April

Ko ido rariso? Kokara Yahwe karkara Ḇyena ke karkara dunya ine? Snonkaku Kristen koine, koḇesewar kwar fa kofrur rosai Allah imarisen na. Mboi nyan karkara koḇena moḇsa ḇyerai? Koḇesewar kwar fa kokara Yahwe karkara Ḇyena, iso komam roi nakam raris moḇ myam na rai ke? Fandun fa koḇesewar kaku insama kofrur na. Imbape, napyan kaku fa kokara karkara dunya ine. Kukro rur dunya ine isya ro ris koḇedi. (Ef. 2:2) Snonkaku ḇero dunya ine smam monda faro fandun mankun sena, ma nane na nafrowes ko fa kokara raris si. Kaku, samswen fa kokara Yahwe karkara Ḇyena, mboi napyan kaku fa kokara karkara dunya ine. Komam monda dunya ine dawyae karkara koḇena ido, nari kofandun mankunko ma komarisen kokinfir roi ḇekaku ma ḇesasar ro mankunko. (Mrk. 7:21, 22) Inja, fandun fa kokara ”Allah karkara ḇyena”, mboi ”karkara snonkaku” ḇa. w18.11 21 ¶1; 22 ¶3-4

Yesus imewer ismai syowi ḇerama ro manfarkin agama ma polotik sya. Ḇape, Yahwe dawos ḇeri ro nanki rarwan rikyor, imarisen insama Rumkun Ḇyedi ifawi snar ima iswar i kaku. Ine syambraḇser kaku Yesus i! Rofyor Yesus ḇyebaptis ro Warḇeki Yordan raposa, Yahwe ikofen raris mnuk ḇero rasine. Rya Yohanes Ḇeḇebaptis derer monda ḇerower wos annane. Ramnai, indokada taun oser rofyor Yesus imar ḇaim, manwawan rikyor ḇyeskoya skorower Yahwe wos Ḇyena nkur ḇe Yesus i, ”Ine Rumkun yaswar kakurirya, faro I sneri imarisen, iḇye mkomnaf I.” (Mat. 17:5) Oso wer, ras riḇeso fanam ḇe ras Yesus imar ya, Yahwe dawos ḇeri ro nanki ḇe Rumkun Ḇyedi. (Yoh. 12:28) Yesus ifawi snonkaku sya na sor i ḇe snon ḇeanonef ma nari marmar ḇyedi nafrur mamyai. Ḇape, ḇyenadi ḇo dor insama Allah marisen Ḇyedi ryarirya mura ḇo marisen ḇyedi awer. (Mat. 26:39, 42) ”Ḇyefandun ḇa imar ro [ai kandera] imnis roi oso ḇefrur mamyai”, snaro imarisen ismai marisen ro Kmari mboi dunya ine ḇa.​—Ibr. 12:2. w18.07 7-8 ¶15-16

Yesus ifrur randak munara Swarapepen fnoḇek manwawan ḇyesi raposa, ro roḇ ani kako Yesus fyasnai ḇyebri kaku. Rariso fyasnai na rai? Yesus duf fararur fa ifrur Allah marisen ḇyedi. Mboi ifawi infa ifrur na ido fandun fa ismai samamyai marmar raris snonkaku ḇeḇarḇor. (Mat. 26:65, 66) Yesus isoasuser isof ro imar. Rarirya, nane nun sanandik faro snonsnon Yahwe, nakanowser Yahwe ḇaḇepapoik Ḇyedi, ma snonkaku ḇemḇror sya sismai swaf fa sikenem fyoro. Osower ido, Yesus fyasos manfamyan ḇyesi fa simkak ḇa rofyor sismai fafrowes ro ras-ras nayama. Yesus fyasnai ḇyebri kako kuker myam faro fandun mankun ḇyedi monda ḇa. Imbape, myam faro fandandun ro manwawan ḇesoasuser ḇyesya. Rofyor Yesus iwan Yudas i fa syae, insape fyasnaiḇair munara Swarapepen faro si. Kaku ya nari manfamyan ḇesmai ramrem ansine siswarapepen fainda ro Yesus rik ḇyena ma nari saksowarpu ro ḇaḇeasas babo.​—1 Kor. 10:16, 17. w19.01 22 ¶7-8

Yesus Kmari kyarem kuker dawos ro nanki mumfes, ”Yaḇuk baba faroi kwar, ma nari yaḇuk baba faroi wer!” Yesus ḇyekandera fafayaḇa snar duf fakamamar ḇeba fa isoasuser pdef faro Yahwe. Yesus ifawi kaku nari sewayam i kuker rarmomen ma smun i fa imar. (Mat. 26:38) Ḇape, roi ḇefandun syadi faro Yesus iso ḇyuk baba ḇaido sanandik faro Kmari snori. Ḇyeḇirḇar nari marmar ḇyedi dun snandik ḇe Kmari snonsnon Ḇyedi ḇa snar skursof Yesus danonef Allah I kwar. Inja, wos Yahwe ikofen na nasambraḇser kaku Yesus i! Raris Yesus, imbude koḇeḇirḇar nari sanonef snonsnon Yahwe. Fyorno ido, sifrur pyum koḇa raris Yesus i. Ḇaido korower fawar ḇekaku ḇa ḇekur ko ḇeramuma ro snonkaku ḇembroḇ konsya, ma komarisen ḇa kaku. Imbude komkakwarek snar fawar anna, na nafrur fa sanonef snonsnon Yahwe ma organisasi Ḇyedi. Roi ḇeḇesya nane ndarirya ido, wos Yahwe ikofen ḇe Yesus nun sneprei kaku faro ko. Yahwe nari ifrur snori ismai sanandik ḇesya kwar.​—Mz. 94:22, 23; Yes. 65:17. w19.03 11-12 ¶14-16

