Juli

Fandun fa koḇebati kuker Yesus insama nadi koḇena neḇekarem. Ine kyurfasnai ro papupes nadi koḇena, na kap ”snonsnon Yesus” monda ḇa. Fandun kako fa kofawi pyum nyan Yahwe kyarem nadi koḇena roro Yesus i. Yesus ikofenḇair faro manfamyan ḇyesi bo doḇe, ”Rosai mkor kuker snonsnon ayedi, nari yafrur na faro mko.” (Yoh. 14:13) Yahwe iso monda ḇerower ma ḇekarem nadi koḇena, mboi byuk papoik ḇe Yesus i kwar fa ifrur na. Inja, Yahwe kyarem nadi koḇena ḇaim, na myam koisya kofrur Yesus anun ḇyena kwar ke roḇa. Imnis raris, Yesus ikofen bo doḇe, ”Snar rofyor mkopyos snonkaku sasar sena, Kma mkoḇedi ro boiyaswa Dakpyos sasar mkoḇena kako. Ḇape rofyor mkopyos sasar snonkaku ḇa, Kma mkoḇedi kako Ipok dakpyos sasar mkoḇena ḇa.” (Mat. 6:14, 15) Inja, fandun fa kofrur pyum snonggaku ḇesesya, raris moḇ Yahwe ma Yesus sufrur pyum ko raya! w20.04 22 ¶6

Manwawan Paulus syewar fa ifawi rosai ḇerower i sya simarisen na, mura fyadwer nyan byukibaryas faro si. Raris ro mnu Listra, kawasa ḇerower i sya sifawi kermgun ḇaido sifawi pyum Refo ya ḇa. Inja, Paulus dawos roi sifawi na monda, ḇekur ḇe fafisu afuf ya ḇaido nyan sismai payamyum ro kankenem. Byuk wos ma fyasnai na insama ḇerower sya sifawi ḇeri. Swewar fa wafawi rosai snonggaku ḇero moḇ Bedi simarisen na ma fadwer nyan bukibaryas faro si. Rariso wafawi snonggaku oso rosai imarisen na rofyor wambran fanam yoḇ i ḇaido rum ḇyedi? Mam pyum ari. Isya kyer rokaker na ke, iwasya syap oso ke, ifrur mnis kaḇer motor ḇyeja ke, ḇaido ifrur roi ḇesena. Nasrow ido, ḇe roi ifrur nane fa wawos kuker i. (Yoh. 4:7) Ro moḇ syansun i raya na kofawi moḇ ryama ya, fararur ḇyena, ḇaido tim olahraga imarisen na. w20.04 11 ¶11-12

Naek srar ono sisya sna makakwarek ḇesyadadi ḇefnai fa simgak syadi rofyor sekayam kuker snonggaku ḇese. Sḇaḇir samswen fa sro fandu kawasa ḇebor sya, mboi sisewar fa siso pdef ro fananjur ma munara kebaktian na. Rya samswen fa sawos ḇe snonggaku sifawi ḇaim sya, mboi sisewar fa sakkawos rofyor sbaryas ro rum ḇe rum. Wakna samswen ḇeradine ido, wafawi werer monda ḇa. Ḇebor sya sakḇaḇir raris moḇ ḇaḇir raya. Waswarepen Yahwe imarisen faro roi swewar fa wafrur kuker sne ḇesiper. Wamkuepen isof ro ras ine ima fyasnaiḇair Yahwe isya ḇyebarakas ma syambraḇser Au. (Flp. 4:6, 7) Nwa raryar ḇa ḇaido besanekar mboi wafarmyan pdef ḇe Yahwe ido, wakyar Ausya wafrur fa imarisen. Kobor kona baken ḇesambraḇ wer ḇa kukro koduf ma koḇesinan kwar, ḇesyaḇo komkuepen pdef! (2 Kor. 4:16) Kuker fafnoḇek ro Yahwe I, kokame na kofrar isof kosmai mun ḇepupes ya! w20.04 30-31 ¶20-21

Yahwe ifrur supswan ine kuker nyan ḇepyum kaku. Ine fyasnai fawawinanem Ḇyena. (Ibr. 3:4) Mboi supswan koḇedine iḇese ro planet ḇesena. Kukro? Supswan ine monda moḇ ḇesrow kaku fa snonggaku sya sikenem ro na. Ro farsyos ḇeba ine, supswan koḇedine imnis ra wai ḇeba ḇeyayun ro soren ḇeba bo ḇeyek ro i sya sibore. Imbape, roi ḇeḇeso naisya ḇefrur fa supswan ine iḇese kaku ro wai ya. Kokarapan, ḇeyek ro wai oso na sor si fa sfasos roḇean, war, ma wam ro manggunsi. Sor si fa sisawen famfnom awer papus na ḇe ḇandi. Ro fafisu ḇeradine, nari bisa sikenem pdef ke? Na oroḇa. Mboi, supswan ine dakmnis ra wai ani ḇa. Supswan ine isaramper roi ḇekenem syakam fa sikenem pdef. Supswan koḇedine fyasos wam, roḇean, ma war kofandun na. Nane kam napok nabro ḇa. Sisawen papus ḇero supswan ine ḇe farsyos iyaswa ḇa. Rarirya mboi, supswan ine ipduk kaker ma bisa koḇarek ro na. Kukro? Yahwe ifrur supswan ine insa syambraḇ fa manggundi fyadwer papus ḇe roi ḇepyum fa bisa sun na wer. w20.05 20 ¶3-4

