April

Rariso kosma fainda ro fararur marḇak sena? Bisa kakfasnai kakyar ma soasuser raris si ma koso ananun ḇeḇeknam ro Refo sḇukna. (Ibr. 13:7, 17) Penatua ansya siswar ko ma simarisen insama kofanam syadi ḇe Yahwe I. Rofyor smam koso fananjur yawer ḇa ḇaido koraryaḇ werḇa nari sifnoḇek ko ḇeri. Nari srowerpyum ko ma sisambraḇser ko kuker ananun ḇemnis ro Refo. Wamam fafnoḇek sḇuk nane ḇe fasasna Yahwe saswar Ḇyedi faro Au ke? Waswarepen, napyan ḇe penatua sya ḇa fa sḇuk wos ananun ḇe ko. Inja, rariso wafnoḇek penatua sya? Fasna sne ḇerun, napyan fa sawos ḇe Au ma fasnaḇair waḇesyowi kaku si. Wamam fafnoḇek sena ḇefasasna Allah saswar Ḇyedi. Wafrur rarirya ido, nari wasma fainda ma penatua sya nari simarisen sifrur fararur sena. w18.03 31 ¶15, 16

Romawa oso imnis kuker ḇesesya ḇa. Ma fawawi sena kako naḇesisyeyae. Ḇesesya smambabir napnapesya kwar rofyor sbabo kaker, inja sifrur snemuk ḇepyum ma simarisen sebaptis. Ḇape, ḇesesya insape sebaptis rofyor sḇesinan kwar. Inja, sinan ḇena fawawi sya sidif awer romawa sesya fa sebaptis. Ḇape, nari sifnoḇek romawa oser-oser fa smamḇir Yahwe I kuker samambraḇ mankun sena. Sinansya simarisen kaku rofyor romawa sesya siso anananun ro mnuk ḇero rasine. Ḇape, fandun fa siswarepen roi sisewar yaiso sifnoḇek si fa sḇe manfamyan. Inja sinansya fandun fa skarauser, ’Romawa yedine nya fawawi nabor kwar fa ḇyuk farsamsyom mankun ḇyedi faro Allah ma ḇyebaptis ke?’ w18.03 10-11 ¶6

Rofyor sor ko fa korama ḇe rum sena ido, koswarepen insama kora imnis wos kokofen kwarna. Ḇape, rofyor jadifa kora ḇe rum sena snar fandun oso isya ido, kokofenḇair ḇepon ḇe si. Snar ḇena rumya imbude fyasos anan kwar fa ḇyukiwaf ko, inja koramaḇa ido rosai fyasos kwarna na nadawer monda. (Mat. 5:37) Ḇeḇesosya simewer srama insama bisa sraḇe snonkaku ḇeyor si snaro skara undangan sena napyum syadi. Roi sifrur nane nfasnai saswar ma syowi ke? Fandun fa koḇesyowi rosai ḇena rumya fyasos kwarna. (Luk. 10:7) Inja koraḇa ido, kokofenḇair fasaw ḇe ḇena rumya. Kofrur rarirya ido, kofasnai saswar ma ḇaḇenaḇye faro i. Fandun fa koḇesyowi snonkaku oser-oser budaya sena. Ro budaya ḇeḇeso, sifrurpyum snonkaku ḇerama kanandor fa ḇedakam ḇe rum sena. Ro budaya ḇese, rofyor korama ḇaim ḇe rum oso fandun fa kokofenḇair ḇepon ḇe ḇena rumya. Ro budaya ḇeḇeso, ḇedakam sya kuker syowi bisa spampum undangan ḇerandak ḇaido ḇesuruya. Ḇape ro budaya ḇese, spampum undangan ḇerandak ima napyum ḇa. Inja, komampyum budaya ḇero moḇ ani insama ḇena rumya imarisen korama ḇe rum ḇyedi. w18.03 20 ¶20, 21

Insama koso Allah farkankin Ḇyena ido, fawawi Refo koḇena kermkun monda awer. (1 Raj. 4:29, 30; 11:4-6) Inja, rosai na kofrurna insama koso Allah farkankin Ḇyena? Fandun fa kosambraḇser kakyar koḇena. (Kol. 2:6, 7) Nyan oser isoine kofarkor syap Cara agar Tetap Dikasihi Allah. Syap ani na ifnoḇek ko fa kofawi moḇsa koso wos farkin ḇero Refo ro kankenem koḇena raya. Kofarkor syap ani fa ibro kwar ido, kun fawawi royo publikasi ḇesenawer insama kakyar koḇena nadworen. (Kol. 1:23) Kokarauser kaku rosai kofarkor kwarna ma kor Yahwe ifnoḇek ko fa kofrurna. Rosai imbe kosma kakuna rofyor kofarkor ma kokarauserna? Roi imbe kosmana iso insama komarisen syadiwer fa kofrur Allah imarisen ma kosouser I. (Mz. 40:8; 119:97) Osower ido, rofyor kofarkor ma kokarauserna, nari kosambraḇ fa kopampum rosai monda ḇefrur koso Allah farkankin Ḇyenaḇa.​—Tit. 2:11, 12. w18.02 24 ¶7-9

