Februari

Nuh dakfawi ḇyawes wai ḇeba ro ras oso ḇaime. Fandun fa ikyar faro Yahwe I ma ifrur roi nakam ’imnis’ kuker rosai Yahwe ikofenna. Bon ya, wai ḇeba ani fyaspar Nuh ma kina ḇyesya! Nuh i kako ifarkorpyum romawa ḇyesya snar ikyar faro Allah fawawi Ḇyena. Sikenem ro fafisu ḇesamswen rofyor Faḇruḇ ḇeba ryama ḇaim raryano, Nuh ifarkorpyum romawa ḇyesya ma ḇyuk contoh ḇepyum faro si. (Kej. 6:5) Auma sinan ido, rariso waso Nuh contoh ḇyedi rofyor wafarkor romawa Bedi? Rwower rosai Yahwe ikofenna, waso ananun ro Wos Ḇyena ma organisasi Ḇyedi. Kakuḇae, sinansya imbude sḇensewar kwar fa sifarkor romawa sesya, ḇape imbude ras oso romawa ani kyinfir fa ibur Yahwe I. Ḇape, rofyor sinansya sḇensewar kaku nari sna sneuser ḇesren ma sikyar romawa sesya nari kyaḇer ḇe Yahwe I. w18.03 30 ¶10, 11

Fafisu oso wamarisen wor snonkaku sya sedakam Au, ḇape imbude ḇaḇir nwa roi nabor ḇa ro rum Bedi. Osower ido, wamai ma ḇeḇirḇar snonkaku ani imarisen ḇyarek kawan ro rum Bedi ḇa. Ḇaido nwa pipi nabor ḇa ma jadifa ḇuk roi nabor syadi imnis kuker snonkaku ḇesesya sḇukna. Snonkaku ḇedakam Au ani, myam ro rum ḇepyum Bena ḇa. Snar roi fyandun na iso frurpyum Bedi ma myam rum Bedi isren. Ḇeḇirḇar awer rofyor nwa roi nabor ḇa, snaro roi ḇefandun yaiso saswar Bedi faro snonkaku ḇedakam Au sya. Ko kako fandun fa komam pyum snonkaku ḇedakam ko sya. (Flp. 2:4) Snonkaku ḇebor sya simarisen sfawar pengalaman sena. Na korower pyum farfyar sena rofyor kokainus kuker si. Penatua oser fyas, ”Rofyor naek srar sya srama ḇe rum yedi, ine nafnoḇek ayafa yamambir si ma yafawi rariso sifarkor napnapes ya.” Rofyor wafasna sneḇenaḇye faro snonkaku ḇedakam Au sya ido, nari nafrur snonkaku syakam simarisen sḇebati kuker Au. w18.03 18-19 ¶15-17

Sinan ḇesesya simarisen sifnoḇek romawa sesya fa sun snemuk ḇepyum. Rofyor romawa oso ḇyeḇirḇar ḇa fa ḇyebaptis, ḇape alasan ḇekaku nasya fa iwaf ido, bisa kyara mnis resari. Snar ḇaḇeoser ḇyena kuker Yahwe nari nasambraḇ ḇa. (Yak. 4:17) Ḇape, rofyor romawa ani ḇyebaptis ḇaim, sinan ḇena fawawi sya nari skara mnis resari romawa ani ḇyensewar fa ḇyemanfamyan faro Kristus kwar ke roḇa. Pengawas wilayah ḇeḇeso smam romawa babo ḇeḇeumur fanam ḇe taun ri 20 ḇaido syadi, siba ro napnapes ya mboi sebaptis ḇaime. Ro ras ḇe ras romawa ansine siso fananjur, siḇaryas, ma skara sima se Saksi Yahwe kwar. Ḇape, sḇuk farsamsyom mankun sena ḇe Yahwe ma sebaptis ḇaime. Snaro sinan sesya skara sna fawawi nabor ḇaim fa sebaptis. w18.03 9-10 ¶1, 2

Insama kofawi nyan Kristus ḇyedi fandun kaku kofarkor kakara ḇyena, sneḇaḇir, ma rosai ifrurna. Yesus iswar kaku fasfesepen ḇyedi kuker Yahwe I, ine ḇyefandun syadi ro rosai riryakam. Inja, rofyor koso Yesus nyan ḇyena ido, imnis raris koso Yahwe nyan Ḇyena kako. Iso ḇefnai fa fandun kaku kona Kristus kakara ḇyena. Rariso kakfarari Yesus i? Rofyor ifarmyan ro supswan, manfamyan ḇyesi smam ifrur mujisat, fyarkor snonkaku ḇeborsya, rariso ifrurpyum snonkaku sariryakam, ma smam rariso Yahwe fyarkin i kuker rur ḇesren ya. (Farfyar 10:39) Kirine na komam Yesus i ḇa. Ḇape na komambir pyum Yesus i ma kofawi kakara ḇyena rofyor kowasya ma kowasenkara injil rifiak, isoine Matius, Markus, Lukas, ma Yohanes. Inja nari ’koso wewur ḇyena’ ma kofarari nyan ”kakara” ḇyena.​—1 Ptr. 2:21; 4:1. w18.02 20-21 ¶15, 16

