Ilumbo 18) pa kulumbanya Yehova nga “Kapokolola” mu kwasuka kwi pepo. (2 Samwele 22:2-7) Ukufuma mwi tempele lyakwe ilya mu mulu, Lesa abombele ku kupokolola umubomfi wakwe uwa bucishinka ukufuma ku fibambe fya bulamba. (Ifikomo 8-19) Davidi muli fyo alilambwilwe pa kusupila inshila yatambalala no kusunge nshila sha kwa Yehova. (Ifikomo 20-27) Ifyalondolwelwe cimo cimo mu kukonkapo fyali milimo yacitilwe mu bukose bwapeelwa na Lesa. (Ifikomo 28-43) Ica kulekeleshako, Davidi alosesheko ku kupokololwa ukufuma ku bakusange filubo ku mwabo na ku balwani ukufuma ku fyalo fimbi kabili atootele Yehova ngo “[ulekusho] kupusukapusuka kwa mfumu yakwe, kabili alecito luse ku wasubwa wakwe.” (Ifikomo 44-51) Yehova kuti apokolola na ifwe bene nga ca kuti twasupila inshila yatambalala no kushintilila pali wene ku bukose.

Cintu Cipilibula Ukuba uwa Bucishinka

3. Ukufuma ku mimwene ya mu Malembo, cinshi cipilibula ukuba uwa bucishinka?

³ Ulwimbo lwa kwa Davidi ulwa kupokololwa lutupeela uku kwebekesha kwa kusansamusha: “Ku wa bucishinka imwe [Yehova] mukabomba muli bucishinka.” (2 Samwele 22:26) Ni adjective ya ciHebere cha·sidhʹ e ilangilila “uwa bucishinka,” nelyo “uwa cikuuku ca kutemwa.” (Ilumbo 18:25, NW, utulembo twa pe samba) Nauni cheʹsedh yabamo itontonkanyo lya cikuuku iciilambatika icine ceka mu kutemwa ku cintu cimo ukufikila imifwaile ya ciko mu kulundana na cene yafikilishiwa. Yehova alumbulula uyo musango wa cikuuku ku babomfi bakwe, pamo fye nga fintu bacilumbulula kuli wene. Bucishinka bwalungama, ubwa mushilo bwapilibulwa “icikuuku ca kutemwa” na “ukutemwa kwa bucishinka.” (Ukutendeka 20:13, NW; 21:23, NW) Mu Malembo ya ciGreek, “bucishinka” bwakwata imfundo ya bumushilo no kucindikisha, ifyalumbululwa muli nauni ho·si·oʹtes na adjective hoʹsi·os. Bucishinka bwa musango yo busanshamo ubusumino no kuipeelesha kabili bupilibula ukuba uwaipeelesha no kubomba mu kusakamanishisha imilimo yonse ukulola kuli Lesa. Ukuba uwa bucishinka kuli Yehova cipilibula ukulambatila kuli wene mu kuba no kuipeelesha kwakosa nga nshi ica kuti kubomba ukupala ica kulambatikilako ica maka.

4. Ni shani fintu bucishinka bwa kwa Yehova bwalangwa?

⁴ Bucishinka bwa kwa Yehova bwine bwalangwa mu nshile shingi. Ku ca kumwenako, alabuule ncitilo ku kulwisha ababifi pa mulandu wa kutemwa kwa bucishinka ku bantu bakwe na bucishinka ku bulungi no bulungami. (Ukusokolola 15:3, 4; 16:5) Bucishinka ku cipingo cakwe na Abrahamu bwamuseseshe ku kuba uushishimisha ukulola ku bena Israele. (2 Ishamfumu 13:23) Abo aba bucishinka kuli Lesa kuti bashintilila pa kwaafwa kwakwe ukufika ku mpela ya nshila yabo iya bucishinka kabili kuti baba abashininkisha ukuti akabebukisha. (Ilumbo 37:27, 28; 97:10) Yesu akoshiwe ku kwishiba kwa kuti pamo nga “uwa bucishinka” mukalamba uwa kwa Lesa, umweo wakwe tawali no kushala ku Mbo.—Ilumbo 16:10; Imilimo 2:25, 27, NW.