Setan ikofenbos kaku Allah ima danggarkar. Rarirya ro ras anya ḇeri, Setan nya snonsnon Ibiris, isoine manḇeanonef. Eva ikyar faro rosai Ibiris ikofen na. Rarirya, Eva ismai fafrowes. (1 Tim. 2:14) Ikyar kuf Yahwe I ḇa, mboi ikyar syadi faro Ibiris i. Inja, dun snemuk ḇesasar. Eva isouser faro Yahwe I ḇa ma dan bon Yahwe idwarek ani. Mura, byuk na ḇe Adam i kako fa dakkan. (Kej. 3:6) Kwarapan rosai fandun fa Eva ikofen kaku yoḇ Ibiris i. Kwarapan ikofen radine, ”Ayama yafawi au ḇa. Mboi yafawi kaku Kma yedi, Yahwe I. Yaswar I ma yakyar I. Byuk roi nakam faro Adam nu kwar. Rosai ḇefnai au fa wawos roi ḇekaku ḇa ḇekur I? Rwa wabur ḇe diwara!” Eva isouser pdef bo ikofen rarirya kada, na Yahwe imarisen kaku! (Ams. 27:11) Imbape, Adam ma Eva sufasnai saswar faro Yahwe I ḇa. Naiso eḇedari rofyor Ibiris danonef snonsnon Yahwe, suḇriwarek Yahwe I ḇa. w20.06 4 ¶10-11

Imbesrar koḇesi sisyus fa kokofen kasumasa ḇeri fa srower kukro sifrur roi nabor ro fararmyan ḇe Yahwe I kwar. Imnis ra sakso ro fararur ḇaḇawes ma fadaduru Balai Kerajaan, sisaramper raryur ḇeyawos wos ḇese, sifnoḇek fa sifrur syap-syap ro wos ḇese, ma sifarmyan ḇe perintis ma misionaris. Oso wer ido, bar binswa sya kako sisaramper siswasi kukro sfararur marḇak faro sidang ma organisasi. Bar naek ansine suf pyum fararur sena kukro siswasi sisaramper si. (Ef. 4:8) Penatua ḇena fawinanem na sikyar kaku, imbesrar siso sordade ḇeba ḇefararur kuker sne ḇemarisen. Ma rofandu manbaryas angginem Karajan, imbesrar siso ḇebor syadi. Oso wer ido, penatua sifawi imbesrar ḇesoasuser ḇena kakyar ḇenako, sima sisrow kaku fa sifnoḇek imbesrar ḇebabo sya ro samswen sena. (Tit. 2:3-5) Nasnai kaku, fandun fa koḇesyowi imbesrar koḇansine! w20.09 23 ¶13-14

Yahwe ḇyefnder ḇaḇeri snonggaku ḇefarmyan ḇe I kwar, mboi ro swaf ono sifarmyan ḇe I wer ḇa. Fyanander rosai sifrur kwar ro fararmyan ya ḇa kako. (Ibr. 6:10) Nabi Yesaya fyas wos peper ḇefasnai pyum kaku Yahwe iswar kawasa Ḇyesi. Yesaya fyas, ”Kuker bramin Ḇyedi, nari iryur domba mgun sya, ma nari dun si ro ander Ḇyedi.” (Yes. 40:11) Moḇsa Manfarandows Ḇeba koḇedi ḇyaḇir rai fyor domba Ḇyesi oso iḇor? Yesus fyasnai Yahwe moḇ ḇyaḇir raya fafisu ifuken manfamyan ḇyesi, ’Rariso karkara bedi? Rofyor snonggaku oso ismai domba utin oser, ma oso ro si iḇor, rariso nari ryirḇake samfur risiw seser risiw ansi ro ḇon ya ḇo rya syewar ḇeḇor ani? Ma yakofen faro mgo: Kaku ḇeri rofyor ismai, raryaḇ ḇyedi iba syadi snar oser ani, ro samfur risiw seser risiw ḇeḇor ḇa ansi.’​—Mat. 18:12, 13. w20.06 19-20 ¶8-9

Komam fararmyan koḇena ḇe Yahwe I ro fararur rosai monda ḇe syowi ḇeba kaku. (Mz. 27:4; 84:10) Mambesrar oso imarisen ifrur nabor syadi ro fararur ḇesren ido, ima ipyum kwar. Imbape, fyor sbuk fararur fa duf, ipok kyara awer ima ipyum syadi ro ḇesesya. (Luk. 17:7-10) Ipyum fa kyara imbe duffarmyan snonggaku ḇesesya kuker sne ḇerun. (2 Kor. 12:15) Refo naser fawar ḇekur snonggaku ḇekara syadi manggunsi. Imnis raris, Diotrefes fyasnai sne ḇerun ḇa bo syewar fa iba syadi ro jemaat. (3 Yoh. 9) Uzzia dararer i, inja fararur Yahwe byuk ḇe i fa duf na, ifrur na ḇa. (2 Taw. 26:16-21) Absalom imarisen fa dakḇe raja, inja syewar fa dun kawasa sya sisnesna insama sisaramper i. (2 Sam. 15:2-6) Fawar ro Refo nane nfasnaibos Yahwe ima imewer kaku snonggaku ḇesewar sanandik faro manggunsi. (Ams. 25:27) Ḇarpur ya, ḇeararer sya sismai roi ḇesamswen.​—Ams. 16:18. w20.07 4 ¶7-8

