Maret

Naek srar sino sifrur fa wafafayaf ke? Rofyor wawos kuker i ḇaim ido, nari wafafayaf ker. Refo ikofen na koḇedame kuker snonkaku ḇese, iba syadiwer mbroḇ koḇesya rofyor komarisen ḇyedakam ko. (Ams. 25:21, 22) Rofyor wor i ḇe rum Bedi, bisa mam rari-rari ḇepyum ḇyena ḇefrur Yahwe duni ḇe napnapesya. (Yoh. 6:44) Rofyor saswar idif Au fa wor snonkaku ani ḇe rum Bedi, ine nari nafrur fa ḇaḇebati muḇedi fanam syadi ma wafafayaf faro i werḇa. Rariso insama koswar syadi i? Nyan oser yaiso koso ananun ro mnuk ḇero rasine. Kokarapan, ro rosai monda naek srar kobansi sipyum syadi ro ko. Imbude bisa kofarkor ro kakyar, ḇaḇefarmku ḇaido rari-rari Kristen sena. Kokara rari-rari ḇepyum sena nari nafnoḇek ko fa koswar si ma komarisen kor si fa srama ḇe rum koḇedi. w18.03 19, 20 ¶18, 19

Faro sinan ḇeḇesosya, roi oser na ḇefrur soasuser sena faro Yahwe neḇemam rofyor romawa sesya sepecat si. Ineiso imbesrar oso ismana, inaikir ḇyedi sepecat i ma syae ro rum skoḇedi. Ikofen, ”Yasewar alasan ro publikasi koḇena insama yafanam ma yawos kuker romawa ma kpu yedi.” Ḇape, swari ikofen ḇe i snar romawa subanya ikamar sasar ḇyena ro mankundi, isya ro subrasna werḇa. Fandun kaku susouser faro Yahwe I. Taun ḇeḇeso ramnai, romawa suḇedi kyaḇerwer ḇe sidang. Snari doḇe, ”Ḇyesyowi aya ma swa yeja snaro nusouser faro Allah I”. Rofyor sepecat romawa Bedi ido, na ”wakyar faro Yahwe kuker snembri ḇesiper ke”? Na fasnaḇair ḇe I snar ”wakyar faro kakara mankun Bena ḇa ke”? (Ams. 3:5, 6) Inja, mkokyar kaku farkarkor ma farkankin Yahwe Ḇyena nkakubos ḇeri. Mkosouser faro Yahwe I pdef rofyor roi anna nafrur sne mkoḇena naduf. Mkorower Allah disiplin Ḇyena, ma mkopampum awerna. w18.03 30-31 ¶12, 13

Refo dapbairḇa ro umur riḇeḇeso snonkaku oso bisa ḇyebaptis. Ro Matius 28:19, wos Yunani ’kofarkor er sya kam ḇe manfamyan’ ine kyurfasna koḇuk farkarkor ḇe si ma kofnoḇek si isof sakḇe manfamyan. Manfamyan ima snonkaku ḇefarkor ma ḇemamḇir pyum Yesus farkarkor ḇyena ma imarisen isouserna. Inja rofyor romawa sya sḇeḇeaben, fandun fa sisma farkarkor ḇefnoḇek si fa sḇuk farsamsyom sena faro Yahwe I ma sḇe Kristus manfamyan ḇyesya. Kakuḇae, kapira sya jadifa sebaptis ḇa. Ḇape, Refo kyurfasna romawa sya bisa smambir ma siswar napnapes ḇero Refoya. Manfamyan oso ḇeyun snemuk fa ifarmyan ḇe Yahwe rofyor ḇyaboya, isoine Timotius i. Kakyar ḇyeja syambraḇ kaku. (2 Tim. 1:5; 3:14, 15) Imbude ḇyesnonkbor kaker ḇaido ḇyeumur taun ri 20 syadi rofyor isma fararur ḇepyum kwar ro sidang.​—Farfyar 16:1-3. w18.03 10 ¶4, 5

Fafisu iwara rofyor kofarkor randak Refoya, kofrur fararwei nabor ro kankenem koḇena. Ḇape, koḇebaptis kwar ido kofandun fararwei nabor wer. Osower ido, kofandun fararwei ker snar konapes ḇa. (Flp. 3:12, 13) Kwara fakfuken nane: ’Fafisu ine yaso Allah farkankin Ḇyena kwar ke? Kenem yedine imnis raris Kristus i kwar ke? Moḇ yawos ma yafrurpyum ḇesesya nfasnaḇair yaso Allah farkankin Ḇyena kwar ke? Ro awawos yena, rosai kaku ḇero swaruser yena? Rariso kuker farkakor Refo mankun yedi, moḇ yasansun aya raya, ḇaido kakara yena rofyor sḇuk wos anun ḇe aya? Rofyor yasma fafrowes fa imbe yafrur sasar ido, rosai na yafrur ya? Yaḇe snonkaku Kristen ḇemas kwar ke?’ (Ef. 4:13) Kokarauser fakfuken nane ido, nari kofawi koso Allah farkankin Ḇyena kwar ke roḇa. w18.02 23 ¶4, 5

