November

Snar kofarmyan ḇe Yahwe I, kona swaf fa kosmai kaḇer roi Adam ma Eva sufrur fa napromes kwar anna, ine kako kankenem fyoro. Adam ma Eva sukinfir fa sufarmyan ḇe Yahwe werḇa snar suna saswar ḇesambraḇ faro I ḇa. Rarirya ido, Yahwe ḇyesu fa sukenem kawan insama suna romawa ma sukinfir ro mankunsu nyan moḇsa sufaduru romawa suḇesi raya. Sumam ro makunsu kankinfir suḇena fa sumkei ro Yahwe I nun roioḇa kaku. Romawa rak suḇedi myunbos ḇedar ḇyedi, ma ro fafisu anya kankenem snonkaku sya naser ḇaḇerarmomen ma ḇaḇefandun mankun. (Kej. 4:8; 6:11-13) Imbape, Yahwe fyasos nyan fa fyaspar Adam ma Eva romawa ḇyesikam ḇemarisen ḇefarmyan ḇe I. (Yoh. 6:38-40, 57) Fyor wafawi nabor syadi Yahwe ḇaḇekaḇaḇaḇ ma saswar ḇeba Ḇyedi ido, nari waswar syadi I. Na wamewer kwinfir sasar raris Adam ma Eva su mboi buk kankenem bedi fa wafarmyan ḇe Yahwe I. w19.03 2 ¶3; 4 ¶9

Insama kofasnai rari ḇaḇaḇir oser ya, kokarapan samswen ḇekur kina ma naek srar koḇesya. Fasnaiḇair komam ma kofandun romawa babo ḇero sidang sya, faro snonkaku ḇeduf sya, ḇesinan kwar sya, ḇaido ḇesneso snar snonkaku siswar sya simar. Kofuken abar sena ma fyor sfawar rosai sḇaḇir na ido, korower pyum si. Kofasnaiḇair ḇe si snar kofawi kaku roi ḇekur si na. Sfandun fafnoḇek koḇedi ido, kofnoḇek si kuker samambrab koḇena ḇesiper. Kofrur rarirya ido, kofasnai koswaryae ko. (1 Yoh. 3:18) Rofyor koḇesewar fa kofnoḇek snonkaku ḇese sya ido, fandun fa kosewar nyan risai monda fa kobuki fnoḇek si. Rosai ḇefnai ya? Snaro roi snonkaku sya sismai na neḇeseyae. Sia imḇe sfawar na, siwer ido simewer sfawar na. Inja, imbe kofnoḇek si ḇoi, kopok kobuk fakfuken ḇefrur fa simai. (1 Tes. 4:11) Nanoido, oso isya imbe fyawar samswen ḇyena, imbude komarisen faro rosai ikofen na ḇa. Mboi, koswarepen snar iso roi sḇaḇir na. Inja, kosamberen famkomnaf, ḇape kawos fasaw awer.​—Mat. 7:1; Yak. 1:19. w19.03 19 ¶18-19

Wamkak rofyor ḇaryas ro moḇ snonkaku sya sibor ro na ke? Waswarepen Nehemia i. Fyarmyan ro istana faro raja ḇepoik kaku. Ras oso Nehemia ḇyesaneso snar sikofenḇair ḇe i ayar karui ma kerwa ḇeba ro mnu Yerusalem neḇekarbaken kaker. (Neh. 1:1-4) Raja ifuken i rosai ḇefrur fa iryaḇ ḇa. Wawasen kada na Nehemia isyasen kaku! Nehemia ḇyenadi ḇeri ma kyarem ḇe Raja. Bon ya, Raja ifrur roi nabor fa ifnoḇek Allah kawasa ḇyesi. (Neh. 2:1-8) Farkarkor kun ro Nehemia iso fandun fa koḇenadi fyor kokarem ḇaim. Ḇesuruya, fawar ro Yunus i. Fafisu Yahwe dor i fa dawos yoḇ snonkaku Niniwe sya, Yunus imkak kaku inja ifrar ibur ḇe moḇ ḇese. (Yun. 1:1-3) Ḇape mura, kuker fafnoḇek ro Yahwe I, Yunus ifrur fararur ḇyedi. Ma wos ikofen ḇe snonkaku Niniwe anna nun fainda ḇe si. (Yun. 3:5-10) Farkarkor kun ro Yunus iso Yahwe na ifnoḇek ko fa kofarmyan ḇe I fafisu komkak kaku. w19.01 11 ¶12

Fafisu koso raris rosai kofarkor kwar ro Refo ro kenem koḇena ido, nari kina ma bati koḇesya simewer sḇebati kuker ko wer. Yesus ikofenḇair roi ḇeḇefnai ya fyor ḇyenadiwarek manfamyan ḇyesi, ”Fasren si ro kakaku ya. Wos Bena naiso kakaku nairya.” (Yoh. 17:17; NW) Wos ”fasren” kyurfasnai kako ḇe ’ḇe si fa siḇese’. Rofyor kosouser kakaku ya, nari koḇesebur dunya ine kukro koso akurfasnai ro Refo na. Kosewar fa kofaduru pyum wis koḇena kuker kina ma bati koḇesi, mboi imbude na simarisen faro ko werḇa ma spampum kakyar koḇena. Na kopok kokandor ḇa. Yesus doḇe, ”Kina ro rum oso nari sembroḇ yaesi.” (Mat. 10:36) Mboi Yesus ḇyeasas, rosai monda kobur kwar na snar kakaku ya, nari kosmai sadwer nabor syadi wer! w18.11 6 ¶11