5. Apantu Yehova wa bucishinka, cinshi afwaya ku babomfi bakwe, kabili cipusho nshi cikapeelwa ukulangulukapo?

⁵ Apantu Yehova Lesa alibo wa bucishinka, afwaya bucishinka ku babomfi bakwe. (Abena Efese 4:24) Ku ca kumwenako, abaume bafwile ukuba aba bucishinka pa kuba abafikapo ku kusontwa nga baeluda ba mu cilonganino. (Tito 1:8) Fishinka nshi filingile ukusesha abantu ba kwa Yehova ukumubombela muli bucishinka?

Ukutasha pa Fintu Fyasambililwa

6. Ni shani fintu tulingile ukuyumfwa pa lwa fintu fya mu Malembo ifyo twasambilila, kabili cinshi tulingile ukwibukisha pa lwa kwishiba kwa musango yo?

⁶ Ukutootela ku fintu fya mu Malembo ifyo twasambilila kulingile ukutusesesha ku kubombela Yehova muli bucishinka. Umutumwa Paulo acincishe Timote ukuti: “Ikalilila muli ifyo wasambilile ne fyo watetekelako, ukwishiba abo wasambilileko, no kuti ukufuma ku bwaice waishibe amalembo ya mushilo ayaba na maka ya kukulengo wa mano ayalosha ku kupusuka mu kutetekela Kristu Yesu.” (2 Timote 3:14, 15) Ibukisha ukuti ukwishiba kwa musango yo kwaishile ukufuma kuli Lesa ukupitila mu “musha wa cishinka kabili uwashilimuka.”—Mateo 24:45-47.

7. Ni shani fintu baeluda balingile ukuyumfwa pa lwa ca kulya ca ku mupashi icipayanishiwa na Lesa ukupitila mu musha wa cishinka?

⁷ Ukucilisha baeluda basontwa balingile ukutesekesha ica kulya cafumba ica ku mupashi icipayanishiwa na Lesa ukupitila mu musha wa cishinka. Imyaka yapitapo baeluda banono babulilwe ukutesekesha kwa musango yo. Uwa kubebeta umo alandilepo kuti aba baume “baali aba kulengulula ku fipande fya Ulupungu lwa kwa Kalinda, ukukanafwaya ukupokelela lwene nga . . . ipitilo lya kwa Lesa ilya cine, lyonse ukwesha ukusonga bambi mu nshila yabo iya kutontonkanya.” Nangu cibe fyo, baeluda ba bucishinka tababala abesha ukusonga bambi ukukaana icili conse ica ca kulya ca ku mupashi icipayanishiwa na Lesa ukupitila mu musha wa cishinka.

8. Ni shani nga ca kuti tatutesekeshe mu kukumanina icishinka cimo ica mu Malembo icapeelwa no musha wa cishinka kabili uwashilimuka?

⁸ Nge Nte shaipeela isha kwa Yehova, ifwe bonse tufwile ukuba aba bucishinka kuli wene na ku kuteyanya kwakwe. Tatulingile nelyo fye ukulanguluka ukupasukako kufuma ku lubuuto lwapesha amano ulwa kwa Lesa, ukusupila inshila ya busangu iingatungulula ku mfwa ya ku mupashi nomba no bonaushi bwa mu kupelako. (Yeremia 17:13) Lelo ni shani nga ca kuti cili icayafya kuli ifwe ukupokelela nelyo ukutesekesha mu kukumanina icishinka cimo ica mu Malembo icapeelwa no musha wa cishinka? Lyene lekeni mu kuicefya twishibe uko twasambilile icine no kupepela amano ya kubomba ne ci ca kwesha ukufikila caisa ku mpela mu kuba no bulondoloshi bumo ubwaumfwika ubwasabankanishiwa ubwa milandu.—Yakobo 1:5-8.

Tesekesha Bumunyina bwa Bwina Kristu

9. Ni shani fintu 1 Yohane 1:3-6 alanga ukuti Abena Kristu bafwile ukukwata umupashi wa bunabo?

⁹ Ukutasha kwa kuyumfwa kwafuma ku mutima pa mupashi wa bunabo wabako mu kati na nkati ka bumunyina bwesu ubwa Bwina Kristu kupayanya inkosho shalundwako ku kubombela Yehova muli bucishinka. Na kuba, ukwampana kwesu na Lesa na Kristu te kuti kube ukutuntulu lwa ku mupashi ukwabula uyu mupashi. Umutumwa Yohane aebele Abena Kristu basubwa ukuti: “Ico twamona no kuumfwa e co tulanda kuli imwe, ukuti na imwe mube ne senge [“ubunabo,” Diaglott] pamo na ifwe; kabili isenge tuli na lyo lili pamo na Wishi, kabili pamo no Mwana wakwe Yesu Kristu. . . . Nga tutila, Tuli ne senge nankwe, kabili twenda mu mfifi, ninshi tulabepa, tatucita cine iyo.” (1 Yohane 1:3-6) Ici cishinte cibomba ku Bena Kristu bonse, nampo nga isubilo lyabo lya ku mulu nelyo lya pe sonde.