Insama kakfaduru kakyar koḇena raris Nuh i, ḇefandun yaiso kuker kofarkor Refoya, koswar rosai kofarkorna, ma koḇukifadwer kenem koḇena ma kun snemuk ḇepyum ro kankenem koḇena. (1 Ptr. 1:13, 15) Kakyar ma Allah fawawi Ḇyena nakadaunwarek ko ro denem Setan ḇyeja ma awyae dunya ine. (2 Kor. 2:11) Snonkaku ḇebor ḇero dunya ine siswar syadi faro roi ḇeḇarḇor ma amoralitas, simarisen monda faro roi ḇesasarna. (1 Yoh. 2:15, 16) Siḇefnder snar kofanam kaku kuker papupes dunya ḇeḇarḇor ine. Rofyor kakyar koḇena syambraḇ ḇa ido, nari kakkara rarirya. Koswarepen rofyor Yesus ikofen fafisu koḇedi ine imnis Nuh fafisu ḇyedi, dawos ḇa kuker roi ḇeḇarḇor ḇaido amoralitas ḇape roi ḇeḇyeḇa nari kosmana rofyor kofarmyan ḇe Allah werḇa. (Mat. 24:36, 39) Kofuken mankunko, ’Ro kankenem yedi yafasnaḇair yamambir kaku Yahwe I kwar ke? Kakyar yedi nadif aya fa yafrur rosai Yahwe imarisenna ma yafarkor snonkaku ḇesesya fa sakfrur rosai Allah imarisenna ke?’ Kankarem koḇena faro fakfuken nane nari nafnoḇek ko fa kofawi kosya kombran kuker Allah ḇekaku raris Nuh i ke roḇa.​—Kej. 6:9. w18.02 11-12 ¶8, 10

Kakuḇae, na koḇinkwanbur ḇeriḇa snonkaku oser-oser ḇena rari ḇeḇyeḇa ansine. Imbude kofararur kayam kuker si, kora ḇe rumfarkor fnoḇek si, ḇaido kokenem kuker si. Ḇape kopok fa kona kakara ma kofrur raris nyan sifrur na ḇa. Rosai na ḇefnoḇek ko rai? Na kosambraḇser ḇaḇebati koḇena kuker Yahwe roro kofarkor Refo ma kokinfir bati ḇeswar I sya. Komarisen kako fa kofnoḇek ḇesesya fa sakmambir Yahwe I. Kosewar swaf fa koḇaryas, ma kor Yahwe I fa ifnoḇek ko insama kokofen roi ḇenapes ro fafisu ḇemnis. Iḇye kada snonkaku sya smambir koḇe Saksi Yahwe. Inja, kenem ḇepyum koḇena nari nun sanandik ḇe Allah ḇape faro mankunko ḇa. Yahwe fyarkor ko kwar fa ”kobur ḇarḇorna ma rmomen supswan ine ma insa kokenem kuker fawawinanem, nanapes ma ḇaḇeari faro Allah ro supswan ine”. (Tit. 2:11-14) Kofarari Yahwe ma kofrur roi imarisen na ido, na snonkaku ḇesesya smamna. Iba syadiwer imbude sino sikofen radine, ”Nkomarisen nkoso mko, snar nkorower kwar Allah ryous mkokame.”​—Za. 8:23. w18.01 32 ¶17, 18

Ine kyurfasna koswar mankunko ido syasar ke? Aroḇa, koswar mankunko ima roi ḇefandun ma roi kofasna ro rasras nairi. Yahwe ifrur ko rarirya. Yesus doḇe, ”Waswar snonkaku min besi imnis waswar mankundau.” (Mrk. 12:31) Kakuya, na kopok koswar snonkaku ḇesesya ḇa rofyor koswar mankunko ḇa. Refoya ikofen kako, ”Snonya iswar swari kada imnis raris baken mankundi ḇyedi: Mansei ḇeswar swari imnis raris iswar mankundi. Snar snonkaku oso dayin baken mankundi ḇyedi ḇaim, mboi fyaduru ma ḇyemanmin i.” (Ef. 5:28, 29) Inja nasnai kaku fandun kako fa koswar mankunko. Saswar kowasya ro 2 Timotius 3:2 ima iso ḇeḇefandun mankun. Snonkaku oso iswar syadi mankundi ido, na kyara ikaki syadi ro roi ḇekakuna. (Rm. 12:3) Fyandun mankundi bardi buro ḇesesya. Rofyor ismai samswen, na ḇyuk sasarya ḇe mankundi ḇa ḇape ḇesesya. Snonkaku ḇemnis radirya sna aski kaku ḇa. w18.01 22 ¶4, 5