Ro marandan kankenem snonkaku, fafisu kokenem ine iḇeseburo fafisu iwara. Yahwe isya iryur raryur ḇeba oso ḇerama ”ro ersya kam, keret, kawasa ma wosna”, raris Refo ḇyardina. Siso ”er ḇesambraḇ kaku” ḇena kawasa ḇeḇeaski ḇesyadi ro yuta riwar ’ḇesyowi faro Allah roḇ meser ro Allah rum ḇesren ḇyedi’. (Fasasna 7:9, 15; Yes. 60:22) Ro fafisu ine insape snonkaku ḇebor syadi sisya ḇeswar kaku Allah ma min sesya. Ḇape, Refo ḇyardi kako snar ro fafisu koḇedine, snonkaku ḇebati kuker Allah I ḇa na sfasna saswar ḇesasar. Ineiso ḇeḇefandun mankun. Manwawan Paulus fyas snar ro ras-ras ḇepupes na, snonkaku sya nari ”siswar mankunsi ḇardi, siswar pipi” ma ”siswar marasrisen baken ro siswar Allah I”. (2 Tim. 3:1-4, NW) Saswar ḇeḇefandun mankun ine iḇeseburo saswar ḇe Allah. Ḇape kakuya rarirya ḇa. Saswar ḇeradirya na nafrur fa snonkaku sya sifandun mankunsi ma nun samswen faro kankenem snonkaku sya. w18.01 21, 22 ¶1, 2

Snar Nuh ifarkor ro Yahwe I, inja nya kakakyar ma Allah fawawi Ḇyena. Ine nakadaunwareki ro fararur rosai monda na ḇefrur Yahwe imarisen ḇa. Rariso Nuh ifrurna rai? Nuh imarisen ḇyebati kuker Allah I, imewer ḇyebati kuker snonkaku ḇena kakyar faro Yahwe I ḇa ma ḇepampum I sya. Nuh imnis si ḇa, imewer ikyar faro hantu-hantu ḇerama ḇe supswan sya. Fafisuya, snonkaku smanen kaku faro samambraḇ hantu-hantu sya ma sisewar fa sisyom si. (Kej. 6:1-4, 9) Ḇape, Nuh ifawi Yahwe imarisen snonkaku sya sna romawa ma sibor syadi ro supswan. (Kej. 1:27, 28) Inja, rofyor hantu-hantu sine sifarḇuk ma sna romawa, Nuh fyawi ine roi ḇesasar dirya. Isyadiwer rofyor myam romawa ansine sibamantar kaku ma sisambraḇ syadi ro romawa ḇesesya. Ḇarpur mura, Yahwe ikofen ḇe Nuh nari ifrur faḇruḇ ḇeba fa myunpres snonkaku ḇeḇarḇor sya. Snar ikyar faro Yahwe swarapepen Ḇyeja, ḇyawes wai ḇeba oso, inja i ma kina ḇyesya sisma fasaspar.​—Ibr. 11:7. w18.02 11 ¶8

Rofyor kofrur sasar ḇeba ido, Yahwe imarisen fa ḇyuk ampun ḇe ko. Imarisen ifnoḇek ko fa kofrur mnis kaḇer fasfesepen koḇena kuker I. Ḇape, fandun fa wasma fafnoḇek Yahwe ḇyuk ḇe Au roro penatua sya. (Ams. 24:16; Yak. 5:13-​15) Inja wawaf awer boi, wafrurna ḇeri, snar wasma kankenem fyoro rofyor wasouser faro I. Imbude koḇaḇir kosasar kaker rofyor Yahwe ḇyuk ampun faro sasar koḇena kwar. Koḇaḇir rarirya ido, rosai fandun fa kofrur ya? Fyorno ido, manwawan Paulus ḇyesanekar snar sasar ḇyena ro fafisu iwara. Ikofen, ”Aya ine Manseren manwawan ḇyedi ḇesma anonef. Aya ine sipok sap aya ḇe manwawanḇa, snar yaḇewayam Allah jemaat ḇyena kwar.” (1 Kor. 15:9) Yahwe ifawi Paulus ima snonkaku ḇesasar kako. Ḇape, imarisen kyaremso Paulus i ma imarisen Paulus ifawi roi ine. Rofyor kombror kaku kwar faro rosai kofrurna, ma kawos ḇe Yahwe kuker roi ani ma ḇe penatua sya ido nari ḇyuk ampun faro ko. Kokyar Yahwe ḇyuk ampun ḇe ko kwar ma komarisen kosma ḇaḇeampun ro I!​—Yes. 55:6, 7. w18.01 7-8 ¶17, 18

Infa koḇebati kuker Yahwe, fandun fa korower I ma kowawos kuker I. Nyan ḇerandak fa korower Yahwe iso kuker kofarkor Refoya. Ine kako kuker kowasya ma kowasenkara Allah Wos Ḇyena ma publikasi koḇena. Ḇape, kofarkor Refo namnis raris koso ujian ro rumfarkor ḇa. Farkarkor Refo ine raris komarandan fa kosewar roi oso. Kosewar ma kosrow roi ḇebabo kuker Yahwe I. Bon ya, bisa kofanam ḇe Allah, ma I kako fyanam ḇe ko. Yahwe Organisasi Ḇyedi fyasos publikasi ḇebor insama nafnoḇek Au fa wafarkor Refo. Imnis raris, ro jw.org syap ”Rosai Refo Fyarkor Ḇeko?” nasya. Bisa nafnoḇek Au fa swambraḇser kakyar Bedi.​—Mz. 119:105. w17.12 23, 24 ¶8, 9