Fafisu Adam ma Eva suna romawa, snonkaku sya sifawi Yahwe I roro nyan rikior, isoine roro ḇraur Ḇyeja, manfamyan ḇesouser Ḇyesya, ma fainda sismana snar sisouser I. (Yes. 48:18) Rofyor Nuh myam Allah braur Ḇyena, ikyar kaku Allah ima isya ma i kako fyarkor Allah rari-rari Ḇyena. Inja, ine nafnoḇeki fa ifawi Yahwe ima syambraḇ kaku ma iso monda Allah ḇekakuya. (Rm. 1:20) Ḇape, Nuh ikyar faro Allah monda ḇa, mboi fyaduru pdef kakyar ḇeba ḇyedi faro I. Imbude Nuh fyarkor fa ifawi Yahwe ro kina ḇyesya. Kmari Lamekh i, ikyar faro Allah ma ḇyeḇeaben rofyor Adam imar ḇaim. Apus ḇyedi isoine Metusalah i ma kpu up ḇepon ḇyedi Yeret i, sumar fafisu taun ri 366 fyor Nuh ḇyeḇeaben kwar. (Luk. 3:36, 37) Nuh iswar rosai fyarkorna, inja nadif i fa ifarmyan ḇe Yahwe I.​—Kej. 6:9. w18.02 10 ¶4, 5

Rofyor naek ḇaido srar Kristen koḇesya ḇaido min ro kina koḇesi sifrur ḇaido sikofen roi ḇefrur dosam sne koḇena ido, na komsor kaku. Rariso rofyor koḇefnder ḇaḇeri rosai sifrur ḇe ko na? Nari kokram masasor ani taun ḇe taun ke? Ḇaido na koso ananun ḇero Refo insama kofrur mnis kaḇer famfaḇri naḇeri ke? Kawos fasaw ḇe snonkaku ani ḇa ido, nari samswen ḇe ko fa koḇedame kuker snonkaku ani. Rosai nari kofrur ya insama koḇedame? Randak ya, koḇenadi ḇe Yahwe I. Kor fafnoḇek ro I insama kawos mnis kuker naek ḇaido srar ḇefrur dosam ko ani. Koswarepen naek ḇaido srar ani kako Yahwe bati Ḇyedirya. (Mz. 25:14) Allah iswari ma fyasna ḇaḇenaḇye faro bati ḇyedine kako, ma imarisen kakfasna roi ḇemnis kako. (Ams. 15:23; Mat. 7:12; Kol. 4:6) Ḇesuru ya, kokara mnis kaku rosai imbe kokofen ḇe naek ḇaido srar ani. Kokara fasaw awer imbe ifrur dosam ko. Imbude kofawi mnis ḇaim rosai ḇeḇejadiya. Ma komarisen kokofenḇair ko kako kosasar. w18.01 7 ¶15, 16

Allah manfamyan Ḇyesi siḇesebur snonkaku ḇero dunya inensya snaro sfasna saswar ḇekaku ḇe ḇesesya. Ine nasnaibos kaku kwar. Kakuya, Yesus ikofen ro Sasoser Moses saswar faro Allah iso sasoser ḇefandun syadi ro saswar faro snonkaku. (Mat. 22:38, 39) Yesus ikofen kako snar snonkaku Kristen ḇekaku na sifawi si ro saswar sifasna faro oser ma ḇesesya. (Yoh. 13:35) Iba syadiwer na siswar mbroḇ sesi. (Mat. 5:43, 44) Yesus fyasna snar iswar kaku snonkaku ḇesesya. Fyasna roi ine kuker imbranyar kota ma kota nakam fa ikofenḇair ankankinem ḇeḇye Karajan Allah. Ḇyuk pararei faro ḇepraf, ḇepapipen, ḇeduf pado ma ḇeproi sya. I kako ḇyawes snonkaku bemar kwar sya. (Luk. 7:22) Iba syadiwer Yesus ḇyuk kankenem ḇyedi fa fyaspar snonkaku syakam. Yesus fyari mnis kaku Kmari saswar Ḇyedi. Ro supswan ḇesiper Saksi-Saksi Yahwe sifarari Yesus i ma sfasna saswar faro ḇesesya. w18.01 30 ¶11, 12

