November

Kofawi mnis Yunus kenem ḇyena ḇa ido, na kokara ima snonggaku ḇemakakak ma isouser ḇa. Yahwe iwan i fa ikofenḇair anun samamyai faro mnu Niniwe. Mboi, Yunus isouser ḇa bo ”ifrar ibur Yahwe I” ma dek kapal ḇe moḇ ḇese. (Yun. 1:1-3) Au ido na buk swaf wer ḇe Yunus i fa duf fararur ani ke? Imbude roḇa. Ḇape, Yahwe ima myam roi ḇepyum ro Yunus i, inja byuk swaf wer ḇe i. (Yun. 3:1, 2) Kowasya Yunus nadi ḇyena ido na kofawi ima snonggaku ḇemnis rariso. (Yun. 2:1, 2, 9) Yunus ḇyenadi ḇe Yahwe ḇesya kwar. Rofyor ḇyenadi ro in ḇeba anya snewar ḇyeja, wos ikofen na nafnoḇek ko fa kofawi sasar ḇyena monda ḇa mboi komam rari ḇepyum ḇyena kako. Roi ikofen na nfasnai nya sne ḇerun, syowi, ma dun snemuk fa isouser Yahwe I. Iso ḇefnai fa Yahwe myam monda faro Yunus sasar ḇyena ḇa, kyarem nadi ḇyena, ma byuk fararur fa ifarmyan ḇe nabi pdef! Fandun kaku fa penatua oser-oser sfawi mnis resari samswen oso insape sbuk wos anun! w20.04 15 ¶4-6

Manfamyan ḇero abad randak siwara simarisen faro farkarkor Kristen mura, sikyar kaku rur ḇesren fyarkin si fa sifawi pyum Refo ya. Manggunsi sfasnai sikyar farkarkor anna neknam ro Refo ya. (Kis. 17:11, 12; Ibr. 5:14) Kakyar sena neknam ro roi sḇaḇir na ḇa, ma sfarmyan ḇe Yahwe I kukro simarisen sekayamyam kuker min sesya monda ḇa. Imbape, sḇawes kakyar sena ro ”fawawi ḇekaku ro Allah”. (Kol. 1:9, 10) Kakaku ro Refo napok nfadadwer ḇaḇeri. (Mz. 119:160) Raris min koḇesi oso ifrur fa kofafayaf ḇaido ifrur sasar ḇeba kaku ke samswen nkur ko ke, kakaku ro Refo napok nfadwer ḇaḇeri. Inja, fandun fa kofawi pyum farkarkor ro Refo ma kokyar na ḇe kakaku. Rarirya mande, na kosouser pdef ḇe Yahwe I ro fafisu ḇesamswen na, imnis ra yor ḇesambraḇ ḇeserepen nako wai ro wam doḇer ya. w20.07 9 ¶6-7

Yesus myam roi kofrur fa kosaramper naek ḇyesi ima imnis ra kofrur na ḇe Yesus manggundi. (Mat. 25:34-40) Nyan ḇepon kaku kosaramper snonggaku ḇesmai ramrem ansi iso kaksowarpu fa kobaryas anun Karajan ma kobuk farkarkor faro snonggaku sya. Inema fararur Yesus iwan ḇe manfamyan ḇyesi fa sifrur na. (Mat. 28:19, 20) Baboine, Yesus naek ḇyesi bisa sifrur fararur ḇaḇebaryas ro supswan ḇesiper ine kukro fafnoḇek ro ’domba ḇese’. (Yoh. 10:16) Waksun ro ’domba ḇese’ ido, oras buk faro fararur ine fyasnaiḇair saswar Bena faro Kristus naek ḇyesi ma Yesus manggundi. Koḇebati faro Yahwe ma Yesus su kako kuker kobuk kumpan koḇena fa kobukisaramper fararur sumam kaku na. (Luk.16:9) Imnis raris, kobuk kumpan fa nesaramper fararur ro supswan ḇesiper, isoine sbukifnoḇek ḇesmai rim ḇeba sya. Kobuk kumpan kako fa kofamfon fandun ro sidang koḇedi ma kobukifnoḇek ḇefandun sya.​—Ams. 19:17. w20.04 24 ¶12-13

