Icipandwa 18

Lenga Ukubombela Lesa Kuli Pe Na Pe Ukuba E Buyo Bobe

1, 2. Pa mbali ya kukwata uku ukwishiba Lesa, cinshi cimbi icifwaikwa?

ELENGANYA ukuti nuiminina pa ntanshi ya ciibi ca kwingilila mu muputule ukwetemo ifyuma ifingi lelo nacikomwa. Tutile umuntu umo uwakwato bulashi nakupeela amakii kabili nakweba ukubuulamo ifi fintu fya mutengo. Ayo makii te kuti yakwaafwe nangu panono kano nga wayabomfya. Mu musango umo wine, ufwile ukubomfya ukwishiba nga kuli no kukunonsha.

² Ici ca cine na kucilisha ukukuma ku kwishiba Lesa. Mu cine cine, ukwishiba Yehova Lesa na Yesu Kristu mu kulungika kutwala ku mweo wa muyayaya. (Yohane 17:3) Lelo, ilyo isubilo te kuti lifikwepo pa kukwata fye ukwishiba. Kwati fye fintu wingabomfya amakii ya mulimo ukalamba, ulekabila ukubomfya uku kwishiba Lesa mu bumi bobe. Yesu atile abalecito kufwaya kwa kwa Lesa “[bakengila] mu bufumu.” Abantu ba musango yo bali no kukwate shuko lya kubombela Lesa kuli pe na pe!—Mateo 7:21; 1 Yohane 2:17.

3. Cinshi caba ukufwaya kwa kwa Lesa kuli ifwe?

³ Pa numa ya kusambilila icaba ukufwaya kwa kwa Lesa, calikatama ukukucita. Bushe uletontonkanye fyo cinshi caba ukufwaya kwa kwa Lesa kuli iwe? Kuti casupulwa mu kulinga muli aya mashiwi: Ukupashanya Yesu. Petro wa Kubalilapo 2:21 atwebo kuti: “Ni ’ci cine mwaitiilweko; pa kuti na Kristu aculiile imwe no kumushile ca kumwenako, ukuti mukonke mu makasa yakwe.” Pa kuti ucite ukufwaya kwa kwa Lesa kanshi, ulekabila ukukonka ica kumwenapo ca kwa Yesu mu kupalamisha nga nshi. Iyo e nshila ya kubomfeshamo ukwishiba Lesa.

IFYO YESU ABOMFESHE UKWISHIBA LESA

4. Mulandu nshi Yesu aishibile fingi pa lwa kwa Yehova, kabili ni shani fintu aabomfya uku kwishiba?

⁴ Yesu Kristu e waishiba Lesa mu kupalamisha ukucila uuli onse umbi. Aikele na Yehova Lesa mu muulu no kubomba nankwe pa myanda mishila ya myaka ilyo talaisa pe sonde. (Abena Kolose 1:15, 16) Cinshi Yesu acitile na kulya kwishiba konse? Taikushiwe fye no kukwata kulya kwishiba. Yesu aikele ukulingana na kwene. E mulandu wine abelele uwa cikuuku nga nshi, uwatekanya, kabili uwa kutemwa mu mibombele yakwe yonse na bantunse banankwe. Muli ifyo Yesu alepashanya Wishi wa ku muulu no kubomba ukulingana na fintu aishibe inshila sha kwa Yehova ne mibele.—Yohane 8:23, 28, 29, 38; 1 Yohane 4:8.

5. Mulandu nshi Yesu abatishiwilwe, kabili aikele shani umwabela ubupilibulo bwa lubatisho lwakwe?

⁵ Uku kwishiba Yesu akwete na kabili kwamulengele ukucitapo icintu cimo icakakala. Afumine ku Galili no kuya ku mumana wa Yordani, uko Yohane amubatishe. (Mateo 3:13-15) Bushe ulubatisho lwa kwa Yesu lwali cishibilo ca cinshi? Pamo ngo mu Yuda, afyalilwe mu luko ulo kale kale ulwaipeele kuli Lesa. E co, Yesu ali uwaipeela ukufuma ku kufyalwa. (Ukufuma 19:5, 6) Ukupitila mu kuinashisha ku lubatisho, aleipeela kuli Yehova ku kucita ico Lesa alefwaya wene ukucita ilyo aali pe sonde. (AbaHebere 10:5, 7) Kabili Yesu aikalile umwabela ubupilibulo bwa lubatisho lwakwe. Alipilikite mu mulimo wa kwa Yehova, ukwananya ukwishiba Lesa ku bantu pa nshita iili yonse ashukila. Yesu alebekelwa mu kucita ukufwaya kwa kwa Lesa, ukusosa fye no kuti cali nge ca kulya cakwe.—Yohane 4:34.