Kowasya kada aiwan ḇeyan ḇepek raris serigala ma singa, na sikain kayam kuker rofanfan sya raris domba ma lembu. Rosai ḇefnai fa nari sikain kayamyam? Bardadi ani ikofen wer, ”Snar kaku supswan ine nari ifo kuker fawawi ro Yahwe I.” Aiwan sya na sipok sifarkor kuker Yahwe I ḇa, inja ḇardadi ine kyurfasna ḇe fararwe ro kenem snonkaku. (Yes. 11:6, 7) Ḇebor ro naek srar koḇesya ḇepon ya sifasna rari ḇerarmomen raris serigala, ḇape kirine simarisen sikenem kuker aski. Na wawasya farfyar sena ro artikel ”Refoya Fyadwer Kankenem” ḇero jw.org. Ḇeḇor ro Yahwe manfamyan Ḇyesi ḇena kenem ḇerarmomen ro ḇepon ya, kirine ’sikenem babo imnis raris Allah ifrur kwar ma marisen ḇyedi isoine kankenem ḇenapes, ma ḇesren’. (Ef. 4:23, 24) Rofyor snonkaku sfarkor kuker Allah I, sḇaḇir snar fandun fa sisouser Allah sasoser Ḇyena. Ine na nafnoḇek si fa sifadwer rosai sikyar na, nyan kakara sena, ma rosai sifrur na. Napyan fa sifrur fararwe ḇerariryaḇa, ḇape Allah rur ḇesren Ḇyedi na ḇefnoḇek si fa sifrur imarisen. w18.01 31-32 ¶15, 16

Refo doḇe snonkaku ḇeyek ḇe nanki nari sikḇawes ’imnis rarwas sedi’. Inja, na kokyar kaḇakḇok ro supswan kako nari Allah fyasos mnisna. Ḇape, imbude kofuken, ’Snonkaku ḇemar babo sya nari siḇawes ḇepon ro Ḇaḇepapoik Taun Syaran Oser Kristus ma snonkaku ḇefawi si siso na ḇesaser si ke? Allah manfamyan Ḇyesya ro fafisu iwara ḇefarkin pyum sya nari sḇeḇeḇawes ḇepon fa sifnoḇek Allah kawasa Ḇyesya ro dunya babo ke? Rariso kuker snonkaku ḇefawi ḇaim Yahwe sya? Fafisu risai ma rodiso nari sikḇawes ya?’ Imbude roi nabor nasya na kokarana. Ḇape, fandun ḇa fa kokara kerna ro kirine. Ipyum syadiya kowaf ma komam rariso Yahwe ifrur mnis roi nane ro fafisu iyama. Ine nari nun sneprei kaku ḇe ko. Ro fafisu kowaf ya, fandun kaku fa kosambraḇser kakyar koḇena ḇe Yahwe I. Roro Yesus i, ḇyeasas snonkaku ḇemar sya na sisya ro Yahwe swarapepen Ḇyedi ma nari ḇyawes kaḇer si.​—Yoh. 5:28, 29; 11:23. w17.12 14 ¶20, 21

Ananun ine bisa nafnoḇek kina Bedi ke? Yahwe ḇyuk parenta ḇe snonswa sya, ”Waswar swambri ma bewayam awer i.” Snonswa ḇesaswar nari ḇyesyowi swari ma ryower rosai swari ikofenna ma doḇe rosai ikofenna ima fyandun kaku. (1 Ptr. 3:7) Rofyor swari iso marisen ḇyenakam ḇa raryano, ryower pyum swari kakara ḇyena, na nafnoḇeki fa dun snemuk ḇepyum. (Ams. 15:22) Snonswa ḇesaswar nari idif swari ḇa fa ḇyesyowi i. Ḇape, ḇyensewar kaku fa isma syowi ani. Rofyor snonswa iswar swari ma romawa ḇyeja, kina seja nari neaski syadi rofyor sifarmyan ḇe Yahwe ma nari sisma sasuref ro Yahwe I. w17.11 30-32 ¶12, 15

Fafisu taun 60-61 M, fyor Manwawan Paulus syun ro bui ḇero Roma, fyas syapram ḇe snonkaku Kristen ḇero Kolose sya. Fyasnaḇair ḇe si fandun kaku sna ”fawawi nakam ma kakara rurya”, iso samambraḇ fa komam rosai monda imnis kuker Yahwe mamam Ḇyedi. (Kol. 1:9) Paulus doḇe, ”Roi ḇeḇor nane kam yakofena, insa ono sḇeankar mko maroḇa kuker wos ḇerok marndanden. Mkosasor mko insa rosai sḇukfarkor ninyan mko fasfarkin mko ro nyan sasar awer ma ḇekaku ḇana, snar siso farkarkor ninyan ma rodur ḇero supswan ine, fama ḇyeknam ro Kristus ḇa.” (Kol. 2:4, 8) Ramnai, Paulus fyasnaḇair rosai ḇefnai fa kakara ḇeḇeso sifawi kwarna nama nsasar ma rosai ḇefnai fa snonkaku ḇebor simarisen faro kakara ḇeradirya. Imnis raris, snonkaku ḇeḇeso imbude sḇaḇir kakara ḇeradirya nafrur fa sifawi nanem syadi ḇaido sipyum syadi ro snonkaku ḇesesya. Inja, Paulus fyas syapram ḇe naek srar sya insama siso awer kakara dunya ine ma bisa seḇinkwanbur fararur ḇesasarna.​—Kol. 2:16, 17, 23. w17.11 21 ¶1

