Mei

Baboine, snonkaku sibor sisya sibur moḇ sena fa sra ma sḇarek ro sup ḇese ḇe snonkaku mandaman. Farkor fa wafawi wakofen aroo ro wos sena. Wakfarkor wos ḇeḇeso ro wos sena insama simarisen sawos yoḇ Au. Fasnai vidio ma syap-syap ro wos sena ḇero situs web jw.org. Yahwe fyasos fafnoḇek kofandun na insama kokir syadi ro ḇaḇeḇaryas ya. Imnis raris, Farkarkor Kankenem ma Fararmyan Kristen nafnoḇek ko fa kofawi mnis moḇsariso na korama kaḇer ma kofarkor Refo kuker snonkaku sya rai. Auma sinan ḇena romawa risau ido, farkor romawa Bansi fa sḇuk kankarem kuker wos mankun sena. Sino sisya simarisen sfarkor napnapes snar srower romawa sya sḇuk kankarem ḇepyandam ma kuker sne ḇesiper.​—1 Kor. 14:25. w18.06 22-23 ¶7-9

Fandun fa koswarepen mura ḇe fafisu iwara fyor koḇinkwan kaker ro Allah I. (Ef. 2:12) Ḇape, snar Yahwe iswar ko rya dun ko fa kofanam ḇe I. (Hos. 11:4; Yoh. 6:44) Ma Kristus i kako imarisen faro ko. Ifnoḇek ko fa kakrandum ro Allah kina Ḇyedi. Koma snonkaku ḇenapes ḇa siko, ḇape Yesus fyasnai ḇaḇenaḇye faro ko kwar, inja kopok kokara fa kopampum snonkaku ḇesesya awer! Snar kofanam ḇe papupes dunya ḇeḇarḇor ine, inja na snonkaku sya sḇeoser ḇa, smamfarfir, ma sayayin. (Gal. 5:19-21; 2 Tim. 3:13) Ḇape, snar koinema Yahwe kawasa Ḇyesiko, komarisen kosewar ”fawawinanem ḇerama ro boiyaswa” ḇefnoḇek ko fa komamfarfir ḇa, ma kosewar aski. (Yak. 3:17, 18) Komarisen kaku koḇebati kuker snonkaku ḇerama ro er sairirya kam, komarisen faro rari ro moḇ srama ro na, ma imbude kakfarkor wos sḇukidawos na. Kofrur rarirya ido, na kosmai aski ”raris war ḇedaf” ma roi ḇenapes kofrur anna imnis ”raris risen ḇero soren na”.​—Yes. 48:17, 18. w18.06 14 ¶18-19

Sordade Romawi oso nari rya myamunmun ḇa rofyor syower sepato oḇa. Sepato nane nako kaku snar sifrur na fa nesyos-syos rikyor. Mboi sepato nane myanan kako, inja sordade ḇesower na nari imbran ḇo imkak ḇa ma ryosdis ḇa. Sordade Rowawi ine sepato ḇyena nafrur fa ismai payamyum ro mamamun, ḇape sepato kosower na nkurfasna ḇe roi na ḇefnoḇek ko fa ’koḇaryas ankankinem ḇeḇye kuker aski ya’. (Yes. 52:7; Rm. 10:15) Bape fafisu ono, kofandun ḇaḇeḇri ḇeba kaku rofyor koḇaryas. Naek oso ḇenir ḇe Bo, umur ḇyeja taun ri 20, doḇe, ”Yamkak fa yaḇaryas ḇe bati yedi ro rumfarkor. Ine snaro yamai kaku. Ḇape yakara ipyum ya yamkak awer. Kirine yamarisen kaku yaḇaryas ḇe bati yedi ro rumfarkor.” Roma inai babo ḇebor sya simkak ḇaḇeri rofyor sḇaryas snar sifrur fasasos kwar. w18.05 29 ¶9-11

Yesus ikofen ḇe manwawan ḇyansi, ”Aski ayena yaḇuk na faro mko.” (Yoh. 14:27) Rariso Yesus aski ḇyena nafnoḇek ko fa koḇaryas pdef? Koḇaryas pdef ido, na kosnesna neaski snar kofawi kofrur Yahwe ma Yesus sumarisen. (Mz. 149:4; Rm. 5:3, 4; Kol. 3:15) Yesus ikofen ḇe manwawan ḇyansi snar imarisen fa sismai raryaḇ. Ramnai, fyasnaiḇair rosai ḇefnai fandun kaku fa sfasnai saswar ḇefandun mankun ḇa. (Yoh. 15:11-13) Ramnai ikofen wer, ”Yor mkoḇe bati”. Sḇebati kuker Yesus ima syowi ḇeba kaku nairi! Ḇape, rariso insama manwawan sya sḇebati pdef kuker Yesus i? Yesus ikofenḇair insama fandun fa sra ma sḇuk bon pdef. (Yoh. 15:14-16) Ine kyurfasna sḇaryas pdef. Taun risuru rofyor ikofen roi anna ḇaim, ikofen ḇe manwawan ḇyesi, ”Mkora ma mkoḇaryas: [Karajan nanki] fyanam kwar.” (Mat. 10:7) Inja, ro roḇ rofyor Yesus imar ḇaim, ikofen faro manfamyan ḇyansi fa sfarmku pdef ro fararur ḇaḇeḇaryas.​—Mat. 24:13; Mrk. 3:14. w18.05 13 ¶15-16