10. Nangu cingati Yuodia na Suntuki mu kumonekesha bakwete ubwafya bwa kupikulula impika ya pa lwabo, ni shani fintu Paulo amwene aba banakashi?

¹⁰ Ukubombesha kulafwaikwa ku kusungilila umupashi wa bunabo. Ku ca kumwenako, abanakashi ba Bwina Kristu Yuodia na Suntuki mu kumonekesha bacisangile icayafya ukupikulula impika pa kati kabo. Paulo muli ifyo abakonkomeshe “ukuba abaitabana muli Shikulu.” Alundilepo kuti: “Kabili ndekulomba na iwe pamo, we munandi wa mwi koli wine wine, uleafwa aba banakashi; pantu bakoshenye pamo na ine mu mbila nsuma, kabili pamo na Klemente na bambi ababomfi banandi, abo amashina yabo yali mwi buuku lya mweo.” (Abena Filipi 4:2, 3) Abo abanakashi ba bukapepa balwishishe pamo na Paulo na bambi “mbila nsuma,” kabili aali uwashininkisha ukuti baali pa kati ka abo ‘bantu amashina yabo yali mwi buuku lya mweo.’

11. Nga ca kuti Umwina Kristu wa bucishinka akumanya impika ya ku mupashi, cinshi cingabe calinga ukusunga mu muntontonkanya?

¹¹ Abena Kristu tabafwala icishibilo ca kulanga cintu bakwate shuko lya kucita mu kuteyanya kwa kwa Yehova na fintu babombela wene muli bucishinka. Nga ca kuti bakwata impika ya ku mupashi, fintu cingaba kubulwo kutemwa ukusuulako imyaka yabo iya mulimo wabo uwa bucishinka kuli Yehova! Mu kupalako, uwitwa “umunandi wa mwi koli wine wine,” aali ni munyina wa bucishinka uwafwaishe ukwafwilishako bambi. Nga ca kuti uli eluda, bushe uli “umunandi wa mwi koli wine wine,” uwaipekanya ukupeela ukwafwilisha mu nshila ya cililishi? Shi ifwe bonse natulanguluke ubusuma bwacitwa na basumina banensu, pamo fye nga fintu Lesa acita, kabili mu kutemwa bafweni ukusenda ifisendo fyabo.—Abena Galatia 6:2; AbaHebere 6:10.

Takuli Kumbi Ukwa Kuya

12. Lintu ukulandapo kwa kwa Yesu kwalengele ‘abasambi abengi ukuya ku numa,’ cifulo nshi Petro abuulile?

¹² Tukaseshiwa ukubombela Yehova muli bucishinka pamo no kuteyanya kwakwe nga ca kuti twaibukisha ukuti takuli kumbi ukwa kuya ku bumi bwa ciyayaya. Lintu ukulandapo kwa kwa Yesu kwalengele ‘abasambi abengi ukuya ku numa,’ aipwishe abatumwa bakwe ukuti: “Bushe na imwe mulefwayo kuya?” Petro ayaswike ukuti: “Mwe Shikulu, ni kuli ani twingaya? Imwe muli ne fyebo fya mweo wa muyayaya. Kabili ifwe twatetekela no kwishibo kuti ni mwe Wa mushilo wa kwa Lesa.”—Yohane 6:66-69.

13, 14. (a) Mulandu nshi ubuYuda bwa mu mwanda wa myaka wa kubalilapo bushakwatile ukusenamina kwa bulesa? (b) Cinshi cintu Inte imo iya kwa Yehova umukokole asosele pa lwa kuteyanya kumoneka ukwa kwa Lesa?