Manwawan Paulus ḇyesyowi naek srar ḇyesi ma fyasnai na ro rosai ikofen ḇekur si na. Ro nadi mankun ḇyedi, ikofen kasumasa ḇesya kwar ḇe Allah snar ḇyuk naek srar sya ḇe i. Ro syapram ḇyena ikofenḇair syowi ḇyena faro si. Ro syap Roma 16:1-15, Paulus dapḇair min Kristen ri 27 sisnosna. Paulus dapmnis kaku Priska ma Akuila ’indokada sumar sadwer i’. Ma fyasnaiḇair Febe ”ifnoḇek snonkaku sibor kwar”, Paulus i kako. Isandik naek srar ḇesaswar ma ḇefararur marḇak ansine. Paulus ifawi naek srar ḇyesi sima sinapes ḇa, ḇape, kyara monda faro rari ḇepyum sena. Kwarapan, fyor naek srar ro sidang srower siwasya kuker mkaren naba Paulus anun ḇyena na sisambraḇ kaku! Bon ya, sifanam syadi kuker Paulus i. Au ido, wakfasnai syowi ḇesyakwar faro roi ḇepyum naek srar ḇero sidang Bedi sikofen ḇaido sifrur na ke? w19.02 16 ¶8-9

Kakuḇae, imbude na koḇaḇir koma komnis ḇa kaku ḇaido kofrur sasar nabore. Inja, na kokara fandun fa koḇe snonkaku ḇemnis kaku insape kofasnai soasuser ke? Kokara radirya awer snar Yahwe myamepen sasar koḇena ḇa. Refo fyasnaiḇair ḇe ko, ”Rofyor sasar naiso mamepen na, sye Yah, mansei na ḇekain pdef, sye Yahwe?” (Mz. 130:3) Ifawi koinema snonkaku ḇenapes ḇa ma ḇesasar, mboi imarisen ḇyuk ampun ḇe ko. (Mz. 86:5) Yahwe ifawi kako ḇaḇeraryarḇa koḇena, ma dor ko ḇa fa kofrur syadi ro roi kosambraḇ fa kofrur na. (Mz. 103:12-14) Yahwe manfamyan Ḇyesi koine, kofandun saswar infa kofasnai soasuser. Saswar ma samsyom kuker soasuser koḇena faro Kma koḇedi ro nanki, fandun fa namnis, naḇye, ma nasiper. Rarirya, rofyor kosmai fafrowes ido na kofasnai soasuser pdef. (1 Taw. 28:9; Mat. 22:37) Kofawi Yahwe sasoser Ḇyena nanapes, ma kokara monda faro roi ḇefrur Kma koḇedi ḇero nanki imarisen. Rofyor kun snemuk ḇaim, saswar faro Yahwe I nadif ko fa kokara roi ḇeyun marisen ḇe I ma kofasnai soasuser koḇena. w19.02 3 ¶4-5

Fafisu komam ro mankunko fainda ro kofrur roi ḇenapes ya, kakyar koḇena nasambraḇ syadi wer. (Yak. 1:2, 3) Sne koḇena naprei snar kofrur Yahwe imarisen kaku fa dor koḇe romawa Ḇyesi, nafnai fa komarisen syadi wer fa kofrur marisen Ḇyena. (Ams. 27:11) Farawrowes ḇekur ko na nḇuk swaf fa kofasnai kofarmyam Kma koḇedi kuker sne ḇesiper. (Mz. 119:113) Kofasna koswar kaku Yahwe kuker kosouser parenta Ḇyena ma kofrur marisen Ḇyena. (1 Raja-Raja 8:61) Kakuḇae na kofrur sasar snar konapes ḇa. Rofyor kosapi ido, koswarepen Raja Hizkia fawar ḇyeja. Ifrur sasar mboi imbror ma fyarmyan pdef ḇe Yahwe ”kuker sne ḇesiper”. (Yes. 38:3-6; 2 Taw. 29:1, 2; 32:25, 26) Inja, mkorama kopampum Setan kakara ḇyena ḇeawninyan ko. Iḇye ya koḇenadi fa kona ”sne ḇesoasuser” ma kosoasuser pdef faro Yahwe I.​—1 Raj. 3:9; Mz. 139:23, 24. w19.01 18-19 ¶17-18