Kina ḇeḇeso sra ḇe sup ḇese kukro samswen ro sup marin sedi ḇaido imbe sisewar fararur. Rarirya ido, romawa sesi ro rumfarkor na sfarkor wos ḇebabo ḇero sup ani. Sinan sya kako fandun fa sifawi sawos ro wos ani insama napyan fa sismai fararur. Sidang ḇaido raryur ḇeyawos wos manggun sedi naisya ro diwa ido na rariso? Sidang ḇeyawos wos risai fandun fa kina ani siso na? Siso sidang ḇeyawos wos ḇero sup ani ke sidang ḇeyawos wos manggun sedi? Ḇebukor ro kina iso na ḇekinfir sidang risai na sfanjur ro na. Inja, na kyara pyum kaku fandun ro kina ḇyesi. Koḇesyowi ḇebukor ro kina ani rosai ifrur kwar kukro inema oser-oser na kyamar na. Kofrur na kuker koser pyum kina ani ro sidang koḇedi ma kofasnai koswar si.​—Rm. 15:7. w20.08 30 ¶17-18

Komarisen Yahwe byuk papoik ḇe ko ido, kopok kararer awer ko snar kona baken ḇesambraḇ, farkarkor ḇekaki, moḇ korama ya, ḇaido nana arasai koḇena. Roi nane nari nafrur fa Yahwe myam koḇesyowi ḇa. Ḇekaku ya, Allah manfamyan Ḇyesi ’ḇefawinanem, roḇa ḇesmai papoik, roḇa ḇesmai nasan ḇekaki ro mamam snonggaku’ sibor ḇa. (1 Kor. 1:26) Inja, roi ḇepyum ḇa rosai monda ḇekur ko na, bisa kofarmyan pdef ḇe Yahwe I. Ine iso swaf fa komam moḇsa Yahwe byuk papoik ḇe ko raya. Rupa ra, ono sisya sawos makak fa sifrur insama wakorwanan ḇekur rosai wakyar ya ido, benadi ḇe Yahwe fa ifnoḇek Au insa wamgak ḇa fa wawoswarek kakyar Bena. (Ef. 6:19, 20) Rofyor waduf marḇak, wor ḇe Yahwe I fa byuk samambraḇ insama wamyaren pdef ro fararur ḇesren ya. Fafisu mam moḇsa Yahwe ifnoḇek Au rai, kakyar Bena nari nsambraḇ syadi. w20.07 16 ¶9

Kosewar ḇepon Karajan ya ido, fandun fa kakmnis raris Abraham i, iso komarisen kofrur roi ḇeyun marisen ḇe Allah I. (Mrk. 10:28-30; Ibr. 11:8-10) Kopok kokara awer na komkei ro samswen na. Kofawi snonggaku ḇefarmyan faro Yahwe I saksmai samswen. (Yak. 1:2; 1 Ptr. 5:9) Baboine, fandun kaku fa komam mura ḇe ras ḇarpon iyama. Roi ḇejadi ro dunya ine nfasnai kaku koisya kokenem ro papupes ras-ras ḇepupes kwar. Ro Karajan Allah nari kosmai barakas oso iso, snonggaku koswar sya simar kwar mboi na kosrow kaḇer kuker si. Ro fafisu ani, Yahwe na ḇyebarakas Abraham i snar kakyar ma kaḇaḇaḇ ḇyena dun kankenem ḇe i ma kina ḇyesi ro supswan ine. Nari wakro diwa fa wasrow si ke? Imbo, mboi wakfrur kaku raris Abraham i mande. Isoine wabur roi ono fa swewar ḇepon Karajan Allah, samswen nabor mboi wakyar pdef, ma wawaf monda Yahwe I ḇesya kwar.​—Mi. 7:7. w20.08 5-6 ¶13-14; 7 ¶17

Kofawi mbroḇ koḇesi smun ko rariryano, Yahwe nari ḇyawes ko fa kokenem kaḇer. Kokyar kaku roi oso ḇaḇeri na ḇedwarek ko fa kofarmyan ḇe Yahwe I. (Rm. 8:35-39) Yahwe fyasnai nya fawinanem ḇeba kaku kuker Byuk saneraro kaḇakḇok ine ḇe ko! Iso ḇefnai fa na komgak ḇa rofyor ḇeso Ibiris sya sawos bo soḇe imbe smun ko kukro komewer kofrur roi sor na. Oso wer ido, saneraro kaḇakḇok syambraḇser ko fa kosoasuser faro Yahwe I pdef. Ḇembroḇ Yahwe I sya soḇe imbe smun Au ido, wakyar Yahwe nari ḇyawes Au fa wakenem kaḇer ke? Moḇsa wafawi nwa kakyar faro roi ine kwar rai? Nyan oser ya wafuken, ’Roi kasun monda yafrur ro kenem ayena, yafasnai yakyar faro Yahwe I ke?’ (Luk. 16:10) Oroḇa ido wafuken, ’Ro nyan kenem yedine, yafasnai yakyar Yahwe nari fyasos fandun ayena fyor yasewar ḇepon Karajan Ḇyedi ke?’ (Mat. 6:31-33) Kwarem imbo faro fakfuken ri suru suine ido, nari swambraḇ fafisu wasmai roi ḇesamswen ro ras meser iyama.​—Ams. 3:5, 6. w20.08 17-18 ¶15-16