¹³ “Ifyebo fya mweo wa muyayaya” tafyasangilwe mu buYuda bwa mu mwanda wa myaka wa kubalilapo C.E. Ulubembu lukalamba ulwa buko lwali kukaaniwa kwa kwa Yesu nga Mesia. Takuli nangu umo uwa misango ya buko umo ubuYuda bwashimpilwe mu kupaatulwa pa Malembo ya ciHebere. AbaSaduke bakeene ukubako kwa bamalaika kabili tabasumine mu kubuuka. Nangu cingati abaFarise tabasuminishenye na bene muli ishi mbali, mu kubembuka basangwile Icebo ca kwa Lesa ica fye pa mulandu wa fishilano fyabo ifishali fya mu malembo. (Mateo 15:1-11; Imilimo 23:6-9) Ifi fishilano fyatekele abaYuda ubusha no kucilenga icayafya ku bengi ukupokelela Yesu Kristu. (Abena Kolose 2:8) Ukupimpila ‘ifishilano fya fikolwe fyakwe’ kwalengele Sauli (Paulo) mu bumbulu bwakwe ukuba kapakasa wakaluka uwa bakonshi ba kwa Kristu.—Abena Galatia 1:13, 14, 23.

¹⁴ UbuYuda tabwakwete ukusenamina kwa kwa Lesa, lelo Yehova apaalile ukuteyanya kwapangilwe na bakonshi ba Mwana wakwe—‘abantu abacincilile milimo isuma.’ (Tito 2:14) Kulya kuteyanya e pantu kucili, kabili ulwa kwene Inte ya kwa Yehova umukokole atile: “Nga ca kuti icintu cimo calibe cacindamisha kuli ine, caba mulandu wa kutwalilila uwapalamisha ku kuteyanya kumoneka ukwa kwa Yehova. Ica kukumanya candi ica mu kubangilila cansambilishe ifyo tacabe cituntulu ukushintilila pa kupelulula kwa buntunse. Lintu fye umuntontonkanya wandi wapingwile mu kushangila pali ico cishinka, napampamine ukwikala mu kupalamisha no kuteyanya kwa busumino. Ni nshila nshi imbi umo engakwatilamo ukusenamina kwa kwa Yehova ne paalo?” Takuli kumbi ukwa kuya ku kusenamina kwa bulesa no bumi bwa ciyayaya.

15. Mulandu nshi uwa kubombela pamo no kuteyanya kwa kwa Yehova ukumoneka kabili na abo abalesunsa icishingamo muli kwene?

¹⁵ Imitima yesu ilingile ukutusesha ukubombela pamo no kuteyanya kwa kwa Yehova pantu natwishiba ukuti kwene kweka e kutungululwa no mupashi wakwe kabili kuleishibisha ishina lyakwe ne mifwaile. Kwena, abo abalesunsa icishingamo muli kwene bali abashapwililika. (Abena Roma 5:12) Lelo ‘ubukali bwa kwa Yehova bwaimiine’ Aarone na Miriamu lintu bafwailishe cilubo muli Mose no kulabo kuti wene, te bo iyo, e waseekeshiwe ne cishingamo capeelwe na Lesa. (Impendwa 12:7-9) Ilelo, Abena Kristu ba bucishinka babombela pamo na ‘abo abaletungulula’ pantu ico e cintu Yehova afwaya. (AbaHebere 13:7, 17) Ubushininkisho bwa bucishinka bwesu busanshamo ukusangwa ku kulongana kwa Bwina Kristu lyonse no kucita ukulandapo uko ‘ukucincimusha bambi ku kutemwa ne milimo isuma.’—AbaHebere 10:24, 25.

Beni Aba Kukuulilila

16. Ukufwaisha kwa kucita cinshi kuli bambi kulingile na kabili ukutusesesha ku kubombela Yehova muli bucishinka?

¹⁶ Ukufwaisha kwa kuba uwa kukuulilila kuli bambi na kabili kulingile ukutukuntila ku kubombela Yehova muli bucishinka. Paulo alembele ukuti: “Ukwishiba kulatuumika, lelo ukutemwa kulakuula.” (1 Abena Korinti 8:1) Apantu umusango umo uwa kwishiba watuumike abaukwete, Paulo afwile apilibwile ukuti ukutemwa na kabili kulakuulilila abo abalangisha iyo mibele. Icitabo ca Baprofesa Weiss na English citila: “Umuntu wakwata amaka ya kutemwa ilingi line alatemwikwa mu kukonkapo. Amaka ya kutambulwilako kufwaya kusuma no kulangulukilako mu lubali ululi lonse ulwa bumi . . . yalikwata ukusonga kwamonekesha ukwa kukuula pa muntu uutambulula ukuyumfwa kwa musango yo pamo pene na pa muntu uwapokelela yene kabili muli ifyo yaleta ubuseko kuli bonse babili.” Pa kulanga ukutemwa, tulakuulilila bambi na ifwe bene, nga fintu calangililwa mu mashiwi ya kwa Yesu aya kuti: “Mwabe nsansa shafulilako mu kupeela ukucila ishaba mu kupokelela.”—Imilimo 20:35, NW.