Ḇe romawa babo, na wun snemuk fa buk kankenem Bedi fa wafrur Yahwe imarisen ma wafrur aw fa wafarmyan ḇe I. Ḇape, roma inai babo ḇebor ḇemnis Au sya simarisen sifrur marisen mankun sena monda. Na sor Au fa wakfrur raris rosai sifrurna. Fandun fa fasnai ḇe snonkaku ḇesesya fa sakmam snar aw Bena nama roi ḇefandun kaku nairi. Mam pyum insa sipok sifnai awer Au fa ḇefnder aw Benane. Inja, rosai na wafrur insama swambraḇ pdef rofyor snonkaku ḇesesya sawninyan Au fa wakfrur rosai sifrurna? Ḇinkwanbur roi nari ḇefrur samswen Au fa pampum farawrowes na. (Ams. 22:3) Kwarapan roi ḇeḇyeḇa nari ḇekur Au rofyor wafrur roi ḇesasar. Ma rwun mankundaw ḇo fasnai snar Auma wafandun ananun ḇepyum. Rwower pyum sinan bansuya ma fawar ro naek srar ḇero sidang sya. (1 Ptr. 5:5, 6) Au ido nwa sne ḇerun fa rwower ananun ḇepyum ya ke? w18.04 31 ¶14-16

Rofyor Yesus ḇyuk ananun ḇe sidang riḇeḇeso ro Asia Kasun, fyasnai syowi faro manfamyan ḇyesi snar fararur marḇak sena. Imnis raris, ḇyerandak ananun ḇyena faro sidang Tiatira kuker ikofen, ”Yafawi roi ḇeḇor mkofrur na, yafawi mkosaswar, mkosouser, mkofararur, ma mkofarmku ro kandera. Yafawi baboine mkofararur nabor syadi ro ḇeponiwara.” (Why. 2:19) Yesus dap monda ḇa sifrur fararur ḇebor kwar. Mboi, isandik si snar rari ḇepyum ḇedif si fa sifrur roi ḇeḇye na. Yesus imbe isonek naek srar ḇeḇeso ro Tiatira, ḇape ḇyerandak ma isisen ananun ḇyena kuker wos ḇesambraḇser si. (Why. 2:27, 28) Kwarapan kada, Yesus nya papoik fa ḇyebru ro sidang nakam. Fandun ḇa fa ikofen kasumasa faro ko faro roi kofrur ḇe I na. Ḇesyaḇo, fyasnai syowi pdef. Inema nyan ḇepyum kaku faro penatua fa siso na! w19.02 16 ¶10

Ro abad randak naiwara, Yahwe ḇyuk raryur naek ḇefarkin sya fa sisambraḇser snonkaku Kristen syakam ma snon ḇefarkin sidang sya kako. Siwan Petrus ma Yohanes fa suḇenadiwarek snonkaku Kristen ḇebabo ḇesmai rur ḇesren sya. (Kis. 8:5, 14-17) Filipus ma naek srar Kristen ḇebabo sya sismai samambraḇ snar fafnoḇek ḇerama ro raryur naek ḇefarkin sya! Baboine, Raryur Naek Ḇefarkin ro Saksi-Saksi Yahwe sḇuk wos ḇeḇuk samambraḇ ḇe naek srar ḇefararur ro Betel, perintis ḇefarmyan ro moḇ ḇaḇeḇaryas, ma kokame. Raris naek srar ro abad randak siwara, koryaḇ kaku snar wos ḇeḇuk samambraḇ ine! Sanun kako ḇe snonkaku ḇebur napnapes sya fa skaḇer wer. Inja ro 2015, Raryur Naek Ḇefarkin sḇuk syap Kembalilah kepada Yehuwa, ma syap ine syambraḇser kaku naek srar ḇebor ro supswan ḇesiper ine kwar. w18.04 20 ¶18-20

Snonkaku ḇeḇeso soḇe sna ḇaḇemkei ḇeba syadi ido na ipyum kaku. Ḇape nkaku rarirya ke? Kwarapan moḇsa dunya ine na ḇyerai rofyor sasoser oso nadwarek si ḇaḇeri? Syap The World Book Encyclopedia doḇe sasoser sifrur faro kawasa sya syamswen snar sasoser ani kyadaunwarek si monda ḇa mboi idwarek ḇaḇemkei sena kako. Inema roi ḇepyan risyaḇa. Iso ḇefnai fa komam kada, sasoser nabor naisya, pengacara, ma mankara sibor sisewar fa sfasnaiḇair sasoser anna ma sisouser na. Inja, insama kona ḇaḇemkei ḇekaku ya, kofandun roi risuru. Oser ya, fandun fa kokyar faro napnapes Yesus fyarkor ḇe ko na. Ḇesuru ya, fandun fa koḇe manfamyan ḇyedi. Kofrur roi risuru suine ido nari kona ḇaḇemkei ḇekaku ya. Ḇape nari komkei ro rosairi? Yesus doḇe, ”Snonkaku ḇefrur sasarsya, nari [sḇewomen] faro sasarya.” Ikofen wer, ”Rofyor Rumkunya ḇyuk ḇaḇemkei faro mko, kaku ḇeri nari mkoḇe mkei.”​—Yoh. 8:34, 36. w18.04 7 ¶13-14