Korower Yahwe I kuker kofarkor Refoya, ma kawos ḇe I ro nadi ya. Kokara awer nadi ima roi kofrur ro ras-ras na ḇaido imnis raris aryawin ḇaido ”jimat” ḇeyun barakas. Rofyor koḇenadi, kawos ḇeri kuker Manḇedaw koḇedi. Yahwe imarisen ryower ko! (Flp. 4:6) Inja, rosai monda makakwarek Bedi, ”Buk ḇaḇekandera bedi faro Yahwe I.” (Mz. 55:22) Naek srar syaran ma syaran sya sḇaḇir fainda ro ananun Refo ani. Inja, nadi ima ḇyefandun kaku faro Au! Rofyor koḇenadi, fandun fa kor Yahwe fafnoḇek Ḇyedi monda ḇa. Fyorno ido, komkakwarek syadi samswen kosmana isof koḇefnder roi ḇepyum kosmana kwar. Inja, ras ḇe ras kwarapan roi rikior wamarisen kakuna, ramnai wakofen kasumasa ḇe Yahwe faro roi anna. w17.12 24 ¶10, 11

Snonkaku syaran ma syaran ḇefarkor Refo sisya sḇuk farsamsyom mankun sena ḇe Yahwe I, ma sebaptis. Ḇebor ro fandu si, sima romawa babo ḇefarkor Refo rofyor sibaḇa ya. Skinfir nyan kankenem ḇepyum syadi kwar. (Mz. 1:1-3) Mkoḇe sinan Kristen ido, imbude mkowaf fafisu romawa mkoḇesya sḇebaptis. (Mam kako 3 Yoh. 4.) Sinan Kristen mkoya, na mkomarisen insama romawa mkoḇesya smambir Refoya, kirine kofawi naḇe Syap-Syap Ibrani ma Yunani. Iba syadiwer, romamkun sya kako bisa sfarkor tokoh-tokoh ma fawar ḇero Refoya. Organisasi Yahwe fyasos kwar syap, majalah, ma vidio bisa sinan sya sḇuki fnoḇek romawa sesya. Insama romawa mkoḇesya sfanam ḇe Yahwe ido, fandun fa smambir kaku Refoya. w17.12 15-16 ¶1, 4

Kokarapan imbesrar oso swari isyom Yahwe I ḇa. Rosai nari ifrur ya rofyor swari ifrur mnis i ḇa? Imbesrar ine bisa imsor ma dawos nabore. Ḇape, ine nun fainda ke? Rofyor iso ḇesasarḇa ido, na swari imarisen fyarmyan ḇe Yahwe ke? Oroḇaḇeri. Ḇape, rofyor ḇyesyowi swari ḇebukor ro kina yadori ido, kina ḇyeja nari ḇyeaski syadi ma nun sanandik faro Yahwe I. Rari ḇepyum ro imbesrar ine bisa nafrur swari imarisen ifarmyan ḇe Yahwe isof sukame susma sasuref Allah Ḇyeasas kwarna. (1 Ptr. 3:1, 2) Kwarapan naek oso swari isyom Yahwe I ḇa. Rosai nari ifrur ya rofyor swari ḇyesyowi i ba? Rofyor imsor ma ḇyawek swari snar ḇyesyowi i ḇa ido, ine nun fainda ke? Na aroḇaḇeri! Allah imarisen insama ḇyesnonswa ḇesaswar ma ifarari Yesus. Yesus iso ḇebukor ro sidang Kristen, ḇyekaḇaḇaḇ ma isaswar. (Luk. 9:46, 48) Rofyor naek ani iso Yesus nyan ḇyena ido, ḇarpurya imbude nari swari imarisen dakfarmyan ḇe Yahwe I. w17.11 30-31 ¶13, 14

Snonkaku ḇeso kakara dunya ine, sifandun Yahwe wos farkin Ḇyena ḇa. Rofyor kosasor ko ḇa ido, kakara sena fawawas nafrur kakyar koḇena syambraḇ ḇa. Kirine, kakara dunya ine nasya ro moḇ nakame, raris ro televisi, internet, moḇ kofararur rona, ma rumfarkor. Kakara ḇeradine nabor kaku ro moḇ ḇebor. Snonkaku ḇekofen radirya fyandun ḇa Allah ima isya ke roḇa. Kyara radirya snar nya ḇaḇemkei fa ifrur rosai monda imarisenna. (Mz. 10:4) Ḇesesya sḇaḇir na sepande rofyor sikofen, ”Yakyar faro Allah ḇa raryano, na yakenem pyum.” Rofyor kokara Manḇedaw isyaḇa ido, nsun ro swaruser ke? Snonkaku ḇeḇeso sisewar kankarem ḇyena kuker sifarkor fawawi dunya ine. Ḇape ḇarpur mura sikmome. Kakuya kankarem ḇyena samswenḇa. Imnis raris, rum oso na dores ro mankundi ro moḇ oso ke? Na jadi ḇa. Ono sisya ḇebawes rum ani. w17.11 22 ¶2-4