Fandun fa kokir syadi fa kun pyum Wos Refo ya. Nyan fa kokir syadi iso kofarkor ro fananjur koḇena. Imbape, imbe kofnoḇek snonggaku ḇese fa sikyar kakaku ro Refo nari nbuk payamyum faro si ido, fandun fa kofarkor syadi manggunko resari kada. Kofarkor pyum Refo insama kakyar koḇena nsambraḇ syadi. Inja, na kowasya fasfas ro Refo na monda ḇa. Kokarauser rosai kowasya kwar ma kofarkor kaku na insama kofawi pyum ma koso na ro kenem koḇena. (1 Tim. 4:13-15) Rarirya, na kofasos kwar fa kofarkor Wos Refo ya faro snonggaku ḇesesya. Komarisen kofnoḇek ḇerower konsya fa sifawi pyum wos ro Refo ma sifawi moḇsa siso na rai. Inja, kofarkor pyum Refo ya ido, nari kokir syadi fa kobuk farkarkor.​—2 Tim. 3:16, 17. w20.09 28 ¶12

Kokara pyum rosai Yahwe ifrur kwar fa ifnoḇek ko ido, nari kokara monda faro fararur ḇaḇebaryas. Imnis raris fyasos anan rur nabor roro syap sifrur kwar ma eḇe elektronik, audio, ma vidio serekam kwar, ma JW Broadcasting na. Kokarapan: Situs web koḇena naser anun ḇepyum nasyadi ro wos ri 1.000 kwar! (Mat. 24:45-47) Nyan ḇese insama komam monda faro fararur ḇaḇebaryas iso koso raris moḇ Yesus imbran raya. Imewer roi ono nadwarek i fa byaryas kakaku ro Refo ya. (Yoh. 18:37) Pyampum Ibiris fafrowes ḇyena rofyor Ibiris fyasnai ’roi bebor kam ro supswan ine kuker payamyum ḇyena’. Imewer kaku fyor snonggaku sya imbe skanow i ḇe raja. (Mat. 4:8, 9; Yoh. 6:15) Kyara ḇaḇeri fa imbe daksmai nana nabor ḇaido nasan ḇekaki. (Luk. 9:58; Yoh. 8:59) Koswarepen Paulus anun ḇyena ḇero mnuk faro ras ine ma koso pyum na kada, na kores nako pdef rofyor roi ono naisya nafrowespan kakyar koḇena. w20.09 9-10 ¶6-7

Komarisen kaku kukro imbesrar koḇesi sibor sfararur marḇak ro sidang kwar! Sakso ro fananjur ma ḇaḇebaryas ya. Imbesrar ono sisya sifnoḇek fararur fadaduru Balai Kerajaan ma sfasnai sawarwar faro naek srar ḇesesya. Kaku ḇae, samswen sena naisya nabore. Sia smamfaduru sinan sesi. Sia wer, kina sesi sidwarek si. Ḇese wer, semir sfaduru roma inai sesi ma siso ḇesewar fandandun sena. Rosai ḇefnai fa kosewar insama kosambraḇser imbesrar koḇesi? Snar snonggaku ḇero dunya ine sesyowi ma sifrur pyum bin sya ḇa ker. Oso wer ido, Refo danun ḇe ko fa kosambraḇser imbesrar sya. Imnis raris, Manwawan Paulus dor sidang ḇero Roma fa sisaser pyum srar Febe ma ’sifnoḇek i rofyor ḇyefandun fafnoḇek ro si’. (Rm. 16:1, 2) Paulus ima iba ro moḇ smam bin sya sima sismai roi oḇa ma smamkyof si. Imbape fafisu Paulus dakḇe Kristen kwar, dakfrur ra Yesus moḇ ifrur pyum bin sya raya. w20.09 20 ¶1-2

Insa bisa kofnoḇek ḇefarkor Refo sya fa simarisen sakbaryas, bisa kofuken si radine: ”Payamyum rosai wasmai snar waso raris rosai Refo fyarkor na? Manggun kwara ido, snonggaku ḇese fandun fa sakrower angginem ḇepyum ro Refo ine ke? Rosai na wakfrur fa wafnoḇek si kako?” (Ams. 3:27; Mat. 9:37, 38) Koswarepen Yesus iwan ko fa kofnoḇek snonggaku ḇese fa ’sifrur roi nakam ikofen kwar faro ko’ na. Ine kyur kako ḇe sasoser ri suru ḇeba syadi ya, isoine saswar faro Allah ma min koḇesi. Saswar ḇeradine nya fasfes kuker fararur ḇaḇebaryas ma kobuk farkarkor snonggaku sya fa sḇe manfamyan. (Mat. 22:37-39) Kofawi roi ḇedif kaku ko fa kobaryas iso saswar. Imbude ḇefarkor Refo ono sisya skara simgak kaker fa sakso ro ḇaḇebaryas. Ḇape bisa kofnoḇek si fa sikyar Yahwe nari ifnoḇek si insama fawas mura simgak faro snonggaku sya wer ḇa.​—Mz. 18:1-3; Ams. 29:25. w20.11 3 ¶6-8