17. Ni shani fintu ukutemwa kukuula, kabili cinshi kukacilikila ifwe ukucita?

¹⁷ Pali 1 Abena Korinti 8:1, Paulo abomfeshe ishiwi lya ciGreek a·gaʹpe, ukulangilila ukutemwa kwa cishinte. Kulakuula, pantu kulashishimisha kabili kwa cikuuku, kushipikisha fyonse, kabili takupwa. Uku kutemwa kulafumyapo inkuntu sha konaula, pamo nga icilumba na kalumwa. (1 Abena Korinti 13:4-8) Ukutemwa kwa musango yo kukatutalusha ukufuma ku kuilishanya pa lwa bamunyinefwe, abashapwililika pamo fye nga fintu twaba. Kukatucilikila ukufuma ku kuba nga “bashipepa” ‘abasokelele’ mu kati ka Bena Kristu ba cine aba mu mwanda wa myaka wa kubalilapo. Aba bantu ‘balesuula na bukateka no kupontela bakata,’ mu kumonekesha ukusosa ububi ku bantu umo umo aba musango yo nga bakangalila basubwa aba Bwina Kristu abakwete ubukata bumo ukubikwa pali bene. (Yuda 3, 4, 8) Muli bucishinka kuli Yehova, twikabala atunakila kwi tunko lya kucita icili conse icapalako.

Cincintileni Ciwa!

18. Cinshi Satana engatemwa ukucita ku bantu ba kwa Yehova, lelo mulandu nshi te kuti acitile fyo?

¹⁸ Ukwishiba kwa kuti Satana alefwaya ukonaula ukwikatana kwesu nga bantu ba kwa Lesa kulingile ukwingilishako umupampamina wesu ku kubombela Yehova muli bucishinka. Satana kuti atemwa nelyo fye ukupwisha abantu ba kwa Lesa bonse, kabili ababomfi ba kwa Ciwa aba pe sonde inshita shimo balepaya bakapepa ba cine. Lelo Lesa takasuminishe Satana ukupyanga bonse. Yesu afwile pa kuti “afubalishe uukwete amaka ya mfwa (uyo ni [Ciwa, NW]).” (AbaHebere 2:14) Ukucilisha ubufumu bwa kwa Satana ku kubelesha amaka bwalipeleshiwa ukutula pa kutamfiwa kwakwe ukufuma mu mulu pa numa lintu Kristu abele Mfumu mu 1914. Kabili mu nshita ya kwa Yehova iyalinga, Yesu akonaula Satana no kuteyanya kwakwe.

19. (a) Kusoka nshi pa lwa kubombesha kwa kwa Satana iyi magazini yapeele imyaka yapitapo? (b) Pa kusengauka ifiteyo fya kwa Satana, kusakamana nshi tulingile ukubelesha mu kubomba na basumina banensu?

¹⁹ Iyi magazini inshita imo yasokele ukuti: “Nga ca kuti Satana, ciwa, kuti alenga icimfulunganya pa kati ka bantu ba kwa Lesa, kuti abalenga ukuumana no kulwa pa kati kabo beka, nelyo ukulangisha no kulundulula imibele ya kaso iingatungulula ku konaulwa kwa kutemwa kwa ba bwananyina, muli iyo nshila kuti atunguluka mu kubamina.” (The Watch Tower, May 1, 1921, ibula 134) Twisuminisha Ciwa ukonaula ukwikatana kwesu, nakalimo pa kutubeleleka ukucito bukwakwa, nelyo ukulwishanya. (Ubwina Lebi 19:16) Shi Satana ekabala atucimfya mu nshila ya kuti ifwe pa lwesu twacena abo abalebombela Yehova muli bucishinka nelyo ukulenga ubumi ubwacililako ukwafya kuli bene. (Linganyeniko 2 Abena Korinti 2:10, 11.) Ukucila, natubomfye amashiwi ya kwa Petro aya kuti: “Tekanyeni, loleni. Icibambe cenu, [Ciwa, NW] wine, endauka nge nkalamo iilelila, ukufwaya untu engalya. Mukaanyeni; iminineni abakosa ndi mu citetekelo.” (1 Petro 5:8, 9) Pa kukaanya Satana, kuti twasungilila ukwikatana kwesu ukwapaalwa nga bantu ba kwa Yehova.—Ilumbo 133:1-3.