Yesus manfamyan ḇyesi sikandor kaku! Skara Yesus na ḇyawes kaḇer Karajan Israel, ḇesyaḇo Yesus ikofen kero wer nari ḇyekandera ma imar. Manwawan Petrus dawos ḇepon, ”Manseren, Allah myam monda awer roi ḇera dine! Roi ḇeḇesya ani ipok kyur awer au.” Yesus kyarem, ”Biris wabur. Au karui ḇekarkar aya, snar kwara karkara Allah ḇyena ḇa, ḇoi karkara snonkaku.” (Mat. 16:21-23; Kis. 1:6) Fyor Yesus ikofen rarirya, nasnai kaku snar Yahwe karkara Ḇyena iḇese ro karkara Setan dunya ḇyedi ḇyepoik roro ya. (1 Yoh. 5:19) Petrus danun ḇe Yesus i fa nya rari faḇri mankun raris snonkaku ḇebor ro dunya ine. Mboi, Yesus ifawi Yahwe imarisen insama fyasos mankundi faro kandera ma marmar nari kero wer ḇekur i na. Yesus kankarem ḇyena nefasnaibos nya Yahwe karkara Ḇyena ma pyampum kaku karkara ḇero dunya ine. w18.11 21 ¶1-2

Kwarapan rosai Yahwe myam ya rofyor snonkaku seyuta ro supswan ḇesiper siryur fa sifrur Munara Swarapepen. Myam faro barbor ro snonkaku ḇerama sya monda ḇa mboi myam si oser-oser. Imnis raris, myam snonkaku ḇerama ker ro taun nakam. Imbude rofandu si sismai wayam ḇemarḇak kaku mboi srama. Sino sisya srama ker ro fananjur ḇesena ḇa, ḇape skara fandun fa srama ro munara Swarapepen. Ḇerama randak snar siḇe sifawi roi sifrur ro munara ine sya, Yahwe myam si kako. Kakuḇae, Yahwe imarisen fa myam snonkaku sibor kaku srama ro munara Swarapepen. (Luk. 22:19) Imbape, Yahwe fyandun faro barbor ro snonkaku ḇerama sya monda ḇa. Imarisen syadi fa ifawi roi ḇefnai fa srama ya. Iso roi ḇefandun kaku ḇe I nairi. Ḇape, koma komarisen Yahwe ma organisasi Ḇyedi fyarkor ko.​—Yes. 30:20; Yoh. 6:45. w19.01 26 ¶1-3

Yesus fyasnai nyan ḇe ko kwar fa kakfasnai saswar ḇefandun mankun ḇa. Imarisen imarwarek manfamyan ḇyesi monda ḇa, ḇape ro moḇ ikenem raya fyasnai syewar fandun sena ro fandun mankundi ḇardi. Imnis raris, rofyor imbrus kaku ḇaido ḇyaḇir iryarḇa kwar ḇesyaḇo isrow kuker manfamyan ḇyesi. (Luk. 22:39-46) Myam monda faro rosai na ḇyuk ḇe snonkaku ḇesesya, mboi rosai na sḇuk ḇe i na ḇa. (Mat. 20:28) Ko monda koḇe manḇekanaek Kristen ḇekaku siko, ma komarisen koḇuk oras nabor syadi fa kor ḇesesya fa siryur fnoḇek ko. Imbape, ḇepon syadi ya komarisen kofnoḇek ”min koḇesi ḇesma kakyar oser” ḇeso ḇaḇeḇaryas ḇaido fananjur ya werḇa. (Gal. 6:10) Kofasnai koswar si kuker kanun ḇe si fa sakrama ro fananjur koḇena, ḇesyadi ro munara Swarapepen. Raris Yahwe ma Yesus, na komarisen kaku fyor komam oso ro naek srar ḇeḇor ansine fa kyaḇer ḇe Yahwe, Kma ma Manfarandows ḇesaswar koḇedi. (Mat. 18:14) Fananjur koḇena na nafnoḇek ko fa kofaduru sne ḇerun, ḇaḇebri, ma saswar ya. w19.01 29 ¶12, 14; 30 ¶15