Fafisu kofrur fasasos faro farkarkor Refo, konadiwarek ḇefarkor Refo ani ma fandun ḇyena. Kor fa Yahwe ifnoḇek ko insama kobuk farkarkor Refo kuker nyan ḇepyum insama nsun ro sneri. Koswarepen ker roi imbe kofrur ya iso komarisen kofnoḇek i isof ḇyebaptis. Ḇefarkor Refo ani fandun kako fa ḇyenadi ḇe Yahwe I. Moḇsa ifrur na rai? Manggundi ryower ma dawos faro Yahwe I ro nadi. Ryower Yahwe I kuker iwasya Refo ras ḇe ras. (Yos. 1:8; Mz. 1:1-3) Dawos ḇe Yahwe I ro nadi ras ḇe ras. Inja konadi kuker sne ḇesiper ro randak ma papupes farkarkor na oser-oser, ma kap sisnosna ro nadi koḇena. Fafisu srower nadi koḇena, na sakfawi nyan senadi kuker sne ḇesiper ḇe Yahwe I roro snonsnon Yesus Kristus. (Mat. 6:9; Yoh. 15:16) Kokarapan rariso ḇefarkor Refo iwasya Refo ras ḇe ras (ryower Yahwe I) ma ḇyenadi (dawos kuker Yahwe I) nafnoḇek i fa fyanam syadi faro Yahwe I!​—Yak. 4:8. w20.10 8 ¶8; 9 ¶10-11

Yahwe organisasi Ḇyedi ro baboine kako sisewar fa sidang Kristen nambran pyum ma sḇeoser. (Kis. 16:4, 5) Rupa radine: Waso Farkarkor Baryas ro sidang ḇaido moḇ ḇese ido, na wafawi kwar farkarkor rosai imbe sawos ya ma moḇsa sifrur na rai. Nari waḇor famfnom ḇa! Rur ḇesren iso ḇefrur fa koḇeoser radine. (Zef. 3:9, fks) Rosai bisa wakfrur na? Kofuken manggunko: ’Yasewar fa sidang ayedi ḇyeoser ma ḇyeaski pdef ke? Yasouser faro naek ḇefarkin sya ke? Naek srar sya bisa sikyar aya ke, isyadi wer fyor yana fakamaman ro sidang? Ayama yakawawur ḇa, yamarisen yafnoḇek ma yafarmyan faro naek srar sya ke?’ (Yak. 3:17) Komam mboi roi naisya bisa kofrur fa napyum syadi ido, kor fafnoḇek rur ḇesren ya. Rur ya ifnoḇek ko fa kofadwer rari ma kenem koḇena. Rarirya, naek srar sibor nari siswar ko ma sesyowi ko. w20.10 23 ¶12-13

Allah Wos Ḇyena imnis ra kansinai. (Yak. 1: 23-25) Kosasyar ro arwo ḇaim ido, na komam komgasna ro kansinai. Inja, na kofawi roi ono naisya fandun fa kofrur na fa namnis kaḇer ke roḇa. Rarirya kako, kowasya Refo ras ḇe ras ido, insape na kofawi nyan kakara ma kenem koḇena fandun fa kofadwer na. Ḇebor sya sismai payamyum kwar kukro sra sifrur fararur sena ḇaim, siwasya ḇepon mnuk ro Refo faro ras ani. Simarisen roi siwasya na nfara kakara sena. Mura, ro ras anya ḇesiper sisewar fa siso anun ro Refo na. Oso wer ido, fandun fa kofarkor ma kokarauser Allah Wos Ḇyena ras ḇe ras. Rya ine roi ḇemanggenem ḇa, mboi ine fyandun kaku insama nafnoḇek ko fa kombran pdef ro nyan ḇefyos ḇeyun ḇe kankenem ya. Refo ima imnis ra robebor ḇaido mesin dokter sya sbukimam baken koḇena ḇero do ya. Ḇape fafisu kosmai wos ro Refo ḇekur ḇeri ḇe ko ḇaido ro snonggaku Allah ryem sya, fandun fa kofasnai sne ḇerun. Rarirya, nari kosmai payamyum. w20.11 18 ¶3; 20 ¶8

Ro abad randak, sewayam ker snonggaku Kristen sya. Mboi ro swaf ono sro fafisu ḇeknon kako. Rosai sifrur na? Sbaryas pdef abar ḇepyum ya. Syap Farfyar ikofenḇair ”sikenem kuker araryof faro Manseren”. Simyaren sbaryas abar ḇepyum, inja barbor ro kawasa ḇesyom Yahwe I sibor syadi. Ine fyasnai Yahwe ḇyebarakas sasewar sena fa sbaryas kuker raryaḇ ro fafisu ḇeknon anya. (Kis. 9:26-31) Snonggaku Kristen ro awar randak sya sbuk swaf nakam fa sbaryas pdef. Raris, Manwawan Paulus myam mboi ismai swaf ḇepyum fa byaryas faro snonggaku Efesus sya, inja dun snemuk fa ḇyarek ro mnu ani resari insama bisa byaryas ḇe si. (1 Kor. 16:8, 9) Mura manwawan sya sisewar kaku fa sbaryas abar ḇepyum ro ’Manseren wos Ḇyena’. (Kis. 15:30-35) Inja imnis mnuk ḇero ras ine, kawasa ḇekyar sya sibor syadi wer. w20.09 16 ¶6-8

