Desember

Yesus ifawi mnis samswen ḇekur snonkaku ḇenapes ḇa koine. Ine nbuk sneprei kaku ko. Fafisu ryo supswan, Yesus ’dakryaḇ fnoḇek snonkaku ḇeryaḇ sya ma dakkanes fnoḇek snonkaku ḇekanes sya’. (Rm. 12:15) Imnis raris, rofyor manfamyan ri 70 ḇyesi skaḇer kuker raryaḇ snar ḇaḇeḇaryas sena nun bon ḇepyum, Yesus ikako ”iryaḇ rodo Rur Ḇesrenya”. (Luk. 10:17-21) Ḇape, rofyor myam snonkaku sya skanes snar Lazarus imar, ”sneri isosi”. (Yoh. 11:33) Yesus ima snonkaku ḇenapes kaku, mboi ifrur pyum snonkaku ḇesasar koine kuker sawarwar ma sne ḇenaḇye. Rosai ḇefnai fa ifrur dadirya? Roi ḇefnai kaku ya iso snar iswar snonkaku sya. ”Imarisen syadi faro snonkaku sya.” (Ams. 8:31) Snar iswar snonkaku sya, inja ḇyesewar kaku fa fyawi mnis nyan kakara sena. Manwawan Yohanes ikofen ḇo doḇe Yesus ima ”myamkir rosai isya ro snonkaku sisnes na”.​—Yoh. 2:25. w19.03 20 ¶1-2

Setan dunpres Ayub roieḇor ḇyena kam, fyasyar arasai ḇyena, myun manfamyan ḇyesi, ma ifrur snonsnon ḇyedi iḇyeḇa. Myun Ayub romawa risamfur ḇyesi ra simar. Mura, ifrur Ayub ismai dafduf kuker ḇyuk mui ifo ro baken ḇyedi ro wesi isof ro bruri. Ayub swari ḇyesanekar ma ḇyesaneso fafayaḇa. Naiso ḇefrur fa idif Ayub i fa isusu mura, ifras Allah ma imar. Ayub mankundi dakkara iḇye imar mura, ḇape isoasuser pdef. Ḇarpurya, Setan syewar nyan ḇesewer fa myun Ayub roro bati rikyor ḇyeskoya. Ras-ras skomamfar Ayub i mboi skoḇuk wos sneprei faro i ḇaberi. Ḇesyaḇo, skawos nabor yoḇ i ma skomsor i. Soḇe Allah iso ḇefnai samswen ḇekur i na ma fyandun faro soasuser ḇyena ḇa. Iba syadi, skara ḇo soḇo Ayub ima snon ḇarḇor inja isyus fa ismai roi ḇeḇyeḇa annane!​—Ayb. 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Koḇesyowi kaku Yahwe I ido, na kopok kofrur roi imewerḇa na. Adam ma Eva sufasnai syowi ḇeradine kada, na supok suḇembroḇ faro Yahwe I ḇa. Mboi suḇembroḇ faro I kwar. Sufrur rarirya ramnai, insape sumkasna neḇas ma suḇaḇir kaku sufrur sasar kwar. Sufawi susouser Allah sasoser Ḇyena ḇa kwar, inja sumai snar suḇaḇer ma sudwarek mankunsu. (Kej. 3:7, 21) Mura, suna romawa ma suḇuk sasar ma marmari ḇe si. Koḇesyowi Yahwe I ido, na kopok komkak syadi faro marmar i ḇa. Yahwe fyasos kwar nyan insama kosmai kankenem fyoro ya. Kofrur sasar mboi kombror kaku ro sasar kofrur na ido, Yahwe nari ḇyuk ampun ḇe ko. Ifrur rarirya snar kokyar faro farsarser ro Rumkun Ḇyedi. Nyan ḇepon kaku fa kofasnai kakyar ya iso koḇuk farsamsyom kankenem koḇena ḇe Allah ma koḇebaptis.​—1 Ptr. 3:21. w19.03 5-6 ¶12-13

Snonkaku Israel sya sna sano ḇebor fa sifasnai syowi. Yahwe ḇye Kandera Risamfur fa nkur Masir ya raposa, imkei si ro ḇaḇewomen ya. Mura, Allah fyaspar si kuker myun pres sordade Masir ro Soren Ḇerik sya. Snonkaku Israel sikofen kasumasa inja sidisen dow ḇaḇemkei ḇesandik Yahwe I. Ḇape, sifasnai syowi pdef ke? Rofyor snonkaku Israel sismai samswen wer, fasaw fa siḇefnder roi ḇepyum nakam Yahwe ifur kwar ḇe si na. Mura, sifrur wer roi ḇefasnai sesyowi Yahwe I ḇa. (Mz. 106:7) Rosai rirya? ”Kawasa Israel syakam sisurem Moses ma Harun su.” Mboi kakuya, sisurem faro Yahwe I. (Kel. 16:2, 8) Yahwe fyafko kaku snar kawasa Ḇyesi sakfawi sakfasnai syowi ḇe I ḇa. Ḇarpurya, ḇyardi syos ro snonkaku Israel syakam nari simar ro moḇ ḇeursḇa. Yosua ma Kaleb su mande nari sukenem pdef.​—Bil. 14:22-24. w19.02 17 ¶12-13