Kosma fainda ro mankunko rofyor koḇuk kankarem ro fananjur. (Yes. 48:17) Snaro? Oserya, fyor kokara imbe koḇuk kankarem ido, ine idif kaku ko fa kofrur fasasos ḇepyum faro fananjur ya. Fafisu kofrur na ido, na kosmai fawawi nabor syadi ro Allah Wos Ḇyena. Snar kofawi nabor syadi, na komarisen kosouser pyum roi kofarkor kwar na. Ḇesuruya, na koryaḇ syadi ro fananjur snar kakso warpu ro awawos na. Ḇekyorya, snar kosewar kaku fa koḇuk kankarem, na koswarepan fyoro roi kokarem na. Kofrur Yahwe imarisen rofyor kawosḇair kakyar koḇena kako. Kokyar kaku Yahwe na ryower ma ḇyesyowi kaku sasewar koḇena fa koḇuk kankarem ro fananjur ya. (Mal. 3:16) Fyasnai na kuker ḇyebarakas ko snar kosewar fa kofrur imarisen. (Mal. 3:10) Nasnai kaku, kona roi ḇepyum ḇewar fa koḇuk kankarem ro fananjur ya. w19.01 8 ¶3; 9-10 ¶7-9

Yahwe ima ifrur pyum kaku ko. Ḇyuk sasoser nabor ḇe ko ḇa, mboi kyaḇaḇ fyarkor ko fa kosouser faro sasoser ḇefo saswar Ḇyena. Fyarkor ko fa kokenem imnis marisen Ḇyena ma kayin roi ḇeḇyeḇa na. Ro Faya ro Urek, Yesus ifnoḇek ko fa kofawi pyum roi ḇewar fa snonkaku sya sifrur roi ḇeḇyeḇa na. (Matius 5:27, 28) Ma ro dunya babo, fyor Yesus ḇye Raja ro Allah Karajan Ḇyedi, na fyarkor pdef ko fa komam roi ḇekaku ma roi ḇesasar raris mamam ḇyena. (Ibr. 1:9) Oso wer ido, Yesus nari ifrur fa swaruser ma baken koḇena namnis kaku. Kokarapan moḇsa fafisu ya na ḇyerai, rofyor kosmai farawrowes fa kofrur roi ḇeḇyeḇa werḇa ma koḇekandera werḇa snar sasar ya. Ḇarpur mura, nari kosmai ḇaḇemkei ḇekaku Allah ḇyeasas kwar anya. (Rm. 8:21) Ro dunya babo ya, kona ḇaḇemkei ḇesyadadi ḇa kaker. Kosmai ḇaḇemkei ḇekaku ya rofyor koso Yahwe nyan Ḇyena monda kada.​—1 Yoh. 4:7, 8. w18.12 19-20 ¶19-20

Sasoser ya ḇye snon Israel oso fa fyaspar swari rofyor ”myam roi ḇemnis ḇa ro i”. Sasoser Moses fyasnaiḇair ḇa rosaiso ”roi ḇemnis ḇa” anya. Mboi, kaku ḇeri inema roi ḇefrur mamyai kaku ḇaido roi ḇefamfnom risyaḇa ma sasar kasun monda ḇa. (Ul. 23:14) Ara faḇye, ro Yesus fafisu ḇyedi snonkaku Yahudi ḇebor sya sfaspar siswasi kuker ”knam famfnom monda”. (Mat. 19:3) Komewer kaku fa kakfrur raris rosai sifrur nane. Ro Nabi Maleakhi fafisu ḇyedi, snon sibor sfaspar bin sḇuk ḇepon ya, imbude insama sfarḇuk wer kuker bin ḇebabo ḇefarmyan ḇe Yahwe I ḇa. Mboi, Allah ikofen snai kaku moḇsa myam imbeswa ḇesisyeyae raya. Doḇe, ”Yamewer kaku fa imbeswa suḇesisye.” (Mal. 2:14-16) Allah ikofen ro farḇakḇuk ḇerandak ya ḇo doḇe snon oso ”nari ḇyeoser kuker swari, ma . . . suḇe baken oser”. (Kej. 2:24) Moḇ Allah myam farḇakḇuk ya ryarirya kaker. Ma Yesus nya karkara oser raris Kmari, doḇe, ”Rosai Allah ḇyefa ḇeḇeoser kwar, snonkaku sipok sfaspar i ḇa.”​—Mat. 19:6. w18.12 11 ¶7-8

Naek srar sino sisya sna swaf fa sifrur na. Sna kakara raris nabi Yesaya i. Rofyor Yahwe ifuken i, ”Manseiso nari yawan i, ma mansei nari ḇeramura faro nko?” kyarem ḇo doḇe, ”Aya isoine! Wawan aya!” (Yes. 6:8) Wamarisen ma nwa swaf fa wafnoḇek Yahwe organisasi Ḇyedi ke? Yesus dawosḇair fararur ḇaḇeḇaryas ma ḇyuk farkarkor fyor ikofen, ”Inja mkor faro tuan ḇena afuf ya, insa fyarem ḇeyinek sya sibor faro afuf ani.” (Mat. 9:38) Bisa wakfarmyan ḇe perintis ro moḇ ḇefandun syadi manḇaryas ke? Ḇaido bisa wafnoḇek snonkaku ḇese fa ifrur na ke? Naek ma srar ḇebor sya sḇaḇir nyan ḇepyum kaku fa sifasnai saswar faro Allah ma min sesya iso sakḇe perintis ro moḇ ḇefandun syadi manḇaryas sya. Kwara nyan ḇesena wer fa wafrur nabor syadi ro fararmyan Bena ke? Wafrur rarirya ido, na ḇeaski syadi. w18.08 25-26 ¶14-15