Raris ḇardadi anya, raja bar wambrur fyasnai ḇyesyowi ḇa sinan ḇepon siwara Allah sisyom ya. Kofawi na ro? Uni Soviet imbe ipyos ḇeri agama-agama na, inja syewar fa dun papoik ro organisasi agama nakam. Moḇsa ifrur na rai? Raris, ro randak taun 1918, iwan kaku insama ro rumfarkor na, sbuk farkarkor snar Allah ima isya kaku ḇa. Rariso raja bar wambrur isandik allah adir-adir na rai? Uni Soviet byuk kumpan nabor kaku fa fyasos sordade militer ḇyeja ma ifrur romamun nuklir nabor insama pamarenta ḇyeja syambraḇ. Raja bar wambrur ma raja bar wamires suna romamun nabor kaku fa subukimun snonggaku sya! Raja bar wambrur sufararur kayam kuker raja bar wamires fa sufrur roi ḇeba kaku oso, isoine ’suḇawes roi ḇefrur ayin ḇeyun ḇe farmakakok’—Perserikatan Bangsa-Bangsa (PBB).​—Dan. 11:31. w20.05 6-7 ¶16-17

Mansei na ḇeso fa ḇeyaksewar snonggaku ḇeḇinggwanbur sidang sya? Manbaryas ḇero sidang syakam isoine penatua, perintis, ma kina sesi. Wakfawi bati ḇaido kina Bedi oso ḇyinggwanbur sidang kwar ke? Wasrow i rofyor baryas ro rum ḇe rum ḇaido ro moḇ kawasa ḇebor sisya ro ya ke? Wasrow oso kwar bo imarisen ido, wakofen yoḇ i bo woḇe nari wakofenḇair moḇ ḇyarek ro ya ḇaido nomor telfon ḇyedi ḇe penatua ḇefanam ro moḇ anya fa sra smamfar i. Penatua oso ḇenir ḇe Thomas doḇe, ”Ḇepon ya, yafuken naek srar sya mansei ḇefawi moḇ sḇarek ro kirine. Ḇaido yafuken mansei ḇefawi naek srar ḇeso fananjur wer ḇa sya. Mura, fyor yarakaki naek srar ḇeḇinggwanbur sidang ansine, yafuken romawa sesi ḇaido ḇero kina sesi. Fyor iwara, sun ker romawa sesi ḇe fananjur, ma sakḇe manbaryas kako. Inja, fandun fa kofnoḇek si kako insama skaḇer ḇe Yahwe I wer.” w20.06 24 ¶1; 25 ¶6-7

Roi ḇekenem ro supswan ine kam, snonggaku koine monda iso ḇena samambraḇ fa kofawi moḇsa kokenem pyum raya. Inja, bisa kofadwer kakara ma kenem koḇena insama koḇe snonggaku ḇefrur pyum syadi. (1 Kor. 6:9-11; Kol. 3:9, 10) Bisa kofarkor kako sneuser koḇena fa kobukimambir roi ḇekaku ma ḇesasar na. (Ibr. 5:14) Bisa kosewar fa kofasnai saswar, frur pyum, ma sawarwar. Ma bisa kosewar fa koso Yahwe rari Ḇyena, isoine nanapes. Rariso koḇesyowi kaku samambraḇ kosmai fa kobukiswarepen ine? Nyan oser ya iso koswarepen roi Yahwe ifrur kwar fa ifnoḇek ma syambraḇser ko. Rarirya, kokyar na ifnoḇek ko ḇesya kwar. (Mz. 77:12; 78:4, 7) Nyan ḇese wer iso koswarepen roi ḇepyum snonggaku ḇese sifrur yoḇ ko na, ma kokofen kasumasa faro roi sifrur kwar na. Sasewar fawawi oso doḇe snonggaku ḇefawi ḇekofen kasumasa, sima sna marasrisen syadi. w20.05 23-24 ¶12-13