Rosai fandun fa snonkaku Kristen ifrurya insama isma Yahwe sawarwar Ḇyena pdef? Fandun fa ibur rosai monda, syadiwer rosai na ḇefrur isapi ro sasar ya. (Mat. 18:9) Imnis raris, rofyor bati ḇesya sifrur roi Yahwe imarisen ḇa ido, na ḇebati kaker kuker si ke? Rofyor samswen fa fara mankundaw ro aninem swan ido, na ḇinkwanbur fafisu ḇefrur fa winem swan nabor syadi ke? Rofyor samswen fa fara marisen farḇakḇuk famfnom ido, na ḇinkwanbur filem, situs web ḇaido fararur na ḇefrur fa wana kakara ḇesren ḇa ke? Koswarepen, rosai monda kofrur insama kosouser faro Yahwe sasoser Ḇyena, nari nefromo ḇa. Rofyor kosusu ido, na kokara kofrur Yahwe fyafko ḇaido Yahwe iswar ko werḇa. Rosai koḇaḇir nane, nafrurduf kaku ko. Rofyor kosusu ḇa, nari koḇeaski syadi snar koḇaḇir ”saswar soasuser ro [Yahwe] ḇekain fyoro”.​—Yes. 54:7, 8. w17.11 12 ¶12

Wamam mnis ro Zakharia 5:4 ikofenbadir fafras nari ”syun ḇe rum ḇekarawraw ani” ma ”ḇyarek ro rum ani dori ma imkok na”. Inja, roi ḇeḇyeḇa rosai monda kawasa Ḇyesya sifrurna, Yahwe na fyasnaḇairna ma ḇyemankara si. Iba syadiwer, imbude snonkaku ḇekarawraw oso iyokef rosai ifrurna ro polisi, tuan ḇyedi, penatua ma sinan ḇyeja raryano, ipok fa iyokef roi ifrurna ro ḇarpon Yahwe I ḇa. Allah nari ifrur fa snonkaku ḇekarawraw sya sifawi sasar sena. (Ibr. 4:13) Komarisen kaku snaro kosya rofandu snonkaku ’ḇefrur roi ḇenapes ḇesya kwar’. (Ibr. 13:18) Yahwe dayin kaku snonkaku ḇekarawraw sya. Nari komarisen kaku snar kofawi ma kosouser Yahwe wos Ḇyena kuker rosai ḇeḇye ma ḇyeḇeḇa na. Ma ko kako komarisen snar nyan kankenem koḇena nun anonef faro snonsnon Ḇyeja ḇa. Kuker kofrur roi ine, nari Yahwe ḇyemankara ko ḇa imnis kuker snonkaku ḇesouserḇa sya. w17.10 16-17 ¶6, 7

Ḇaḇeaski rofandu naek srar sya ima roi ḇemaeja kaku. Iba syadiwer rofyor koḇaḇir sifrur mnis ko ḇa ḇaido skara sasar ko, fandun fa koḇensewar kaku insama kamk nako ḇaḇeaski ya. (Rm. 12:17, 18) Rofyor kofrur snonkaku ḇesesya simsor ido, ipyum ya kor maf ḇe si, ḇape kuker sne ḇesiper. Ḇaḇeaski ḇyefandun kako ro farḇakḇukya. Imbeswa sufasna awer rya sukain pyum ma suswaryae su kwar ro ḇarpon snonkaku sya, ḇape kakuya sumewer suyawawose, sufyakyae su, ḇaido supakpikyae rofyor ono sisya smam su ḇa. Fandun fa koḇuk ampun kuker sne ḇesiper ḇesya kwar. Rofyor sino sisya sifrurduf sne koḇena ido, nari koḇuk ampun faro snonkaku ani ma kosawen sne dosam koḇena. Fandun fa kofrur radirya, iba syadiwer rofyor snonkaku ḇefrur fa komsore ifawi rosai ifrur ḇe ko na ḇa. Insama koḇuk ampun kuker sne ḇesiper, kokara awer rosai snonkaku sya sifrur faro ko na. Snaro saswar ”ikram masasorḇa”. (1 Kor. 13:4, 5) Rofyor kokram masasor ido, nari nafrur fa ḇaḇebati koḇena kuker Yahwe ma naek srar ḇesesya naḇyeḇa.​—Mat. 6:14, 15. w17.10 7-8 ¶14, 15