Ro farfyar ḇekur Yesus kaparpar ḇyedi, nfasnai kaku Yahwe mamam Ḇyena faro nana arasai na. Allah mankundi kyinfir Yusuf ma Maria, ḇena nana nabor ḇa ansuya fa sumamfaduru Roma Ḇyedi. (Im. 12:8; Luk. 2:24) Rofyor Maria kyapar Yesus i, ”ḇyeifa ḇyarek ro sayer dombasya sananroya, snar skosma moḇo ḇa ro rum seryar roya”. (Luk. 2:7) Yahwe imarisen ido, na myam mnis insama Maria kyapar Yesus i ro moḇ ḇepyum syadi. Mboi imarisen Yesus iba ro kina ḇefakapon samsyom faro Allah. Iso roi ḇefandun kaku faro Yahwe I. Farfyar ḇyedine nfarkor ko rariso Yahwe myam nana arasai na raya. Sinan sino sisya simarisen romawa sesya sna nana arasai ḇepyum. Mboi, nane nafnai fa romawa sesi wis sena kuker Yahwe I namuk. Nasnaibos, Yahwe myam wis koḇena kuker I ḇe roi ḇefandun syadi. Wakmarisen nwa Yahwe mamam Ḇyedi faro roi ine ke? Rosai ḇefasnai ro fararur Bena? w18.11 28-29 ¶7-8

Yahwe iso Knam ro aski ya, inja imarisen kosmai aski, ma ḇyuk roi ḇebor kofandun na insama koḇeaski. (Ul. 12:7; Pkh. 3:12, 13) Ḇape, rosai ḇefnai fa ro baboine na samswen kaku fa koḇeaski? Na napyan ḇa fa kosmai aski fafisu kokamar samswen, raris snonkaku koswar sya simar ḇaido sisae si bur sidang, rofyor farḇakḇuk koḇena namuk, ḇaido kona fararur werḇa. Na samswen kako fa kosmai aski rofyor ḇero kina yadori srakrok ker, bati ro moḇ kofararur ḇaido ro rumfarkor skoryae ko, oroḇaido sewayam ko roḇa sisun ko ro bui snar kofarmyan ḇe Yahwe I. Oso wer ido kodafdufe, imbude koduf marḇak, ḇaido koḇe depresi. Ḇape koswarepen Yesus Kristus ima Manḇepoik ḇeaski, imarisen kaku fa ḇyuk sneprei ḇe snonkaku sya ma ifrur si fa sḇeaski. (1 Tim. 6:15; Mat. 11:28-30) Ro Faya ro Urek, Yesus dap rari ḇeḇeso na ḇefnoḇek ko fa koḇeaski, iba syadi wer ro fafisu samswen nabor nkur ko snar kokenem ro Setan dunya ḇyedine. w18.09 15-16 ¶1-3

Roi oso syamswen kaku fa kofadwer ya iso, komnai ro koso rari ma adat Yahwe imewer na. (Ams. 23:23) Sino sifawi kwar moḇsa Yahwe myam roi nane raya, mboi samswen kaker fa sḇinkwanbur na. Skara moḇsa na kina sesi, min fararur, ḇaido bati sesya smam si rai. Sifawi snonkaku ono suf nako adat sena, imnis ra sḇuk samsyom faro karyer sesi ḇemar kwar sya. Inja, rosai na ḇefnoḇek ko fa kofrur fararwei ḇefandun kaku nane? Na kun farkarkor ro fawar ḇepyum ro snonkaku ḇepon siwara ḇefrur fararwei fafisu sfarkor kakaku ya. Rosai snonkaku ro mnu Efesus sifrur rofyor sḇe snonkaku Kristen kwar? Refo ya fyasnaiḇair, ”Siryur syap-syap rawan sena fa sikun na ro ḇarpon kawasa ḇeḇor. Maeja ro syap-syap rawan anna indokada nekumpan sarak syaran samfur ririm.” (Kis. 19:19, 20) Snonkaku Kristen ḇesoasuser ansine simarisen sikun syap-syap ḇemaeja sena, ma Yahwe ḇyebarakas si. w18.11 7-8 ¶15-16

Kero fafisu snonkaku Israel simbranuk Warḇeki Yordan raposa, roi oso ḇyeḇejadi. Yosua isrow kuker snon oso ḇeyuf sumber ḇekwan ḇyedi. Yosua kyandor fafayaḇa snon ani ima ’mananir ro Yahwe sordade Ḇyesi’, isoine malaikat oso ḇemamwarek Allah kawasa Ḇyesi. (Yos. 5:13-15) Malaikat ani ikofen mnis ḇe Yosua rosai fandun fa ifrur ya insama kyafyo Yerikho. Randak ya, akurfasnai ḇeḇeso ḇyuk na rya namnis ḇa kero. Imnis raris, malaikat ani iwan Yosua i fa sordade ḇyesi kam sismai sofakfuk. Rarirya ido, ro ras ḇeḇeso na sipok ḇa fa smamunmun ḇae. (Kej. 34:24, 25; Yos. 5:2) Imbude sordade ansine na skara, ’Moḇsa na kokadaunwarek kina koḇesya rai rofyor mbroḇ sya srama smun ko?’ Ḇape, roi oso skara ḇaim ya ḇyejadi! Snon ḇero Yerikho sya srama fa smamunmun snonkaku Israel sya ḇa, snar simkak faro si. Kowasya kada, ”Kedwa ḇeba ro Yerikho ḇyeḇesisen snar er Israel, snonkaku osoḇaḇeri isae ma isun indi.” (Yos. 6:1) Roi ine ifrur fa snonkaku Israel sikyar syadi wer faro Allah akurfasnai Ḇyedi! w18.10 17 ¶5-7