Rosai ḇefnai fa fandun kaku koso munara Swarapepen? Snar munara ine fyasnaḇair kosyom faro Yahwe I kako. Na kokyar Yahwe ma Yesus sumam kaku rosai snonkaku sya sifrurna insama sakso ro munara ḇefandun kaku ro taun ine. Komarisen Yahwe ma Yesus sumam koso ro munara Swarapepen ani. Ḇape jadi fa koso ḇa snar koduf ḇaido roi ḇesena. Rosai kofrurna nfasnaḇair munara ani ḇyefandun kaku ḇe ko, koḇuk sano ḇe Yahwe I fa fyas snonsnon koḇena ro ”syap swarapepen” Ḇyedi. Syap ani kako sap i ḇe ”syap kankenemya”. Ro syap ani naser snonsnon ro snonkaku nari ḇesma kankenem fyoroya. (Fasasna 20:15) Ro minggu munara Swarapepen ya ḇaim, bisa koḇenadi ma kowasenkara fasfesepen koḇena kuker Yahwe I syambraḇ ke roḇa.​—2 Kor. 13:5. w18.01 10 ¶4, 5

Rofyor snonkaku ḇemun ani isya kwar ro kota ḇekadaunwarek, ipok imkak awer. Yahwe dawos kuker kota ḇekadaunwarek kwar, ”Kota-kota anna nari nḇe moḇ fadadiren.” (Yos. 20:2, 3) Rodiwa, Yahwe nari dor ḇaḇeri snonkaku ḇemun ani semankara i wer kuker parkara ḇemnis. Snonkaku na ḇemunsu i ani ipok fa syun ḇe moḇ ani fa myuni. Rofyor snonkaku ḇemun ine isya ro kota ani ido, nari Yahwe kyadaunwareki. Ḇape, kota ani imnis raris bui ḇa. Bisa fyararure, ifnoḇek snonkaku ḇesesya, ma ifarmyan ḇe Yahwe kuker aski. Kankenem ḇyedi bisa neaski ma nun raryaḇ! Allah manfamyan ḇeḇeso Ḇyesya ḇefrur sasar ḇeba sḇaḇir sisasar kaker, iba syadiwer rofyor simbror kwar. Sino sisya skara Yahwe ḇyefnder sasar sena ḇa. Rofyor ḇaḇir rarirya ido, wakyar kaku rofyor Yahwe ḇyuk ampun ḇe Au, ipyospres na kwar. Wapok fa kwara wasasar kaker. w17.11 11 ¶6; 13 ¶13-14

Nyan oser fa kofaduru ḇaḇeoserya iso kuker kowasenkara knam ro mamami ma anggur. Fandun fa kofrur roi ine rofafisu munara Swarapepenya ḇaim ma iba syadiwer ro roḇ Swarapepen Marmar Kristus. (1 Kor. 11:23, 25) Roti tidak beragi ḇaido mamami ḇepisenḇa fyasnaḇair Yesus kankenem ḇenapes fyarser kwarna. Anggur ḇerik fyasnaḇair Yesus rik ḇyedi. Fandun fa kowasen kaku kuker roti ma anggurna. Fandun fa koswarepen farsarser Yesus ḇyedi nfasnaḇair fasasna saswar risuru ḇeba kaku. Yahwe ḇyuk Rumkun Ḇyedi faro ko, ma Yesus ḇyuk kankenem ḇyeja faro ko. Rofyor kowasenkara saswar suḇena ido, ine nari nafnoḇek ko fa koswar syadi su. Ma saswar koḇena faro Yahwe nari nsambraḇser ḇaḇeoser koḇena. w18.01 13 ¶11

Yahwe iswar kaku snonkaku sya, isof ro Mankundi ḇye Rumkun ḇyedi ḇe ko insama bisa kona kankenem fyoro ya. (Yoh. 3:16) Yahwe ifrur kaku asas-asas Ḇyenaḇa ido, ine fyasna Setan ma Allah mbroḇ ḇyesiso ḇekaku sya. Setan kyursof Yahwe I ḇe manḇeankarkar ḇefandun snonkakuḇa ma nyan Ḇyepoikya inapesḇa. Allah mbroḇ ḇyesi sanonef asas Ḇyena kuker sikofen ḇo soḇo, ”Asas Manseren iḇe ryamumaya isyaro? Snar kma ma up nkoḇesi simar kwar, ḇape roi ḇeḇor kam namnis raris ro randakya rofafisu supswan ḇyeḇefrurya!” (2 Ptr. 3:3, 4) Ḇape, Yahwe na ifrur kaku asas-asas Ḇyena. Ḇyeasas kwar snar ḇaḇefasasnai ro hak Ḇyedi fa ḇyepoik ine nari nun kankenem faro snonkaku ḇesousersya. (Yes. 55:10, 11) Yahwe ḇaḇepapoik Ḇyedi ḇyeknam ro saswar ya. Inja, kokyar kaku snar iswar ko ma ḇyesyowi manfamyan Ḇyesi ḇesouser sya ḇesya kwar.​—Kel. 34:6. w17.06 16 ¶7