Komarisen koḇebaptis fyor kobabo kaker. Ḇape, kofawi ḇa rosai farawrowes ro kakyar koḇedi kosma ro fafisu iyama. Insama kosouser pdef, koswarepen asas kofrur faro Allah Bena Papoik, infa kofarmyan ḇe I pdef iba syadiwer rofyor bati ḇaido sinan koḇesya sifarmyan ḇe I werḇa. (Mz. 27:10) Rosai monda wasma ya, waḇefnder awer fa wor fafnoḇek ro Yahwe insama wafrur asas Bedi faro I. (Flp. 4:11, 12) Yahwe imarisen insama koḇebati kuker I. Ḇape, nefandun sasewar koḇena insama kofaduru ḇaḇebati koḇena syambraḇ syadi ma kosma fasaspar. Ro Filipi 2:12 ikofen, ”Mko fararur faswef ro sasewar [kankenem] mkoḇena kuker makakak ma araryof.” Inja, kowasenkara nyan rariso insama kofanam syadi kuker Yahwe I ma kosouser ḇe I ro fafisu sariryakam. Kokyar awer faro mankunko kuker kokara na kofrur sasar ḇa. Koswarepen, Saksi Yahwe ḇeḇeso ḇefyoro kwar ro napnapes si kako bisa sisapi ro sasarya. w17.12 22, 23 ¶4, 6, 7

Yahwe ḇyuk fakamaman ma swaf ḇe ko fa kosaramper fararur ḇeba Karajan. Ḇyuk kakakyar ḇe ko rofyor kofrurna ido, nari ḇyuk barakas ḇe ko. (Mal. 3:10) Yahwe Ḇyeasas snar koḇuk kuker snemura ido, na kopok kokananjar ḇa. (Ams. 11:24, 25) Ikofen kako fyor koḇuk ido na komarisen, snaro ”ipyum syadi ro koḇuk ya ro kosma ya.” (Farfyar 20:35) Ro rosai kokofen ma kofrur na, na kofarkor romawa koḇesya ma ḇefarkor babosya nyan fa sḇuk farsarser faro fararur ine ma sna barakas ḇebor. Roi kosmana kam ndramuma ro Yahwe nairi. Ḇape, koḇuk kaḇer ḇe I ido, kofasna koswar I ma kosyowi roi ifrur kam ḇe ko na. Rofyor snonkaku Israel sḇuk farsarser faro ḇaḇawes bait ya, ”siryaḇ faro farsarser sḇuk kuker marisen na.” (1 Taw. 29:9) Iḇye kada kosma raryaḇ ma marasrisen pdef rofyor koḇuk kaḇer faro Yahwe roi ḇyuk kwar ḇe ko na. w18.01 20 ¶18, 19

Kaḇakḇok ḇerandak ḇe nanki ḇyejadi rofafisu Kristus kyaḇer muma wer. Snonkaku ḇena ramrem ḇekenem ro fafisu ḇaḇekandera ḇeba ya nari ’ḇeḇekanow . . . ḇemandep ro farsyos’. (1 Tes. 4:13-17; Mat. 24:31) Si ’ḇeḇekanow’ ’nari simar kamḇa’. Ine kyurfasna nari simar ro fafisu ḇekwan ḇa. Mboi sikam ’siḇe ḇesadwer. Roi ḇeḇesya ani nari ryarirya imnis arḇeḇer, rofyor kḇurya ryok papupes.’ (1 Kor. 15:51, 52) Kirine, snonkaku Kristen ḇebor sya sisma ramrem ḇa ma skinfir si ḇa fa sḇepoik fnoḇek Kristus ro nanki. Ḇape, siwaf ”ras [Yahwe] ryamumaya”, isoine fafisu dunya ḇeḇarḇor neḇepyos kame. Snonkaku oso ḇaḇeri ḇefawi mnis papupes dunya ine nari ryama ya. Ḇape, aḇyair nabor nfasnaḇair snar papupes ani fyanam kwar. (1 Tes. 5:1-3) Rofyor dunya babo Allah ryama, nari kaḇakḇok ḇese nasya wer. Ro fafisuya, snonkaku nari sḇeḇeḇawes kaḇer ro supswan ma sisma saneraro fa sḇe snonkaku ḇenapes ma simar werḇa. w17.12 25, 26 ¶15, 18, 19