Fainda rosai ro Zakharia anun ḇyeja faro snonkaku Yahudi sya? Yahwe ḇyeasas kwar nari ifnoḇek ma kyadaun si insama fararur ḇaḇebawes bait Ḇyedi imnai. Asas ine nḇuk kakakyar ḇe si. Ḇape, imbude sḇeḇirḇar na fararur ine bisa imnai kuker fafnoḇek snonkaku ḇeḇeso monda. Zakharia ikofen roi ḇesambraḇser si ma ḇefnoḇek si fa simkak werḇa. Yahwe ikofen nari sisya sibor ”sakso ro babawes Yahwe bait ḇyeja”. Imnis raris Heldai, Tobiya, ma Yedaya ḇerama ḇefnoḇek fararur ani. Snonkaku Yahudi sikyar Yahwe nari isaramper fararur sena. Raja Persia idwarek fararur sena raryano, sḇeḇri ma sibawes ḇeri bait ya. Randak ya, roi ḇedwarek ine imnis ra bon karui ḇeba kaku ḇedwarek si, ḇape Yahwe ifrur fa ikrenbur si. Inja, bait ani imnai ro taun 515 SM. (Ezr. 6:22; Za. 4:6, 7) Ḇape, Yahwe wos Ḇyenane kako nun farkarkor ḇeba kaku faro ko ro kirine. w17.10 26 ¶17

Salomo isma fararur ḇeba kaku. Yahwe kyinfir i fa ḇyebukor ro ḇaḇeḇawes bait ro Yerusalem. Ineiso fararur ḇaḇeḇawes ḇefandun kaku ro sarisa er ansi! Bait ani nari ’isnai ma ipyum’ ma nari sifawi snar padakduk ḇyena. Ḇefandun syadi yaiso bait ani nari ḇye ”Yahwe rum ḇyedi, Allah ḇenapes”. (1 Taw. 22:1, 5, 9-​11) Raja Daud ikyar Allah nari ifnoḇek Salomo i. Ḇape, ifawi Salomo ḇyabo kaker ma nya fawawi nabor ḇa. Nari Salomo ḇyeḇri fa ifrur fararur ani ke? Ḇaido, na pyampumna snar ḇyabo kaker ma fawawi ḇyena nabor ḇa ke? Insama bisa ifrur fararur ani, fandun fa ḇyeḇri ma ifrurḇeri fararur ani. Rofyor Salomo imkak ido, fararur ani nari syambraḇ fa ifrurna ḇa. Makakak ḇyeja kako bisa nafrur fa iryarḇa. Makakak ḇyena naḇyeḇa syadi rofyor ifrurmnis fararur ḇyena ḇa. Raris Salomo i, ko kako kofandun fafnoḇek ro Yahwe insama koḇeḇri. Inja, bisa kofrur fararur ḇyuk ḇe ko na. w17.09 27, 28 ¶1, 2, 4, 5

Rosai na ḇeḇejadi ro kankenem koḇedi rofyor kona Refo ḇa? Nari kosma anun ma farkankin ro ras ḇe ras ḇa. Nari ko kako kofawiḇa napnapes kuker Allah, kankenem, ma fafisu iwama. Ma nari kofawiḇa rosai Yahwe ifrur kwar faro snonkaku sya ro fafisu iwara. Kokofen kasumasa, snar roi ḇeradirya kosmana ḇa. Yahwe ḇyuk ḇe ko Wos Ḇyena, Refoya. Ḇyeasas kwar Refoya nari nasya pdef isof fyoro-fyoro. Ine nasnaibos kaku ro Manwawan Petrus wos ḇyena rofyor dapkaḇer Yesaya 40:8. Kakuḇae, ro mnuk ani dawos ḇeriḇa kuker Refoya, ḇape wos ḇyena nkur ḇe rosai ḇero Refoya. (1 Ptr. 1:24, 25) Nari kosma fainda nabor syadiwer rofyor kowasya Refo ro wos koḇedi. Iso ḇefnai fa ro abad ḇe abad, snonkaku ḇeswar Allah Wos Ḇyena, sisma roi ḇedwarek ma samswen rariryano, sifararur marḇak fa sefararwe Refo ma sirwasna. Yahwe imarisen insama ”snonkakusya kam sisma koreri ma sifawi ro ḇaḇenapnapesya.”​—1 Tim. 2:3, 4. w17.09 15-16 ¶1, 2

Rosai Yusuf ismana, kirine romawa babo Kristen ḇeborsya kako saksmana. (Kej. 39:7) Contoh oser iso Kim i. Bati ro rumfarkor ḇyedi sfawarker snar sifrur fararur farḇuk rofyor sifarkor ḇa. Kim nya fawar ḇemnis rariryaḇa. Snar iḇese kuker si, inja nafrur fa ḇyaḇir ”kyain ro mankundi ma demir monda”. Snar dakḇe pacaranḇa, inja bati ḇyesya skoryaye i. Ḇape, Kim fyasna nya fawawinanem, snar ifawi fafrowes fa kofrur fararur farḇuk fyor koḇe romawa babo ima nsamḇraḇ kaku. (2 Tim. 2:22) Bati ḇesesya sifukeni ḇyeinsos kaker ke roḇa. Inja, nya swaf ḇepyum fa ikofenḇair ḇe si rosai ḇefnai fa dakfrur raris si ḇa. Koḇesyowi kaku romawa babo Kristen ḇepampum fararur ḇeamoralna, ma Yahwe I kako nari imarisen faro snemuk sena! w17.09 5, 6 ¶8, 10