Yesus iwan manfamyan ḇyesi fa sifrur munara ḇesamswen ḇa, ḇape munara ḇepyan monda fa sḇukiswarepen marmar ḇyedi ro taun ḇe taun. (Yoh. 13:15; 1 Kor. 11:23-25) Munara Swarapepen ḇepyan monda ine fyasnai snar Yesus ima snon ḇena sne ḇerun. Na komarisen kaku snar Raja koḇedi ro nanki nya rari ḇepyum ine. (Flp. 2:5-8) Rariso kakfasnai sne ḇerun raris Yesus i rai? Kuker kofakapon fandandun snonkaku ḇese ro fandandun koḇena bardi. (Flp. 2:3, 4) Kwarapan kada, ro roḇ fyor Yesus imar ḇaim, ifawi fyoro werḇa na smuni kuker nyan ḇeḇyeba kaku. Mboi, imkakwarek syadi faro manfamyan ḇyesi snar nari sḇesneso kaku. Inja, ro roḇ ani ḇyuk sneprei, syambraḇser, ma ḇyuk akurfasnai ḇe si. (Yoh. 14:25-31) Yesus ifakapon fandandun snonkaku ḇese ḇardibur fandandun ḇyedi. Ima nyan ḇepyum kaku fa koso na! w19.01 21 ¶5-6

Rofyor wakanow ḇramin bedi fa buk kankarem ido snembri isyasen ke? Rarirya ido werer monda ḇa. Kakuya, ḇebor ro ko komkake fyor koḇe koḇuk kankarem. Kakuya, ḇaḇaḇir ḇeradine nḇeḇair ḇe roi ḇepyum. Nane nefasna nwa sneḇerun ma mam snonkaku ḇese sipyum syadi ro Au. Yahwe imarisen rari sneḇerun. (Mz. 138:6; Flp. 2:3) Ḇape, Yahwe imarisen kako insama wasandik I ma swambraḇser naek srar ḇero fananjur sya. (1 Tes. 5:11) Yahwe iswar Au ma nari ḇyuk ḇaḇebri wafandun na. Mnuk ḇeḇeso ro Refo nḇuk swarapepen ḇe ko. Refo ikofen kokame kofrur sasar ro wos koḇena ma moḇsariso kawos raya. (Yak. 3:2) Yahwe ma naek srar koḇesi kako, sor ko ḇa fa koḇe snonkaku ḇenapes kaku. (Mz. 103:12-14) Naek srar koḇansi sima kina koḇesirya, ma siswar ko. (Mrk. 10:29, 30; Yoh. 13:35) Sifawi kaku fyorno ido kankarem koḇuk na namnis kuker roi kokara imbe kawos na ḇa. w19.01 8 ¶3; 10-11 ¶10-11

Ine na napyan ḇa, mboi ine roi swambraḇ fa wafrur na. Kuker Allah fafnoḇek Ḇyedi, na wasmai payamyum ro kankenem rofyor wababo kaker ma fafisu waba kwar. Insama kofawi mnis roi ine, nari kawos rosai ḇefnoḇek snonkaku Israel sya fa sisun ḇe Sup Ḇaḇeasas ma rosai ḇeḇuk samambraḇ ḇe Daud i fa myun Goliat ḇebamantar ani. Rofyor snonkaku Israel kero wer siḇe sisun ḇe Sup Ḇaḇeasas ya, akurfasnai rosai Yahwe ḇyuk faro si na? Ikofen ḇe si fa sakḇe sordade ḇepyum ḇaido ḇekir syadi ro mamamun ya ke? Oroḇa! (Ul. 28:1, 2) Mboi, ikofen ḇe si fa sisouser ma sikyar faro I. (Yos. 1:7-9) Snonkaku sya smam ananun ine rya namnis ḇa kero. Mboi, inema ananun ḇepyum kaku faro snonkaku Israel sya. Yahwe ifnoḇek ker kawasa Ḇyesi fa skafyo snonkaku Kanaan sya. (Yos. 24:11-13) Sfandun kakyar fa sisouser faro Allah, mboi kakyar nun ḇe payamyum ḇesya kwar. Roi nane nkaku ro fafisu naiwara, ro fafisu ine rarirya kako. w18.12 22 ¶3-4

Sino skarkar snar fawawi ḇebabo faro mnuk ro Refo. Sino wer, siso farkarkor ninyan ro snonkaku ḇebur kakaku sya ma ḇekofenḇair roi ḇekaku ḇa ḇekur konsya. (Ibr. 3:12-14) Ḇepyum syadi ya iso sikyar faro Yesus i, raris manwawan Petrus i! Ḇesesya wer, sifawi ḇa ḇo fawawas sḇinkwanbur kakaku ya. Sima simnis raris wai ḇeyayun fawasbur bande. Refo ḇyuk swarapepen ḇe ko insama ”koki awer”. (Ibr. 2:1) Fyorno ido, snonkaku ḇebur fawas kakaku ine, skara fa sifrur rarirya ḇa. Mboi, smam monda wis sena kuker Yahwe I nsambraḇ ḇa, muniwara namuk. w18.11 10 ¶5-6