Rofyor Yahwe dap asas ani, imnis ḇeḇefas ro Kejadian 3:15, rya farsarser ani neḇeḇuk kwar. Taun ri 4000 ramnai, insape Yahwe ḇyuk Rumkun mandos Ḇyedi ḇe snonkaku sya. (Yoh. 3:16) Yahwe saswar Ḇyeja nadif sne koḇena kaku. Koine konapesḇa. Ḇape, bisa kofasna saswar ḇekakuya ke? Imbo, kakuḇae. Yahwe daw ko imnis kuker fanir Ḇyeja. Ine kyurfasna bisa kofarari rari Ḇyena. Kaku, kofasna saswar ḇekaku ima napyanḇa, ḇape bisa kofasna na. Habel iswar kaku Allah I. Kuker sne ḇesiper ḇyuk roi ḇepyum syadi faro Allah. (Kej. 4:3, 4) Nuh i kako fyasna saswar ḇekaku. Ro taun ḇe taun ḇyaryas pdef anun swarapepen ḇerama ro Allah, ḇape snonkaku sya simewer simnaf i. (2 Ptr. 2:5) Abraham fyasnaḇair saswar ḇyeja faro Allah syambraḇ syadi ro rosai monda. Ma kuker sne ḇesiper, imarisen ḇyuk romawa iswar kaku Ishak i ḇe farsarser. (Yak. 2:21) Imnis raris snon anskoine, ko kako komarisen kofasna saswar rofyor samswen fa kofasna na. w17.10 4 ¶3, 4

Snar Yesus ima Imam Ḇeba koḇedi, inja kokyar kaku ”nari Allah iswar ko ma ḇyeḇok ko ma kosma fafnoḇek, rofafisu koḇefandunya”. (Ibr. 4:16) Inja, insama kosma fadadiren ro Yahwe I, fandun fa kokyar faro Yesus farsarser ḇyedi. Kokara monda awer farsarser ima nefasos faro snonkaku syakam. Wakyar kaku snar farsarser nḇuk fainda faro mankundaw. (Gal. 2:20, 21) Wakyar kaku snar Yahwe ḇyuk ampun kwar faro sasar Bedi snaro farsarser. Wakyar kaku snar farsarser nḇuk ḇe Au saneraro fa wakenem fyoro. Farsarser Yesus ḇyedi ima sasuref Yahwe ḇyuk ḇe Au nairi! Yahwe ḇyefnder sasar koḇena kwar, ma pok fa komkak awer na syewar sasar koḇena ḇaido ḇyemankara ko faro sasar kofrur kwar na. (Mz. 103:8, 12) Inja, na kokyar kaku Yahwe ipyos sasar koḇena kwar. w17.11 13-14 ¶14, 17

Rofyor sifrur randak Anan Roḇ Tuan, Yesus ḇyenadi kuker kakaku. Ḇyenadiwarek fasfesepen ḇyena kuker Kmari. Yesus ḇyenadi kako insama manfamyan ḇyesya sakḇeoser. Yahwe kyarem nadi ro Rumkun iswar kaku ani. Iḇesebur kuker munara ḇesena, Swarapepen ine fyasnaḇair snaro Saksi-Saksi Yahwe sya sḇeoser. Ro ras ani, snonkaku syaran ma syaran ḇerama ro er, ma kif ḇesnai ḇese siryur kayam fa sifasnaḇair sikyar Yahwe iso ḇewan Rumkun Ḇyedi. Ro moḇ ḇeḇeso, snonkaku ḇerama ro er ḇeḇese sakfrur munara ḇaḇeari kayamyame, ḇape snonkaku ḇesesya skara ima roi ḇemnis ḇa. Ḇape, Yahwe ma Yesus sukara rarirya ḇa. Faro suma, ḇaḇeoser koḇena ro munara Swarapepen ipyum syadi. Snar koine Yahwe kawasa Ḇyesya, inja kokandor ḇaḇeri snar koḇeoser kuker nyan ḇeradirya. Yahwe Ḇyardi ḇaḇeoser ine ro wos Ḇyena faro Yehezkiel i.​—Yeh. 37:15, 17; Za. 8:23. w18.01 11-12 ¶7-9

”Karui kamasan ḇaḇawesya” sipampum Mesias isoine manfarkin Yahudi sya. Simewer srower Yesus ma simewer skarem i ḇe Kristus. Ḇape irya monda ḇa, manfarkin ansya ma snonkaku Yahudi ḇesesya si kako sor Pilatus i fa myun Yesus i. (Luk. 23:18, 23) Inja, si kako sakso warpu fa smun Yesus i. Rofyor Yesus spampum ma smuni ido, rariso na ”ḇye karui dopir” rai? Roi ine bisa ḇyejadi fyor Yesus ḇyeḇeḇawes kaḇer. Manwawan Petrus dawos kuker ”Yesus Kristus, snon Nazaret, mkopai kwar ani, ḇape Allah ḇyawes i kwar ro fandu snonkaku ḇemar sya”. Ramnai doḇe, ”Karui kamasan ḇaḇawessya sisawen kwar, ḇyekarui dopir kwar.’” (Farfyar 3:15; 4:5, 11; 1 Ptr. 2:5-7) Inja, Yesus iso monda ḇebuk fasaspar faro snonkaku sya. Iso eḇedari Refo ikofen, ”snonsnon oso ḇese isya ḇa ḇesma kwar papoik ro Allah fa ḇeḇuk koreriya maḇeko”.​—Farfyar 4:12; Ef. 1:20. w17.12 10-11 ¶6-9

