Langeni Ukuti Mulasakamana Abantu—Ku Cikuuku Cenu

¹ Umwanakashi umo uwapatile baNte alanda ifyo cali ilyo alanshenye na Nte umuku wa kubalilapo, atila: “Nshibukisha bwino ifyo twalandilepo, lelo ico njibukisha ca kutila ulya Nte ali uwa cikuuku ne cileela kuli ine, kabili ali uwaicefya. Nalimutemenwe sana.” Aya mashiwi yalelanga ico ukusakamana balya tushimikila kwawamina.—Fil. 2:4.

² Ukutemwa Kwa Cikuuku: Inshila imo tulangilamo ukuti twalitemwa abantu kuba ne cikuuku. (1 Kor. 13:4) Uwa cikuuku alasakamana bambi, no kufwaya sana ukubaafwa. Kwena ca cine ukuti ukushimikila mulimo ulanga ukuti tuli ba cikuuku. Nomba, te kubashimikila kweka kulanga ukuti twalibatemwa. Fyonse ifyo tucita ilyo tuli na bambi—bucibusa bwesu, imibele yesu iisuma, ifyo tukutika, ifyo tulandapo ne milandile yesu, ne fyo fye tulolesha bambi, fikalanga ukuti tulasakamana.—Mat. 8:2, 3.

³ Ukusakamana abantu bambi kukalenga no kuti tulebafwa mu nshila shalekanalekana. Ilyo munyinefwe painiya aleshimikila ku ng’anda ne ng’anda, mukamfwilwa umukoloci alikeene ukukutika ilyo fye aishibe ukuti ni Nte alelanda nankwe. Atile aali pa mutanto mu kicini alebika ikolobo ilyo munyinefwe akonkonseshe. Munyinefwe atile, “te kuti cibe bwino ukubomba mweka uyu mulimo.” Uyu nakulubantu aebele munyinefwe ukwingila mu ng’anda. Munyinefwe alisokwele ikolobo no kubika limbi no kuya aya. Ilyo umwana wa kwa uyu nakulubantu apitile pa ng’anda ku kumupempula, nakulubantu amwebele icacitike. Umwana alitemenwe sana ica kuti atile akafwaya uyu munyinefwe pa kuti akamutashe. Muli ci mwafumine ukulanshanya ukwalengele umwana asumine ukusambilila Baibolo.

⁴ Nga twaba ne cikuuku, tulanga ifyo Yehova atemwa abantu kabili tulenga imbila ya Bufumu ukuwama. E ico, lekeni lyonse “tuleishininkisha fwe bene nga bakapyunga wa kwa Lesa . . . mu cikuuku.”—2 Kor. 6:4, 6.