6. Ni mu nshila nshi Yesu aikaanine umwine?

⁶ Yesu alilwike bwino bwino ukuti ukucita ukufwaya kwa kwa Yehova kwali no kuba ukwa mutengo nga nshi—ica kuti kwali fye no kumwipaisha. Nangu ni fyo, Yesu aliikene, ukubika ukukabila kwa pa lwakwe mu cifulo ca cibili. Lyonse atangisheko ukucita ukufwaya kwa kwa Lesa. Ni shani fintu twingakonka ica kumwenapo ca kwa Yesu icapwililika mu kucite ci?

IMIBOMBELE IYO ITWALA KU MWEO WA CIYAYAYA

7. Mibombele nshi umo alingile ukukonka nga alefwaya ukufikapo ku kubatishiwa?

⁷ Ifwe tatwaba nga Yesu, tatwapwililika kabili kuti twafikapo fye ku lubatisho, ulwaba e pa kwalukila, pa numa ya kukonke nshila shimo ishakatama. Ici citendekela pa kwingisha mu mitima yesu ukwishiba kwalungikwa pa lwa kwa Yehova Lesa na Yesu Kristu. Ukucite ci kutulenga ukuba ne citetekelo no kutemwa Lesa mu kushika. (Mateo 22:37-40; Abena Roma 10:17; AbaHebere 11:6) Ukumfwana na mafunde ya kwa Lesa, ifishinte, ne fipimo kulingile ukutulenga ukulapila, ukulumbulula ubulanda bwa bukapepa pa membu sha ku numa. Ici citungulula ku kupilibuka, uko e kuti ukusha inshila yalubana iili yonse iyo twaendelemo pa ntanshi ya kwishiba Lesa. (Imilimo 3:19) Mu cishinka, nga ca kuti mu bumfisolo tucili tuletwalilila ukulacito lubembu mu cifulo ca kucita icalungama, ninshi mu cituntulu tatwapilibuka, kabili tatulebepa Lesa. Yehova alamona ubumbimunda bonse.—Luka 12:2, 3.

8. Cinshi ulingile ukucita nga ca kuti ulefwaisha ukwakana mu mibombele ya kushimikila Ubufumu?

⁸ Nomba apantu ulasambilila ukwishiba Lesa, bushe tacili icisuma ukulanguluka ifyo wingakubomfya pa lobe? Napamo ulefwaisha ukwebako balupwa, ifibusa, na bantu bambi pa lwa fintu ulesambilila. Na kuba, napamo kale kale ulabashimikilako, kwati fye ni fintu Yesu ayakene imbila nsuma na bantu bambi nelyo ni lintu balelanda fye lyashi. (Luka 10:38, 39; Yohane 4:6-15) Nomba kuti pambi ulefwaya ukucita ifyafulilako. Baeluda ba Bwina Kristu bakaba aba nsansa ukulanda nobe pa kuti bengamona nga naufikapo kabili nga kuti wayakana mu mibombele ya lyonse iya kushimikila Ubufumu iya Nte sha kwa Yehova. Nga ca kuti naufikapo, baeluda bakatantika ukuti ukaleya na Nte mu butumikishi. Abasambi ba kwa Yesu bakonkele amakambisho yakwe pa kuti ubutumikishi balebomba bwingalaenda mu muyano. (Marko 6:7, 30; Luka 10:1) Ukanonkelamo mu kwaafwa kwapalako ilyo uleakana mu kwananya ubukombe bwa Bufumu ku ŋanda ne ŋanda no kubomfya inshila shimbi.—Imilimo 20:20, 21.