Kowasenpan, Moses dores ro bon karui ma myam Yahwe fyasnai baba Ḇyena ro ḇarpon ḇyeja. Na moḇsa Moses ḇyaḇir rai? Syap Pemahaman Alkitab doḇe ”rya inema fasasnai ḇeba kaku snonggaku smam randak rofyor Yesus ryama ḇe supswan ine ḇaim”. Moses ryower malaikat oso doḇe, ”Yahwe, Yahwe iso Allah ḇesawarwar, ḇefrur pyum, ḇemasasor fasaw ḇa ma ḇefo kuker saswar soasuser ma kakaku, ḇefasnai saswar soasuser faro snonggaku syaran ma syaran sya. Byuk ampun faro roi ḇesasar, ḇaḇeyuk, ma sasar.” (Kel. 33:17-23; 34:5-7) Moses na iswarepen sarisa ani fyor ikofenḇair snonsnon Yahwe imnis wos ḇero mnuk faro ras ine. Fafisu kun snonsnon Yahwe, na kokarauser kako moḇ kenem Ḇyena rai. Koswarepen kaku rari ḇepyum Ḇyena, raris papoik, fawinanem, nanapes, ma saswar. Kokarauser na ma rari ḇesena ido, na koḇesyowi syadi Yahwe I.​—Mz. 77:11-15. w20.06 8-9 ¶3-4

Yesus doḇe na sifawi manfamyan ḇyesya kukro sima siswaryae si. (Yoh. 13:34, 35) Mboi insama kakyar koḇena nako, fandun fa kofrur roi ono. Kakyar koḇena neknam ro saswar komam ro Allah kawasa Ḇyesi monda ḇa. Kukro? Kakyar koḇena neknam ro saswar monda ido, na napyan fa napromes. Imnis raris, wafawi penatua ḇaido perintis oso ifrur sasar ḇeba kaku ido, nane bisa nafnai fa wamewer wafarmyan ḇe Yahwe I. Oroḇa ido, fafisu oso ifrur fa wafafayaf ḇaido ibur kakaku ya bo doḇe roi kokyar na nsasar, na wamewer wafarmyan ḇe Yahwe I wer. Inja, wakyar ḇe Yahwe I snar mam monda ro rosai snonggaku sya sifrur na ido, nari kakyar Bena nadworen ḇa. Fandun fa kakyar Bena neknam ro wis ḇefanam kaku kuker Yahwe I ma wakyar nako rosai Refo fyarkor ḇekur Yahwe I, ima kakaku nairi.​—Rm. 12:2. w20.07 8-9 ¶2-3

Fawar nabor naisya ḇefasnaiḇair malaikat sisya sifnoḇek ko fa kosrow snonggaku ḇeḇinggwanbur sidang kwar ḇemarisen ḇekaḇer ḇe Yahwe I wer. (Why. 14:6) Imnis raris, mambesrar oso ro Ekuador snori Silvio, dor ro nadi ḇe Yahwe I insama iwan snonggaku oso ryama ifnoḇek i fa kyaḇer ḇe sidang. Rofyor isya ḇyenadi kaker, sinuk kedwa ro rum ḇyedi. Penatua ri suru surama yoḇ i. Ro ras surama anya, susambraḇser i ma subuk fafnoḇek fyandun na. Na koryaḇ kaku kukro kofnoḇek snonggaku ḇeḇinggwanbur sidang kwar sya fa skaḇer ḇe Yahwe I. Mambesrar perintis oso syewar kaku fa ifnoḇek snonggaku ḇeḇinggwanbur sidang. Doḇe, ”Fyorno ido, yakain yakara ḇeḇinggwanbur Yahwe ansine skaḇer kwar ido, na yaswar si ra. Yaryaḇ kaku yana syowi ḇeba fa yafararur kayam fnoḇek Yahwe I fa yafnoḇek manfamyan iswar kaku fa isasyarbur Setan dunya ḇyedine ma kyaḇer ḇe sidang.” Ḇinggwanbur sidang kwar ido, wakyar kaku Yahwe iswar Au kaker. Imarisen insama kwaḇer ḇe I. Yahwe isya iwaf Au rawo kwaḇer, ma nari iryaḇ kaku isaser Au fa kwaḇer ḇe sidang wer. w20.06 29 ¶16-18