Wamarisen wasmai farkarkor nabor wer insama wafrur nabor syadi ro fararmyan ḇe Yahwe I ke? Imbude waser formulir fa wakso Sekolah bagi Penginjil Kerajaan. Farkarkor ine fyarkor naek srar ḇemas kwar ḇefarmyan ro oras nakam insama sifrur nabor syadi faro Yahwe organisasi Ḇyedi. Ḇeyakso ro farkarkor ine sya, fandun fa simarisen sifarmyan ro moḇ risai monda siwan si fa sra yoḇ na. Wakmarisen wafrur nabor syadi wer ro fararmyan Bena ḇe Yahwe I roro nyan ine ke? (1 Kor. 9:23) Snar koinema Yahwe kawasa Ḇyesiko, na kofasnai snemura, frur pyum, ḇaḇenaḇye, ma saswar. Koswar snonkaku ḇese ro ras nakam. Ine nun raryaḇ, aski, ma marisen ḇe ko. (Gal. 5:22, 23) Fafisu rosai monda wasmai na, na ḇeaski ḇesya kwar rofyor wakfrur raris Yahwe moḇ fyasnai snemura ma wafararur kayam fnoḇek I!​—Ams. 3:9, 10. w18.08 26 ¶16-18

Imbude sia sifuken, ’Roi ḇefnai kaku isya faro imbeswa Kristen fa suḇesisye ma sufarḇuk wer ke?’ Komampan rosai Yesus ikofen na, ”Mansei ḇefaspar swar i, raimnai dun bin ḇese, irya ifrur [farḇuk famfnom] faro swa ḇepon byedi. Rarirya kako bin oso fyaspar swari ma fyakawin snon ḇese, i kako ifrur farḇuk [famfnom]”. (Mrk. 10:11, 12; Luk. 16:18) Nasnai kaku, Yesus ḇyesyowi farḇakḇuk ya, ma imarisen ḇesesya sakfrur rarirya kako. Rofyor snon ḇaido bin oso fyaspar swa ḇefrur pyum ḇyedi ma fyarḇuk wer ido, isya ifrur farḇuk famfnom. Snar fafisu imbeswa suḇesisye, na nafrur fa farḇakḇuk suḇena namnai ro dia ḇa. Allah myam kaker imbeswa ansuya suḇe ”baken oser”. Yesus ikofen kako rofyor snon oso fyaspar swari ḇefrur sasar ḇa, na ifnai fa eḇe bin ya ifrur farḇuk famfnom kako. Moḇsa ine ḇyerarirya rai? Fafisu ya, imbude snar eḇe bin ya swari fyaspar i mura, ismai samswen ro kumpan na, inja kyara fandun fa fyarḇuk wer. Farḇakḇuk ḇeradine imnis ifrur farḇuk famfnom. w18.12 11 ¶8-9

Habakuk awawos ḇyena faro Yahwe I nbuk aski ro swaruser ḇe i. Ine ifrur fa nya snemuk fa iwaf Yahwe ifnoḇek i. Habakuk dap kaḇer snerimuk ḇyenane fyor ikofen, ”Yakain fasis fa yawaf ras ḇefo kandera ani.” (Hab. 3:16) Farkarkor rosai kun ro Habakuk snemuk ḇyena? Randak ya, kopok komnai awer fa koḇenadi kor ḇe Yahwe I ma kokofenḇair samswen koḇena. Ḇesuru, fandun fa korower rosai Yahwe ikofen ro Refo ma organisasi Ḇyedi. Ḇekyor ya, fandun fa kokḇaḇ kowaf fasaspar ro Yahwe I ma kokyar nari ipyos kandera koḇena ro fafisu ḇesrow ya. Kakfrur raris Habakuk ido, nari kosmai aski ro swaruser ma kosambraḇ fa komkuepen. Samswen rosai monda nkur ko, mboi saneraro koḇena nafnoḇek ko fa kokḇaḇ ma kosmai aski.​—Rm. 12:12. w18.11 18 ¶11-12

Rariso Yahwe myam snonkaku ḇefrur fa snonkaku ḇese skarkar? Yesus doḇe, ”Mansei ḇefarkor ninyan oso ro fandu romawa kasun ḇekyar aya sine, ipyum syadi sfes karui ḇeba ro sasuri ḇo simsaweri ro soren.” (Mrk. 9:42) Wos nane npakrek kaku! Kofawi Yesus ima imnis Kmari. Inja kokyar Yahwe na imewer kaku rofyor oso ifrur karkar Yesus manfamyan oso ḇyesi. (Yoh. 14:9) Komam snonkaku ḇefrur karkar ḇesesya imnis Yahwe ma Yesus mamam suḇena ke? Rosai ḇefasnai ro fararur koḇena? Imnis raris, imbude kosansun ma kofamankor ko ro nyan komarisen na. Mboi rosai na kofrur rofyor roi kokinfir na nafnai fa ḇeḇeso ro sidang simarisen ḇa ḇaido ḇesesya sna karkara ḇeḇyeḇa yoḇ ko? Saswar koḇena faro naek srar sya nari nadif ko fa korir roi komarisen na ke? w18.11 29 ¶9-10