Ine iso nyan oser fa kofasnai sne ḇerun raris Paulus i. Kopok kokara awer fararur ḇaḇeḇaryas ḇaido roi kosmai snar fafnoḇek ro Yahwe I nafrur fa kopyum syadi ro ḇesesya. Kofuken mankunko, ’Moḇsa yamam snonkaku ḇero moḇ yaḇaryas ya rai? Yamamfarfir kawasa ono ke?’ Saksi-Saksi Yahwe ro supswan ine ḇesiper sisewar fa sisrow snonkaku ḇemarisen ḇerower ankankinem ḇeḇye. Iba syadi wer ro moḇ oso kawasa sya smamkyof na, Saksi sya sino sisya sfarkor wos ḇese ḇaido kenem ro moḇ anya. Mboi skara ḇaḇeri sima sipyum syadi ro snonkaku sḇaryas yoḇ si na. Imbape, sisewar fa smambir snonkaku oser-oser insama sifnoḇek snonkaku sibor syadi wer fa sismai ankankinem Karajan. w18.09 5 ¶9, 11

Snonkaku Romawi sya smun Yudas i. Kawasa Yahudi ro raryur Zealot sya siwafwaf Mesias rarama ḇyedi. Soḇerada nari Mesias ḇyuk makakei faro si ro ḇaḇepapoik Romawi ma ifrur kaḇer er Israel ḇe er ḇeba syadi wer. (Luk. 2:38; 3:15) Ḇebor sya sikyar kaku Mesias nari ḇyawes karajan oso ro supswan ine ro sup Israel. Roi ine ndarirya ido, snonkaku Yahudi ḇeḇarek ro moḇ nakam ro supswan ḇesiper nari skaḇer ḇe Israel. Yohanes Ḇeḇebaptis i kako dakfuken Yesus i, ”Auso nari ḇeramayake, roḇa nari nkowaf snono ḇese?” (Mat. 11:2, 3) Imbude Yohanes ifuken ro mankundi na snonkaku oso ḇese ḇerama ḇeḇuk mkei faro snonkaku Yahudi syandi. Mura, manfamyan risuru susrow Yesus ro nyan ḇera ḇe Emaus fyor ikḇawes kwar. Suyoḇe sukyar Yesus iso nari ḇerama fa ḇefaspar er Israel sya. (Luk. 24:21) Fyoro ḇa mura, manwawan sya sifuken Yesus i, ”Manseren, wamarisenke ro fafisu ine, bawes [karajan] faro kawasa Israel?”​—Kis. 1:6. w18.06 4 ¶3-4

Fandun fa kosasor ko rofyor korower farfyar ḇekur ḇe Yahwe kawasa Ḇyesi. Koswarepen mbroḇ koḇedi Setan ḇeḇeyap ḇe ”[ḇekursof] naek srar koḇesi”. (Why. 12:10) Yesus ḇyuk swarapepen nari ḇembroḇ konsya ’sonef ko kuker wos ḇeḇor ḇeḇyeḇa’. (Mat. 5:11) Kokarauser swarapepen ine ido, na kokandor ḇa rofyor korower farfyar ḇeyun sneprei ḇa ḇekur ḇe Yahwe kawasa Ḇyesi. Wamarisen wakfarem e-mail ḇaido SMS ḇe bati Besya ke? Fyor wafawi farfyar ḇaido fawar ḇepyum oso ido, wamarisen fawar pampam na ke? Fafisu farem e-mail ḇaido SMS ḇaim, wafuken mankundaw: ’Yafawi mnis kwar farfyar ine nkaku ke? Yafawi kakaku ḇyena kwar ke?’ Wafawi mnis ḇaim na ido, na fawar pampam roi ḇekaku ḇa na. Inja, rofyor wafawi mnis ḇaim roi anna nkaku ke roḇa, farem awer na. Wapyos na ḇeri! w18.08 4-5 ¶3, 6-7