Ro ḇardadi ḇyedi kuker ras ḇepupes dunya ine, Yesus dawos kako kuker ’raramuma’ ḇyeja. Kuker ḇaḇekandera nari ḇeramaya, doḇe, ”Rofyor ani nari aḇyair Rumkun Snonkaku fyasnai ro nanki ma kawasa kam ro supswan ine nari skanes ma nari smam Rumkun Snonkaku ryama ro mandif ro nanki kuker papoik ma payamyum ḇyena. Ma nari [Yesus] iwan malaikat-malaikat ḇyesi fa sisasyar ma siwuf sonker ḇerok naba kaku ma nari siryur snonkaku Allah kyimfir kwar sya ro supswan ḇesiper.” (Mat. 24:29, 31) Yesus nari ’iryur snonkaku’ rofyor dun snonkaku Kristen ḇesma ramrem syakam ro supswan ḇe nanki. Ine nari ḇeḇejadi rofyor ḇaḇekandera ḇebaya fyor Harmagedon ryama ḇaim. Yesus fnoḇek 144.000 sya nari smamunmun kuker raja-raja ḇero supswan ma nari sikafyo si. (Fasasna 17:12, 14) Na koso munara Swarapepen ḇepupesya rofyor Yesus ’ryama’ ḇaim fa iryur snonkaku ḇesma ramrem sya. w18.01 14 ¶15

Ro nanki Yesus ’ikenem isof fyoro-fyoro’. (Rm. 6:9; Fasasna 1:5, 18; Kol. 1:18; 1 Ptr. 3:18) Yesus ḇyeasas faro manwawan ḇesouser ḇyesya nari sḇepoik fnoḇeki ro nanki. (Luk. 22:28, 30) Paulus fyas snar ”Kristus ḇyeḇeḇawes ro marmarya. Ine fyasnai sasuref faro snonkaku ḇemar kwar ansi nari sḇeḇeḇawes wer”. Paulus ikofen wer snonkaku ḇese sino sisya ḇeḇeḇawes ḇe nanki kako, ”Oser-oser nari ḇyeḇeḇawes imnis rarwas ḇyedi: ḇepon kakuya Kristus; ḇarpurya ro fafisu Kristus kyaḇerma wer, insape rarwas snonkaku ḇesun ro Kristus kawasa ḇyesi.” (1 Kor. 15:20, 23) Ro Paulus wos ḇyenane, bisa kofawi fafisu risai kaḇakḇok ḇe nanki nari ḇyejadi. Ine nari ḇeḇejadi ro fafisu Kristus kyaḇer muma wer. Saksi-Saksi Yahwe sfasnaḇair ro Refo fyoro kwar snar Kristus raramuma ḇyedi ḇyeḇerak ro taun 1914. Inja kokenem kaker ro Kristus ”raramuma” ḇyedi, ma papupes dunya ḇeḇarḇor ine fyanam kaku kwar. w17.12 12-13 ¶11, 14-16

Yahwe I kako fafisu oso snonkaku iswar sya simar, imnis raris manfamyan ḇyesya Abraham, Ishak, Yakub, Moses, ma Raja Daud. (Bil. 12:6-8; Mat. 22:31, 32; Farfyar 13:22) Refo ikofen Yahwe imander kaku fa ḇyawes kaḇer snon ḇesoasuser ansya. (Ayb. 14:14, 15) Ma rofyor sikḇawes kaḇer kwar, nari sisma aski ma pararei ḇekain fyoro. Yahwe I kako dakḇaḇir sne ḇyedi ḇyefafardun rofyor Rumkun ḇyedi imar. Refo ikofen snar Yesus ima ’byemankun bepon syadi Allah imarisen kaku’. (Ams. 8:22, 30) Samswen kaku fa kofawimnis rariso Yahwe sneḇaḇir ḇyedi rofyor myam Romawa ḇyeja imar kuker kandera. (Yoh. 5:20; 10:17) Kokyar kaku nari Yahwe ifnoḇek ko. Inja koḇeḇirḇar awer ma kokofenḇair sne ḇefafardun ma saneso koḇena. Nari kosma sneprei kaku snar kofawi Yahwe ifawimnis kaku sneḇaḇir koḇena ma imarisen ḇyuk fafnoḇek kofandunna!​—2 Kor. 1:3, 4. w17.07 10 ¶3-5