Rofyor koḇensewar kaku fa kofasna saswar ma sneḇenaḇye nari komasasor fasawḇa. Refoya ikofen ḇo doḇe, ”Saswar ani kaḇaḇaḇ ma ḇaḇenaḇye. Saswar ani isasyar kuker sasuremḇa.” (1 Kor. 13:4) Insamaido sne ḇemasasor ine nerares ro sne koḇena ḇa ido, fandun fa komam rosai monda imnis Yahwe mamam Ḇyeja. Kokame koḇebaken oser, isoine sidang ya. Refoya ikofenbadir, ”Rofyor kina oso ḇyeḇesandik, kina ḇesenakam nakraḇ kako.” (1 Kor. 12:16-18, 26) Inja, rofyor oso ro naek srar kobansi isma roi ḇepyum ido, kokame nari komarisen ma kokram masasor faro i ḇa. Kokarapan farari ḇepyum ro Raja Saul romawa ḇyedi, Yonatan i. Yonatan ḇyeḇekinfir ḇe raja ḇa raryano, imsor faro Daud i ḇa rofyor Daud ḇyeḇekinfir ḇe raja. Iba syadiwer syambraḇser ma isaramper Daud i. (1 Sam. 23:16-18) Bisa kofarari sneḇenaḇye ma saswar Yonatan fyasna na ke? w17.11 29-30 ¶10, 11

Yahwe fyasepen ḇaḇeasas Sasoser ḇe ko ro Wos Ḇyena, Refoya. Imarisen insama kofawi ma kombranser na ḇe ”roi ḇefandun kaku”, isoine farkankin-farkankin ḇekainsero sasoser Taurat. (Mat. 23:23) Sasoser Moses naser ”fawawi ma farkarkor ḇenapesya”. Sasoser ani fyarkor ko kuker Yahwe ma farkankin-farkakin Ḇyena. (Rm. 2:20) Kota ḇekadaunwarek ine nfasnaḇair Sasoser ḇefarkor moḇsa penatua sya ”smankara kuker nanapes”. Kota ḇekadaunwarek ine kako fyarkor kokam fa kofasnai ”saswar soasuser ma sawarwar”. (Za. 7:9) Imbo, kona fesepen kuker sasoser Taurat nane werḇa. Ḇape, Yahwe fyadwer mamam Ḇyenaḇa. Nanapes ma sawarwar nefandun kaker faro I. Inja, kokofen kasumasa nabor snar kosyom Allah ḇemnis radirya. Koso rari-rari ḇeba Ḇyenane ma kosewar fadadiren ro I! w17.11 15-16 ¶2-3; 20 ¶18, 19

Naek ḇeyun faya sya fandun smam mnis kaku insama Refo ima bar ḇefandun kaku ro faya sena. (Yoh. 7:16) Inja, fandun fa mam mnis kakuna. Waswarepen insama pengalaman ḇaido sararḇer buk ro faya Bedi ḇaido nyan rariso wun fayaya napyum syadi awer ro Refoya. Waswarepen kako wawasya Refo monda nama namnisḇa kuker buk farkarkor ro Refoya. Snaro, rofyor kowasya mnuk nabor ido, ḇerama sya nari siswarepen na ḇa. Inja, kwinfir pyum kaku mnuk imbe wawasyana. Ramnai, wasya fasaw awer mnuk ani. Wawasya ramnai, fasna farkarkor ro mnuk ani, buk ilustrasi, ma wakofenḇair rariso kofrurna ro kankenem koḇena. (Neh. 8:8) Kwarapan rosai fasfesepen ro rangka ani kuker mnuk ḇero dorina. Ḇefandun syadiya, wor fafnoḇek ro Yahwe I, insama fasna kakara ḇemaeja Ḇyena ro Refoya.​—Ezr. 7:10. w17.09 24, 25 ¶11, 12

Ro taun 537 SM, Yahwe kawasa Ḇyesi sisma aski kaku. Snaro sḇewomen si ro Babilon swaf taun ri 70, ḇape kirine simkei kwar! Siryaḇ kaku fa skaḇer ḇe Yerusalem insama sibawes kaḇer bait ma sisyom ḇe Yahwe I rodiwa. Taun oser ramnai, er Israel sya sifrur fondasi bait ani. Taun ri samfur seser riwonem ḇyenande kwar, ḇape Yahwe bait Ḇyeja imnai ḇaim. Allah kawasa Ḇyesya fandun fa sisma swarapepen fa skaḇer ḇe Yahwe ma simnai fa skara fandandun mankun sena. Ro taun 520 SM, Yahwe iwan nabi Zakharia fa ifnoḇek kawasa Ḇyesya fa siswarepen kaḇer rariso ḇyuk ḇaḇemkei faro si ro Babilon. Knam ro Zakharia snonsnon ḇyeja isoine ”Yahwe Iswarepen Kwar.” Yahwe kawasa Ḇyesya sḇefnder rosai ifrur kwar faro si na, rariryano Allah iswarepen kaker si. (Za. 1:3, 4) Yahwe ḇyeasas nari ifnoḇek si fa sḇawes kaḇer ibadat ḇekaku na. Imḇape, ḇyuk swarapepen ḇe si kako snar nari kyaremso farsamsyom sena rofyor sḇuk roi ḇepyum syadi faro I. w17.10 15, 16 ¶2, 3