Yesus imarisen insama kakfasnai snemura snar ine nari nun aski ḇe ko. Kofasnai snemura ido, nari snonkaku ḇebor sakfasnai snemura kako. Kakuḇae, fyor kofasnai snemura, na snonkaku syakam ḇa ḇesyowi na. Kokyar kaku fyor kofasnai snemura, nari nun roi ḇepyum nabore. Snonkaku ḇefasnai snemura kuker sisnesna ḇesiper, nari sḇuk ḇo sor ḇakḇuk kaḇer ḇa. Yesus doḇe, ”Rofyor wafrur munara ido, pos snonkaku ḇesaḇarar, ma ḇeḇeroro, ḇepapipen ma snonkaku ḇeprafsya. Nari wasma aski, snar snonkaku ansya sisma roi ono fa sḇukḇak frurpyum benaḇa.” (Luk. 14:13, 14) Refo ikofen kako, ”Snonkaku ḇena snemura nari ismai barakas”, ma ”Aski faro mansei ḇemamfaduru snonkaku ḇena royoḇa.” (Ams. 22:9; Mz. 41:1) Fandun fa kofasnai snemura snar komarisen kaku fa kofnoḇek snonkaku ḇesesya. w18.08 19 ¶15-16

Baboine, samswen kaku fa kosmai anun ḇekaku ma kokara pyum na. Snaro? Anun ḇebor na namnis ḇa ḇaido naser roi ḇekaku kam ḇa ma koine snonkaku ḇenapes ḇa siko. Rosai na ḇefnoḇek ko? Wos farkin ḇero Refo na! Raris, wos farkin oso ikofenḇair ḇe ko rofyor kokarem roi oso mboi korower ḇepon kakaku ḇyena ḇaim ido kofasnai kofawinanem ḇa. (Ams. 18:13) Wos farkin ḇese wer ifnoḇek ko fa kofawi kokyar awer faro roi nakam. Ḇape, kosewar ari fa kofawi roi anna nkaku ke roḇa. (Ams. 14:15) Ma kofarmyan ḇe Yahwe I fyoro kwar ke roḇa, kokyar awer faro kakara mankun koḇena. Wos farkin ro Refo na nafnoḇek ko rofyor koḇuk kakaku kosmai na fa kun kakara ḇepyum oso ma kofrur snemuk ḇekaku. w18.08 8 ¶19

Kuker koḇebaptis, snonkaku ḇese nari smam Yahwe iso ḇena konya ma komarisen kosouser I. Yesus dakfrur rarirya rofyor ḇyebaptis. Rya ikofen, ”Yamarisen yafrur marisen Bena, sye Allah yedi.” (Mz. 40:7, 8, fks.) Na moḇsa Yahwe ḇyaḇir rai rofyor Yesus ḇyebaptis anya? Refoya doḇe, ”Isma masi sren kwar, Yesus Isasyar fasau bur warya ma ro fafisu ani beri nanki ḇyas ma Myam Rur Allah imnis manjawa dado faro I, ma simnaf mkaren ro boiyas ḇekofen: ’Inekada Romawa Yaswar kaku, faro I [yamarisen].’” (Mat. 3:16, 17) Kakuḇae, Yesus ima Allah nya i kwar. Mboi Yahwe iryaḇ syadi fyor myam Yesus imarisen ḇyuk kankenem ḇyedi fa fyarmyan monda ḇe I. Yahwe iryaḇ kako rofyor koḇuk kankenem koḇena faro I, ma nari ḇyebarakas ko.​—Mz. 149:4. w18.07 22 ¶4-5

Rofyor Moses ikofen ”nusasyar”, rya roi ine kyur ḇe mankundi ma Harun i. Rosai Moses ikofen anya nfasnai ḇyesyowi Yahwe I ḇaḇeri snaro ḇyuk sanandik faro Yahwe I ro mujisat ani ḇa. Mazmur 106:32, 33 doḇe, ”Sifrowespan masasor Ḇyena ro War Sun Meriba, ma roi sifrur nane nafnai fa Moses ismai samswen. Sifrur fa imsor, inja dawos ḇo kyara na ḇa.” (Bil. 27:14) Moses ḇyuk sanandik ma ḇyesyowi Yahwe I ḇa. Yahwe ikofen ḇe Moses ma Harun su, ”Mupampum parenta Yena kwar.” (Bil. 20:24) Nanema sasar ḇeba kaku nairi! Ḇepon ya, Yahwe ḇyuk samamyai ḇe kawasa Israel syakam na sipok fa sisun ro Sup Ḇaḇeasas ḇa snar sembroḇ faro I kwar. (Bil. 14:26-30, 34) Moses dakḇembroḇ, inja, rofyor Yahwe ḇyuk samamyai ḇemnis rarirya faro i ido, nama roi ḇenapes nairi. Moses i kako daksun ro Sup Ḇaḇeasas ya ḇa. w18.07 11 ¶9; 12 ¶12, 13

Kakuḇae, kinem swan nama hak koḇenairi. Ḇape, rofyor roi anna nakyaren naek srar ḇesesya sneuser sena ido, ipyum syadi kinem awer na. Imbude naek oso rofyor fyarkor kakaku ya ḇaim, fafisu iwara imasarser ḇape kirine dun snemuk kwar fa imnai ro farandinem swan ya. Na komewer kofrur roi oso ḇefnai fa kyaḇer wer ḇe kenem ḇekwar ḇyana. (1 Kor. 6:9, 10) Rofyor kor naek ani fa ryama ḇe rum koḇedi ḇo imewer dinem, na kodif i fa dinem swan anya ke? Oroḇaḇeri! Rofyor Timotius ḇye snonkbor kaker, ifawi snonkaku ḇesofakfuk nari sidufe, ḇape imarisen daksmai sofakfuk. Rosai ḇefnai ya? Snaro imbe ḇyaryas ḇe snonkaku Yahudi sya, ma ifawi snonkaku Yahudi smam sofakfuk ima roi ḇefandun kaku nairi. Raris Paulus i, Timotius imewer roi nane nekarui karkar faro snonkaku ḇesesya. (Kis. 16:3; 1 Kor. 9:19-23) Inja, na wamarisen rwir hak Bena fa wafnoḇek snonkaku ḇesesya ke? w18.06 18 ¶12-13