Fafisu Adam ifrur sasar anya, dun marmar ḇe manggundi ma kpu up ḇyesi. Isof ro baboine, koḇekandera kaker kukro Adam isouser ḇa. Imboi Allah Yahwe ḇyawes Yesus i kwar, inja nari kosmai fafisu ḇepyum ro ras naiwama. Manwawan Paulus ikofen wer, ”Snonkaku oser ifnai fa kaḇakḇok ro marmari ḇyeḇeḇuk faro snonkakusya kako. Imnis snonkaku kam simar snar ḇaḇeoser kuker Adam, rarirya kako nari sikam sikenem wer, snar ḇaḇeoser kuker Kristus.” (1 Kor. 15:22) Paulus doḇe ”snonkaku kam simar snar ḇaḇeoser kuker Adam”. Mansei kyur kaku ya? Paulus isya dawosḇair Adam kpu up ḇyesi, sismai sasar ro Adam i mura nari simar. (Rm. 5:12) Adam nari daksmai kaḇakḇok oḇa. Daksmai payamyum ro Yesus marmar ḇyedi ḇa kukro kyinfir fa isouser faro Allah Yahwe I ḇa fafisu ḇye snonggaku ḇenapes kaker. Adam nari ismai kankenem fyoro ḇa. Ine imnis roi ḇekur snonggaku nari Yesus ḇyemankara si ḇe kambing.​—Mat. 25:31-33, 46; Ibr. 5:9. w20.12 5 ¶13-14

Kona fakamaman ro sidang ḇa ido, bisa kofarkor kako ro malaikat ḇesouser sya. Ro fafisu Raja Ahab ḇyepoik ya, Allah Yahwe dor malaikat sya fa sikofenḇair kakara sena ḇekur moḇsa na sifrowes raja ḇeḇarḇor ani. Malaikat riḇeso sikofen kakara sena. Ḇape Yahwe imarisen faro malaikat oso anun byuk na. (1 Raj. 22:19-22) Malaikat ḇesesya na sesanekar bo sikofen radine ke, ’Sye roi kokofen na nadawer monda.’ Kokyar skara radine ḇa. Malaikat ansi sfasnai sne ḇerun ma simarisen sbuk sanandik ḇe Yahwe I. (Hak. 13:16-18; Why. 19:10) Fandun fa koswarepen fakamaman ḇepon kaku kosmai ya iso koḇe Saksi Yahwe ma kobaryas angginem Karajan. Fakamaman ro sidang bisa kosmai na, mboi bisa napromes kako. Ḇape Yahwe ḇyesyowi ko kukro fakamaman ani ḇa. Kofasnai sne ḇerun ido, koḇemaeja kaku ro ḇarpon Yahwe ma naek srar sya. Inja, kor Yahwe ifnoḇek ko fa kona sne ḇerun pdef. Kokarauser fawar ro Allah manfamyan Ḇyesi ro Refo ḇefasnai sne ḇerun sya. Ma kosewar fa kofarmyan naek srar koḇesi.​—1 Ptr. 5:5. w20.12 26 ¶16-17

Roi ḇesaswo bukor isoine fasaspar. Roi ḇesaswo ḇukor fyasnaiḇair saneraro Yahwe byuk na isoine Yahwe nari imkeibur ko ro marmar ma byuk sasuref ḇe snonggaku ḇefrur marisen Ḇyena. (1 Tes. 5:8; 1 Tim. 4:10; Tit. 1:1, 2) Saneraro Yahwe byuk na nari nadwarek swaruser koḇena. Snar saneraro ani na ifnoḇek ko fa komam monda faro Allah asas Ḇyena ma komgakwarek syadi ḇa fafisu kona samswen. Kosaswo roi ḇesaswo bukor isoine fasaspar kuker komam mnis nyan kakara koḇena kuker Yahwe nyan kakara Ḇyena. Imnis ra, na kokyar faro arasai na ḇa, mboi kokyar faro Allah I. (Mz. 26:2; 104:34; 1 Tim. 6:17) Sumber ine fyasnaiḇairo Allah Wos Ḇyena, Refo ya. Sumber anine na fyasnaiḇos kaku anggarkar ḇebor ma nafnoḇek snonggaku sya simkeibur farkarkor ḇesasar ma rari ḇeḇye ḇa na. (2 Kor. 10:4, 5; 2 Tim. 3:16, 17; Ibr. 4:12) Kofarkor moḇsa koḇepake sumber ine kuker kofrur farkarkor manggun koḇena ma koḇepake farkarkor kosmai ro Allah organisasi Ḇyedi.​—2 Tim. 2:15. w21.03 27 ¶4; 29 ¶10-11