Bena fawawi ro kesehatan mental doḇe rofyor kofasna sawarwar ido, na kodafdufḇa ma fasfesepen koḇena kuker snonkaku ḇesesya napyum syadi. Rofyor kofnoḇek snonkaku ḇekandera sya, nari koḇeaski syadi, kokain ro mankunkoḇa, ma kona kakara ḇeḇye pdef. Inja, rofyor kofasna sawarwar ine nari nun fainda faro ko. Rofyor kofnoḇek snonkaku ḇesesya kuker saswar ido, sneuser koḇena nari nasren pdef snar kofawi kofrur Yahwe parenta Ḇyena. Kuker kofasna sawarwar, nari nafnoḇek ko fa koḇe sinan, imbeswa, ma bati ḇepyum syadiwer. Osower ido, snonkaku ḇefasna sawarwar faro ḇesesya nari rofyor sifandun fafnoḇek ido, bisa sismana ḇeri. (Mat. 5:7; Luk. 6:38) Kofasna sawarwar insama kosma fainda monda ḇa, ḇape ḇefandun yaiso kofasnana snaro komarisen kofarari Yahwe ma kosandik I. Yahwe iso Knam ro saswar ma sawarwar.​—Ams. 14:31. w17.09 14 ¶16, 17

Ifrur fararur ḇyeja ḇe Raja ma Imam Ḇeba monda ḇa, ḇape Yesus i kako isma fararur fa ”byawes Yahwe bait ḇyedi”. Inja, ro 1919, ifrur fararur ḇaḇebawes ine kuker ḇyuk ḇaḇemkei faro Allah kawasa Ḇyesya ro awyaye agama ḇekaku ḇa ḇaido Babilon Ḇeba. Ma Yesus i kako ifrur sren sidang ma ryem ”manfamyan ḇeḇesyowi ma ḇefawi nananem”. Naek ḇeḇeryem ansine sifarkin fararur ḇefandun kaku ro supswan ine, ḇeḇebar ro bait rohani ḇeba syadi. (Mat. 24:45) Rofafisu ine, Yesus i kako myamwarek saranden ro Allah kawasa Ḇyesya ma ifnoḇek si fa sifrur farsamsyom ḇesren sena. (Mal. 3:1-3) Yesus ma 144.000 raja ma imam ḇepoik kayam kuker i nari sḇepoik ro swaf taun syaran oser. Ro swaf ani, nari sifnoḇek snonkaku ḇesouser sya fa sḇesnonkaku ḇenapes. Rofyor raja ma imam ansine sifrur fararur sena kwar, nari snonkaku ḇesyom Yahwe sya monda na ḇebarek ro supswan ine. Inja, ibadat ḇekaku ine nari iso monda ḇero supswan ine! w17.10 25-26 ¶15, 16

Insama isma ampun, snonkaku ḇefnai marmar ani fandun fa ifrar ḇe kota ḇekadaunwarek ḇefanam. (Yos. 20:4) Imarisen ikenem kaker ido, ryaḇeri ḇe moḇ ani ma ḇyarek rodiwa isof imam ḇeba imar. Roi ine iso fandun fa snonkaku ani ifrurna. Ibur fararur ḇyena, rum ḇyeja, ma ipok fa imbran famfnom ḇa. Ḇape, roi ḇyensewar kwarna nefromo ḇa. Kirine, snonkaku ḇefrur sasar ḇape ḇemarisen ḇembror fandun fa ifrur roi ḇeḇeso insama isma ampun ro Allah I. Fandun fa imnai ro sasar ḇyena. Ine kyurfasna fandun fa ḇyinkwanbur rosai monda na ḇefrur fa ifrur sasar ḇeba. Inja, koḇensewar insama kofrur sasar awer. Rarirya ido, kofasna faro Yahwe I snar komarisen kaku fa kofadwer kenem koḇena ma kokara awer sawarwar Ḇyena nama napyan fa kosmana.​—2 Kor. 7:10, 11. w17.11 12 ¶10, 11