Rofyor wasrow randak snonkaku oso ḇefarmyan Yahwe I ḇa, na mambir kaku i ke? Imbude na wafawi snonsnon ḇyedi ma moḇ isnai raya, mboi wafawi roi nabor kuker i ḇa. Mboi fyor wasrow randak snonkaku oso ḇefarmyan ḇe Yahwe ido, na iḇese. Wafawi kaku iswar Yahwe I. Wafawi Yahwe myam roi ḇepyum ro i, inja dor i fa ḇyekina Ḇyesi ḇeḇuk samsyom faro I. (Yoh. 6:44) Ro moḇ risai ryama ḇaido iba ro ya, wafawi nabor kuker i kwar, ma dakfawi nabor Au kako! Kawan ḇa fyor wasrow kuker min Saksi ḇese ido, wafawi kwar roi ḇefrur fa wamnis kuker i. Muyawos ro wos ḇesisye, mboi muyawos wos ḇemnis ”wos ḇesren” isoine kakaku ya. Ine kyurfasnai mukyar faro Allah, mukenem imnis marisen Ḇyena, ma musmai saneraro ḇemnis ro fafisu iwama. Roi nane nafnoḇek mu fa mukyaryae mu ma musambraḇser ḇaḇebati ḇekain fyoro. w18.12 17-18 ¶9-10

Yesus fyarkin raryur naek ḇefarkin sya fa sifasnaibos snar snonkaku Kristen ḇeḇe Yahudi ḇa sya sima saksmai sofakfuk ḇa. (Kis. 15:19, 20) Ḇape, taun ḇe taun ḇe ḇarpon, snonkaku Kristen Yahudi sifrur sofakfuk faro romawa sesya kaker. Ḇape, imbude kofuken, ’Sasoser Moses imnai kwar fafisu Yesus imar. Mboi rosai ḇefnai fa Yesus ryir samswen ḇekur sofakfuk ine imbran kawan kaku?’ (Kol. 2:13, 14) Nefandun oras fa siso mnis fawawi ḇebabo na. Snonkaku Kristen Yahudi ḇeḇeso sifandun oras kawan fa sifawi kaku sro baḇ Sasoser ya werḇa. (Yoh. 16:12) Skara kaker sofakfuk iso ḇyeaḇyair fasfesepen ḇepyum kaku sena kuker Allah. (Kej. 17:9-12) Ḇesesya wer simkak nari min Yahudi sesi sewayam si snar siḇese. (Gal. 6:12) Ḇape ḇarpur mura, Kristus ḇyuk akurfasnai faro si roro syapram Paulus fyas na.​—Rm. 2:28, 29; Gal. 3:23-25. w18.10 18-19 ¶10-12

Kayafas iwaf isof ro roḇ insape iwan sordade sya fa sfor Yesus i. Yesus ifawi kwar rosai nari ḇekur i. Inja, fafisu inan kayam kuker manfamyan ḇyesya, iwan si fa sun sumber riḇeso. Sumber risuru suisya ma imnis kwar fa nbuk farkarkor ḇefandun kaku faro si. (Luk. 22:36-38) Ro romfawru ya, srama fa sfor Yesus i, nane nafrur fa Petrus imsor fafayaḇa, inja pyas sumber ani ro sower ya fa ḇyukimun snon oso. (Yoh. 18:10) Ḇape, Yesus ikofen yoḇ Petrus i, ”Swower sumber ani, snar mansei ḇefnak kuker sumber nari ryo kuker sumber.” (Mat. 26:52, 53) Farkarkor ḇefandun kaku rosai Yesus ḇyukifarkor manfamyan ḇyansi? Isoine, fandun fa siwaira awer ḇe dunya ine. Ine iso roi Yesus dor ro nadi ḇyena ro roḇ anya. (Yoh. 17:16) Yahwe derer monda ḇena hak fa ipyos roi ḇenapes ḇa na. Ḇape, koma kokain kuker aski ma koḇeoser. Yahwe myam mboi kawasa ḇero supswan ine sya sḇeoser ḇa, ḇape imarisen kaku myam kawasa Ḇyesya sḇeoser.​—Zef. 3:17. w18.06 7-8 ¶13-14, 16

