Ukufumya Ifilangililo Ku Fintu Abantu Baishiba

KWENA, calicindama nga nshi ukuti ifilangililo fyonse mwabomfya fyalingana ne fyebo mulelandapo. Lelo pa kuti fifike abantu pa mitima, calicindama no kuti filinge abo mulelandako.

Nga mulelanda kwi bumba, ni shani fintu abali mwi bumba bengakumwa ku filangililo muli no kusala? Cinshi Yesu Kristu acitile? Ilyo alelanda ku mabumba atemwa ku basambi bakwe, Yesu talebomfya ifya kumwenako fya mikalile ya mu fyalo fya ku nse ya Israele. Ifya kumwenako afiba fya musango yo, abo alelandako nga balifilubile. Ku ca kumwenako, Yesu talandilepo pa mikalile ya mwi sano lya mu Egupti nelyo pa mipepele ya ku India. Nalyo line, ifilangililo fyakwe fyali pa milimo iyo abantu abengi bacitako mu fyalo fyonse. Alandile pa lwa kubila ifikamba pa nsalu, ifya kucita amakwebo, ukulufya ica mutengo, na pa kusangwa ku mutebeto wa bwinga. Alishibe ifyo abantu balecita ilyo balepita mu fyalekanalekana, kabili alebomfya ubu bwishibilo mu filangililo. (Marko 2:21; Luka 14:7-11; 15:8, 9; 19:15-23) Apo ukushimikila kwakwe ukwa ku cintubwingi kwalungatikwe sana ku bena Israele, ifilangililo fya kwa Yesu ilingi line nga nshi fyali pa fintu nelyo pa milimo iyo balya bantu balecita mu mikalile yabo. E co alandiile pa fintu pamo ngo bulimi, ifyo impaanga shankula ku mucemi wa shiko, na pa lwa kubika umwangashi mu nyambi. (Marko 2:22; 4:2-9; Yoh. 10:1-5) Alandile na pa fyacitike ku kale ifyo abantu baishibe. Fimo fimo alandilepo fyali kubumbwa kwa bantunse babili aba kubalilapo, Ilyeshi lya mu nshiku sha kwa Noa, ukonaulwa kwa Sodomu na Gomora, ne mfwa ya kwa muka Lote. (Mat. 10:15; 19:4-6; 24:37-39; Luka 17:32) Bushe na imwe pa kusala ifilangililo mulatontonkanya bwino pa fintu abali mwi bumba baishiba ne ntambi bakulilamo?

Ni shani nga tamulelanda kwi bumba, lelo mulelanda no muntu umo napamo ku banono fye? Esheni ukusala icilangililo icingalinga bwino abo bantu. Ilyo Yesu aleshimikila ku mwanakashi umwina Samaria pa cishima mupepi na ku Sukari, alandile pa lwa “menshi ya mweo,” ‘ukukanaumfwe cilaka kabili,’ na pa “cishima ca menshi ayalefukaukila ku mweo wa muyayaya,” kabili ifi fyonse fyali mampalanya ayalingana na cintu ulya mwanakashi aile mu kucita ku cishima. (Yoh. 4:7-15) Kabili ilyo alandile na baume abalesamba amasumbu yabo, amampalanya acitile yali pa lwa bulondo. (Luka 5:2-11) Afwaya, ponse pabili nga alandile pa lwa bulimi, apo baleikala mu ncende ya bulimi, lelo calibombele bwino sana ukulanda pa milimo balebomba pantu calengele belenganye ifyo alelanda! Bushe mulatukuta ukucite fyo?

Yesu apoosele sana amano ku “mpaanga ishaluba isha ng’anda ya kwa Israele,” lelo umutumwa Paulo wena atuminwe ku bena Israele e lyo na ku Bena fyalo. (Mat. 15:24; Imil. 9:15) Bushe ici calengele Paulo ukulanda mu nshila yapusanako? Ee. Ilyo alelembela Abena Kristu mu Korinti, alandile pa kucimfyanya kwa lubilo, pa kulya ifilyo mu matempele ya tulubi, kabili alandile pa fyo abalecimfya baleenda mu mulongo, ifintu ifyo balya Bena fyalo baishibe.—1 Kor. 8:1-10; 9:24, 25; 2 Kor. 2:14-16.

Bushe na imwe mulapoosako amano pa kusala ifilangililo ne fya kumwenako fya kubomfya mu kusambilisha nge fyo Yesu na Paulo balepoosako amano? Bushe mulatontonkanya pa nkulilo ne milimo bakomfwa wenu babomba cila bushiku? Kwena, ifintu fyalyaluka mu calo ukufuma mu mwanda wa myaka uwa kubalilapo. Abengi balatambako ilyashi lya pano isonde pa televishoni. Ilingi line baleshiba ifilecitika mu fyalo fimbi. Nga e fyo caba uko mwikala, te kulufyanya nangu panono ukulanda pali fyo fintu mu filangililo fyenu. Lelo, ifintu fifika sana abantu pa mitima ilingi line ni filya bacita na bo mu mikalile yabo—ifya pa myabo, mu lupwa lwabo, incito babomba, ifilyo balya, imiceele ya ku cifulo bekala.

Nga mwasanga ukuti icilangililo cenu cilekabila mulondolole ifingi, ninshi abo mulelandako napamo tabaishiba ico cintu. Icilangililo ca musango yo kuti cafimbilikisha ne cishinka mulesambilisha. Ici kuti calenga ibumba lyalaibukisha icilangililo lelo ukulaba icishinka ca mu Malembo ico mwalefwaya ukusambilisha.

Yesu talepikanya pa kulinganya, lelo alandile pa fintu fyayanguka, ifyaseeka. Alandile pa tuntu tunono ku kulondolola ifikalamba kabili alandile ifyayanguka ku kulenga ifyakosa ukumfwika. Yesu alelinganya ifintu fyaseeka ificitika ku cine ca ku mupashi no kufibomfya ku kwafwa abantu ukumfwikisha mu kwanguka icine ca ku mupashi ico alesambilisha no kuciibukisha. Mwandi ca kumwenako cisuma ukupashanya!