Yesus ifrur randak munara Swarapepen kuker manfamyan ri 11 ḇesouser ḇyesya. Ḇyuk roḇean ḇedawer ro munara Paskah na fa ḇyerak munara swarapepen ḇepyan ani. Ḇyuk monda mamami ḇepisen ḇa ma anggur sfasos kwarna. Yesus ikofen faro manwawan ḇyesi mamami kyurfyasna ḇe baken ḇyedi ma anggur ḇe rik ḇyedi. Kniko wer na ḇyuk na ḇe farsarser faro fandun sena. Manwawan sya sifawi munara ine ḇyefandun kaku, ḇape na sifrurna kuker nyan ḇepyan monda. Rosai ḇefnai ya? Paik ḇeḇeso aniwara ro rum bati ḇyesya isoine Lazarus, Marta, ma Maria, Yesus fyarkor sko. Marta isya kako rodia, mboi syombirek kaku fa fyasos roḇean nabor faro Yesus ḇedakam sko ani. Inja, kuker myaren Yesus isonek Marta ḇo ikofen fandun ḇa fa fyasos roḇean nabor. (Luk. 10:40-42) Barpur mura, fyor fanam imbe smuni, Yesus ifrurmnis wos ḇyenane. Fyasos munara Swarapepen ḇepyandam. w19.01 20-21 ¶3-4

Yahwe fyasnai marisen Ḇyena faro Yesus i kuker nyan kyara ḇaim na. Rofyor Yahwe ḇyawes Yesus i ”ikanowi fa ikaki syadi” ro nanki. Ḇyuk kako ḇe Yesus kankenem rur ḇepok ḇemnai ḇa, snonkaku oso ḇaim ḇesmai roi ḇeradine! (Flp. 2:9; 1 Tim. 6:16) Nyan Yahwe ḇyebarakas Yesus i snar fararmyan ḇyena kuker soasuser ima ipyum bose! Rosai nari ḇefnoḇek ko fa kosmai Yahwe marisen Ḇyena mboi dunya ine ḇa? Fandun fa koswarepen Yahwe fyasnai marisen Ḇyena faro manfamyan Ḇyesi ḇesoasuser ḇesya kwar. Ma fafisu ono, ifrur roi nane kuker nyan skara ḇaim na. Na kokarauser monda rariso Yahwe ḇyebarakas ko ro fafisu iyama rai! Ḇape ro kirine, fyor kofarmku ro fafisu ḇesamswen ro dunya ḇeḇarḇor ine, fandun fa koswarepen kaku roi ḇero dunya inena naisya nḇenande kwar. Inja, sasewar snonsnon ro i nari nefromo monda. (1 Yoh. 2:17) Oso wer ido, Kma ḇesaswar koḇedi, Yahwe I, na ipok fa ḇyefnder ḇaḇeri fararur koḇena ma saswar kofasnai kwar faro snonsnon Ḇyedi, snaro ima ”inapes”. (Ibr. 6:10) Nari fyasnai kaku marisen Ḇyena ḇe ko, imbude kuker nyan kopok kokara ḇaim na! w18.07 8 ¶17-18

Ro roḇ rofyor Yesus imar ḇaime, fafisu inan fnoḇek manwawan ḇyansi, imkakwarek nari sḇeoser ḇa. Rofyor ḇyenadiwarek si, dor ro nadi ḇyena insama manfamyan ḇyansya sḇeoser raris mankundi ma Kmari suḇeoser ndraya. Yesus manfamyan ḇyansya sḇeoser ido, na snonkaku ḇesesya smam Yahwe iso ḇewan Yesus i ḇe supswan. Rofyor siswaryae si, snonkaku sya nari sifawi sima Yesus manfamyan ḇekaku ḇyesirya, ma ine nafnoḇek si fa sḇeoser ḇesya kwar. (Yoh. 13:34, 35) Iso ḇefnai fa ro roḇ ani, Yesus dawos kawan kaku farkarkor ḇekur ḇe ḇaḇeoser ya. Myam kwar mboi manwawan ḇyesya sḇeoser kuf ḇa. Raris moḇ sifrur ro rasras ḇepon ya, manwawan sya ”sfamfaḇri, mansei ro si ḇeba syadiya”. (Luk. 22:24-27; Mrk. 9:33, 34) Ro fafisu ḇesena, Yakobus ma Yohanes suyor Yesus i fa ḇyuk nasan ḇefandun kaku na suyakuf ro ris ḇyedi ro Karajan nanki.​—Mrk. 10:35-40. w18.06 9 ¶1-2

Yahwe imarisen ḇeḇe imbeswa suswaryae su, rirya kaḇrai saswar suḇena nako isof fyoro. (Mat. 19:3-6) Roi ḇeḇyeḇa kaku snonkaku ḇefarḇuk kwar ifrur ḇe suminya iso fyarḇuk wer. Iso eḇedari, sasoser ḇefik ro Sasoser Risamfur idwarek kaku fararur farḇuk. (Ul. 5:18) Ima ”sasar faro Allah” rirya ma roi ḇeḇyeḇa kaku oso ifrur ḇe swari. (Kej. 39:7-9) Sumin ḇefrur sasar oḇa nari sneri iduf kawan kaku snar swari ibur i kwar. Yahwe myam ḇaido fyandun romawa sya kako. Imarisen insama sismai aski ma payamyum. Yahwe iwan sinan sya fa sfamfon fandandun romawa sesya ras ḇe ras monda ḇa, mḇoi sifnoḇek si fa sfanam ḇe Allah. Sinan sya fandun fa sḇuk swaf sena fa sifnoḇek romawa sesya infa sesyowi Yahwe Sasoser Ḇyena ma sfarkor si fa siswar I. (Ul. 6:6-9; 7:13) Sinan sya sipok smam awer romawa sesya simnis ra roieḇor sfandun ḇa na ḇaido sifrur mnis na ḇa. Imbape, fandun fa smam romawa sesya raris arasai, ḇaido roi ḇepyum ḇemaeja kaku ḇerama ro Yahwe.​—Mz. 127:3. w19.02 21 ¶5, 7