Snonkaku ḇeḇeso simasasor fasawsaw ma sawos roi ḇefrur sneduf ma skoryae snonkaku ḇesesya. Rofyor sifrur radine ido, kina sesya sḇekandera. Refoya ḇyuk swarapepen ḇe ko insama komasasor fasawsaw awer, kawos awer roi ḇefrurduf snonkaku ḇesesya ma korakrok awer. (Ef. 4:31) Snaro ine bisa nafnai mamamun. Baboine, snonkaku skara simsor ma sfasna masasor ima roi ḇesasar ḇa. Ḇape kenem ḇeradirya nfasnaḇair sḇesyowi manḇedaw koḇedi ḇa. Ḇebor ro naek srar koḇansi sfadwer rari sena kwar ma sifasna kenem ḇebabo. (Kol. 3:8-​10) Wos ankarkar iso bar ro kenem ḇekwar. Imnis raris, snonkaku ḇebor sankar insama sḇak som ḇa ḇaido simewer skamar sasar sifrurna. Ḇape Yahwe iso ”Allah ḇaḇenapnapesya.” (Mz. 31:5) Inja, dor insama ḇesyom I sya ’sikofen roi ḇekaku’ ma ’sankarkar awer.’ (Ef. 4:25; Kol. 3:9) Inja samswen fa kawosna, ḇaido komai raryano, fandun fa kokofen kakaku ya.​—Ams. 6:16-​19. w17.08 16 ¶3, 5; 18-20 ¶12-13, 15

Kirine, Yahwe fyarkin ko roro Wos ḇyena, Refoya. Manḇefas mazmur ikofen, ”kuker fasaw kaku wos ḇyena nafrar” fa nafnoḇek ko. Yahwe fyarkin ko kuker nyan ḇemnis ro fafisu kofandunna. Kwarapan kada fainda wasmana ro Refo, publikasi ḇerama ro ”manfamyan ḇeḇesyowi ma ḇefawi nananem”, JW Broadcasting, jw.org, penatua sya, ma naek srar sya. (Mat. 24:45) Wamam kwar ro kankenem bedi, Yahwe fasaw kaku fa fyarkin Au ke? Manḇefas mazmur ifawi, Yahwe kyinfir er Israel sya fa sḇekawasa Ḇyesi rofandu er syakam ḇero supswan ine. Siso monda besma ”wos ḇyena” ma ”sasoser-sasoser ḇyena”. (Mz. 147:19, 20) Kirine, kosma fakamaman ḇeba kaku snaro koḇuk Yahwe snonsnon Ḇyedi. Kokofen kasumasa snar bisa kofawi Yahwe I, kona Wos Ḇyena ḇefarkin ko, ma koḇebati fanam kuker I. Raris manḇefas Mazmur 147, roi nabor naisya ḇefrur fa ”Kosandik Yahwe I” ma kor snonkaku ḇesesya fa saksandik I kako. w17.07 19-20 ¶15, 16, 18

Manfamyan Yesus ro kirine, ma ḇefarmyan ro oras nakam sisyadi ro yuta rioser, sḇensewar kaku fa sifrurmnis ananun Paulus ḇyedi ḇero ḇo ine ro kenem sena. Simewer fasasnai ḇero dunya ine nawyaye si. Siswarepen wos ḇefarkin ine, ”Snonkaku ḇenyaki ima manfamyan ro snonkaku ḇebuk nyaki.” (Ams. 22:7) Setan imarisen insama koḇuk oras koḇenakam ma samambraḇ koḇena fa kofararur ḇe dunya ḇaḇefarḇaḇyan ḇyena. Ono sisya nyaki sena nabor fafayaḇa snaro sḇukikoḇes rum, oto, ḇaido sḇukbak farkarkor, ḇaido faro munara farḇakḇuk sena. Rofyor kosasor ko ḇa ido, bisa koḇuk oras koḇena taun ḇe taun fa kobak kaḇer nyaki koḇena monda. Inja rofyor kofasnaḇair kakara ḇeḇye kuker kokenem syadadi ḇa, koḇenyaki ḇa, ma koḇoḇ famfnom ḇa roi kosmana. Kuker rarirya nari roi oso ḇaḇeri ḇedwarek ko fa kofarmyan ḇe Allah ma koḇemanfamyan werḇa faro sistem ḇaḇefarḇaḇyan ro kirine.​—1 Tim. 6:10. w17.07 6-7 ¶13

Yahwe nya hak fa ḇyepoik farsyos ma supswan. Snar ḇyepoik kuker nyan ḇenapes syadi. Ikofen ḇe ko, ”Aya iso Yahwe, Mankun ḇefasna saswar souser, nanapes ma ḇaḇenapnapes ro supswan; faro roi nane yamarisen kakuna.” (Yer. 9:24) Yahwe fyandun hukum ro snonkakuḇa fa ḇyukidun snemuk ḇenapesna. Ḇape, iso ḇebuk akurfasna faro rosai ḇenapesna. Ma kuker nanapes ḇemnis kaku Ḇyena, Yahwe ḇyuk hukum faro snonkaku. Manḇefas mazmur doḇe, ”Ḇaḇenapnapes ma nanapes iso ḇeknam ro karapesa Bedi.” Inja, sasoser oser-oser, wos farkin, ma snemuk ḇerama kero Yahwe na nkaku ḇeri. (Mz. 89:14) Setan ikofen snar Yahwe nyan ḇyepoik ima inapesḇa, ḇape mankundi ipok fa ifrur ḇaḇenapnapes isya ro supswan ine ḇa. w17.06 22 ¶5