Baboine, snonkaku syaran ma syaran simarisen snar bisa sḇuk ”robebor ḇepyum” raris oras, samambraḇ ma arasai sena. Kuker sifrur rarirya, sisaramper bait rohani ḇeba syadi Yahwe Ḇyeja. (Ams. 3:9) Yahwe nari ḇyefnder ḇaḇeri saswar ma fararur marḇak koḇena faro I. Ro ras ḇepupes ine, Yahwe kawasa Ḇyesya sifrur fararur ḇeba kaku. Fararur inekam bisa nambran snaro barakas ro Yahwe ma nyan Kristus ḇyuk farkankin. Komarisen kaku snar koisya ro organisasi ḇefamfnom ḇa, ḇeknon, ma ḇekain fyoro. Inja, komarisen koḇesyowi fararur koḇena ro organisasi Yahwe Ḇyedi. Ma ’komnaf Yahwe wos ḇyena’ pdef. Kofrur rarirya ido, nari Raja ma Imam Ḇeba koḇedi sukadaunwarek ko. Komarisen kofrur rosai riryakam fa kosaramper ibadat ḇekakuya. Yahwe nari myamwarek ko isof pupes ma iba syadiwer isof fyoro-fyoro bis! w17.10 26 ¶18, 19

Fyoro werḇa, bar ro dunya Setan raris sistem polotik, agama, ma ḇaḇefarḇaḇyan nari neḇemun pres. Brawen ma perak smam ḇe roi ḇekakur ro sistem ḇaḇefarḇaḇyan ine nari nḇe roi ḇekakurḇa, imnis raris nabi Yehezkiel ma Zefanya sufas na. (Yeh. 7:19; Zef. 1:18) Kwarapan kada, ro fafisu ḇepupes ro kankenem koḇena insape kofawi fyoro kwar koḇuk nana ḇekaku koḇena fa kosewar ”arasai ḇeḇyeḇa na” ro dunya ine, rariso sneḇaḇir koḇena? Imbude koḇaḇir komnis raris snonkaku ḇebuk kankenem ḇyeja ḇesiper fa isewar pipi, ḇape pipi ismanakam pipi ḇekaku ḇa. (Ams. 18:11) Nana ḇero dunya nanekam nari napromes. Inja wafnak awer oras bedi fa buk nana wasmana fa waseref ḇaḇebati ro nanki. Nari kosma raryaḇ kaku snar koḇuk roi ḇepyum syadi faro Yahwe ma Karajan Ḇyedi. w17.07 7-8 ¶16

Snonkaku Kristen ḇeḇeso sifrur sasar ḇeba ma sḇesewar fa siyokef sasar sena. Imbude simai ḇaido simewer sifrur ḇesesya sfafko. (Ams. 28:13) Ḇape, koyokef sasar koḇena ima roi ḇepyum ḇa snar na nafrur samswen ko ma ḇesesya. Rosai ḇefnai ya? Snaro nakyaren fararur ro rur ḇesren ma nawyae ḇaḇeaski ro sidang. (Ef. 4:30) Inja, snonkaku Kristen ifrur sasar ḇeba ido, saswar ḇekakuya nari nadif i fa dawos ḇe penatua sya ma isma fafnoḇek fyandunna. (Yak. 5:14, 15) Saswar ima rari ḇemaeja kaku. (1 Kor. 13:13) Kofasna saswar ido, snonkaku sya na sfawi mansei ḇeso kaku Yesus i ma ḇefarari Yahwe I, Knam ro saswarya. Paulus doḇe nya saswarḇa ido, ima ḇyefainda royoḇa. (1 Kor. 13:2) Iḇye kada kokame kofasna pdef saswar ro ”sḇadon roḇaido wawos” monda ḇa, ḇape kako ’kuker saswar ḇekaku, ro fararur koḇena’.​—1 Yoh. 3:18. w17.10 8 ¶17, 18

Yusuf fyasna ḇaḇeḇri ḇyeja rofyor Potifar swari dembuki fa denfus i. Ifawi kwar nari isma samswen ro kankenem ḇyeja, rofyor pyampum Potifar swari marisen ḇyena. Ḇape, imkak ma isusuḇa. Kuker ḇri pyampum ḇerina. (Kej. 39:10, 12) Rakhab ima contoh ḇesewer. I kako bin ḇeḇri kaku. Rofyor manpaf Israel risuru ḇesun fasis ḇe Yerikho ḇerama ḇe rum ḇyedi, inja iyokef snon ansuya ma ifnoḇek su fa sufrarbur moḇ ani. (Yos. 2:4, 5, 9, 12, 16) Rofyor snonkaku Saduki imbe sidwarek si, manwawan ḇesoasuser ḇyansi kako sifasna ḇaḇeḇri. Ine snaro smam Yesus fyasna ḇaḇeḇri, inja simarisen kako sifarari ḇaḇeḇri ḇyena. Simewer sisusu fa sḇuk farkarkor kuker Yesus i. (Farfyar 5:17, 18, 27, 29) Yusuf, Rakhab, Yesus ma manwawan sya sun snemuk fa sifrur rosai ḇenapes. Sifasna ḇaḇeḇri snar sikyar mankunsi ḇa, ḇape snar sikyar faro Yahwe I. Rofyor kofandun ḇaḇeḇri, fandun fa kokyar faro Yahwe I, mboi faro mankunko awer.​—2 Tim. 1:7. w17.09 28-29 ¶6-9