Allah Yahwe, ”Guru Ḇeba” koḇedi, fyasos fawar ro Refo fa byukifarkor ko. (Yes. 30: 21) Na kofarkor kuker kokarauser fawar ro snonggaku ḇefasnai rari ḇepyum imnis rosai Allah imarisen na. Na kofarkor kako kuker kawos roi ḇekur snonggaku ḇefasnai sne ḇerun ḇa sya. (Mz. 37:37; 1 Kor. 10:11) Kokarapan fawar ro Raja Saul i. Fafisu byabo kaker, fyasnai sne ḇerun. Ifawi samambraḇ ḇa ḇyena ma ikyar manggun ḇa na daksmai fararur nabor syadi. (1 Sam. 9:21; 10:20-22) Imbape, fafisu dakḇe raja kwar bo fyoro ḇa mura, dararer i ma ifrur roi siwan yoḇ i ḇa. Ras oso, imewer iwaf kawan Nabi Samuel i bo ryap farsarser ro rum ari, iso fararur ipok ifrur na ḇa. Eḇedari Yahwe imsor faro Saul i ma ḇye raja wer ḇa. (1 Sam. 13:8-14) Kun farkarkor ro fawar anine ma komewer kararer ko ido, kofrur roi ḇepyum. w20.08 10 ¶10-11

Kaku ḇae, roro Kristus i Yahwe byuk ’bar snon sya’ fa sfarkin sidang Ḇyedi. (Ef. 4:8) Bar snon ansine siso Raryur Naek Ḇefarkin warpu ḇefnoḇek si, anggota Panitia Cabang, pengawas wilayah, ḇebuk farkarkor ro sekolah Alkitab, penatua ro sidang, ma hamba pelayanan sya. Naek ansine sismai ramrem kuker rur ḇesren insama smamwarek Yahwe domba Ḇyesi ma sisambraḇser sidang. (1 Ptr. 5:2, 3) Naek ansi sismai ramrem kuker rur ḇesren fa suf fararur ḇeḇeso. bar ḇero baken koḇena, raris ḇramin ma wemin, sufararur kayam fa susyopan baken koḇena ḇesiper. Rarirya kako, naek ḇesmai ramrem ansine sfararur marḇak kaku fa sifnoḇek sidang-sidang na. Sisewar sanandik faro manggunsi ḇa. Imbape, sisewar kaku fa sisambraḇser naek srar sya. (1 Tes. 2:6-8) Kokofen kasumasa faro Yahwe I kukro byuk naek ḇemam ḇepon fandun ro snonggaku ḇese ro fandun sena! w20.08 21 ¶5-6

Roi na ḇefrur fa koryaḇ kobaryas iso kukro imbe kofnoḇek snonggaku ḇembrus ma ḇekandera sya. (Mat. 9:36) Fandun kaku fa sifawi kakaku ḇekur Karajan Allah. Yahwe imarisen snonggaku syakam sismai fawawi ḇekaku ma sismai fasaspar. (1 Tim. 2:4) Kokara mura faro payamyum nari kosmai na kada, nari koryaḇ fa kobaryas. Bisa kofnoḇek snonggaku sya fa sismai fasaspar. (Rm. 10:13-15; 1 Tim. 4:16) Kofandun kako roi bebor ḇesrow fa kobuki baryas ma kofawi kaku moḇsa koḇepake roi bebor anna rai. Yesus fyasnai ḇe manfamyan ḇesya kwar nyan fa sbaryas abar ḇepyum ya rai. Ikofenḇair rosai monda sun na, moḇsa risai sbaryas rona, ma rosai nari sawos ya. (Mat. 10:5-7; Luk. 10:1-11) Ro baboine, Yahwe organisasi Ḇyedi fyasos kwar Roi fa Kobukifarkor ḇeser vidio ma syap-syap ḇepyum kaku ḇefnoḇek ko rofyor kobaryas ma kobuk farkarkor. Ma organisasi fyarkor ko kwar nyan koḇepake pyum na. Mura, komgak wer ḇa ma kokir syadi ro fararur ḇesren ine.​—2 Tim. 2:15. w20.09 4-5 ¶6-7, 10