Rofyor kofanam kuker snonkaku ḇefawi mnis sneḇaḇir ma fafisu koḇena ido, na komarisen kaku. Sisewar fa sifawi mnis roi kokara ma koḇaḇir na. Sifawi roi kofandun na ma simarisen sifnoḇek ko, iba syadi fyor kor na ḇaim. Koḇesyowi kaku snonkaku ḇefasnai ”ḇaḇaḇir oser” faro ko kwar. Snonkaku Kristen koine kam, komarisen kona ḇaḇaḇir oser kuker snonkaku sya. Ḇape, inema roi ḇepyan risyaḇa. Rosai ḇefnai ya? Oser ya, snar koinema snonkaku ḇenapes ḇa si ko. (Rm. 3:23) Ras-ras na, kokara ker mankun ko ḇardi. Inja, kosewar kaku fa kokara snonkaku ḇesesya. Osower ido, nyan sifaduru ko isof koba ḇaido roi ḇekur ko ro fafisu iwara, na nafrur samswen ko fa kakḇaḇir snonkaku ḇesesya moḇ sḇaḇir raya. Snonkaku ḇeḇarek ro ris koḇedi sya na sawyaye ko kako. Ro ras-ras ḇepupes ine, snonkaku sibor ”siswar mankunsi ḇardi” ma sfandun ḇa faro sneḇaḇir snonkaku ḇesesya. (2 Tim. 3:1, 2) Ḇape, koso Allah Yahwe ma Rumkun Ḇyedi, Yesus Kristus nyan suḇena kada, na kakfasnai rari ḇaḇaḇir oser ine fa ipyum syadi. w19.03 14 ¶1-3

Parenta ḇesamfur ro Sasoser Risamfur ikofen snonkaku sya sisnesna ndro snonkaku ḇesesya roi snana awer. (Ul. 5:21; Rm. 7:7) Yahwe ḇyuk sasoser ine fa fyarkor roi ḇefandun kaku oso: Kawasa ḇyesi fandun fa sfaduru sne sena, isoine kakara sena, ma roi sḇaḇir na. Yahwe ifawi kaku ḇaḇeḇarḇor ndramuma ro swaruser ma sneḇaḇir ḇesasar. Raja Daud i, ima snonkaku ḇepyum rirya, mḇoi dakfrur roi ḇesasar. Ḇape ras oso, sne ḇyedi ryo snon oso ḇese swari. Iso eḇedari ifrur roi ḇesasar. (Yak. 1:14, 15) Daud ifrur fararur farḇuk kuker bin ani, ḇarpurya syewar fa dankar bin ani swari, ma myuni. (2 Sam. 11:2-4; 12:7-11) Yahwe myam ko ro ḇandi monda ḇa. Mboi, Yahwe myam kaku roi ḇero kosnesna dori. (1 Sam. 16:7) Roi oso ḇaberi ḇero kakara koḇena, sneḇaḇir koḇena, ma roi kofrur na nayokef buro Yahwe I ḇa. Isewar rari-rari ḇepyum koḇena ma imarisen fa kofasnai na pdef. Ḇape, imarisen kako fa komamḇir kakara ḇesasar na ma kofara kakara koḇena insama kofrur roi ḇesasar awer.​—2 Taw. 16:9; Mat. 5:27-30. w19.02 21 ¶9; 22 ¶11

Refo fyasnaiḇair Moses ima snonkaku ”ḇena sne ḇemayar kaku, isyadi ro snonkaku ḇero supswan ine kam”. (Bil. 12:3) Ine kyurfasnai Moses ima iryarḇa, imkak fa dun snemuk, ma imkak faro snonkaku ḇesampum i sya ke? Ḇeḇeso sya na skara snonkaku ḇena sne ḇemayar moḇ ya ryairi. Ḇape, kakara ḇeradinema nkaku ḇaberi. Moses ima Allah manfamyan Ḇyedi ḇesambraḇ, imkak ḇa fa dun snemuk, ma ḇyebri. Kuker fafnoḇek ro Yahwe, syambraḇ fa dawos yoḇ manḇepoik kaku ro Masir, fyarkin snonkaku Israel indokada se 3.000.000 ro sup ḇeursḇa, ma ifnoḇek si fa sikafyo mbroḇ sesi. Koma kaksmai samswen raris Moses i ḇa. Mboi, ras ḇe ras na kosrow snonkaku ḇaido fafisu ḇefrur samswen fa kofasnai sne ḇemayar. Imbape, roi ono ḇedif kaku ko fa kona rari ḇepyum ine. Yahwe ḇyeasas ”snonkaku ḇena sne ḇemayar sya siso nari ḇena supswan”. (Mz. 37:11) Na ḇaḇir Auma snonkaku ḇena sne ḇemayar kwar ke? Na snonkaku ḇesesya smam Au rarirya kako ke? w19.02 8 ¶1-2