Rosai ḇefrur fa kofandun soasuser ya? Snaro malaikat oso ḇyembroḇ Yahwe I, ma snonkaku koine kwar. Malaikat ḇembroḇ anya danonef Yahwe I kuker fyasnaiḇair Allah ima Manḇepoik ḇeḇyeḇa, fyandun mankundi, ma inapes ḇa. Faḇye kaku, Adam ma Eva suwaira Setan i, ma suḇembroḇ Yahwe I. (Kej. 3:1-6) Kakuya, suna swaf ḇebor ro Yaf Eden fa susambraḇser saswar suḇena faro Yahwe I. Ḇape, fafisu Setan ḇyembroḇ ya, saswar suḇena namnis ḇa, ḇaido nasiper werḇa. Fakfuken ḇesewer naisya: Snonkaku ono sisya na sisoasuser pdef faro Allah Yahwe snar siswar I ke? Ḇaido, snonkaku ono sisya na sisambraḇ fa sifasnai soasuser ya ke? Fakfuken nane nasnai kaku ro Ayub fafisu ḇyedi. (Ayb. 1:8-11) Dakmnis ra ko, inapes ḇa. Dakfrur sasar kako. Ḇape, Yahwe iswar Ayub i snar isoasuser. w19.02 3-4 ¶6-7

Yesus ḇyuk wos sarḇer oso ḇekur snon ḇesewar inkin mkamor ḇepyum. Rofyor snon ani isrow inkin mkamor oser ḇemaeja kaku, rya ḇeri ma ḇyoḇpres roi ismai nakam fa ḇyukikoḇes inkin mkamor ani. Inkin mkamor kyur ḇe fawawi ḇekaku ḇekur Allah Karajan Ḇyedi. Rarirya, Yesus fyasnaiḇair kakaku ima roi ḇemaeja syadi faro snonkaku ḇesewar na. (Mat. 13:45, 46) Fafisu kofarkor randak kakaku ro Allah Karajan Ḇyedi, ma farkarkor ḇepyum ḇesena ro Refo, kakmarisen kako fa kobur roi nakam fa kosmai kakaku anna. Koḇesyowi na pdef ido, nari kopok kobur na ḇa. (Ams. 23:23) Mboi faḇye kaku, manfamyan Allah ḇeḇeso sesyowi kakaku anna werḇa ma sibur na ḇeri. Komewer kofrur roi ḇerarirya! Fandun fa koso anun ro Refo fa koso pdef nyan ḇekaku ani. (3 Yoh. 2-4) Ine kyurfasnai kosewar ḇepon kakaku ma kofasnai na ro kenem koḇena. w18.11 10 ¶3

Malaikat ani ikofen ḇe Yosua i ḇo doḇe snonkaku Israel sya smamunmun awer ḇe mnu Yerikho. Imbape, fandun fa simbranyar mnu ani ras oser rarwan oser ro swaf ras riwonem ma rarwan rifik ro ras ḇefik ya. Sordade ansi imbude skara, ’Kofnak oras ma samambraḇ koḇena monda!’ Mboi Manfarkin ḇekaku Israel, Yahwe I, ifawi kaku rosai ifrur ya! Snar snonkaku Israel sisouser akurfasnai Ḇyedi, skafyo Yerikho kuker mamamun ḇa. Ma rofyor smam fainda ya, kakyar sena nasambraḇ syadi. (Yos. 6:2-5) Rosai kofarkor ro farfyar ine? Fyorno ido Yahwe organisasi Ḇyedi ifrur roi ono kuker nyan ḇebabo, ma imbude na kofawi mnis roi ḇeḇefnai ya ḇa. Imnis raris, randak ya na kokara ḇaḇeri fainda ro koḇuk HP ḇaido tablet faro farkarkor mankun koḇedi, ḇaḇeḇaryas, ḇaido fananjur ya. Ḇape kirine, insape komam fainda ro koḇuk roi nane. Rofyor komam bon ḇepyum ro fararwei nane, kakyar koḇena nasambraḇ syadi ma koḇeoser syadi kuker naek srar koḇesya. w18.10 18 ¶8-9

Kawasa Yahudi sikyar kaku Mesias, imnis ra manfamyan Yesus ḇyesi sikyar ya iso nari ḇepyos samswen ḇekur si. Imbude iso ḇewar fa snonkaku Galilea simarisen skanow Yesus i fa ḇye raja faro si. Skara nari ḇyepoik si kuker payamyum snar ima dawoskir, syambraḇ fa ḇyuk pararei faro ḇeduf sya, ma fyan ḇebiser sya. Skandor kaku rofyor Yesus fyan snon indo kada se 5.000. Yesus ifawi rosai imbe sifrur ya. Refoya doḇe, ”Snar Yesus ifawi, siḇe srama fa sidifi insa ḇye [raja] farosi. Inja isusu bursi ḇe urek.” (Yoh. 6:10-15) Ro meser ya, fyor kawasa sya siknon kwar, Yesus ikofenḇair yoḇ si snar ryama fa fyasos fandandun rasras sena ḇa mboi fyarkor si fa sfawi Allah Karajan Ḇyedi. Doḇe, ”Mkofararur, faro roḇean nari ḇero na awer, mboi faro roḇean ḇekain fyoro faro kenkenem ḇemnai ḇaya kada.”​—Yoh. 6:25-27. w18.06 4 ¶4-5