Yahwe iwan ko insama kofasna snemura ḇe naek srar sya. (1 Yoh. 3:17) Ḇape, kona alasan ḇekaku fa kofrur roi anna. Kwarapan, ’Snonkaku yor fa srama ḇe rum yedi, sima bati yedi monda ḇaido snonkaku yakara sna fakamaman ḇepyum ro sidang ke? Yor monda snonkaku na yafawi sḇuk roi oso ḇe aya ke? Ḇaido, yafasna snemura ḇe naek srar yafawi mnis ḇaim si ḇaido faro snonkaku yafawi na jadi fa sakḇuk roi oso ḇe ayaḇa ke?’ (Luk. 14:12-14) Kwarapan kada: Rofyor naek oso fyandun fafnoḇek yedi snar sasar ifrur ro mankundi ido, rariso na yafnoḇek i? Ḇaido, rariso sne ḇaḇir yedi rofyor snonkaku yor fa ḇerama ḇe rum yedi sifawi sikofen kasumasa ḇa? Yahwe ḇyuk parenta ḇe ko fa komarisen koḇuk imnis mnuk ḇero rasine. Nari komarisen kaku kofasna snemura kuker nyan ḇekaku.​—Farfyar 20:35. w17.10 6 ¶12

Rosai na kofarkor ro Yusuf contoh ḇyeja? Rofyor imbe sifrowes ko fa koyuk Allah sasoser Ḇyedi, fandun fa kopampumna. (Ams. 1:10) Rofyor koḇe Saksi-Saksi Yahwe ḇaim, ḇeḇeso rofandu ko sḇensewar fa spampum marasrisen ro anan ḇesyadi, aninem ḇesyadi, anan tabaku, anan sasar narkoba, fararur farḇuk, ma ḇesena. Iba syadiwer rofyor sebaptis kwar, sino sisya sisma fafrowes wer fa sifrur roi anna. Rofyor waksma roi ḇeradine ido, kwara pyum resari ḇaḇebati Bedi kuker Yahwe I. Kwara kako fafisu rosai bisa ḇefrur fa wasapi ro fafrowesna, ma ḇinkwanbur fafisu ḇerarirya. (Mz. 26:4, 5; Ams. 22:3) Rofyor wasma fafrowes ani ido, wor Yahwe I fa ḇyuk fawawinanem ma ḇaḇefarmku mankun insama bisa pampum fafrowes anna. w17.09 5 ¶8, 9

Nyan oser fa koḇebati kuker Yahwe rofyor kosewar nana ḇekakuna ma kosowarpu syadi ḇa ro dunya ḇaḇefarḇaḇyan. Iso roi Abraham ifrurna. Isouser Yahwe kuker ibur mnu beba Ur moḇ ḇenana fa ḇyarek ro rum kruben monda snar imarisen ḇyebati kuker Yahwe. (Ibr. 11:8-10) Ikyar faro Allah, ḇape faro arasai ḇyena ḇa. (Kej. 14:22, 23) Yesus imarisen insama manfamyan ḇyesya sna kakyar ḇemnis rarirya. Fafisu oso ikofen ḇe romawa babo ḇenana oso, ”Rofyor wamarisen wafrur imnis ido, rwamura, ḇoḇ nana ḇeḇor bena ma bukna faro snonkaku ḇesaḇarar sya, rarirya nari wasmai nana ro boiyas, ḇarpurya rwamuma ma waso Aya.” (Mat. 19:21) Snon ḇebabo ani nya kakakyar imnis raris Abraham i ḇa. Ḇape snonkaku ḇese sino sisya sikyar ḇe Allah. w17.07 6 ¶12

Inja, iwaf isof taun ri 430 rofyor imbranuk ro Warbeki Efrat kwar insape up ḇyesya sḇekawasa ḇebarek ro moḇ ani. (Kel. 12:40-42; Gal. 3:17) Abraham imarisen fa iwaf snaro ikyar kaku Yahwe nari ifrur asas Ḇyena. Nya kakakyar faro Yahwe I. (Ibr. 11:8-12) Rofafisu Abraham ikenem kaker, myam Allah ifrur asas ḇyenakam ḇa raryano, imarisen iwafe. Mboi kwarapan kada, Abraham nari iryaḇ kaku rofyor Allah ḇyawes kaḇeri fa ikenem ro firdaus. Nari imarisen fafayaḇa rofyor iwasya farfyar ro kankenem ḇyeja ma kina ḇyesya ḇeḇefas ro ḇar bebor ḇero Refoya. I kako imarisen snar ifawi dakḇe ḇar ḇefandun kaku ro Yahwe marisen Ḇyedi kuker Mesias ḇeḇeasas kwar ani! Na kokyar kaku ḇyaḇir radirya snar barakas nari ismana. w17.08 6 ¶10, 11