9. Ni shani fintu umuntu engaipeela kuli Lesa, kabili ni shani fintu ukuipeela kwambukila ubumi bwa pa lwakwe?

⁹ Ukushimikila imbila nsuma ku bantu ba misango na misango abekala mu cifulo ca kubombelamo ica cilonganino ni nshila ya kusangilamo abo abakongamina ku bulungami kabili ni cimo ica milimo isuma iya kushinina ukuti walikwate citetekelo. (Imilimo 10:34, 35; Yakobo 2:17, 18, 26) Lyonse ukusangwa ku kulongana kwa Bwina Kristu no kwakanamo kutuntulu mu mulimo wa kushimikila na sho shaba ni nshila sha kulangishishamo ukuti walilapila no kupilibuka kabili nomba upampamine pa kwikala ukulingana no kwishiba Lesa. Ni nshila nshi iya mano iikonkapo? Kuipeela kuli Yehova Lesa. Ici cipilibula ukuti mwi pepo lya kufuma ku mutima, waeba Lesa ukuti ulepeela ubumi bobe kuli wene ku kucita ukufwaya kwakwe mu kuitemenwa kabili no mutima onse. Iyi e nshila ya kuipeelelamo kuli Yehova no kupokelela ikoli lya kwa Yesu Kristu ilyayanguka.—Mateo 11:29, 30.

CINTU ULUBATISHO LUPILIBULA KULI IWE

10. Mulandu nshi ulingile ukubatishiwilwa pa numa waipeela kuli Yehova?

¹⁰ Ukulingana na Yesu, abo bonse abasanguka abasambi bakwe bafwile ukubatishiwa. (Mateo 28:19, 20) Mulandu nshi ici cabela icakabilwa pa numa waipeela kuli Lesa? Apantu waliipeela kuli Yehova, alishiba ukuti walimutemwa. Lelo mu kushininkisha kuti wafwaya ukubombelapo mu kulundapo pa kuti uleke bambi beshibe pa lwa fintu watemwa Lesa. Ulubatisho lulakupeela ishuko lya kulenga ukuipeela kobe kuli Yehova Lesa ukwishibikwa pa cintubwingi.—Abena Roma 10:9, 10.

11. Bushe ulubatisho lupilibula nshi?

¹¹ Ulubatisho lwaisulamo ubupilibulo bwa mampalanya. Ilyo uletumpwa mu menshi, nelyo “ukushiikwa,” cili kwati wafwa ukufuma ku nshila ya bumi iyo waleyamo kale. Lintu watumpulwa ukufuma mu menshi, cili kwati watumpwilwa ku bumi bupya, ubo ubutungululwa no kufwaya kwa kwa Lesa te kobe iyo. Kwena, ico tacipilibula ukuti calaala capwa tawalepanga filubo, pantu ifwe bonse tatwapwililika na muli ifyo tulabembuka cila bushiku. Nangu cibe fyo, pamo ngo mubomfi wa kwa Yehova uwaipeela, uwabatishiwa, ukaba nawingila mu kwampana kwaibela na wene. Pa mulandu wa kulapila kobe no kuinashisha mu lubatisho, Yehova aliba uwaitemenwa ukulekelele membu shobe pa cishinte ce lambo lya cilubula ilya kwa Yesu. Muli ifyo ulubatisho lulenga ukukwata kampingu wasanguluka pa cinso ca kwa Lesa.—1 Petro 3:21.

12. Cinshi cipilibula ukubatishiwilwa (a) “mwi shina lya kwa Tata”? (b) ‘mwi shina lya Mwana’? (c) ‘mwi shina lya mupashi wa mushilo’?