Mu Kubamo Ipepo Shintilileni Pali Lesa

20, 21. Ni shani fintu ukushintilila kwabamo ipepo pali Yehova kwaampana ku kumubombela muli bucishinka?

²⁰ Ukushintilila kwabamo ipepo pali Lesa kukatwaafwa ukutwalilila ukubombela Yehova muli bucishinka. Lintu twamona ukuti aleyasuka amapepo yesu, tulapalamikwa lyonse kuli wene. Ukushintilila kwabamo ipepo pali Yehova Lesa kwacincishiwe lintu umutumwa Paulo alembele ukuti: “Ndefwaya abaume ukupepa mu ncende shonse, baleimya amaboko ya mushilo, ababulo bukali ne fikansa.” (1 Timote 2:8) Ku ca kumwenako, fintu cili icacindama ukuti baeluda bashintilile mu kubamo ipepo pali Lesa! Ukulangisha kwa musango yo ukwa bucishinka kuli Yehova lintu balekumana ku kulanshanya imilandu ya cilonganino kukaafwa ukucilikila ifikansa fyabule mpela no kupuuka kwingacitikako ukwa bukali.

²¹ Ukushintilila kwabamo ipepo pali Yehova Lesa kulatwaafwa ukusakamana ifishingamo mu mulimo wakwe. Umwaume uwali nabombela Yehova muli bucishinka pa makumi ya myaka aali na maka ya kusoso kuti: “Ukupokelela kwesu ukwa kuitemenwa ukwa mulimo uuli onse uwapeelwa ifwe mu kuteyanya kwa kwa Lesa ukwa mu kusaalala kwa calo, no kutwalilila kwesu pa cifulo cesu ica mulimo, abashitelententa, kulaleta ukumwentula kwa kwa Lesa ukwa kusuminisha pa kubombesha kwesu ukwa mukoosha. Nelyo fye nga ca kuti umulimo wapeelwa wingamoneka ukuba uwa pa nshi, ilingi line cisangwa ukuti ukwabula ukubombwa kwa uko ukwa busumino imilimo iingi imbi iyakatama te kuti ibombwe. Muli ifyo nga ca kuti tuli abaicefya kabili abasekelela mu kulungatika mu kukatamika ishina lya kwa Yehova kabili te lyesu line, lyene kuti twaba abashininkisha ukuti lyonse tukaba ‘abashangila, abashitelententa, ukupikintika mu mulimo wa kwa [Yehova, NW].’—1 Abena Korinti 15:58.

22. Ni shani fintu amapaalo ayengi aya kwa Yehova yalingile ukwambukila bucishinka bwesu?

²² Te mulandu na cintu twacita mu mulimo wa kwa Yehova, kwena, te kuti tumulipile pa cintu atucitila. Fintu twaba aba mutelelwe mu kati ka kuteyanya kwa kwa Lesa, ukushingulukwa na abo abali fibusa fyakwe! (Yakobo 2:23) Yehova alitupaala mu kuba no kwikatana ukwisako ukufuma ku kutemwa kwa bumunyina ukwalimbe mishila mu kushika nga nshi ica kuti Satana wine te kuti akunukule. Lekeni kanshi tulambatile kuli Shifwe wa mu mulu uwa bucishinka no kubombela capamo nga bantu bakwe. Nomba na ku ciyayaya conse, lekeni tubombele Yehova muli bucishinka.

Kuti Waasuka Shani?

◻ Cinshi cipilibula ukuba uwa bucishinka?

◻ Fya kusangwilako nshi fimo ifilingile ukutusesesha ku kubombela Yehova muli bucishinka?

◻ Mulandu nshi tufwile ukucincintila Ciwa?

◻ Ni shani fintu ipepo lingatwaafwa ukuba ababomfi ba bucishinka aba kwa Yehova?

[Icikope pe bula 23]

Ababomfi ba bucishinka aba kwa Yehova tabasuminisha Icibambe cabo icapale nkalamo, Ciwa, ukupasa ukwikatana kwabo