Yahwe ḇyuk faro snonkaku sya sneuser. Moḇsa kofawi Adam ma Eva su kako suyakna sneuser ya? Rofyor susouser Allah I ḇa, suyokefbur su ro I. Ine nfasnaiḇair sneuser suḇena naknon ḇa. Sneuser koḇena iso fawawi ḇero kosnesna ḇefnoḇek ko fa komambir roi ḇekaku ma ḇesasar na. Snonkaku oso fyarkor sneuser ḇyedi ḇa ido na imnis raris kapal ḇena kompas ḇeḇyeḇa kwar. Wam ma daf ḇero soren ya nari nun kapal ani ḇe moḇ ḇesasar. Ḇape, kompas ḇembran pyum nari ifnoḇek kapten ya fa fyara kapal ani ro nyandayuk ḇyena. Imnis rarirya, kofarkor sneuser koḇena ido, nari nfarkin pyum ko ro marandan kankenem koḇena. Kofarkor pyum sneuser koḇena ḇa ido, rofyor kofrur sasar nari nbuk swarapepen ḇe ko ḇa. (1 Tim. 4:1, 2) Iba syadi wer, na kokara ”roi ḇeḇyeḇa ima ipyum”. w18.06 15 ¶1-3

Fandun fa komambir ma kopampum karkara dunya ḇesnaibos ḇeri ḇa. Imnis raris, abar ono rya nesonem fararur polotik na. Ma anun ono nfasnaiḇair aw sena ma rosai sifrur kwar fa dunya ine myanen na. Felem ma syap ḇeḇeso sfasnai sfaḇri mankunsi ma kina sesi, ma sifrur na fa rya nasrow, napyum, ma nkaku. Imbape, karkara ḇeradine neknam ro Refo ya ḇa. Refo doḇe fandun fa koswar syadi Yahwe ro mankunko ma kina koḇesya. Kofrur na ido, nari kosmai kaku aski ya. (Mat. 22:36-39) Ine kyurfasnai ḇa komam hiburan nama nsasar. Mboi fandun fa kofuken mankunko, ’Sfasnaibos ḇeri ḇa mboi yamambir karkara dunya ḇero roi ine dori ke? Yamamwarek romawa yesi ma mankundaya ro roi ono nkomam ro televisi ma roi nkowasya na ke? Yafnoḇek romawa yesi fa sakna Yahwe karkara Ḇyena insama karkara dunya srower ma smam na nawyae awer si ke?’ w18.11 26 ¶18-19

Yahwe fyasna isya ryous ko kuker myam faduru ko ma fyasna sawarwar faro ko. Komam kada rariso fyasnaḇair saswar ma sneḇaḇir Ḇyedi faro ko rai. Yahwe doḇe, ”Snar auma ḇemaeja, ḇesyowi ro mamam yedi, ma Yaswar au.” (Yes. 43:4) Roi osoḇaḇeri ḇero supswan ma farsyos ine na idwarek Yahwe I fa fyasnai saswar ma soasuser Ḇyena faro manfamyan Ḇyesi koine. (Yes. 54:10) Yahwe ḇyeasas fa ipyosbur samswen kosmana ḇa. Mboi nari ipok ryir monda ḇa samswen ḇebor raris ”warḇedaf” nafrur fa koḇoryae ma komnai kofarmyan ḇe I, ḇaido samswen ḇemarḇak raris ”for” na nkur ko pdef. Ḇyeasas kwar nari ryous ko, ifnoḇek ko fa ’kombranuk’ ḇaido kosaebur samswen anna. Rosai nari Yahwe ifrur ya? Nari ifrur fa komkak werḇa inja na kosoasuser pdef faro I, iba syadi rofyor kosmai roi ḇemun. (Yes. 41:13; 43:2) Kokyar Allah nari ’ryous ko’ ido, na komkak ḇaḇeri ma kosambraḇ ro fafisu ḇesamswen na. w19.01 3 ¶4-6

Roma ḇaido inai babo disau ido, imbude guru, sinan sya, ḇaido snonkaku ḇesesya na sanun ḇe Au fa waksewar farkarkor ḇekaki ḇaido fararur ḇepyum insama nwa pipi nabore. Mboi, Yahwe danun fa wafrur roi ḇese. Kakuḇae, imarisen fa wafarkor pyum ro rumfarkor insama nari wapok fa wafamfon fandandun mankun Bena. (Kol. 3:23) Mboi Yahwe fyawi kako fyor babo kaker ine, fandun fa wafrur wos snemuk ḇefarfnak ḇa. Ma snemuk wun anna naiso nari ḇeyap kankenem Bedi ro ras ḇarpon iyama. Inja, Yahwe ḇyuk wos farkin ro Refo nari ḇefarkin ma ḇefnoḇek Au insama wafrur fa imarisen ro fafisu rasras ḇepupes ine. (Mat. 24:14) Yahwe ima ifawi roi nakam. Ifawi rosai nari ḇeḇesya ro ras ḇarpon iyama, ma ifawi mnis kaku papupes dunya ine isya fyanam kaku kwar. (Yes. 46:10; Mat. 24:3, 36) Ma Yahwe myambir Au kaku. Ifawi rosai na ḇefrur fa waryaḇ ma waryaḇ ḇa. Wos anun ro snonkaku sya rya napyum, mboi neknam ro wos Refo ya ḇa ido na napyum ḇaḇeri. w18.12 15 ¶1-2