Ayub dufepen nako soasuser ḇyena kuker kyara mura ḇe ḇaḇyak nari Allah ḇyuk na. Ikyar Allah ima ifawi soasuser ḇyena. Samswen nkur i mboi Ayub ikyar kaku Yahwe nari ḇyebarakas i. Kakakyar ḇyenane nafnoḇek i fa dufepen nako soasuser ḇyena. Ayub ima snonkaku ḇenapes ḇa, ḇape Yahwe imarisen kaku faro soasuser ḇyena inja ḇyeḇok i kuker ḇyuk nana nabor ḇe i! (Ayb. 42:12-17; Yak. 5:11) Ma nari Ayub ismai ḇarakas ḇeba syadi wer. Allah koḇedi ima ḇyefararwe ḇa. (Mal. 3:6) Koswarepen Allah ḇyesyowi soasuser koḇena ido, na kofaduru saneraro ḇepyum ro fafisu iwama fa naisya pdef ro kosnesna. (1 Tes. 5:8, 9) Fyorno ido, na ḇaḇir wemir monda ḇeyufepen soasuser ya, mboi kakuya rarirya ḇa. Au isya rofandu snonkaku sesyaran ro supswan ḇesiper ḇeyufepen nako soasuser ya. Na waksowarpu snon ma bin ḇero fafisu iwara ḇena kakyar sya ḇeyufepen soasuser sena, iba syadi fyor siḇe smun si.​—Ibr. 11:36-38; 12:1. w19.02 7 ¶15-16

Rofyor munara Swarapepen fyanam kwar, kokarauser fakfuken-fakfuken nane kada: ’Rariso yaso mnis Yesus i fa yafasnai saswar syadi wer? Yamam ḇepon fandandun ro naek srar sya bardibur fandandun mankun yena ke? Na yor si fa sifrur roi sisambraḇ fa sifrur ḇa na ke, ḇaido yafawi mnis ḇaḇeraryar ḇa sena ke?’ Rirya kada kakso Yesus nyan ḇyena fa kofasnai ”ḇaḇaḇir oser”. Ras oso nari kofrur munara Swarapepen Kristus marmar ḇyedi werḇa. Fyor Yesus ”iwerma” ro fafisu kandera ḇeba ya, nari iryur snonkaku ḇesmai ramrem ”kyimfir kwar sya” fa sek ḇe nanki. Ro fafisu ya kako, na kofrur munara Swarapepen ine werḇa. (1 Kor. 11:26; Mat. 24:31) Inja nari kofrur munara Swarapepen ya werḇa, mboi Yahwe kawasa ḇyesiko na koswarepen ḇesya kwar farkarkor kosma ro munara sifrur kuker nyan ḇepyan ani. Isoine sne ḇerun, ḇaḇebri, ma saswar ḇeba kaku ro snonkaku oso. w19.01 25 ¶17-19

Nyan fa komamwarek sne koḇena ima imnis raris kofaduru ḇaken saprop koḇena fa naprei. Ḇepon ya, infa baken koḇena naprei pdef fandun fa kan roḇean ḇepyum, ma koḇeolah raga ker. Rarirya kako, insama kankenem Kristen koḇena napyum pdef fandun fa kan roḇean rur ḇepyum kuker kowasya Refo ma publikasi ḇeknam ro Refo na. Osower ido, kofasnai kakyar faro Yahwe I ḇesya kwar isoine kosomnis rosai kofarkor kwar na ma kawosḇair na. (Rm. 10:8-10; Yak. 2:26) Ḇesuru ya, imbude kokara koduf ḇa snar roi komam ro bandi na, mboi ro bandum ya rarirya ḇa. Rarirya kako, imbude na kokara kona kakyar ḇesambraḇ, snar komyaren kofrur fararur ḇesren koḇena, ḇape imbude marasrisen ḇesasar ya isya isur ro sne koḇena. (1 Kor. 10:12; Yak. 1:14, 15) Fandun fa koswarepen kaku Setan imarisen dawninyan kakara koḇena. w19.01 15 ¶4-5

Na kofuken mankunko, ’Yakfrur raris snon Samaria ḇefrur pyum ani kwar ke?’ (Luk. 10:30-35) ’Rofyor snonkaku ḇesesya sekandera ido, na yafrur roi oso fa yafnoḇek si ke? Imnis raris, na yafnoḇek naek srar ḇesinan kwar ro sidang sya, kabom ḇaido romawa sinan sesya sifarmyan ḇe Yahwe I ḇa ke? Na ’yakawos sneprei faro ḇefafardun sya’ ke’? (1 Tes. 5:14; Yak. 1:27) Rofyor kofasnai sawarwar ḇe ḇesesya, koisya koḇuk. Yesus doḇe koḇuk ido nari kosmai aski syadi. Oso wer ido kofawi koisya kofrur Yahwe imarisen. (Kis. 20:35; Ibr. 13:16) Raja Daud ikofen roi ḇekur snonkaku ḇefasnai sawarwar, ”Yahwe nari myamwarek i insama ikenem pdef. Nari sap i ḇe snonkaku ḇeaski ro supswan.” (Mz. 41:1, 2) Kofasnai sawarwar ma frur pyum faro ḇesesya ido, nari kosmai Yahwe sawarwar Ḇyena kako ma nari koḇeaski isof fyoro.​—Yak. 2:13. w18.09 18 ¶11-12