Kwarapan Manwawan Yohanes moḇsa ḇyaḇir rai fafisu ryower snonggaku ifnoḇek kwar fa sifawi kakaku ya, sfarmyan pdef ḇe Yahwe I. Yohanes myam snonggaku Kristen ḇesoasuser ansya simnis ra romawa ḇyesi. Inja, rofyor sismai samswen nabore, syewar kaku fa syambraḇser kakyar sena. Rarirya kako, na komarisen rofyor komam romawa koḇesi ḇaido snonggaku kofnoḇek kwar fa sifawi kakaku ya, sbuk kenem sena fa sfarmyan pdef ḇe Yahwe I. (3 Yoh. 3) Indokada taun 98 Masehi, Yahwe fyarkin Yohanes kuker rur ḇesren fa fyas syapram ri kyor. Yohanes fyas syapram anskoya insa nafnoḇek snonggaku Kristen ḇesoasuser sya fa sisambraḇser kakyar sena ma simbran pdef ro kakaku. Yohanes imgakwarek kukro snonggaku ḇebur kakaku sya sfarkor ninyan sidang-sidang kwar. (1 Yoh. 2:18, 19, 26) Soḇe sifawi Allah kwar, mboi sisouser Yahwe parenta Ḇyena ḇa. w20.07 20 ¶1-3

Kokyar faro anun kobaryas anya, inja komarisen fa korwas na ḇe snonggaku ḇebor syadi. Kokyar faro Allah asas Ḇyena ro Refo. (Mz. 119:42; Yes. 40:8) Komam kada ḇardadi ro Refo ndarirya kwar. Komam moḇsa snonggaku sya sfadwer kenem sena rofyor sisouser farkankin ro Refo na. Nane nafrur fa kokyar fandun fa snonggaku syakam sifawi abar ḇepyum Karajan ya. Kokyar kako Yahwe iso Knam ḇebuk angginem fa kokofenḇair na, ma kokyar Yesus iso Yahwe ryem kwar fa ḇye Raja ro Karajan nanggi. Rosai monda ḇekur ko na, Yahwe nari syambraḇser ma fyadiren ko pdef. (Mz. 46:1-3) Oso wer ido, kofawi Yesus ryo nanggi mboi kokyar isya fyarkin fararur ḇaḇebaryas ine kukro Yahwe byuk papoik ḇe i kwar. (Mat. 28:18-20) Kakyar nafrur ko fa kokyar Yahwe nari ḇyebarakas sasewar koḇena. w20.09 12 ¶15-17

Fyorno ido, imbesrar koḇesi sfandun ono ḇeyawoswarek si fafisu roi ḇedwarek naisya. (Yes. 1:17) Imnis raris imbesrar kabom oso, na fyandun oso ḇefrur pyan ma ḇemam pyan snon sya fararur sena. Imbesrar ḇesinan kwar na fyandun oso fa ḇeyawos pyan ḇe dokter. Ḇaido imbesrar perintis ḇefnoḇek ro fararur ḇesren ḇesena, fyandun ono ḇeyawoswarek i fyor ono sisasurem kukro rya byaryas ker raris perintis ḇesesya ḇa. Mgomampan contoh ro Yesus i. Yesus dawoswarek ḇeri bin ḇesouser sya fafisu kawasa sya skara sasar bin ansine. Rupa ra dawoswarek Maria fafisu Marta dawos nabor i. (Luk. 10:38-42) Ro rarwan ḇesuru, dawoswarek Maria wer fafisu ḇesesya simsor i kukro skara bo soḇe ifrur roi ḇemnis ḇa kwar. (Mrk. 14:3-9) Yesus ifawi roi Maria kyara ya ma byuk wos sandik ḇe i. Yesus ikofen kako ḇardadi oso snar rosai Maria ifrur anna nari sap na ker fafisu angginem ḇepyum ya sbaryas na ro supswan ḇesiper. w20.09 24 ¶15-16