Fafisu sisun manwawan Yohanes i ro bui snar byaryas snonsnon Yesus, fyasnai iswar snonggaku ḇesesya. Rupa ra, fyasepen fasasnai myam na, mura fyarem na ḇe sidang-sidang insama sakfawi kako rosai nari kero ḇerama na. (Why. 1:1) Raimnai, fafisu ibur myos Patmos kwar, rya insape fyas syap Injil ḇyeja ḇekur Yesus kankenem ma fararmyan ḇyena. Fyas kako syapram ri kyor ḇesambraḇser ma ḇebuk sneprei ḇe naek srar sya. Na koso Yohanes nyan fyasnai saswar ḇyena ma kofrur na ro kenem koḇena, kofasnai koswar snonggaku ḇese. Dunya ḇeḇarḇor ine imarisen insama kobuk oras ma samambraḇ koḇena faro fandun manggun koḇena ḇardi, imnis ra sasewar pipi ma snonsnon. Ḇape manbaryas binbaryas Karajan ro supswan ine ḇesiper, sfasnai siswar manggunsi ḇa kuker sbuk oras sena fa sbaryas abar ḇepyum ma sisaramper snonggaku sya fa sfanam ḇe Yahwe I. w21.01 10 ¶9-10

Yonatan imbe fyafayaf Daud ido, bisa ḇae. Kukro, ima Raja Saul roma ḇyediri. Bisa kyara iso ḇesrow syadi fa ḇye raja fadwer kmari. (1 Sam. 20:31) Imboi Yonatan fyasnai sne ḇerun, ma isouser faro Yahwe I. Inja isaramper Daud i ḇe raja Yahwe kyinfir kwar ani. Ifawi nari kmari Saul i, imsor fafaya i ḇa, mboi imewer ibur Daud i. (1 Sam. 20:32-34) Yonatan iswar kaku Daud i, inja myam i ḇe mbroḇ ḇyedi ḇa. Yonatan ima mansonanem ma mambri diri. Sifawi Yonatan ma kmari Saul, suma ”sururen syadi ro mansapur” ma ”susambraḇ syadi ro singa”. (2 Sam. 1:22, 23) Inja Yonatan imarisen ido, bisa dararer manggundi. Ḇape, Yonatan imewer isyadi ro Daud ḇaido imarisen ḇa faro roi ḇepyum Daud ifrur na. Oroḇa mboi, Yonatan myanen Daud i kukro imgak ḇa ma ikyar faro Yahwe I. Ḇekaku ya, randak Yonatan iswar Daud iso fafisu myam Daud myun Goliat i. w21.01 21 ¶6; 22 ¶8-9

Yesus Kristus iso ḇeḇebukor ḇenapes kaku ro snonggaku Kristen syakam. Ḇape, fyor bin Kristen oso fyarḇuk kwar ido, ḇeḇebukor ḇe iniso snon ḇenapes ḇa. Rarirya, fyorno ido samswen kaku ḇe i fa ikunem ḇe eḇe snon ya. Inja, fyor bin Kristen oso kyarauser fa fyarḇuk kuker mambesrar oso ido, kyara pyum fakfuken nane: ’Rosai ḇefasnaiḇair na iso snonswa ḇepyum dirya? Ima fyakapon roi Yahwe imarisen na ke? Ifrur rarirya ḇa ido, na fyaduru pyum wis ḇepyum kina nuḇedi rofyor nufarḇuk kwar ke?’ Oso wer ido, myambir pyum kaku manggundi kako kuker kyara fakfuken nane, ’Rari-rari ḇepyum yena na nafrur farḇakḇuk nuḇedi neaski syadi ke? Yaḇe kaḇaḇaḇ ma yafasnai snemura ke? Yaḇe bati fanam kuker Yahwe I ke?’ (Pkh. 4:9, 12) Rofyor bin oso kyinfir srow fyor fyarḇuk ḇaim, na farḇakḇuk ḇyena neaski syadi. Imbesrar riyuta koḇesya sfasnai sikunem faro eḇe snon sya. Sima sfasnai nyan ḇepyum kaku! w21.02 8 ¶1-2

Taun ḇarpur ine, naek srar sibor sfasos ḇepon fa sifrur nabor syadi wer ro fararur ḇesren kuker sfarkor wos ḇese. Moḇ sawos wos ḇese ḇefandun manbaryas Karajan sibor syadi. Naek srar ansi skinfir fa sifrur roi ine insama sbuk nabor syadi ro ḇaḇebaryas Karajan. Kaku ḇae, roi ine fyandun swaf kawan isof swadon sena nasrawen fa sawos ro wos ḇese, mboi sifrur roi ḇepyum kwar ro sidang. Koḇesyowi kaku naek srar ansine snar rosai sifrur kwar na! Badan penatua sipok sidwarek awer naek oso fa duffarmyan ḇe penatua ḇaido hamba pelayanan snar syewar kaker fa ifawi dawos wos sḇukidawos ro sidang. Penatua sya na smam naek oso isyus kwar snar iso akurfasnai ro Refo faro penatua ḇaido hamba pelayanan sya. Penatua sya smam awer ro moḇ ifawi dawos pyum kwar wos sḇukidawos ro sidang ya ke roḇa.​—1 Tim. 3:1-10, 12, 13; Tit. 1:5-9. w20.08 30 ¶15-16