Ro Refo, ”roi ḇemamas na” kyurfasna ḇe farḇakḇuk famfnom monda ḇa. Ine kyurfasna kako ḇe anan tabaku ma farfyar ḇeser roi ḇemamas na. (2 Kor. 7:1; Ef. 5:3, 4) Ine kako kyurfasna ḇe roi ḇeḇyeḇa snonkaku sya sifrur fasis na, imnis raris siwasya syap ḇeser farfyar kuker fararur farḇuk ḇaido smam pornografi. Roi nane bisa nun si ḇe fararur ḇaḇearwaren isoine masturbasi. Snonkaku ḇemam ker pornografi nya marisen kuker ”ḇaḇermomen” ma ifrurker farḇakḇuk famfnom. Peneliti sya smam snonkaku ḇemam ker pornografi simnis kuker snonkaku ḇemasarser ḇaido ḇeyanker narkoba sya. Inja, kopok kokandor ḇa snar marisen ḇesasar faro mamam pornografi bisa nun roi ḇeḇyeḇa kaku. Ine bisa nafnai fa komai fafayaḇa, kofararur mnis ḇa, kina koḇedi isma aski ḇa, ḇaḇesisye ro farḇakḇuk ya, ma syadiwer komun mankunko. w17.08 17 ¶8, 9

Rofyor er Israel skaḇer ḇe Yerusalem, manḇefas mazmur kyarauser Yahwe fafnoḇek ḇyenakam. Yahwe ikofen nari ifrur nako kerwa ḇeba sena. Ine nafrur fa manḇefas mazmur ḇyaḇir imkakḇa ma ikyar Yahwe nari kyadaunwarek kawasa Ḇyesya. Imbude nari wamkakwarek faro samswen wasmana. Ḇape, Yahwe na ḇyuk ḇe ko fawawinanem fa kofarmku pdef. Manḇefas mazmur doḇe Allah, ”ikofen parenta ḇyena ḇe supswan; kuker fasaw kaku wos ḇyena nafrar”. Ramnai manbefas mazmur dawos kuker salju, embun beku, ma es. Ramnai ifuken, ”Mansei ḇepok faro pananuk ḇyena ya?” Ramnai ikofen Yahwe ”fyarem wos ḇyena, ma nakame nambren”. (Mz. 147:15-18) Allah koḇedi ifawi rosai riryakam ma bisa ifrur rosai monda, raris bisa fyara pananunek ro es ma salju. Inja na ifnoḇek ko fa kofrur mnis kaḇer samswen rosai monda kosmana. w17.07 19-20 ¶14, 15

Yahwe ḇyepoik iso ḇepyum syadi ma isyus fa kosonem I kuker sne ḇesiper. Rosai ḇefnai ya? Yahwe ifrur roi ḇeḇor kam. Inja iso ḇena hak fa ḇepoik faro sikam ḇero supswan ine ḇesiper ma nanki kako. Setan ifrur roi oso ḇaberi. Inja, nya hak ḇaberi fa ḇyepoik faro farsyos ḇeba ine. Rofyor Setan ma imbeswa ḇerandak sḇembroḇ ma simarisen sḇepoik ro mankunsi, kakuya sifrur roi sisambraḇ ḇa fa sifrurna. (Yer. 10:23) Sna ḇaḇemkei fa skinfir. Ḇape, ine fyasna snar sna hak fa spampum Yahwe ḇaḇepapoik ḇyena ke? Aroḇa. Sna hak fa sifrur kankinfir ma snemuk oso kuker ḇaḇemkei. Ḇape, ine nafrur sna hak fa sḇembroḇ ḇe Manḇefrur ya ḇa. Rosai ḇefnai ya? Snaro snonkaku koine kofandun farkankin ma Yahwe ḇaḇepapoik Ḇyedi. Nasnai bos kaku, sḇuk sasar ḇaḇemkei sena fa skinfir rofyor sḇembroḇ faro Allah. w17.06 21-22 ¶2-4

Koswar fararmyan koḇena ido, nari kofarari Manwawan Paulus ma koḇaryas pdef, iba syadiwer rofyor kosma samamyai. (Farfyar 14:19-22) Imnis raris, ro swaf taun 1930 ma 1944, naek srar koḇesya ro Amerika Serikat sisma wayam ḇefnak ḇa. Ḇape sḇaryas pdef. Rofyor ḇena papoik sya imbe sidwarek si, naek srar koḇesya sun parkara ine ḇe pengadilan ma simkei ro kasus ḇeborna. Ro 1943, Naek Knorr dapḇair kasus oser ḇemkei ro Mahkamah Agung AS. Ikofen kasus Pengadilan ani nari nasyaḇa rofyor naek srar sya siḇaryas pdef ḇa. . . . Snar komarisen koḇaryas, inja kosma ḇaḇewayam raryano kopok komnaiḇa. Rofyor koswar fararmyan koḇena ido, nari kokara monda ḇa faro oras riḇeso kofas ro laporan koḇedi. Nari komarisen koḇuk rosai bisa koḇukna fa ’koḇaryas ankankinem ḇeḇye’.​—2 Tim. 4:5. w17.06 12 ¶11, 12

