Baibolo—Icitabo Caibela

Mu kulungikwa yaitwa icitabo cacishapo kushitishiwa mu calo conse. Baibolo ilabelengwa kabili yalitemwikwa ukucila icitabo icili conse cimbi. Ukufika pali lelo, amaBaibolo ayaananishiwa (ayakumanina nelyo imbali fye shimo) yatunganishiwa ukuba amabilioni yane mu ndimi ukucila pali 2,000. Nangu cibe fyo, icacilanapo kusungusha pa kwananishiwa kwa Baibolo, ca kuti iine isose fyo katendeka wa iko ni Lesa. “Amalembo yonse yantu yapuutwamo kuli Lesa,” e fyalembele umutumwa wa Bwina Kristu Paulo. (2 Timote 3:16) Cinshi cintu ici cilepilibula? Amashiwi ya kuti ‘ukupuutwamo kuli Lesa’ (iciGriki the·oʹpneu·stos) mu kuyakonka fye yapilibula ukuti “Lesa alipeemenemo.” Ishiwi lyapalako ilya ciGriki, pneuʹma, lipilibula “umupashi.” E co, ukutunga kwaba kwa kuti umupashi wa mushilo uwa kwa Lesa waseseshe bakalemba abantunse, kwati kubapeemena, pa kuti ifyo balemba fingetwa mu cine cine ukuti Cebo ca kwa Lesa, te ca muntu iyo. Mu cine cine, abengi abasambilila Baibolo balapapa pa fyo amabuuku yonse ayabamo yomfwana, fintu yaba iyalungika mu fya sayansi, ukukanapita mu mbali kwa bakalemba ba iko, ne cacindamisha, amasesemo ya iko ayafikilishiwa—ifi fyonse fyalishinina amamilioni ya babelenga ukuti ici citabo cafuma ku ntulo yasumbuka ukucila umuntu.a

Lelo bushe Lesa atungulwile imilembele ya Baibolo mu kupalamisha kwaba shani? Bamo batila aalelanda amashiwi ya mu Baibolo limo na limo. Bambi batila apuutilemo fye amatontonkanyo yasangwa muli Baibolo, te mashiwi iyo. Icishinka, nangu cibe fyo, ca kuti ukupuutwamo takwali fye mu nshila imo, pantu Lesa alelandila “kuli bashifwe muli bakasesema mu . . . misango iingi.” (AbaHebere 1:1; linganyeniko 1 Abena Korinti 12:6.) Mu cipande cikonkelepo, twalabebeta inshila shalekanalekana umo Lesa aalelandila ku bantunse mupepi na 40 abalembele Baibolo.

[Futunoti]