Yesus ifawi mnis sneḇaḇir ro snonkaku ḇesanekar ma ḇeryar ḇa ḇemnis ”ajumek ḇesawayom” ma ”marom ḇepaw”. Inja, ifrur pyum ma ḇyekaḇaḇaḇ faro si. (Mrk. 10:14) Kakuḇae, kona samambraḇ fa kofawi ma kofarkor snonkaku sya raris Yesus i ḇa! Ḇape bisa kofasnai kokarauser pyum snonkaku kosrow sya roro moḇ kawos raya, fafisu risai, ma swaf riḇeso kokainus si. Snonkaku riyuta ro baboine ’simor ma sisoninyan’ snar ḇefarḇaḇyan, manfarkin polotik, ma manfarkin agama sya siḇarḇor ma sirarmomen kaku. (Mat. 9:36) Ine nafnai fa snonkaku sibor sikyar faro ḇesesya ḇa ma siḇor sḇerari. Iso ḇefnai fa wos ma mkarem koḇena fandun fa nfasnai kofrur pyum ma koḇefandun si! Snonkaku ḇebor simarisen srower ankinem koḇaryas na snaro naine ndramuma ro Refo monda ḇa mboi snar kofasnai koḇefandun kaku si ma koḇesyowi si. w18.09 31¶13-14

Koḇaḇir fandun fa komambir Allah ma kofandun fafnoḇek ma farkankin Ḇyena. Rariso kofasnai na rai? Kuker kofarkor Refo, kosouser Allah, ma kofakapon farsamsyom ḇe I ro kankenem koḇena. Kofrur na ido nari nafnoḇek ko fa koḇeaski. Kakyar koḇena faro Allah asas Ḇyena ro ras ḇarpon iyama na nsambraḇ syadi. (Tit. 2:13) Komarisen koḇeaski pdef fyor samswen nkur kankenem koḇena ido, fandun fa kosambraḇser wis koḇena kuker Yahwe I. Manwawan Paulus fyas, ”Mkoryaḇ ḇesya kwar snar Manseren! Yakofen ḇeoser wer: mkoryaḇ mura!” (Flp. 4:4) Insama kofanam syadi ḇe Yahwe I, fandun fa kona fawawinanem ḇerama ro I. (Ams. 3:13, 18) Ḇape insama koḇeaski pdef, fandun fa kofrur raris rosai kofarkor kwar ro Refo na ḇesya kwar. Yesus fyasnaibos roi ine rofyor ikofen, ”Rofyor mkofawi roi nane kam kwar, ma rofyor mkofrur na ido, aski faro mko.” (Yoh. 13:17; Yak. 1:25) Ine nefandun kaku snar kofasnai kofawi koma kofandun Allah farkankin Ḇyena ma koḇeaski pdef. w18.09 16 ¶4-6

Epafras myambir pyum naek srar sya, ma iswar kaku si. Paulus dor i ḇe ’min ḇeyaksmai ro bui’, inja Epafras demir daksmai samswen. (Flm. 23) Ḇape myam fandun ro ḇesesya ḇesya kwar, ma ifnoḇek si. Epafras ḇyenadiwarek naek srar sya, iba syadi dap sisnosna kako. Inja, ko kako bisa kakfrur raris i. Nadi ḇeradinena nya papoik ḇeba kaku. (2 Kor. 1:11; Yak. 5:16) Kwarapan snonkaku oso na ḇenadiwarek i kuker wap snori. Imbude wafawi bati ro sidang ḇaido kina Bedi ḇesmai samswen fa sifrur snemuk ḇaido spampum farawrowes na. Bisa ḇenadiwarek ḇesmai susa snar snonkaku siswar sya simar, rim ḇeba ḇaido mamamun ḇekur ro baboine, ma samswen ro kumpan na. Naek srar sibor sfandun nadi koḇena. w18.09 5-6 ¶12-13

Paulus kyurfasnai koḇuk nana koḇena monda ḇa. Bisa koḇuk kako wos samarawraw, ananun ro Refo, ma fafnoḇek ḇepyan. (Kis. 20:31-35) Ro rosai Paulus ikofen ma ifrur na, fyarkor ko fandun kaku fa kofasnai snemura kuker koḇuk oras, samambraḇ, kakara, ma saswar koḇena. Snonkaku ḇemamkarkir ḇefarkor pyum kenem ro snonkaku sya kako, soḇe snonkaku sya nari sḇeaski fyor sḇuk ḇe ḇesesya. Artikel oso ikofen ḇo doḇe snonkaku sya soḇe sna aski kaku rofyor sifrur roi ḇepyum faro ḇesesya. Ḇemamkarkir ansya soḇe kofnoḇek ḇesesya ido, nari koḇaḇir kankenem koḇenane nefainda syadi wer. Inja, sanun ḇo soḇe snonkaku sya sifnoḇek ḇesesya kuker sne ḇemarisen ido, na ḇaken sena naprei ma seaski syadi. Kakuḇae, na kokandor faro rosai sikofen na ḇa, snar Manḇedaw ḇesaswar koḇedi, Yahwe I, ikofen kwar snar koḇuk ido nari komarisen.​—2 Tim. 3:16, 17. w18.08 20 ¶17-18