Imbesrar Kristen ḇesoasuser snori Yoshiko ismai abar ḇepyumḇa. Dokter ikofen ḇe i snar nari ikenem paik riḇeḇeso monda. Moḇsa kyara roi ine rai? Yoshiko iswarepen mnuk ro Refo imarisen kaku na, imnis mnuk ḇero rasine. Anun ḇeḇuk sneprei ḇero mnuk ani nafnoḇek imbesrar koḇanine fa ikyar kaku faro Yahwe I. Inja, kuker myaren ikofen ḇe dokter ima imkak ḇa, snaro Yahwe isya dufepen ḇramin ḇyedi. Mnuk ine kako na nafnoḇek ko pdef fa komkak ḇa rofyor kosmai samswen ḇemarḇak kaku. Randakya, Yahwe iwan Yesaya i fa fyasepen wos anna fa nḇuk sneprei faro snonkaku Yahudi, nari ḇarpurya sḇeḇeyun ḇe Babilon. Imbape, anun anna nefainda faro snonkaku Yahudi sya monda ḇa mboi faro Yahwe kawasa Ḇyesi kam ḇekenem ro fafisu ine kako. (Yes. 40:8; Rm. 15:4) Baboine, kokenem ro ras-ras ḇepupes ḇefo kuker ”kandera nabor”, inja kofandun syadi wos samaraḇraḇ ḇero syap Yesaya.​—2 Tim. 3:1. w19.01 2 ¶1-2

Imbeswa ḇeburyae su ro fafisu ḇeradine ma suḇe imbeswa kaker mboi na susmai samswen. Manwawan Paulus ikofen kako roi ḇefrur fa imbeswa sukain kayam pdef: ”Snon ḇekyarḇa ani Allah fyasreni snar fakawawin ḇyedi kuker bin Allah nya kwar ani. Rarirya kako bin ḇekyarḇa ani Allah fyasreni kwar snar fakawawin ḇyedi kuker snon Allah nya kwar ani. Rofyor rariryaḇa ido, romawa suḇesi simnis romawa [ḇemamas], ḇape romawa ansi Allah romawa ḇyesirya.” (1 Kor. 7:14) Na sismai fafisu ḇesamswen kaku ro farḇakḇuk sena, mboi snonkaku Kristen sibor sun snemuk fa skain pdef kuker siswasi ḇefarmyan ḇe Yahwe I ḇa sya. Fafisu ono, ḇarpur mura siswasi sakḇe Saksi Yahwe. Snonkaku Kristen ḇemkuepen ansi na simarisen kaku. (1 Kor. 7:16; 1 Ptr. 3:1, 2) Baboine, ro sidang Kristen ḇero supswan ine ḇesiper, naek srar ḇebor ḇefarḇuk kwar sya sismai payamyum ro farḇakḇuk sena. Snon sya siswar siswasi ma bin sya sesyowi kako siswasi. Sikam sfasnai sesyowi kaku farḇakḇuk sena. Ro sidang Bedi kako na mam imbeswa ḇesmai aski kwar sya.​—Ibr. 13:4. w18.12 14 ¶18-19

Wos ”Eden” iso ”Marasrisen”. Imboḇae, yaf anya ḇyemoḇ ḇeyun marasrisen kukro ipyum kaku ma roḇean nabor naisya. Ro moḇ anya, snonkaku sya skain pyum kayam kuker aiwan sya. (Kej. 1:29-31) Wos Ibrani faro ”yaf”, sfarwei na ḇe wos Yunani ḇe pa·raʹdei·sos. Syap Cyclopaedia ḇeraker M’Clintock ma Strong, doḇe rofyor snonkaku Yunani oso ryower wos pa·raʹdei·sos, nari iwasen muraḇe yaf ḇepyum, moḇ ḇebas ḇemkei ro roi ḇemun na. Ro yaf ani, aiknam ḇeḇuk bon nasure, war ḇesren ḇedaf naisya, ma abris nafo ro moḇ anya, inja rusa ma domba sya bisa san abris na. (Mam kako Kejadian 2:15, 16) Yahwe ḇyuk yaf ḇeradirya faro Adam ma Eva su, isoine firdaus oso fa suḇarek ro na. Mboi, susouser faro I ḇa. (Kej. 3:23, 24) Snonkaku osoḇaḇeri ḇeḇarek ro Firdaus anya wer, mboi isya kaker isof ro Faḇruḇ Ḇeba ryama ro awar Nuh ani. w18.12 3-4 ¶3-5