¹² Yesu akambishe abakonshi bakwe ukubatisha abasambi bapya “mwi shina lya kwa Tata ne lya Mwana ne lya Mupashi wa mushilo.” (Mateo 28:19) Cinshi Yesu apilibwile? Ukubatishiwa “mwi shina lya kwa Tata” cilangililo kuti umuntu ulebatishiwa alipokelela Yehova Lesa no mutima wakwe onse ukuti e Kabumba kabili mu kulinga e Mulopwe wa kubumbwa konse. (Ilumbo 36:9; 83:18; Lukala Milandu 12:1) Ukubatishiwa ‘mwi shina lya Mwana’ cipilibula ukuti uyo muntu alipokelela Yesu Kristu—no kucilisha ilambo Lyakwe ilya cilubula—nge nshila fye yeka iyo Lesa apayanishishamo ipusukilo. (Imilimo 4:12) Ukubatishiwa ‘mwi shina lya mupashi wa mushilo’ cilangililo kuti uulebatishiwa nailuka ukuti umupashi wa mushilo uwa kwa Yehova, nelyo amaka yabomba, e cibombelo Lesa abomfya ku kupwishishisha imifwaile Yakwe no kupeela ababomfi Bakwe amaka ya kucita ukufwaya Kwakwe ukwalungama mu kumfwana no kuteyanya Kwakwe ukutungululwa no mupashi.—Ukutendeka 1:2; Ilumbo 104:30; Yohane 14:26; 2 Petro 1:21.

BUSHE NAUIPEKANYA UKUBATISHIWA?

13, 14. Mulandu nshi tushilingile ukutiina ukusalapo ukubombela Yehova Lesa?

¹³ Apantu ulubatisho lwaisulamo ubupilibulo ifyo kabili e pa kwalukila pakatama mu bumi bwa muntu, bushe ninshi caba cintu ico ulingile ukutiina? Awe nakalya! Ilintu ukupingulapo kwa kubatishiwa takulingile ukusendwa mu kwanguka, ukwabulo kutwishika e kupingulapo kwa mano nga nshi uko wingacita.

¹⁴ Ulubatisho lupeelo bushininkisho bwa kuti nausalapo ukubombela Yehova Lesa. Tontonkanya pa lwa bantu waishibana na bo. Bushe umo na umo uwa bene mu nshila imo nelyo iyapusanako tabalebombela shikulu? Bamo babombela mamone. (Mateo 6:24) Bambi bakonkelela incito shabo ukupitila mu kulenga ukufikilisha ifintu balefwaya pa lwabo ukuba e cintu cakatamisha mu bumi. Bambi na bo bapepa tulesa twa bufi. Lelo iwe wasalapo ukubombela Lesa wa cine, Yehova. Takwaba uuli onse umbi uulangisha icikuuku cakulisha, icililishi, no kutemwa ukumucila. Lesa alicindamika abantunse pa kubapeela umulimo wakwata imifwaile uyo utungulula bene kwi pusukilo. Alambula ababomfi bakwe no mweo wa muyayaya. Mu kushininkisha, ukukonka ica kumwenapo ca kwa Yesu no kupeela ubumi bobe kuli Yehova te cintu ca kutiina. Na kuba, e nshila fye iitemuna Lesa kabili iya mano icine cine.—1 Ishamfumu 18:21.

15. Fipindami nshi fimo fyaseeka ificilikila ukubatishiwa?

¹⁵ Nalyo line, ulubatisho talwaba cintu ca kucita pa mulandu wa kupatikishiwa. Waba mulandu wa pa lobe na Yehova. (Abena Galatia 6:4) Ilyo ulelunduluka lwa ku mupashi, napamo kuti waliipushapo mu kupapa auti: “Cinshi cilendesha ukubatishiwa?” (Imilimo 8:35, 36) Napamo kuti waipusha auti, ‘Bushe ukukaanya kwa mu lupwa e kulencilikila? Bushe ncili ndaibimba mu mibele imo iishili ya mu malembo nelyo icibelesho ca lubembu? Bushe napamo ndatiina ukupatwa mu bwikashi?’ Ifi fili e fintu fimo ifya kutontonkanyapo, lelo fipimunune mu kubamo amano.