Yahwe iso Knam ro napnapes ya. (Mz. 31:5) Snar ima Kma ḇefasna sneḇenaḇye, imarisen ḇyuk napnapes annakam ḇe ko. Kofarkor roi nabor kwar kuker kowasya Wos Ḇyena, publikasi koḇena, koso munara kebaktian, ma fananjur ro minggu ḇe minggu. Yesus ikofen rofyor kofarkor napnapes nane, nari kosma ”kron arasai” ḇeser napnapes ”ḇebabo ma ḇekwar”. (Mat. 13:52) Yahwe nari ifnoḇek ko fa koser ”kron arasai” koḇena rofyor kosewar napnapes imnis kosewar arasai ḇeyokef. (Ams. 2:4-7) Rariso koserna rai? Komarisen fa kofarkor Refo ma publikasi koḇena ras ḇe ras ma kofrur riset ḇedo kaku. Ine nari nafnoḇek ko fa kosma napnapes ”ḇeḇabo” kofawi ḇaimna. (Yos. 1:8, 9; Mz. 1:2, 3) Fandun fa koraryaḇ pdef fa kosewar nabor syadiwer napnapes ya. w17.06 12-13 ¶13, 14

Naek oso kyara wos ḇero 1 Korintus 7:28, ḇekofen snar ḇefarḇuk sya ”nari sisrow kandera nabor”. Naek ani dawos ḇe penatua oso ḇefarḇuk fyoro kwar kuker ifuken, ”Rosai ’kandera nabor’ ani, ma rariso yafrurmnis na rofyor imbe yafarḇuk?” Rofyor kyarem fakfuken ani ḇaim, dor insama naek ani kyarauser roi Paulus fyas na: Yahwe ima ”Allah ḇeḇuk samambraḇ sne, ḇyuk samambraḇ ro kosnesna, ro fafisu ḇaḇekandera kosma na.” (2 Kor. 1:3, 4) Kofawi Yahwe ima Kma ḇeswar kaku ko, ma syambraḇser ko ro fafisu ḇesamswen. Waswarepen fafisu Yahwe isaramper ma fyarkin Au roro Wos Ḇyena. Wakyar imarisen roi ḇepyum ḇe Au. Naneiso ifrur faro manfamyan ḇyesya ro fafisu iwara sya.​—Yer. 29:11. w17.06 3 ¶1, 2

Naek srar ḇebarbur koḇesya sfandun anan ma sansun monda ḇa. Ḇefandun syadi yaiso fafnoḇek ma wos sneprei ro Refoya. (Mat. 4:4) Penatua sya bisa sifnoḇek si kuker sisewar plublikasi ro wos sena ma sifnoḇek si fa sisrow kuker naek srar ḇeyawos wos sena. Ine fyandun kaku snar snonkaku ansine sibur roiebor senakam kwar. Na simander kina sesya, bati sesya ma sidang sedi. Fandun fa sḇaḇir Yahwe iswar si roro naek srar Kristen sya. Oroḇaido, nari naek srar ansine imbude sisewar fafnoḇek ro snonkaku ḇerama ro moḇ sena, ḇesyom faro Yahwe I ḇa. (1 Kor. 15:33) Rofyor kofrurmnis si ro sidang ido, ine fyasna kofararur kayam kuker Yahwe fa kokadaunwarek ”mandamansya”. Snonkaku ḇebarbur jadi fa skaḇer ḇe rum senaḇa fafisu snonkaku ḇewayam si sḇepoik kaker. Rarirya kako, snonkaku ḇebarbur ro kirine jadi fa skaḇer ḇe rum senaḇa. Ḇebor sya kako skain kuker makakak snar rosai ḇekur si. Inja, wafuken mankundaw, ’Rofyor yasmai kandera ḇemnis radirya ido, moḇsa yamarisen sifrur aya rai?’​—Mat. 7:12. w17.05 7 ¶15, 16

Snar kokenem ro dunya ḇeḇyeḇa Setan ḇyedi, roi nabor naisya ḇefrur fa koḇesanekar. (1 Yoh. 5:19) Ḇape rofyor kosusu, kakyar koḇena na nasambraḇ werḇa ma saswar koḇena ḇe Allah nari napromes. Imnis raris, imbude na kosmai samswen snar koḇesinan kwar, kodufe, ḇaido samswen ro kumpanna. Ḇaido imbude na koḇesneso snar jadiḇa fa kofrur rosai kokara na bisa fa kofrurna. Kofafko snar roi ḇeḇeso ro kankenem koḇena nambran imnis rosai komarisenna ḇa. Samswen rosai monda kosmaina, kopok koḇaḇir awer Yahwe ryir ko kwar. Kokarauser faro wos ḇeḇuk sneprei ḇe ko ḇeḇefas ro Mazmur 136:23, ”Iswarepen ko rofyor koryarḇa, snar saswar soasuser ḇyena nakain fyoro.” Kokyar kaku snar Yahwe ryower ma kyarem fararyor koḇena.​—Mz. 116:1; 136:24-26. w17.05 17 ¶8

