Ifipusho Ukufuma ku Babelenga

Yohane wa Ntanshi 4:18 atwebo kuti: “Mu kutemwa tamuli mwenso; lelo ukutemwa ukwafikapo kufumyo mwenso.” Lelo Petro alembele ukuti: “Temweni aba bwananyina. Tiineni Lesa.” (1 Petro 2:17) Ni shani fintu twingampanya ifi fikomo fibili?

Bonse babili Petro na Yohane baali batumwa abasambilile mu kulungatika kuli Yesu Kristu umwine. Muli fyo kuti twaba abashininkisha ukuti cintu balembele cilomfwana. Ukukuma ku fikomo ifyambwilwe pa muulu, icasuko cili ca kuti abatumwa babili balelanda ulwa misango yapusanapusana iya mwenso.

Natubale tulanguluke ukufunda kwa kwa Petro. Nga fintu amashiwi yashingulukako yalangilila, Petro alepanda Abena Kristu banankwe amano yapuutwamo ukukuma ku mibele yabo ku baletungulula. Mu mashiwi yambi, alelanda pa lwa mimwene yalinga iya kunakila mu ncende shalekanalekana. Muli fyo, apandile Abena Kristu amano ukunakila abaume abaleteka mu mabuteko ya buntunse, pamo nga imfumu nelyo bakateka. (1 Petro 2:13, 14) Ukutwalilila, Petro alembele ukuti: “Cindikeni abantu bonse. Temweni aba bwananyina. Tiineni Lesa. Cindikeni imfumu.”—1 Petro 2:17.

Ukulanguluka ifyashingulukako, cili icamonekesha ukuti lintu Petro asosele ukuti Abena Kristu balingile ‘ukutiina Lesa,’ apilibwile ukuti tulingile ukukwata umucinshi washika, uwa kucindikisha kuli Lesa, umwenso wa kukanafwaya ukufulwisha kateka wapulamo.—Linganyako AbaHebere 11:7.

Ni shani pa lwa kulandapo kwa mutumwa Yohane? Mu kubangilila muli 1 Yohane icipandwa 4, umutumwa alandile pa lwa kukabila kwa kulinge “mipashi” ukupala ilya iifuma kuli bakasesema ba bufi. Iyo mipashi mu cine cine taifuma kuli Yehova Lesa; ifuma nelyo ibelebesha icalo cibifi.

Mu kupusanako, Abena Kristu basubwa “ba kwa Lesa.” (1 Yohane 4:1-6) Apo cabe fyo, Yohane acincishe ukuti: “Mwe batemwikwa, tutemwane; ico ukutemwa kwa kwa Lesa.” Lesa e watendekelepo ukulanga ukutemwa—‘atumine Mwane icikonsolwelo ca pa membu shesu.’ (1 Yohane 4:7-10) Ni shani fintu tulingile ukwankulako?

Mu kumonekesha, tulingile ukutwalilila ukumfwana na Lesa wesu uwa kutemwa. Tatulingile ukutiina nelyo ukututuma lintu tulefwaya ukumutununuka mwi pepo. Mu kubangilila Yohane afundile ukuti: “Nge mitima yesu taituseka, twaba no kupama ku kupalamina kuli Lesa; kabili conse ico tulomba tupokelela kuli wene, ico tubaka amafunde yakwe.” (1 Yohane 3:21, 22) Ee, kampingu musuma atupeela ubuntungwa bwa kutununuka Lesa ukwabulo mwenso wa kufwa umutombo nelyo uwa kutucincintila. Pa mulandu wa kutemwa, tuyumfwa abakakuka ukulanda kuli Yehova, nelyo ukumutununuka, mwi pepo. Muli kuno kuloshako, “mu kutemwa tamuli mwenso.”

Natwikatanye nomba amatontonkanyo yabili. Umwina Kristu afwile ukukwata akatiina ka kucindikisha aka kuli Yehova, akesako kufuma ku mucinshi washika uwa cifulo cakwe, amaka, no bulungi. Lelo na kabili twalitemwa Lesa pamo nga Shifwe kabili tulayumfwa abapalamisha kuli wene kabili twaba abapama ukumutununuka. Mu cifulo ca kucincintilwa no munsokwe uuli onse uwa kutiina wene, twacetekele fyo kuti twamutununuka, nga fintu umwana ayumfwa uwakakuka ukutununuka umufyashi wa kutemwa.—Yakobo 4:8.