Imbape, ”snonkaku ḇena sne ḇemayar siso nari ḇena supswan, ma nari simarisen kaku kukro nafo kuker aski ya”. Daud ḇyardi kako, ”Snonkaku ḇenapes siso nari ḇena supswan, ma nari sḇarek ro na isof fyoro-fyoro.” (Mz. 37:11, 29; 2 Sam. 23:2) Asas nane ḇyuk fainda rosai faro snonkaku ḇefrur Allah marisen Ḇyena sya? Sna kakyar snar fafisu oso, snonkaku ḇenapes sya nari sḇarek ro supswan ine ma firdaus ḇemnis ra Yaf Eden nari kyaḇer wer. Kawasa Israel ḇepon siwara, soḇe sifarmyan ḇe Yahwe I. Mboi, fawawas mura, spampum I ma samsyom ḇekaku ya. Inja, Allah myam monda snonkaku Babilon sya skafyo kawasa Ḇyesine, skakok sup sena, ma ḇebor sya sun si ḇe women. (2 Taw. 36:15-21; Yer. 4:22-27) Mboi, Allah nabi Ḇyesya sḇardi snar ro swaf taun ri 70 nawas mura, insape nari kawasa Ḇyesi skaḇer ḇe sup marin sena. Ḇardadi nane ndarirya kwar. Mboi, ḇardadi anna nefainda kaker faro ko ro baboine isoine faro firdaus ro supswan ro ras ḇarpon iyama. w18.12 5 ¶9-10

Ananun nane neḇesebur rosai Refo fyarkor na. Mboi, ananun ro dunya ipyum syadi ro ananun ro Refo ya ke? Yesus doḇe, ”Allah fawawi Ḇyena nfasna napnapes ro fararur ḇyena.” (Mat. 11:19) Dunya ine ifrur roi ḇepyum nabor kwar ro teknologi na. Mboi ipok ḇa fa ifrur mnis samswen ḇebor ḇedwarek ko fa kona aski, raris mamamun, mamfarfir, ma roi ḇeḇarḇor na. Oso wer ido, dunya ine myam farḇakḇuk famfnom ḇe roi ḇesasar ḇa. Mboi snonkaku ḇebor sya sikofen kaku naiso ḇefrur fa kina sya senapnap, sismai dafduf ḇemarḇak, ma roi ḇeḇyeḇa ḇesena. Mboi Yahwe wos anun Ḇyena ido ryariso? Snonkaku Kristen ḇena Yahwe mamam Ḇyena sna kina ḇeaski, sna pararei, ma skain pyum kuker naek srar sesi ro supswan ine ḇesiper. (Yes. 2:4; Kis. 10:34, 35; 1 Kor. 6:9-11) Ine fyasnai kaku Yahwe karkara Ḇyena nakaki syadi ro dunya ine karkara ḇyena. w18.11 23 ¶8-10

Kakuḇae, na kosewar fa kofanam kuker kina koḇesya ma kofrur pyum si. Mboi kopok koyuk awer Yahwe sasoser Ḇyena insama kofrur fa simarisen. Fandun fa koḇebati fanam kuker snonkaku ḇeswar Yahwe I sya. Insama kombran ro kakaku ya, fandun fa kosren ro Yahwe mamam Ḇyedi. (Yes. 35:8; 1 Ptr. 1:14-16) Fafisu kofarkor kakaku ya, kofrur fararwei ro kenem koḇena insama koso Allah marisen Ḇyena. Sino sifrur fararwei ḇeba kaku. Mboi, fandun kaker fa kosasor ko insama kofadwer kenem ḇesren koḇena kuker kenem ḇeḇyeḇa na awer. Rosai na ḇefnoḇek ko fa kopampum farawrowes fa kofrur roi ḇeḇyeḇa na? Kokarapan rosai Yahwe ḇyuk kwar ḇe ko insama kosren. Ḇyuk kankenem ḇekakur kaku ro Roma iswar kaku, Yesus Kristus i! (1 Ptr. 1:18, 19) Insama Yahwe myam kosren pdef, fandun fa koḇesyowi kaku farsarser fasaspar Yesus ḇyedi ḇesya kwar. w18.11 12 ¶10-11

Ḇefarmyan ro oras nakam sibor sya sikofen ḇo soḇe smam monda faro fararmyan sena naine nafnoḇek si fa sḇeaski ma sna swaruser ḇepyum fafisu kankenem sena nefararwei. Raris contoh sena, rosai monda nkur ko mboi kosewar fa kofrur roi ḇepyum ma kokyar faro Yahwe I kuker sne ḇesiper ido, na kosambraḇ fa kofaduru pdef swaruser ḇepyum. Muniwara, na kofawi kaku nyan komam fararwei na nasambraḇser ḇaḇebati koḇena kuker Yahwe I. Ro dunya ine, kankenem koḇena na fasaw fa nefararwei ḇeri. Imbude kaksmai fararur ḇebabo ro fararmyan ḇe Yahwe, kodafduf, ḇaido fandun fa komamwarek kina koḇesya. Mboi, rosai monda ḇekur Au, wakyar Yahwe ima fyandun kaku Au ma nari ifnoḇek Au ro fafisu ḇemnis ya. (Ibr. 4:16; 1 Ptr. 5:6, 7) Kirine, ipyum syadi swewar fa wafrur roi ḇepyum syadi ro fafisu Bena. Konadi ḇe Yahwe, Kma koḇedi ma kokyar kuker sne ḇesiper faro I. Rarirya ido, fararwei rosai monda kosmai na, nari kona swaruser ḇepyum ḇeramuma ro Yahwe I ḇesya kwar. w18.10 26 ¶17, 19; 27 ¶22