Manfarandows ḇepyum ifawi na domba ḇyesi bisa siḇor. Domba oso imbran ḇyinggwanbur nai ḇyesi ido, manfarandows ani na myun i ḇa. Kokarapan rosai Yahwe ifrur fa ifnoḇek manfamyan Ḇyedi, ro swaf ono ḇyinggwanbur I kwar. Nabi Yunus isouser Yahwe I ḇa ma imewer rya ḇe Niniwe. Rarirya mboi, Yahwe ibur Yunus i ḇa. Raris manfarandows ḇepyum, Yahwe ifnoḇek ma syambraḇser i insama ifrur fararur ḇyedi fa imnai. (Yun. 2:7; 3:1, 2) Raimnai, Yahwe ḇye rokaker ḇesur famfnom fa byukifarkor Yunus insama ḇyesyowi kankenem ro snonggaku sya. (Yun. 4:10, 11) Farkarkor rosai kosmai ya? Penatua sya spapum awer fa sifnoḇek ḇeḇinggwanbur sidang. Imbape, sisewar fa sifawi roi ḇefnai fa naek ḇaido srar oso ḇyinggwanbur sidang. Ma fafisu kyaḇer ḇe Yahwe ido, penatua sfasnai saswar faro i pdef. w20.06 20-21 ¶10-12

Fafisu Uni Soviet isapi ro taun 1991, ro swaf ono Allah kawasa Ḇyesi ḇeḇarek ro moḇ ḇero baḇ papoik ḇyedi sismai ḇaḇemkei. Daniel dapḇair na ḇe ”fafnoḇek kermgun”. Nafnai fa simkei fa sbaryas, ma fyoro ḇa mura manbaryas ḇero sup randak Uni Soviet sḇepoik ro na, barbor sedi dek syadi wer. Ḇarpur ya, Rusia ma ḇesowarpu i sya sḇe raja bar wambrur. Pamarenta oso na dakḇe raja bar wambrur ḇaido raja bar wamires kukro ifrur roi ri kyor nane: (1) ḇyepoik ro moḇ Allah kawasa Ḇyesi sḇarek ro na ḇaido ḇyewayam si, (2) roi ifrur ḇe Allah kawasa Ḇyesi nfasnai dayin kaku Yahwe I, ma (3) fyamfaḇri kuker raja ḇese. Rusia ma ḇesowarpu i sya sḇepoik ro moḇ Allah kawasa Ḇyesi sḇarek ro na ḇaido sewayam si. Sidwarek fararur ḇaḇebaryas ma sewayam naek srar koḇesi sibor kaku. Roi sifrur anna nfasnai sayin kaku Yahwe I ma kawasa Ḇyesi. Ma sfamfaḇri kuker raja bar wamires, isoine Inggris-Amerika. w20.05 12-13 ¶3-4