Sinan sya sisewar fa sfarkor romawa sesya fa sna kenem ḇepyum. Rofyor romawa sya skinfir fa sikenem imnis nyan ḇepyum sinan sesya sfarkor kwar ḇe si na ido, sipok fa sun snemuk ḇepyum ma sḇinkwan ro samswen, ḇaḇeḇirḇar ma fafafko. Raris sinan ḇefrur pyum, Yahwe imarisen kako romawa Ḇyesya sismai payamyum ḇeba ro kenem sena. (Yes. 48:18) Inja Yahwe fyarkor ko wos farkankin ḇefarkin kenem koḇena ma moḇsa kofrur pyum ḇesesya raya. Dor ko fa komam roi nakam raris moḇ myam na raya ma kokenem imnis marisen Ḇyena. Naine nadwarek kaku ko ḇa. Imbape, nane nafrur fa kofawinanem syadi ma nafnoḇek ko fa kofrur snemuk ḇepyum syadi wer. (Mz. 92:5; Ams. 2:1-5; Yes. 55:9) Na kona kaker ḇaḇemkei ro mankunko, mboi na kokinfir roi nari ḇefrur fa kosmai aski. (Mz. 1:2, 3) Rofyor kona Yahwe karkara Ḇyena ido, nari kosmai fainda nabore! w18.11 22-23 ¶7-8

Insama kombran pdef ro kakaku ya, snonkaku ḇefarmyan ḇe Yahwe I ḇa sya sipok sawyae awer ko. Rofyor kofarkor kakaku ro Refo ya, bati ma kina koḇesya ḇeḇe Saksi ḇa sya ono simewer sfanam kuker ko wer. Imbude ono sesyowi kakyar koḇena, mboi ono wer spampum na. Kina, min fararur, ma bati ro rumfarkor sya, imbude sor ker ko fa koso si fa sifrur rasras sena. Rosai na ḇefnoḇek ko fa kopampum dafdif sena fa koso rari ma rasras ḇeba Yahwe imewer na? Fandun fa koswarepen kaku roi ḇewar fa Yahwe imarisen ḇa faro rasras ḇeba annane. Na kofrur pyum kaku ro publikasi koḇena ma koḇuk swarapepen ḇe mankunko ro moḇ risai rasras ḇeba na ndramuma ro ya. Kowasenkara mnuk-mnuk ro Refo ḇekofenḇair rosai ḇewar fa kakso ro ras ḇeba anna ḇa ido, nari kokyar koisya kombran ro nyan ”ḇefrur sneprei faro Allah”. (Ef. 5:10) Kokyar faro Yahwe ma Wos Ḇyena ido, nari kofandun ḇa faro rosai snonkaku ḇesesya skara na.​—Ams. 29:25. w18.11 12 ¶10, 12

Fafisu kankenem koḇena nefararwei ḇeri ido, imbude na koḇeḇirḇar rawo kokara monda samswen ḇekur ko na. Ine bisa ndarirya ro Yusuf i kako. Imbape, kyinfir fa ifrur roi ḇepyum ro fafisu ḇekur i na. Imnis raris, fyararur myaren faro Potifar, ma fyararur marḇak ro bui. Iso ḇewar fa mananir ro bui ḇyuk fararur ḇe i. (Kej. 39:21, 22) Raris Yusuf i, imbude koro fafisu jadi fa kokrenbur na ḇa. Mboi kokaḇaḇaḇ ma kosewar fa kofrur roi ḇepyum ido, Yahwe nari ḇyebarakas ko. (Mz. 37:5) Iba syadi fyor kokarsosen ma koḇeḇirḇar ido, nari kopok ’kokmom’ ḇa, ḇaido koḇoryae ḇa. (2 Kor. 4:8) Yahwe nari ryous ko, syadi wer rofyor komyaren pdef ro fararmyan koḇena. w18.10 24-25 ¶11, 13

Ausya mambir ma ḇesyowi kaku snonkaku oso, mboi ḇyefnder snombri ma ḇeḇyeḇa syadi wer myamḇaḇir Au ḇa. Na moḇsa ḇaḇir rai? Kakuḇae na wafafko rawo. Snaro? Snar kokame komarisen snonkaku ḇesesya sfandun ko, ma inema marisen ḇesasar risyaḇa. Ḇape, komarisen sifawi ko monda ḇa. Komarisen insama smambir pyum manseisi ko ma sifawi rosai kofrur kwar na. (Bil. 11:16; Ayb. 31:6) Ḇape kosasor ko ḇa ido, na kofrur marisen koḇenane kuker nyan ḇesasar. Setan dunya ḇyedine nari dawninyan ko fa komarisen kosewar snonsnon ma koḇaḇir koma kofandun syadi. Kofrur rarirya ido, na jadi ḇa fa koḇuk ḇe Kma koḇedi ro nanki, Allah Yahwe I, rosai ḇesyus fa ismai na isoine syowi ma samsyom koḇena.​—Why. 4:11. w18.07 3 ¶1-2