Ro Refoya, kofarkor Yahwe kyarauser pyum kaku kawasa Ḇyesya. Imnis raris, komam kuker sne ḇenaḇye Yahwe ifnoḇek Samuel ḇebaḇa kaker ani fa ikofenḇair anun samamyai faro Imam Ḇeba Eli imnis ḇeḇefas ro 1 Samuel 3:1-18. Ro Yahwe Sasoser Ḇyena, iwan romawa sya fa sesyowi snonkaku ḇesinan kwar sya, iba syadi snonkaku ḇena papoik sya. (Kel. 22:28; Im. 19:32) Inja, na samswen ḇe ko fa kowasenkara moḇsa romawa kasun raris Samuel i rya fa isrow Eli ro arwo ya, ma imkak ḇa fa ikofenḇair anun samamyai ro Allah. Refo ikofenḇair ḇe ko Samuel ”imkak fa ikofenḇair ḇe Eli fasasna ani”. Imbape, Allah fyasnaiḇairbos ḇe Eli snar iso ḇeyor Samuel i ma Eli dor Samuel i fa iyokef awer rosai Yahwe ikofen kwar anna. Samuel isouser faro Eli ma ”fyawar roi nakam ḇe i”, ma ikofenḇair kwar anun ḇeradine ḇe Eli i. (1 Sam. 2:27-36) Farfyar ine fyarkor ko snar Yahwe ima kyarauser pyum ko ma fyawinanem kaku. w18.09 21 ¶2; 22 ¶4-5

Baboine, ḇekofen ankarkar nama snonkaku ḇena papoik sya monda ḇa. Artikel ”Rosai Ḇefnai fa Kankarkar”, ḇefas ya iso Y. Bhattacharjee, ikofen ḇo doḇe ”ankarkar nama snonkaku sya rari senairi”. Ḇaido, skara sankarkar ima roi ḇesasar risyaḇa. Fyorno ido snonkaku sya sankarkar fa sikadaunwarek mankunsi, nono ido insama siyokef sasar ḇaido ḇarḇor sena ro snonkaku ḇesesya. Sankarkar kako fa sismai pipi ḇaido fandun ḇesena wer. Artikel anya ikofen kako snonkaku ḇeḇeso sḇaḇir sasar oḇa fa sankar ”snonkaku sifawi ḇaim sya, min fararur, bati, ma snonkaku siswar sya”. Ankarkar anna nafnai fa snonkaku sya sikyaryae si werḇa, ma wis sena namuk. Raja Daud ḇyenadi ḇe Yahwe I, ”Wamarisen faro snonkaku ḇena sne ḇenapes.” (Mz. 51:6) Daud ifawi roi ḇefandun syadi iso roi ḇero kosnesna. Ro fafisu nakam, snonkaku Kristen ḇekaku ’sikofen roi ḇekakuyae faro si’.​—Ef. 4:25. w18.10 4 ¶4; 5 ¶9-10; 8 ¶19

Imbude snonkaku Israel ḇesasyarbur Masir ro taun 1513 SM sya sisyadi ro yuta rikyor. Ro raryur ine, romawa, ḇesinan kwar, ma sino ḇeduf ḇaido ḇeryar ḇa sya sisya. Raryur ḇeba ine fyandun Manfarkin ḇefandun si ma ḇeyakfawi si. Yahwe iso Manfarkin ḇeradirya, ma kyinfir Moses i fa ḇyefaker I. Bon ya, kawasa Israel sibur kuker payamyum ro moḇ sḇarek fyoro kwar ro dianya. (Mz. 78:52) Moḇsa Yahwe myam kawasa Ḇyansi fa sismai payamyum rai? Fyasos mnis er Israel sya ”kuker awnos, raris sordade sya” fa sisasyarbur Masir. (Kel. 13:18) Snar seḇefasos awnos kaku ro nyan ine, inja sikyar Allah iso ḇefara marandan sena. Yahwe ḇyuk kako faro si ”mandep ro arkok” ma ”for ḇe sananai” ro roḇ ya insama siswarepen isya ryous si, fyarkin si, ma kyadaunwarek si.​—Mz. 78:14. w18.09 24 ¶11-12

Ro awar Refo naiwara, Allah manfamyan ḇeḇeso Ḇyesi sekandera snar samswen ḇekur si, inja skara imbe simar mura. Raris Ayub i, rofyor ḇyekandera, ikofen ḇo doḇe, ”Yayin kenem ayedine. Yamewer yakenem pdef indi.” (Ayb. 7:16) Yunus fyafko rawo, inja ikofen, ”Kirine, sye Yahwe, wun nyawa yedine mura. Ipyum syadi yamar ro yakenem.” (Yun. 4:3) Nabi Elia ḇyaḇir syambraḇ werḇa ḇo doḇe, ”Iḇye kwar mura! Sye Yahwe, wun nyawa yedine mura.” (1 Raj. 19:4) Ḇape, Yahwe iswar manfamyan Ḇyanskoine ma imarisen skokenem. Yahwe ḇyemankara moḇ skokara raya ḇa. Imbape, ifnoḇek sko fa skoryaḇ kaḇer fa skokenem ma skofarmyan pdef ḇe I kuker soasuser. w18.09 9 ¶4