Imnis raris ḇeḇefasna ro Galatia 2:11-14, Petrus imkak faro snonkaku sya. (Ams. 29:25) Petrus fyawi rariso Yahwe sneḇaḇir Ḇyedi faro snonkaku Kafirsya. Ḇape imkak snonkaku Kristen Yahudi ḇerama kero Yerusalem nari smamkyof i snar ḇyebati kuker snonkaku Kristen ḇeḇesofuk ḇaimsya. Manwawan Paulus ikofen ḇe Petrus i snar ima snonkaku ḇeankarkar. (Farfyar 15:12; Gal. 2:13) Petrus fyasna sne ḇerun ma ryower anun ḇepakrek Paulus ḇyukna. Refoya ikofenḇairḇa Petrus ismai fakamamar werḇa. Snaro ḇarpurya rur ḇesren fyarkin i fa fyas syap ram risuru ro Refo. Ḇape Yesus ḇeḇukor ro sidang ḇyuk fararur pdef ḇe i. (Ef. 1:22) Naek ma srar ḇero sidang, sisma swaf fa sifarari Yesus ma Kma ḇyedi rofyor suḇuk ampun ḇe Petrus i. Iḇyekada, snonkaku oso kyarkar awer snaro sasar snonkaku ḇesesya sifrurna. w17.04 26 ¶16-18

Yahwe myunpres moḇ nakam insama roi ḇeḇyeḇa ro diya napromeskam. Ḇape I kako ”ifrur swarapepen oso” faro snonkaku ḇeḇarḇor ro baboine. Imnis raris rosai Yahwe ifrur ro fafisu iwara, I kako nari ipyos snonkaku ḇeḇarḇor rofyor myunpres dunya ḇeḇarḇor ine. Rosai nari ḇefadwer fararur ḇesasar nane? Ro dunya babo, nari komyaren kaku kuker fararur ḇeyun marisen. Imnis raris, nari kofrurmnis kaḇer supswan ine ḇe firdaus, kofrur rum ḇe ko ma snonkaku koswar sya. Ko kako nari kosrow kaḇer snonkaku syaran risyaran ḇeḇebawes kaḇer sya ma kofarkor si kuker Yahwe I ma roi ifrur kwar ḇe snonkaku sya. (Yes. 65:21, 22; Farfyar 24:15) Ro fafisuya, nari kona fararur nabor ḇefrur fa komarisen kaku ma nun sanandik faro Yahwe I! w17.04 13 ¶11, 12

Rofyor Yefta ifrur asas ine, imbude ifawi kwar inai ḇyedine nari ḇesae randak fa ḇesrowi. Ifawi kwar ke roḇa, dufepen asas ḇyena pdef faro Yahwe I. Kofawi inema roi ḇepyan ḇa faro Yefta ma inai ḇyedi. Rofyor Yefta myam inai ḇyeja, ikofen sne ḇyedi iḇoryae kaku. Inai ḇyedi kako ”kyanes snaro nari fyarḇuk ḇa”, (Kitab Suci Komunitas Kristiani (KSKK). Sai ḇefnai ya? Yefta nya romawa ḇa, ma nya inai oser monda ḇape nari fyarḇuk ma nya romawa ḇa. Ine kyurfasna nari keret ḇyedi namnai rodine monda. Ḇape Yefta ma inai ḇyedi sufawi snar roi oso isya ḇefandun syadi ro sneḇaḇir suḇena. Yefta ikofen, ”Yabas swadon yedi ḇe Yahwe I kwar, ma na pok fa yayer kaḇer na ba.” Inai ḇyedi ikofen, ”Wafrur maḇeaya mura imnis ḇeasas kwarna.” (Hak. 11:35-39) Yefta ma inai ḇyeja susouser faro Yahwe ma sukara ḇaḇeri fa sufrur asas suḇena ḇa, imbude roi ine napyan ḇe su ḇa fa sufaduruna.​—Ul. 23:21, 23; Mz. 15:4. w17.04 4-5 ¶5, 6

Sifrur mnis Yusuf i ḇa. Randak ya, ḇedar ḇyesya sḇoḇ i ḇe women rofyor ḇyeumur taun ri 17. Ḇarpurya, siksof imbe denfus tuan ḇyedi swari, inja nafnai fa sisun i ḇe bui. (Kej. 39:11-20; Mz. 105:17, 18) Yusuf ima Allah manfamyan ḇesouser Ḇyedi rariryano, isma kandera nabor syadi ro isma barakas. Ḇape taun ri 13 ramnai, nakame nefararwe. Skosae Yusuf i ro bui ma ḇyemanḇepoik ḇesuru ro Masir. (Kej. 41:14, 37-43; Farfyar 7:9, 10) Roi ḇemnisḇa sifrur ḇe Yusuf i nafrur fa sneri iduf ke? Kyara Yahwe iburi kwar ke? Aroḇa. Yusuf iwaf kuker kaḇaḇaḇ. Rosai ḇefnoḇek i ya? Ikyar faro Yahwe I. Ifawi Yahwe iso bena papoik syadi. Bisa kofawina ro rosai ikofen ḇe ḇedar ḇyesya, ”Mkofrur aw ḇeḇyeḇa kwar faro aya. Ḇape, Allah ifrur aw mkoḇena faro ḇaḇenaḇye imnis ifrur ro rasine insama snonkaku ḇeborsya sisma kankenem.” (Kej. 50:19, 20) Yusuf ifawi barakas ḇerama ro Yahwe ḇenaḇye fa iwafna. w17.08 4 ¶6; 6-7 ¶12, 13