16. Ukanonkelamo shani mu kubombela Yehova?

¹⁶ Tacabamo amano ukupimununa fye amafya yakalaisa pa kubombela Yehova ukwabula ukutontonkanyapo pa lwa bunonshi bufumamo. Ku ca kumwenako, languluka pa lwa kukaanya kwa mu lupwa. Yesu alaile ati nelyo fye abasambi bakwe balufya balupwa pa mulandu wa kumukonka, baali no kunonka ulupwa lwakulilako. (Marko 10:29, 30) Aba basumina banobe bakakulangisha ukutemwa kwa bumunyina, ukukwaafwa ukushipikisha ukupakasa, no kukwafwilisha ukwenda mu nshila iitwala ku mweo. (1 Petro 5:9) Baeluda ba mu cilonganino na kucilisha e bengakwaafwa ukubomba ne mpika ne fya kucimfya amafya yambi mu kutunguluka. (Yakobo 5:14-16) Kumfwa ku lwa kupatwa ku calo, kuti pambi waipusha auti, ‘Cinshi kwena cingalinganishiwa ku kukwata ukusenamina kwa kwa Kabumba wa kubumbwa konse, ukumulenga ukusamwa pa nshila ya bumi nasala?’—Amapinda 27:11.

UKWIKALA UMWABELA UKUIPEELA KOBE NO LUBATISHO

17. Mulandu nshi ulingile ukumwena ulubatisho ngo kutendeka ukucila ukulumona nge mpela?

¹⁷ Calicindama ukwibukisha ukuti ulubatisho te mpela ya kulunduluka kobe ukwa ku mupashi. Lwishibisha ukutendeka kwa mulimo wa nshita ya bumi bonse kuli Lesa ngo mutumikishi wabishiwa kabili umo uwa Nte sha kwa Yehova. Nangula ca kuti ulubatisho lwalicindame cibi, talupilibulo kuti calaala capwa ukapusuka. Yesu tasosele ati: ‘Onse uwabatishiwa wene akapusuka.’ Mu cifulo ca ico, atile: “Uwashipikisha ukufika ku mpela, wene akapususuka.” (Mateo 24:13) Kanshi, calikatama ukuti ufwaye Ubufumu bwa kwa Lesa intanshi ukupitila mu kubulenga ukuba e cintu cakulisha mu bumi bobe.—Mateo 6:25-34.

18. Mabuyo nshi yamo aya kukonkelela pa numa ya kubatishiwa?

¹⁸ Pa kuti wingakoselela mu mulimo obe kuli Yehova, ukafwaya ukuimikila we mwine amabuyo ya ku mupashi. Ubuyo bumo ubwawamisha bwaba kwingilishako ukwishiba Lesa ukupitila mwi sambililo lya pa lobe ilya Cebo cakwe. Tantika ukulabelenga Baibolo cila bushiku. (Ilumbo 1:1, 2) Sangwa ku kulongana kwa Bwina Kristu lyonse, pantu ukubishanya ukasanga kulya kukakupeela ubukose bwa ku mupashi. Mulandu nshi te kucipangila ukuba ubuyo bobe ukwasukapo pa kulongana kwa cilonganino na muli ifyo ukulumbanya Yehova no kufwaya ukukuula bambi? (Abena Roma 1:11, 12) Ubuyo na bumbi kuti bwaba kufwaya ukuwamyako mu kulenga amapepo yobe ukubamo ubupilibulo.—Luka 11:2-4.

19. Mibele nshi iyo umupashi wa mushilo wingakwafwilisha ukulangisha?

¹⁹ Nga ca kuti uli no kwikalila umwabela ubupilibulo bwa lubatisho lobe, ulekabila lyonse fye ukusakamana pa lwa fintu ucita, ukuleka umupashi wa mushilo uwa kwa Lesa ukuletako muli iwe imibele pamo ngo kutemwa, ukusekelela, umutende, ukutekanya, icongwe, ubusuma, icishinka, ukunakilila, no kuteko mutima. (Abena Galatia 5:22, 23; 2 Petro 3:11) Ibukisha, Yehova apeela umupashi wakwe uwa mushilo kuli bonse abaupepela no kumumfwila pamo nga babomfi bakwe aba busumino. (Luka 11:13; Imilimo 5:32) E co pepa kuli Lesa ku kulombo mupashi no kwaafwa kwakwe mu kulangisha imibele imutemuna. Imibele ya musango yo ikatendeka ukumonekesha mu milandile yobe ne myendele ilyo ulebomba mu kumfwana no kusonga kwa mupashi wa kwa Lesa. Kwena, umuntu uuli onse mu cilonganino ca Bwina Kristu aletukuta ukulundululo “buntu bupya” pa kuti engacilamo ukupala Kristu. (Abena Kolose 3:9-14) Ifwe bonse umo umo tulalolenkana na mafya yapusanapusana mu kucite ci pantu twafika pa fipimo fyapusanapusana ifya kulunduluka kwa ku mupashi. Apantu tawapwililika, ufwile ukubombesha pa kuti wingakwata ubuntu bwapala ubwa kwa Kristu. Lelo te kwesha ukunenuka mu kucite ci, pantu kuti wacicita mu kuba no kwaafwa kwa kwa Lesa.