Min ḇefararur kayam fnoḇek Allah, nari sifrur pyum snonkaku sya. Ro Refo, wos Yunani faro ”mkoḇuk moḇ ḇeḇeryar faro snonkaku” kyur ḇe ”frur pyum faro mandaman sya”. (Ibr. 13:2) Bisa kowasya farfyar ḇero Refo ḇeḇuk farkarkor ḇe ko rariso kofrur pyum snonkaku ḇesesya rai. (Kej. 18:1-5) Sima ’min koḇesi ḇena kakyar oser’ ke roḇa, fandun fa kofnoḇek ḇesesya rofyor kona swaf fa kofrur na. (Gal. 6:10) Bisa kofararur kayam fnoḇek Yahwe I kuker kofrur pyum naek srar ḇefarmyan ro oras nakam ḇefandun moḇ fa sḇarek ro na ke? (3 Yoh. 5, 8) Kofrur pyum si ido, nari sismai fainda ma ko kako. Refo doḇe na ”kosonemyaeko”. (Rm. 1:11, 12) Refo danun ḇe bar snon ḇero sidang sya insama sifararur kayam fnoḇek Yahwe kuker suffarmyan ḇe hamba pelayanan ma penatua. (1 Tim. 3:1, 8, 9; 1 Ptr. 5:2, 3) Ḇeyuffarmyan ansine simarisen sḇuk fafnoḇek ḇepyan ḇe ḇesesya, ma ro ḇaḇesamsyom sena kako. (Kis. 6:1-4) Ma naek ḇefnoḇek ro fararur ḇero sidang nane soḇe sismai raryaḇ ḇeba kaku. w18.08 22-23 ¶6-7; 24 ¶10

Timotius nya fararur nabor syadi ro naek ḇeḇesinan kwar sya, mboi fandun fa ḇyesawarwar ma ḇyesyowi si. Mboi rariso rofyor snonkaku ḇesinan kwar oso ifrur sasar ḇaido dawyae ḇesesya fa sifrur roi Yahwe imewer na? Ḇyesinan ke, snonkaku sya sesyowi i ke, ifrur kaku sasar ido na Yahwe myam monda i ḇa. Komampan wos farkin ḇero Yesaya 65:20, ”Snonkaku ḇesasar oso umur ḇyeja taun ri 100 kwaro, nari ismai fafras.” Wos farkin ḇemnis naisya ro Yehezkiel fasasna ḇyedi. (Yeh. 9:5-7) Mboi ḇefandun syadi ya, koḇesyowi Yahwe I, iso Ḇesinan Kwar Kaku. (Dan. 7:9, 10, 13, 14) Snar koḇesyowi kaku Yahwe I, inja nari komkak ḇa fa kosonek snonkaku oso ḇefrur sasar kwar, komam ro umur ḇyedi ḇa.​—Gal. 6:1. w18.08 13 ¶13-14

Kokame fandun fa kofawi moḇsariso komam pyum roi oso ḇepon ari insape kun kakara ḇepyum. (Ams. 3:21-23; 8:4, 5) Mboi roḇa ido, nari Setan ma dunya ḇyedine napyan fa dawninyan kakara koḇena. (Ef. 5:6; Kol. 2:8) Kakuḇae, insama kun kakara ḇepyum oso, fandun fa kofawi ḇepon kakaku ḇyena ari. Baboine, anun ḇebor ndramuma ro moḇ sairirya kam. Raris ro internet, televisi, ma ḇesena. Ḇaido kosrow na ro e-mail, SMS, ma farfyar ro bati koḇesi. Rya anun anya nabor fafayaḇa. Inja fandun fa kosasor ko. Bati koḇesya imbude sna kakara ḇepyum, mboi ḇesesya ono sisya sikofenḇair anun ḇekaku ḇa ḇaido spambar wos ḇyena. w18.08 3 ¶1, 3

Yahwe kyinfir bin ḇebabo oso ḇena sne ḇerun ḇenir ḇe Maria fa ḇye sna faro Rumkun Ḇyedi, Yesus i. Maria ḇyarek ro mnu kasun snoriso Nazaret, ḇinkwan kaku ro Yerusalem ma bait ḇepyum kaku ro diwa. (Luk. 1:26-33) Na kofawi Maria fyanam kaku faro Yahwe I ro rosai ikofen ḇe Elisabet i. (Luk. 1:46-55) Yahwe myamepen Maria i, ma ḇyuk barakas kyara ḇaim nane snar isouser faro I. Ro fafisu Maria imbe daḇen Yesus i, faro mansei Yahwe ikofenḇair ḇaḇeaḇen ḇyedi? Ikofenḇair ḇe ḇeḇarara ma ḇepoik ro Yerusalem ma Betlehem sya ḇa. Mboi, iwan malaikat Ḇyedi fa ikofenḇair ḇe manfarandows ḇena sne ḇerun ḇewaren rofanfan sesya ro maper ḇero Betlehem ḇandiri. (Luk. 2:8-14) Ramnai, manfarandows ansya sra smamfar kapira ḇeḇeaḇen babo ani. (Luk. 2:15-17) Maria ma Yusuf na sukandor kaku fyor sumam Yesus ismai syowi kuker nyan ḇeradirya. w18.07 6 ¶11-12