Snonggaku soḇe sismai aski ḇaido raryaḇ fyor sidafduf ḇa, pipi sena nabore, ma kina sena nakain pyum. Imboi, raryaḇ Yakobus ikofen ro dine iso bar oser ro Allah rur ḇesren Ḇyedi, ma raryaḇ ḇeradine nasya snar roi kosmai anna ḇa. (Gal. 5:22) Snonggaku Kristen oso nya raryaḇ ḇaido ḇyeaski kaku kukro ifrur Yahwe imarisen ma iso Yesus nyan ḇepyum ḇyena. (Luk. 6:22, 23; Kol. 1:10, 11) Raryaḇ ani imnis ra for ḇesak ro padamara oso. For ani imbrer ḇa boi isak ker kukro wam ma mekem nawufpum i ḇa. Rarirya kako, kona samswen nabor ro kenem koḇena yo, na koryaḇ pdef. Koduf ke kona pipi ba ke, na nafrur raryaḇ koḇena napromesbur ko ḇa. Kina koḇesi ḇaido snonggaku ḇese sonef ko roḇaido sidwarek ko raryano, na kofasnai raryaḇ ya pdef. Fafisu ḇesampum konsya imbe sifrur samaido raryaḇ koḇena nambrer, raryaḇ ani na isber syadi wer. Fyor kosmai roi ḇedwarek snar kakyar koḇena ido, nfasnai koma Kristus manfamyan ḇyesi ko. (Mat. 10:22; 24:9; Yoh. 15:20) Injariso Yakobus fyas wos ḇero mnuk faro ras ine. w21.02 28 ¶6

Fafisu kowasya mnuk ro Refo ḇekofen fandun fa kokyar faro Yahwe I ma koḇoryae awer, kosewar fa koswarepen na. Nyan ḇepyum ḇefnoḇek ko fa koswarepen na iso kowasya kuker mgarem naba, kofasepen na, ma komam kaḇer na. Yahwe iwan Yosua i fa iwasya myaren Sasoser Taurat insama fyasnai fawinanem ro rosai ifrur na. Roi iwasya na, nafnoḇek Yosua i kako fa imgak ḇa fyarkin Allah kawasa Ḇyesi. (Yos. 1:8, 9) Wos ḇero Refo na nbuk kananon ro swaruser ma kosnesna rofyor koro fafisu na ḇefrur fa koḇeḇirḇar ḇaido komgak. (Mz. 27:1-3; Ams. 3:25, 26) Ro fananjur ari koḇena, na kosmai payamyum ro faya na, kankarem ro naek srar sya, ma awawos ḇesambraḇser ko. (Ibr. 10:24, 25) Rofyor kofawar makakwarek koḇena ḇe bati ḇefanam kuker ko ro sidang, nane nari nbuk sneprei ḇe ko kako. w21.01 6 ¶15-16

Rofyor mgoḇebaptis, mgofasnaiḇair mgokyar faro Yahwe I. Ma Yahwe imarisen kaku dun mgo ḇe kina babo Ḇyedi. Kirine fandun fa ngona sne ḇerun ma mgokyar faro Yahwe I pdef. Rofyor mgofrur snemuk ḇefandun kaku, mgokara ḇeri fa mgosewar fafnoḇek ro Yahwe I. Ḇape rariso kuker snemuk ḇesena? Fandun fa mgokyar kaku pdef faro Yahwe rofyor mgofrur snemuk sarirya monda, isoine snemuk faro hiburan ḇaido fararur ma cita-cita mgoḇena. Mgokyar manggun mgo awer. Ḇape mgosewar wos farkin ḇefnoḇek mgo fa mgofrur snemuk ḇepyum, ma mgosouser wos farkin ro Refo ani. (Ams. 3:5, 6) Mgofrur rarirya ido, nari Yahwe imarisen, ma naek srar ro sidang nari sesyowi mgo. Kokame konapes ḇa ma na kofrur sasar kako. Ḇape roi ani napok nafrur mgo fa mgokara na mgofarmyan pyum ḇe Yahwe I ḇa. w21.03 6 ¶14-15

Wasmai roi ḇedwarek ro kina Besi ke? Ḇaido, ro sup Bedi sidwarek fararur ḇaḇebaryas koḇena ke? Rarirya ido, nari wasmai samambraḇ rofyor wawasya 2 Timotius 1:12-16 ma 4:6-11, 17-22. Manwawan Paulus fyas mnuk-mnuk nane rofyor ismai ro bui. Rofyor wawasya mnuk-mnuk nane ḇaim, wakofenḇair ḇe Yahwe samswen wasmai na. Wakofenḇair kako roi ḇaḇir nakam snar samswen ani. Raimnai wor fafnoḇek ro Yahwe insama wasrow wos farkin ro Paulus fawar ḇyena ḇemnis kuker samswen wasmai na. Yahwe byuk swarapepen kwar ḇe Paulus i snar nari ismai wayam kukro ḇye snonggaku Kristen. (Kis. 21:11-13) Moḇsa Yahwe ifnoḇek Paulus i rai? Yahwe kyarem Paulus nadi ḇyena, byuk samambraḇ ḇe Paulus i ras ḇe ras. Yahwe byuk kakyar ḇe Paulus i snar fararur marḇak ḇyena nefromo ḇa ma ḇyebarakas i. Yahwe i kako byuk Paulus bati ḇesouser ḇyesya fa sifnoḇek i. w21.03 17-18 ¶14-15, 19