Setan syewar kako fa ifrur samswen ma ifrur makakak ko insama kosouser faro Yahwe I werḇa. Imnis ra, dawninyan pamarenta sya fa sidwarek fararur ḇaḇeḇaryas koḇena. Dawninyan kako bati ro moḇ kofararur ḇaido bati ro rumfarkor sya insama koso rosai Refo ikofen na ḇa. (1 Ptr. 4:4) Iba syadi wer, Setan dawninyan karyer koḇesya ḇefarkor Refo ḇa sya fa sidwarek ko insama koso fananjur ya awer. Skara roi sifrur nane ḇe roi ḇekaku nairi. (Mat. 10:36) Rosai kofrurya insama kores nako pdef rofyor Setan ifrur samswen ko? Kopok kokandor awer kuker rosai Setan ifrur nane snaro kofawi kwar Setan ḇyembroḇ kuker ko. (Why. 2:10) Ma fandun fa koswarepen kako rosaiso Setan safsof ḇyena: Setan kyursof ko ḇo doḇe koma kofarmyan ḇe Yahwe I rofyor roi nakam napyan ḇe ko, ma nari kopampum Allah rofyor kosmai samswen. (Ayb. 1:9-11; 2:4, 5) Osower ido, ro ras ḇe ras kor Yahwe I fa syamḇraḇser ko ḇesya kwar. Komkak awer Yahwe nari ryir ko ḇa.​—Ibr. 13:5. w18.05 19 ¶14

Kopok fa koḇefnder awer snar komam rya snonkaku sya simewer srower, mboi ḇaḇeḇaryas koḇena nawyae kaku si. Snonkaku sya smamepen ko. Smam moḇsa kosansun pyum ko, kawos myaren, ma kofrur pyum raya. Ine nafrur fa sesyowi ko, iḇye syadi snonkaku ḇena kakara ḇesasar kuker konsya kako na sfadwer kakara sena. Sergio ma Olinda ḇeperintis suyoḇe, ”Snar nudafdufe, inja ro swaf ḇeḇeso nuraḇe moḇ ras-ras nuḇaryas rona ḇa. Rofyor nukaḇer wer, snonkaku oso ryama ifuken nu, ’Muraḇeryo? Insape nkomam mu wer.’” Fafisu ”mam monda awer bramin bedi imnaisu” fa ḇaryas Karajan Allah ḇe snonkaku ḇesesya ido, na waksowarpu ro fararur ḇefandun kaku fa buk kesaksian faro er syakam. (Mat. 24:14) Ḇesyadi ya, na wasmai marasrisen ḇeba kaku snar wafawi wafrur Yahwe imarisen. Iswar snonkaku syakam ’ḇeḇuk bon ro ḇaḇefarmku’ ya!​—Luk. 8:15. w18.05 8 ¶16-18

Yahwe iso Allah ḇeḇuk samambraḇ ro sne. Ḇyuk na fyoro kaku kwar rofyor snonkaku sya sisapi ro sasar ma sḇe snonkaku ḇenapes ḇa. Adam ma Eva sumbroḇ fa supampum Allah, ḇape ḇyuk ḇardadi oso ḇeḇuk samamḇraḇ ma saneraro faro up suḇesya. Ḇardadi anna naisya ro Kejadian 3:15, ḇekofenḇair Setan roḇa Ibiris ma fararur ḇeḇarḇor ḇyena nari napromes. (1 Yoh. 3:8; Why. 12:9) Kokarapan rariso Yahwe syambraḇser manfamyan Ḇyedi, Nuh i. Snonkaku ḇekenem ro fafisuya sirarmomen ma siḇarḇor. Ḇape, Nuh kina ḇyesi serer monda ḇesyom faro Yahwe I. Roi nane bisa nafrur fa Nuh ḇyesanekar. (Kej. 6:4, 5, 9, 11; Yud. 6) Ḇape, Yahwe ikofenḇair ḇe Nuh i snar nari imkok dunya ḇeḇarḇor ani ma ikofenḇair rosai fandun fa Nuh ifrur insama kina ḇyesi sismai fasaspar ya. (Kej. 6:13-18) Yahwe iso Allah ḇeḇuk samambraḇ sne faro Nuh i. w18.04 15 ¶1-2

Rosai kofrurya rofyor koḇaḇir rya samswen kaku fa kosambraḇser snonkaku ḇesesya? Ḇekaku ya, imbe kosambraḇser snonkaku ḇesesya nama nsamswen ḇa. Randak ya, wasrow snonkaku oso ido fasnai mka ḇemarisen yoḇ i. Imbrif yoḇ Au ḇa ido, ima nfasnai isya ismai samswen ma fyandun wos ḇeḇuk samambraḇ ro Au. Bisa swambraḇser i kuker rwower i rofyor fyawar samswen ḇyena. (Yak. 1:19) Bisa kosambraḇser naek ḇaido srar oso ḇefandun wos sneprei. Raja Salomo fyas, ”Wos oser ḇaken neḇekofen ro oras ḇemnis, sye napyum kaku ra! Mka ḇesnai marisen nafrur sne doryaḇ; ankinem ḇepyum nbuk samambraḇ.” (Ams. 15:23, 30, fasfas kasun) Paulus dakkofen ḇo doḇe kodisen dow Karajan kayame, bisa nafrur fa kosmai sneprei. (Kis. 16:25; Kol. 3:16) Yahwe ras Ḇyedi fyanam kwar, inja fandun kaku fa kosambraḇyae ko.​—Ibr. 10:25. w18.04 25 ¶16; 26 ¶18-19