20. Ni mu nshila nshi umo wingapashanya Yesu mu butumikishi?

²⁰ Ukupashanya ica kumwenapo ca buseko ica kwa Yesu kulingile ukuba pa kati ka mabuyo yobe aya ku mupashi. (AbaHebere 12:1-3) Alitemenwe ubutumikishi. Nga ca kuti wapeelwe shuko lya kwakana mu mibombele ya kushimikila Ubufumu, lyene, te kwesha ukucilenga ukuba fye ica munsaunte. Esha ukusangamo ukwikushiwa mu kusambilisha bambi pa lwa Bufumu bwa kwa Lesa nge fyacitile Yesu. Bomfya amakambisho ayo icilonganino cipayanya ku kukwafwilisha ukuwamyako ilyo ulesambilisha. Kabili ba uwashininwa ukuti Yehova kuti akupeela amaka ya kufishapo ubutumikishi bobe.—1 Abena Korinti 9:19-23.

21. (a) Twaishiba shani ukuti Yehova amona abantu ba busumino ababatishiwa nga baumo mutengo? (b) Cinshi cilangisho kuti ulubatisho lwalikatama nga tuli no kupusunsuka ukuputunkanya kwa bupingushi bwa kwa Lesa pali ino micitile ya fintu iibifi?

²¹ Umuntu waipeela, uwabatishiwa uweshaesha mu busumino ukukonka Yesu aliba uwaibela kuli Lesa. Yehova alalengula imitima ya mabilioni ya bantunse bonse kabili alishiba ifyo abantu ba uyu musango tabafula, ba kamo kamo fye. Abamona nge cuma, “ifisuma.” (Hagai 2:7) Amasesemo ya mu Baibolo yalangisha ukuti Lesa amona abantu ba musango yo nga bashilwa akashilwa ka kupusunsuka ukuputunkanya kwa bupingushi bwakwe ubo buli no kwisa nomba line pali ino micitile ya fintu iibifi. (Esekiele 9:1-6; Malaki 3:16, 18) Bushe ‘mu bulungami walikongamina ku kuya mu mweo wa muyayaya’? (Imilimo 13:48, NW) Bushe mu kuswatuka ulafwaisha ukushilwa akashilwa ngo ubombela Lesa? Ukuipeela no lubatisho fyaba lubali lwa kalya kashilwa, kabili fyaliba ifyafwaikwa ku ulefwaya ukupusuka.

22. Cinshi cintu “ibumba likalamba” lingenekela mu buseko?

²² Pa numa ya Lyeshi lya mu cibulungwa conse, Noa no lupwa lwakwe bafumine mu cibwato no kwikala pe sonde lyasangululwa. Mu kupalako ilelo, “ibumba likalamba” ababomfya ukwishiba Lesa mu bumi bwabo no kunonka ukusuminisha kwa kwa Yehova balikwata isubilo lya kupusunsuka impela ya ino micitile ya fintu iibifi no kuilemena umweo wa muyayaya pe sonde ilyo ilikaba ilyasangululwa pe. (Ukusokolola 7:9, 14) Bushe bulya bumi bukaba shani?

MONA NGA NAWISHIBA

Ni mu nshila nshi Yehova afwaya ukuti ubomfye uku kwishiba wakwata pa lwa wene?

Mibombele nshi imo iitungulula ku lubatisho?

Mulandu nshi ulubatisho lushabela e mpela lelo lwaba e kutendeka?

Ni shani fintu twingekala umwabela ukuipeela kwesu no lubatisho?

[Icikope pe bula 172]

Bushe waliipeela kuli Lesa mwi pepo?

[Ifikope pe bula 174]

Cinshi cilekulesha ukubatishiwa?