Inja, na kokandor ḇa snar Setan ma rur ḇeḇarḇor ḇyesya sawninyan snonkaku ḇena papoik sya fa sawos ankarkar. (1 Tim. 4:1, 2) Ḇeḇyeḇa syadi wer iso manfarkin agama sya sawos ankarkar. Rosai ḇefnai ya? Snaro rofyor oso ikyar faro farkarkor ḇekaku ḇa sena ma ifrur roi Allah imewer na ido, snonkaku ani na dakna swaf fa ikenem fyoro ḇa. (Hos. 4:9) Yesus ifawi manfarkin agama ḇero fafisu ḇyedi sifrowes snonkaku sya. Imkak ḇa ḇo ikofen yoḇ si, ”Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkokaḇor soren ma mko mbranuk sup, fa mkun snonkaku oser monda insa daksun ro agama mkoḇedi ma syun kwar, mkofrur iḇe romawa [Gehena]”, isoine marmar isof fyoro-fyoro. (Mat. 23:15) Yesus doḇe manfarkin agama ḇekaku ḇa ansi simnis kma sedi Ibiris, iso snonmamun diri.​—Yoh. 8:44. w18.10 4-5 ¶5-6

Rosai knam ro Yesus wos ḇyanane? Ikofen wer, ”Mkoryaḇ ma mkomarisen, snar ḇaḇyak mkoḇena naba ro boiyas, snar rarirya kako sifrur kandera kwar faro nabi-nabi ḇepon mko sya.” (Mat. 5:12) Rofyor siprer manwawan sya ma siwan si fa sḇaryas awer, ”sibur kankain [karkara agama] ani kuker raryaḇ ḇeba”. Kakuḇae, na simarisen ḇa rofyor siprer si. Ḇape siryaḇ ”snar skara kwar sikako sakḇe kandera ma san anonef snar snonsnon Yesus”. (Kis. 5:41) Yahwe kawasa Ḇyesya ro baboine sifarmku kuker raryaḇ rofyor sewayam si snar Yesus snonsnon ḇyedi. (Yak. 1:2-4) Raris manwawan sya, na kakmarisen ḇa rofyor koḇekandera ḇaido sewayam ko. Mboi kosoasuser pdef faro Yahwe ido, nari ḇyuk ḇe ko ḇaḇeḇri kofandun fa kofarmku. Rofyor Yahwe ”Allah ḇeaski” imarisen faro ko ido, nari kosmai aski fafisu sewayam ko, kina koḇesya sidwarek ko, kodufe ḇaido koḇe mansar binsar kwar.​—1 Tim. 1:11. w18.09 20 ¶18-20

Kokenem ro ’ras ḇepupes’, inja snonkaku sibor sekandera fafayaḇa, ine nafnai fa skara ipyum ya simar mura. (2 Tim. 3:1-5) Taun oser monda snonkaku sisyadi ro 800.000 smun mankunsi. Ro swaf detik ri 40, snonkaku oser imar wer. Mboi faḇye, naek srar koḇansi sisya kako sakḇaḇir roi ḇeradine ma smun mankunsi. Baboine, naek srar koḇesi sibor sismai fafisu ḇesamswen ma sfandun saswar koḇena. Sino sisya sanonef si ḇaido sewayam si. Sino wer sifnak ker si ḇaido sfawar famfnom si ro moḇ sfararur ya. Oroḇaido simbrus snar sfararur kawan kaku ḇaido fararur sena nafrur fa sibrusna nadufe. Ḇesesya wer sna samswen ḇero kina yadori. Imbude sfarḇuk kuker snonkaku ḇefarmyan ḇe Yahwe I ḇa ma sawos nabor si ker. Roi nane ma samswen ḇesena, nafnai fa ḇebor sya sḇaḇir sisambraḇ werḇa ma sikyar mankun ḇa faro kakakyar sena. w18.09 9 ¶3, 5

Sinan Kristen sya na sifararur kayam fnoḇek Yahwe I kuker sifnoḇek romawa sesya fa sakfarmyan ḇe Yahwe I. Sinan ḇeḇor sya sifrur roi ine kwar. Bon ya, roma inai sesya sun snemuk fa sakfarmyan ḇe Yahwe I ro oras nakam, iba syadi sifarmyan ro moḇ ḇeḇinkwan. Ono sisya sḇe misionaris, ḇesesya sakḇe perintis ro moḇ ḇefandun syadi manḇaryas, ma ḇesesya wer sifarmyan ro Betel. Kakuḇae, rofyor romawa sesya sraḇe moḇ ḇeḇinkwan kaku, na sinan sya sna swaf nabor fa skainus si ḇa. Sifandun mankunsi ḇa ḇoi sisambraḇser romawa sesya fa sakfarmyan pdef ḇe Yahwe I ro moḇ sisya roro ya. Rosai ḇefnai ya? Snar simarisen kaku smam romawa sesya sfakapon Yahwe ro kankenem sena. Sinan ḇebor sya sḇaḇir raris Hana i, doḇe ’ḇyuk’ roma ḇyedi Samuel i ḇe Yahwe I. Skara ima syowi ḇeba kaku fa sifararur kayam fnoḇek Yahwe I roro nyan ine.​—1 Sam. 1:28. w18.08 22 ¶4