Rosai ḇefnai fa Yahwe imsor marsirḇa Salomo i? Refoya doḇe, ”Snar Salomo sneri ḇyinkwanbur Yahwe I . . . , ryama ḇe i rarwan risuru kwar ma ḇyuk swarapepen ḇe i kwar kuker roi ine, isoine ipok fa iso awer allah-allah ḇesena. Mboi isouser Yahwe parenta Ḇyena ḇa.” Inja, Allah imewer i ma ifnoḇek i werḇa. Yahwe imewer Salomo kpu ḇyesya sḇepoik faro er Israel ḇesiper, ma ro swaf taun utin ḇe utin sismai samswen nabore. (1 Raj. 11:9-13) Rofyor kokinfir bati ḇeyakmambir Allah ḇa ma ḇesyowi sasoser Ḇyena ḇa ido, na sawninyan kakara koḇena ma nafrur fa koḇebati kuker Yahwe I werḇa. Imbude sima naek srar ḇero sidang, mboi sna ḇaḇebati ḇesambraḇ kuker Yahwe I ḇa. Ḇaido sima kina koḇesya, ḇeḇarek fanam kuker ko, bati ro moḇ kofararur, ḇaido bati ro rumfarkor ḇeyaksyom Yahwe I ḇa sya. Koḇuk oras koḇena fa kokainus snonkaku ḇesouser Yahwe sasoser Ḇyena ḇa ido, na sawninyan kaku ko isof koḇebati kuker Yahwe I werḇa. w18.07 17 ¶9-10

Roro felem ma fasasna ḇero telefisi na Setan irwas nyan kakara ḇyena. Ifawi mnis komarisen korower farfyar ro snonkaku sya ma farfyar senane na nḇuk saneprei faro ko monda ḇa, ḇape nfarkor ko nyan kokara, koḇaḇir, ma roi kofrur na nraya. Yesus ikir kaku fa ḇyuk fawawar fa ḇyukifarkor snonkaku sya. Imnis raris, wos sarḇer ḇekur snon Samaria ḇefrur pyum ma romawa ḇeḇoḇ farfnak nana ḇyenakam. (Mat. 13:34; Luk. 10:29-37; 15:11-32) Imbape, snonkaku Setan dawninyan kakara sena kwar sya na sḇuk fawawar fa sfarkorninyan ko. Fandun fa kokara mnis. Kakuḇae, felem ma fasasna ḇero telefisi ono na nbuk sneprei ma nfarkor ko. Ḇape fandun fa kosasor ko. Fyor kokinfir hiburan na, ipyum syadi kofuken mankunko, ’Felem ma fasasna ro telefisi na nfarkor aya fa yakara yaso marisen kraf yena nama nsasar ḇa ke?’ (Gal. 5:19-21; Ef. 2:1-3) Rosai nari wafrur ya rofyor mam mboi fasasna anna nefasna Setan kakara Ḇyena? Pampum na beri imnis ra wamewer wasma dafduf ono! w19.01 15-16 ¶6-7

Imnis ra roi ḇesaswo ḇedwarek sordade oso akuk ḇyena, rarirya kako ”saneraro fasaspar” kyadaunwarek kakara koḇena. (1 Tes. 5:8, NW; Ams. 3:21) Setan na ifrowes ko fa korir roi ḇesaswo ḇukor koḇena. Kokarapan rariso ḇyensewar fa ifrowes Yesus i. Setan ifawi Yesus iso nari ḇepoik faro snonkaku sya. Ḇape, randak ya nari ḇyekandera ma imar. Ramnai, iwaf isof Yahwe ikanow i ḇe Raja. Inja, Setan ifrowes Yesus i fa ḇyepoik ḇe Raja ro fafisuya ḇeri. Setan ḇyeasas faro i ḇo doḇe rofyor isyom i kali oser monda ido, nari ḇyepoik ḇeri be Raja faro supswan. (Luk. 4:5-7) Setan ifawi kako Yahwe ḇyeasas nari ḇyuk barakas ḇepyum faro ko ro dunya babo. Fandun fa kowaf asas anna ndarirya, ḇape kirine kosmai kaker samswen nabore. Setan ifrowes ko fa kona payamyum ro kankenem koḇena ro fafisu ine ḇeri. Imarisen insama kofandun mankunko monda ma kosewar ḇepon Karajan Allah ḇa.​—Mat. 6:31-33. w18.05 25 ¶15-17

Yahwe imarisen ḇeaski fafisu wababo kaker ine. Wafrur ḇeri roi nane ro kankenem Bedi ido, na fasaw kako fa wasmai farkankin, fadadiren, ma barakas ro Yahwe I. Kwarauser ananun Yahwe ḇyuk ḇe Au ro Refoya, ma waso pyum anun ine, ”Waswarepen Manḇefrur bedi Ḇekaki Syadi ro fafisu wababo kaker.” (Pkh. 12:1) Roma inai babo mkoya, nkosandik kaku mko snar mkoḇuk kankenem mkoḇena fa mkofarmyan ḇe Yahwe I ḇesya kwar. Mkofrur aw fa mkofarmyan ḇe Yahwe I kwar, ma mkomam fararur ḇaḇeḇaryas ḇe roi ḇefandun kaku ro kankenem mkoḇena. Mkomam monda ḇa dunya ine ifrur fa mkoḇefnder aw mkoḇena. Mkokyar fararur marḇak mkoḇena na nefromo ḇa. Mkona naek srar ḇeswar ma ḇesaramper mko. Inja ’mkokyar roi mkofrur nakam faro Yahwe I, ma nari aw mkoḇena kam nun bon ḇepyum’. w18.04 31, 32 ¶17, 19