Bushe Kuti Mwayafwa?
1 Yehova lyonse fye alafwaya inshila sha kwafwilamo ababomfi bakwe aba cishinka. (2 Imila. 16:9; Esa. 41:10, 13) Esaya amupashenye kuli kacema uusakamana ilyo alembele ati: “Ku kuboko kwakwe aulonganya, asendela pa cifuba cakwe abana ba mpaanga, ne shonsha ashitungulula bwino bwino.” (Esa. 40:11) Natulande pa nshila isho twingapashanyamo ukutemwa kwa kwa Yehova.
2 Afweni Abapya: Kuti twayafwa abapya ilyo twabeta ku kuipakisha ukuba pamo na bo ukwingabakuulilila. (Amapi. 13:20) Munyinefwe umo alondolola ifyo aba bwananyina bamwafwile ilyo atendeke ukulongana ne cilonganino, atila: “Ilingi line kwaleba ulupwa lumo ulwalenjeba ukuti ndesangwa pe sambililo ilya lupwa lwabo. Ilyo nalelunduluka, bapainiya abaupana balefwaya ukuti ndebomba na bo lyonse mu mulimo wa kushimikila akasuba konse. Lyonse fye twalelanshanya pa fisuma ifya ku mupashi.” Kabili atwalilila ati: “Ilyo nshilaba Umwina Kristu, naleangala sana inshita ya bushiku pa nshiku sha pali Cisano na pa Cibelushi. Lelo ukusangwa na ba bwananyina kwalengele naleka ukufuluka ukwangala kwa bushiku.” Ukutemwa kwa baba mu cilonganino kwayafwile uyu munyinefwe ukuba ne citetekelo cakosa no kushipa, kabili pali ino nshita abombela pa Bethel.—Kol. 2:6, 7.
3 Kuulaneni: Nalimo kuti kwaba inshita ya kwafwa aba bwananyina ilyo balepita mu mafya yalekanalekana. Bushe kuti mwapekanya ukubomba na kasabankanya uo amaka yele yalepwa mu kushimikila abantu pali lamya nelyo bushe kuti mwamwita ukuti asangweko ilyo muletungulula isambililo lya Baibolo, nelyo fye ukutwala umusambi ku ng’anda ya kwa uyu kasabankanya wanakuka? Bushe umufyashi uwaba na bana banono na o kuti akabila ukwafwa ilyo alebomba umulimo wa kushimikila? Bushe kuti kwabako bamo bamo abayumfwa kwati tabafikapo abengakabila ukwafwa kwenu ilyo balecita ifipempu fya kubwelelamo nelyo ilyo balebomba imilimo imbi iya kushimikila? E ico ukutemwa aba bwananyina, kukatulenga ukulafwayafwaya inshila sha kubakuulilamo.—Rom. 14:19.
4 Ilyo tulepashanya Yehova mu fyo asakamana ababomfi bakwe mu kunakilila, tulakoshanya, tulalenga icilonganino ukuba icaikatana mu kutemwa, kabili tulacindika Shifwe wa ku muulu.—Efes. 4:16.