Yesus kyurfasnai ḇa na snonkaku ḇenana syakam jadi fa saksun ro Karajan nanki ḇa. Yesus ikofen, ”Aski faro ḇesaḇarar mkoya, snar mkoiso ḇena Karajan Allah.” (Luk. 6:20, NW) Mboi ine kyurfasnai ḇa nari snonkaku ḇesaḇarar syakam srower Yesus i ma sismai ḇarakas ḇepyum. Snonkaku ḇesaḇarar sino sisya simewer siso Yesus i. Inja ḇekaku ya iso, na kopok kokofen ḇa snonkaku oso ḇyebati kuker Yahwe I snar nana arasai ismai na. Rofandu Yahwe kawasa Ḇyesi, naek srar ono sisya sḇenana ma ḇesesya wer sesaḇarar. Ḇape, sikame siswar Yahwe I ma sifarmyan ḇe I kuker sisnesna ḇesiper. Refo ikofen faro snonkaku ḇenana sya insama ”sikyar awer roi nari ḇero imnis nana, mboi sikyar faro Allah”. (1 Tim. 6:17-19) Yahwe ḇyuk swarapepen kako ḇe manfamyan Ḇyesya kam, ḇenana ma ḇesaḇarar snar siswar pipi ido nari nun roi ḇeḇyeḇa ḇe si. (1 Tim. 6:9, 10) Rofyor komam naek srar koḇesya raris moḇ Yahwe myam si ido, nari koḇemankara si snar komam ro nana sena ḇa. w18.08 13 ¶11-12

Komarisen kofasnai kasumasa ḇe Yahwe I snar kyinfir ko ḇe kawasa Ḇyesi kwar. Kofawi rofyor koḇuk kankenem koḇena ḇe I, nama snemuk kofrur kuker fawinanem nairi. Inja, kun snemuk fa kofrur awer roi Yahwe imewer na. Koswar ma koḇesyowi naek srar koḇesya snar Allah nya si kako. (Rm. 12:10) Refoya ḇyeasas, ”Yahwe na ipok fyanander kawasa Ḇyesi ḇa”. (Mz. 94:14) Wos nane nbuk kakakyar ḇe ko. Rosai na ḇekur ko na, Yahwe nari ryous ko. Iba syadi wer, rofyor komar ido, na ḇyefnder ko ḇaḇeri. (Rm. 8:38, 39) ”Inja, kankenem roḇa marmarya, [Yahwe] iso ḇenakonya.” (Rm. 14:8) Kowaf fafisu Yahwe nari ḇyawes kaḇer bati ḇesouser Ḇyesya ḇemar kwar sya. (Mat. 22:32) Ro kirine kako kosmai roi ḇepyum nabor ḇerama ro Kma koḇedi. Refo doḇe, ”Aski faro er Allah sediso Yahwe; aski faro kawasa kyinfir fa nya ḇe mankundi.”​—Mz. 33:12. w18.07 26 ¶18-19

Sino sisya skara snonkaku oser-oser mankunsi na sikamar rosai sifrurna, inja fandun fa sna ḇaḇemkei fa skinfir roi simarisen na rofyor nawyae sne ḇesren seja ḇa. Skara Paulus wos ḇyena, ”Yamewer ḇaḇemkei ayena nafrur fa snonkaku ḇesesya sneuser sena nmankara aya?” (1 Kor. 10:29, NW) Kona ḇaḇemkei fa kokinfir ro mankunko faro farkarkor ma fararur koḇena. Ḇape, fandun fa koswarepen ḇaḇemkei koḇena nasyadi ḇa, ma nari kosmai bon ro snemuk rosai kunna. Iso ḇefnai fa Paulus ikofen ro mnuk rasine. Inja, koma kona ḇaḇemkei fa kokinfir rosai imbe kofrur raris marisen mankun koḇena, imbape rosai komarisen na nefandun mankun ḇa. w18.04 12 ¶10

Snonkaku Kristen oso kyarem daksyom Yahwe I, mboi kaku ya isya ifrur roi Yahwe imewer na. (Yud. 11) Rya imyaren ro ḇaḇeḇaryas ma dakso fananjur ya pdef. Mboi ro swaf anya kako, kyara ker roi ḇeḇyeḇa na, faḇri mankun, ma dayin naek srar ḇyesya. (1 Yoh. 2:15-17; 3:15) Kakara ḇeradinena nari nun i ḇe fararur ḇesasar. Snonkaku ḇesesya na sifawi rosai kokara ma kofrur na ḇa, mboi Yahwe I mande. Ifawi pyum kaku fafisu kowaira ḇe I kuker sne ḇesiper ḇa. (Yer. 17:9, 10) Iḇye syadi wer, rofyor kofrur sasar, Yahwe syewar kaku fa ifnoḇek ko. Rofyor kombran sasar ido, Yahwe dor ḇe ko, ”Mkokaḇer muma ḇe Aya.” Yahwe ifawi mnis na kosewar kaku fa kopampum marisen ḇesasar koḇena. Ḇape, imarisen kofarmku ma kopampum roi ḇesasar na. (Yes. 55:7) Kofrur na ido, ḇyeasas nari ifnoḇek ko ma ḇyuk samambraḇ kofandun fa kopampum marisen ḇesasar koḇena.​—Kej. 4:7. w18.07 16 ¶5-6