Kokyar faro samambraḇ kobena monda nari jadi fa kosawen rari ḇekwar koḇena ḇa. Snonkaku oser-oser sḇensewar kaku fa sfadwer kenem sena. Roi ḇefnoḇek si yaiso Allah Wos Ḇyena ma rur ḇesren ya. (Luk. 11:13; Ibr. 4:12) Insama ko kako kosmai fainda ro Allah farfnoḇek Ḇyeja, fandun fa kowasya Refo ro ras ḇe ras, kowasen karana, ma koḇenadi ras ḇe ras, kor fawawi nanem ma samambraḇ fa kofrur rosai kofarkor kwarna. (Yos. 1:8; Mz. 119:97; 1 Tes. 5:17) Rofyor kofrur fasasos ro fananjur ḇero sidang, Allah Wos Ḇyena ma rur ḇesren Ḇyeja na ryous ko. (Ibr. 10:24, 25) Ma ko kako komarisen kobuk rosai monda organisasi fyasos kwar ḇe ko na, imnis raris majalah, JW Broadcasting, JW Library, ma jw.org. (Luk. 12:42) Snonkaku Kristen fandun fa sisawen kenem ḇekwar sena, sifrur roi nanekam ḇa ido sismai kyaremso ro Allah ḇa. Fandun fa ko kako kona kenem ḇebabo.​—Kol. 3:10. w17.08 20 ¶16, 17

Raja Daud i isma ḇaḇekandera nabore snar roi ḇemnisḇa sifrur faroi na. Yahwe ryem Daud i fa ḇye raja faro er Israel sya rofyor ḇyeromawa babo kaker. Ḇape Daud iwaf kaker isof taun ri 15 insape ḇyeraja faro er ḇyesya. (2 Sam. 2:3, 4) Rofafisu ḇeḇeso, Daud ifrar ma iyokefbur Raja Saul i, snar imbe myuni. Ine ḇefnai fa, Daud nya rum noḇa. I kako ḇyarek ro sup ḇese ma ḇyarek kako ro aḇyaḇ ḇero sup ḇeḇeursḇa. Ḇarpurya, Saul imar ro mamamun ya. Ḇape, Daud fandun fa iwaf kaker taun rifik syadiwer insape ḇyepoik ḇe raja faro er Israel sya. (2 Sam. 5:4, 5) Rosai ḇefnai fa Daud imarisen iwaf kuker kaḇaḇaḇ? Ifawi Yahwe iswari ma nari Yahwe isouser rosai ikofen kwar ḇe i na. Kyara rofyor Yahwe ifnoḇek i rofafisu iwara ma myam ḇe ḇarpon fafisu Yahwe nari ipyos kandera ismana. (Mz. 13:6) Daud ifawi snar Yahwe nari ḇyuk barakas faro mansei ḇenaḇye fa ḇewaf sya. w17.08 7 ¶14, 15

Wosna nefararwei ker. Fyoro mura, wos ma apap sawos ro fafisu iwara, neḇese kuker wos ḇekaku ḇyena. Wos Ibrani ma Yunani ḇeḇefas ro Refo fafisu iwara neḇese kuker wos Ibrani ma Yunani ḇero baboine. Snonkaku ḇebor sya sifawimnis Refoḇa ro wos Ibrani ma Yunani ḇekwar. Inja, sifandun fararwei Refo ḇebabo. Ḇeḇeso sya skara fandun fa sifarkor wos Ibrani ma Yunani ḇekwar insama sifawimnis kaku Refoya. Ḇape, nun fainda naborḇa. Kokofen kasumasa kaku snar sefararwei Refoya ḇesiper ḇaido barya monda ro wos syadi ri 3.000. Yahwe imarisen insama snonkaku ḇerama ro ”er oser-oser, wos, ma kawasa” sisma fainda ro Wos Ḇyena. (Fasasna 14:6) Ine nafrur kofanam syadi ḇe Allah koḇedi, ḇesaswar ma ḇemamfarfir ḇa. w17.09 16 ¶4

Imbude kona karyer sepecat kwar sya. Rarirya ido, komkuepen ko insama kawos awer ḇe i, rofyor kona fandandunḇa. Kakuḇae, ine napyanḇa. Ḇape, ine nari napyan, rofyor koswarepen kofarari Yahwe farari ḇepyum Ḇyena ma kofrur rosai dorna. Ko kako bisa kofarkor ro Raja Daud farari ḇepyum ḇyena. Rofyor Saul ma Syimei sunonef i, Daud imsorḇa ḇaido myunsu su ḇa. (1 Sam. 26:9, 11; 2 Sam. 16:5, 10) Ḇape, fafisu oso fyasna ḇaḇefarmku mankun ḇa. Imnis raris, rofyor iyokef sasar ifrur kuker Bat-syeba i ma rosai ifrurna faro fabri mankun Nabal fyasnana. (1 Sam. 25:10, 13; 2 Sam. 11:2-4) Farkarkor ḇefandun rosai kosmana? Oser ya, manfarkin ro sidang fandun fa sifasna ḇaḇefarmku mankun insama sḇuk sasar awer fakamamar sena. Ḇesuru ya, kokara awer na kosapi ro fafrowes ya ḇa.​—1 Kor. 10:12. w17.09 6 ¶12, 13