Ḇardadi ro Yesaya ḇekur ḇe Yesus Kristus i nsambraḇser ko ma nbuk saneraro ḇe ko. Yesaya ḇyardi Yesus nari ”ḇyemankara imnis rosai myam na ḇa, ḇaido ḇyuk aprer imnis rosai ryower monda ḇa”, ma ”nari ḇyemankara snonkaku ḇena roi noḇa kuker nanapes”. (Yes. 11:3, 4) Rosai ḇefnai fa wos nane nsambraḇser ko? Snar kokenem ro dunya ḇefo kuker snonkaku ḇemamfarfir, ma snonkaku sya semankara snonkaku ḇese snar rosai smam na. Kofandun kaku Mankara ḇenapes, Yesus i, nari ḇyemankara ko snar myam ko ro bandi monda ḇa! Ras ḇe ras, kona kakara oso faro snonkaku ḇesesya. Mboi koma konapes raris Yesus i ḇa, inja kakara koḇena na nanapes ḇa kako. Rosai komam na napyan kaku fa nawyae ko. Mboi, Yesus ḇyuk parenta ḇe ko, koḇe mankara awer ’imnis rosai [komam na]’, ḇape ’koḇe mankara kuker napnapes.’ Inja, Yesus imarisen kakfur raris i ma koḇemankara awer snonkaku sya snar roi komam si ro bandi monda. w18.08 9 ¶1-2

Kakuḇae, na kopok korower Allah dawos ḇe ko ro nanki mumfes ḇa. Imbape, Wos Ḇyena neḇefasepen ro Refo. Ro Refo ya dori, Yahwe ikofenḇair parenta Ḇyena. Osower ido, Yahwe rur Ḇyedi idif women ḇesouser sya fa ḇyuk anan rur faro kawasa Ḇyansi. (Luk. 12:42) Baboine, kosmai anan rur nabor kaku roro syap ḇeḇecetakna, ḇeḇe online na, vidio, ma audio na! Rirya kada Allah wos Ḇyanane, neḇefas ro Refo, nafrur kokyar Yahwe nya papoik faro roi nakam ma nari ipyosbur kandera ḇekur ko ḇeramuma ro Setan ma dunya ḇeḇarḇor ḇyedi. Iḇye kada, kun snemuk fa komnaf kaku Yahwe mkaren Ḇyena. Kofrur rarirya ido, na kodworen pdef fafisu samswen rosai monda nkur ko ro baboine ma ro ras-ras naiwama. Refo danunepen ko, ”Mkofandun kaku kaḇaḇaḇi insa mkofrur Allah marisen ḇyedi, ma rarirya nari mkosma rosai Allah ḇyeasas kwar faro mko.”​—Ibr. 10:36. w19.03 13 ¶17-18

Moses fyarkin kawasa Israel sya ro swaf fyoro kwar, mboi kirine Yosua iso nari ḇefarkin si. Inja, imbude kyara na kawasa ansi simarisen i ḇe manfarkin sedi ke roḇa. (Ul. 34:8, 10-12) Syap referensi Refo oso fyasnaiḇair Yosua 1:1, 2 ḇo ikofen, ro fafisu naiwara ke ro baboine, roi ḇefrur samswen kaku ma nun roi ḇemun faro er oso iso rofyor sfadwer manfarkin sedi kuker manfarkin ḇese. Roi ono nafrur Yosua i fa ḇyeḇirḇar. Mboi ikyar faro Yahwe I ma fasaw fa iso akurfasnai Ḇyedi. (Yos. 1:9-11) Allah ḇyebarakas ma fyarkin Yosua ma snonkaku Israel sya roro malaikat oso. Ḇekaku ya, malaikat ine iso Allah Roma rak Ḇyedirya, ḇeḇeyap ḇe Wos ya. (Kel. 23:20-23; Yoh. 1:1) Yahwe ifnoḇek er Israel sya fa siso pyum fararwei rosai Yosua ifrur ḇe manfarkin ḇebabo sedi. w18.10 16-17 ¶1-4