Saswar koḇena ḇe Allah nafnoḇek ko fa kosouser sasoser Ḇyena, kofarmku, ma kayin roi ḇeḇyeḇa na. (Mz. 97:10) Ḇape Setan ma dunya ḇyedi syewar fa ifrur saswar koḇena ḇe Allah nasambraḇ werḇa ma napromes. Dunya ine nya mamam ḇeḇese kuker saswar ya. Snonkaku ḇebor sya siswar Allah I ḇa, ḇape ”siswar mankunsi ḇardi”. (2 Tim. 3:2) Smam monda faro ”roi ḇeḇor ḇeyun sne, isof sirmomen sna na, ma roi ḇeḇor sirmomen na insa ssḇuki darer mankunsi”. (1 Yoh. 2:16) Manwawan Paulus ḇyuk swarapepen kuker rosai na ḇeḇejadi rofyor kosewar ḇepon marisen mankun koḇena ḇardi. Doḇe, ”Kakara koḇena papoik rari snonkakuya nyana, nari ḇarpurya dunḇe marmar.” Rosai ḇefnai ya? Snaro snonkaku ḇefrur roi ḇeradine sḇembroḇ Allah I. (Rm. 8:6, 7) Snonkaku ḇebuk kankenem sena fa sisewar monda pipi ma marisen fararur farbuk nari ḇarpurya sfafko.​—1 Kor. 6:18; 1 Tim. 6:9, 10. w17.05 16 ¶5, 6

Rofyor naek srar ḇebarbur ansine simewer sismai monda fafnoḇek ro ko, ḇape simarisen sifasna kasumasa faro rosai snonkaku ḇese sifrur faro si. Ine nun aski ma marisen faro naek srar ḇefasna sneḇenaḇye sine. Ḇape, naek srar ḇebarbur ansine fandun fa sisewar fandandun sena ro mankunsi. Sifrur roi nane ido, nari naek srar sesyowi si ma sna fasfesepen ḇepyum kuker si. (2 Tes. 3:7-9) Ḇape, fandun fa koḇuk fafnoḇek ḇepyan ḇe naek srar ansine. Roi sifandun syadi yaiso oras ma saswar koḇena. Imnis raris, bisa kofasnaḇair ḇe si rariso sek oto ro moḇ ani ḇaido rariso sikoḇes robean ḇepyum ḇape nek syadi ḇa. Au kako bisa fasnaḇair rariso sisma mesin jahit ḇaido roiebor ḇesena, inja bisa sbuki sewar pipi ro mankunsi. Ḇefandun syadi ya, bisa wafnoḇek si fa simarisen siryur ro sidang ḇebabo sedi. Osower ido, wakofenḇair ḇe si fa sakso oto kuker Au ḇe fananjur. Au kako bisa fasnaḇair ḇe si nyan ḇepyum fa sbaryas ḇe snonkaku ro moḇ ani, ma wafararur kayam kuker si. w17.05 5-7 ¶11, 12

Snonkaku ḇebor sya sfandun faro marisen baken sena monda, inja samswen ḇe si fa sisma mamam ḇekaku kuker ḇaḇearasaina. (1 Kor. 2:14) Snar skaramnisḇa, inja samswen fa smambir roi ḇekaku ma roi ḇesasar na. (Ibr. 5:11-14) Marisen sena faro ḇaḇearasai nasamḇraḇ syadi. Ma sisewar nabor syadiwer ido, nari roi simarisenna nabor syadiwer. (Pkh. 5:10) Ḇape, roi oso isya ḇefnoḇek ko fa kopampum nyan kakara ḇeradirya. Wawasya Refo ro ras ḇe ras nari syambraḇser ko fa kopampum materialismena. Yesus kyarauser Yahwe fawawinanem Ḇyena, nane nafnoḇek i fa pyampum Setan farawrowes ḇyena. (Mat. 4:8-10) Kirine, fyor komarisen kopampum materialisme ido, fandun fa kofasnaḇair Yahwe fawawinanem Ḇyena ro kankenem koḇena. Nane nfasnaḇair koswar syadi Yesus i ro ḇaḇearasaina. w17.05 26 ¶17