Yahwe myambir snonkaku ḇefarmyan ḇe I kuker sne ḇesiper, ma fyas sisnosna ro ”syap swarapepen”. Komarisen snonsnon koḇena isya kaker ro Yahwe ”syap swarapepen” Ḇyedi ido, roi ono naisya fandun fa kofrur na. Maleakhi ikofen fandun fa koḇesyowi Yahwe I ma kokarauser snonsnon Ḇyedi. Kosyom snonkaku oso ḇaido roi oso ḇese ido, nari snonsnon koḇena neḇepyos ro Yahwe syap Ḇyedi! (Kel. 32:33; Mz. 69:28) Inja, koḇeasas fa kofrur Yahwe marisen Ḇyena ma koḇebaptis nama namnis ḇaime. Roi ono ro kankenem koḇena kofrur na rarwan oser monda, mboi kosyom kosandik Yahwe ima nyan kankenem koḇenairi. Ro marandan koḇena kam ro ras ḇe ras, fandun fa kofasnai ro fararur koḇena koma kosouser faro Yahwe I.​—1 Ptr. 4:1, 2. w18.07 22-23 ¶7-9

Koro kakaku ya fyoro kwaro, na koḇe snonkaku Kristen ḇemas ro rurya ḇeri ḇa. Fandun fa koḇesewar kaku insama koḇe snonkaku ḇemas ro rurya. Fandun fa kofarkor ma kosmai fawawi ya ḇesya kwar. Inja, ras ḇe ras na kowasya Refoya ḇesya kwar. (Mz. 1:1-3) Kowasya Refo ro ras ḇe ras ido, na fawawi koḇena kuker Yahwe sasoser ma wos farkin Ḇyena napyum syadi wer. Sasoser rosai ḇepon syadi faro snonkaku Kristen sya? Isoine sasoser ḇekur ḇe saswar. Yesus ikofen ḇe manfamyan ḇyansi, ”Rofyor mko swar yae mko ido snonkakusya kam nari sifawi mboi manfamyan ayesi mko.” (Yoh. 13:35) Yakobus dap saswarya ḇe ”sasoser ḇepon”. (Yak. 2:8) Ma Paulus doḇe rofyor kona saswar ido, ima ’kofrur mnis sasoser’ anna kwar. (Rm. 13:10) Kopok kokandor awer snar saswar ima roi ḇefandun kaku, snaro Refoya doḇe, ”Allah ikada isaswar.”​—1 Yoh. 4:8. w18.06 19 ¶14-15

Ḇekaku ya, kawasa Israel sya sima sembroḇ faro Yahwe I, mboi Moses iso ḇemsor. Fyarmku mankundi ḇa, mboi dawos famfnom ma kyara ḇepon rosai na ḇekur i ro ḇarpur ya ḇa. Moses myam yoḇ Yahwe I werḇa kukro myam monda yoḇ rosai snonkaku ḇese sifrur na nawyae i. Randak ya, rofyor kawasa ansi sisurem snar sna war fa sim ḇa, Moses ifrur roi ḇepyum kwar. (Kel. 7:6) Mboi, imbude imor kwar ma fyafayaf snar snonkaku Israel sembroḇ ro swaf taun ḇe taun kwar. Imbude roi nane naiso ḇefnai fa Moses kyara monda rosai ḇyaḇir na ḇo kyara ḇa rariso na ḇyuk sanandik faro Yahwe I. Moses ima nabi ḇesouser diri, mboi swaruser ḇyena nawayan ma ifrur sasar. Roi ḇeradine napyan fa nkur ko kako. Moses ima kero wer daksun ro Sup Ḇaḇeasas, mboi koma kero wer kaksun ro dunya babo. (2 Ptr. 3:13) Kakuḇae, komewer fakamaman koḇenane napromesbur ko. Ḇape, insama kosun ro dunya ḇebabo, fandun fa komam yoḇ Yahwe I ma kosouser I ḇesya kwar. (1 Yoh. 2:17) w18.07 12 ¶14-16

Setan na ipok idif ko fa kofrur roi komarisen ḇa na. (Yak. 1:14) Snonkaku ḇebor ro supswan ine sifawi ḇa ḇo sewaira faro Setan i kwar. Ḇape, rofyor snonkaku oso fyarkor napnapes, fandun fa kyinfir imbe iwaira faro Yahwe I ke Setan i. (Kis. 3:17; 17:30) Rofyor kun snemuk fa kosouser faro Allah ido, na Setan ipok idwarek soasuser koḇena ḇa. (Ayb. 2:3; 27:5) Roi ḇesena naisya Setan ma rur ḇemaḇak ḇyesi sisambraḇ fa sifrur na ḇa. Imnis raris, Refo dakkofen ḇa Setan ifawi roi ḇero kakara ma kosnesna. Yahwe ma Yesus suiso monda ḇefawi na. (1 Sam. 16:7; Mrk. 2:8) Rofyor kawos roi ḇepyum ma kofrur rosai Allah imarisen na, kokyar Yahwe myam monda ḇa Setan ifrur fa koḇekandera isof fyoro-fyoro. (Mz. 34:7) Fandun fa komambir mbroḇ koḇedi, ḇape komkak awer i. Konapes ḇa kaker, ḇape Yahwe bisa ifnoḇek ko fa kopampum Setan i! Rofyor kopampum i, nari ifrarbur ko.​—Yak. 4:7; 1 Ptr. 5:9. w18.05 20 ¶15-17

Wawasen kada, nwa aw fa rwaḇe mnu ḇeḇinkwan fa waso munara oso. Fandun fa wafrur marandan kuker wek bis insama rwaro diwa. Ro terminal bis anya, bis na nabore. Inja fandun fa wek bis ḇeyun au ḇe moḇ na rwa roro ya. Na wek bis ḇese ḇa snar wafawi nari dun au ḇe moḇ ḇese. Roma inai babo ro baboine sismai fafisu ḇerarirya: mkomnis snonkaku ḇero terminal bis ansya. Fafisu ono roi nabor naisya fandun fa mkokinfir ro kankenem mkoḇena, nane nafrur fa na mkokmome. Ḇape, rofyor mkofawi mnis rosai imbe mkofrur ro kankenem mkoḇena ido, nari napyan ḇe mko fa mkokinfir pyum. Imbe buk kankenem Bedi ḇesiper fa wafrur Yahwe imarisen ke? Ine kyurfasnai na waso farkankin Ḇyena rofyor wafrur snemuk ro roi nakam ro kankenem Bedi. Raris, imbe wafarkor rodiso ḇaido fararur risai na wuf ḇaido imbe wafarḇuk ma nwa romawa ke roḇa. Osower ido, rofyor wafrur aw fa imbe wafarmyan ḇe Yahwe ido, nari wafanam syadi ḇe I. Kwara pdef fa wafarmyan ḇe Yahwe I ido, nari ḇyebarakas Au ma ifrur aw Bena kam nun bon ḇepyum. w18.04 27 ¶1-3

Yefta ifrur raris asas ḇyedi kuker ḇyuk inai ḇyani fa ifarmyan ro tabernakel ro kankenem ḇyedi ḇesiper. (Hak. 11:30-35) Roi ine syamswen ḇe Yefta i, ma samswen ḇe inai ḇyedi kako. Ḇape, imarisen ifrur rosai kmari ḇyeasas kwar na. (Hak. 11:36, 37) Na fyarḇuk ḇa ḇaido nya romawa ḇa. Inja, up ḇyesya nari namnai rodia monda. Yefta inai ḇyani fyandun kaku wos ḇeḇuk samambraḇ. Refoya doḇe, ”Ro Israel sasoser naisya kwar: Ro taun ḇe taun, inai inkbor Israel sya sramura sḇuk wos sandik ḇe Yefta inai inkbor ḇyedi, snonkaku Gilead ani ro swaf ras rifyak.” (Hak. 11:39, 40) Yefta inai ḇyani ifrur imnis raris snonkaku Kristen ḇero fafisu ine ḇekinfir fa ḇefarḇuk ḇa insama bisa sḇuk oras nabor faro Yahwe I. Bisa kaksambraḇser si ke?​—1 Kor. 7:32-35. w18.04 17 ¶10-11

Malaikat ḇebor sya sḇeoser kuker Setan i fa sḇembroḇ faro Allah. Fabruḇ Ḇeba ya ḇaim, Setan ifrowes ḇeḇeso ro si fa sifrur fararur farḇuk kuker bin ḇero supswan ine. Refo fyasnaiḇair Setan imnis raris korḇen ḇesapi ro nanki kuker dawerepen ḇar ḇeḇekyor ro mak sya fa siso i. (Kej. 6:1-4; Why. 12:3, 4) Rofyor malaikat sya sibur Allah kina Ḇyesi, ine nfasnaiḇair skinfir Setan fa ḇyepoik faro si. Kokara awer malaikat ḇembroḇ ansya sfasos pyum si ḇa. Ro moḇ kopok fa komam ḇa na, Setan isya fyasos karajan ḇyedi imnis raris Allah Karajan Ḇyedi. Ikanow mankundi ḇe raja, fyasos rur ḇemaḇak ḇyesya, ma ḇyuk papoik ḇe si fa sḇepoik supswan ine. (Ef. 6:12) Roro Setan organisasi ḇyedi, fyara ḇaḇepapoik snonkaku syakam. w18.05 16 ¶5-6

Fyorno ido, raris Kma ḇesawarwar, Allah fyasnai saswar Ḇyedi faro ko kuker isonek ko. Daud iwasenuser Allah karkara Ḇyena ma syewar fa nya na. Ḇye Allah karkara Ḇyena fa nfara kenem ḇyedi, isoine nfadwer kenem ḇyedi fa dakḇe snonkaku ḇepyum syadi. Wakfrur raris Daud ido, nari saswar Bena faro Allah ma marisen fa wafrur marisen Ḇyena naba syadi wer, ma wakḇe snonkaku Kristen ḇemas kaku. Imbesrar oso snori Christin ikofen ḇo doḇe fyor fyarkor kaku ma iwasenuser rosai iwasya na, ḇyaḇir Yahwe fyas roi anna faro i derer! Nwa Allah karkara Ḇyena ido, nari mam dunya ine ma fafisu iwama raris moḇ Allah myam na rai. Nanema fawawi ḇeba kaku Yahwe ḇyuk ḇe Au nairi. Rosai ḇefnai ya? Imarisen wafawi roi ḇefandun kaku ro kankenem, wafrur snemuk ḇepyum, ma mam muraḇe ras ḇarpon iyama kuker makak ḇa!​—Yes. 26:3. w18.12 23 ¶9-10