Kosewar fa kobuk farkarkor kuker nyan ḇepyum syadi. Ro supswan ine ḇesiper, koisya kobuk farkarkor Refo faro snonggaku ḇebor. Komarisen kona roi ḇefasos ko fa kobuk farkarkor Refo. Naiso ḇefrur fa imbe kawos nabor roi komarisen na. Imbape ḇefarkin Farkarkor Baryas, Farkarkor Refo ro Sidang, ḇaido ḇebuk farkarkor Refo ro rum, na siswarepen insama sipok sawos nabor awer. Insama farkarkor ya neknam kaku ro Refo, ḇebuk farkarkor isasor i fa dawos nabor awer ma ikofenḇair awer roi nakam ifawi kwar ro mnuk oso ḇaido farkarkor anya. (Yoh. 16:12) Kokara mura faro roi kofawi ro fafisu koḇebaptis anya ma roi kofawi ro kirine. Fyor anya imbude kofawi monda farkarkor ḇefandun kaku ro Refo na. (Ibr. 6:1) Kofandun oras kawan kaku insape kofawi roi nabor ro kirine na. Inja, kosasor ko insama kokofen ḇeri awer roi nakam kofawi kwar na faro ḇefarkor Refo kuker ko. w20.10 14-15 ¶2-4

Yahwe kyinfir pyum kaku sna ma kma faro Yesus i. (Mat. 1:18-23; Luk. 1:26-38) Moḇ Maria kyarem malaikat ani, kofawi ima iswar kaku Yahwe I ma wos Ḇyena Refo ya. (Luk. 1:46-55) Ma komam ro moḇ Yusuf iso pyum akurfasnai ro Yahwe I, kofawi iswar Allah ma imarisen ifrur roi Sinan imarisen na. (Mat. 1:24) Koswarepen, Yahwe kyinfir sinan ḇenana faro Yesus i ḇa. Kofawi rofyor Yusuf ma Maria sukapar Yesus i kwar, roi sufrur na nfasnai kaku sima senana ḇa. (Luk. 2:24) Inja, kokyar sima sikenem syadadi ḇa. Rya Yusuf ma Maria suna kumpan ḇaido robebor nasrow kuf ḇa faro roma inai suḇesya kukro rya sisyadi ro fik kwar. (Mat. 13:55, 56) Yahwe kyadaunwarek Yesus i ro roi ḇemun ono, mboi idwarek i ḇa ro fafrowes nakam. (Mat. 2:13-15) Rupa ra, nya fafrowes ro karyer ḇyesi kukro randak ya sikyar i ḇe Mesias ḇa. (Mrk. 3:21; Yoh. 7:5) Rya ismai fafrowes ḇese wer, isoine kmari Yusuf i, imar ibur i. w20.10 26-27 ¶4-6

Ras oso ḇaḇir kwain ro manggundaw, ma oso ifnoḇek Au ḇa rofyor wasmai samswen ke? Ono sisya skara rarirya, Allah manfamyan ḇesouser Ḇyesi kako. (1 Raj. 19:14) Kwara rarirya ido, waswarepen Yahwe asas Ḇyenane: ”Nari yarir aw ḇa ma nari yabur aw ḇa.” Inja kuker kakyar nari kokofen, ”[Yahwe] ifnoḇek aya, inja nari yamkak ḇa.” (Ibr. 13:5, 6) Manwawan Paulus fyas wos nane faro naek srar ḇero Yudea rya taun 61 M. Wos ḇyena namnis kuker manfasfas Mazmur wos ḇyena ḇero Mazmur 118:5-7. Raris manfasfas Mazmur, Paulus ifawi Yahwe nari ifnoḇek i pdef. Rupa ra, taun ri suru fyor Paulus fyas syap Ibrani ḇaim, imkei ro roi ḇemun ḇeyun marmar fafisu wamdoḇer ya myun kaku kapal dek anya. (Kis. 27:4, 15, 20) Ro marandan anya, ma taun-taun ḇepon ya, Yahwe ifnoḇek Paulus ro nyan ri ḇeso. w20.11 12 ¶1-2

Rosai ḇefnai fa kokara ker awer bo koḇo fafisu naiwara napyum syadi? Swarapepen ḇeradirya nafrur fa koswarepen roi ḇepyum na monda bo koḇefnder roi ḇepyum ḇa kosmai ro ras-ras naiwara. Imnis ra, er Israel ḇepon siwara. Fyor sisasyarbur sup Masir kwar, fasaw kaku sefnder kandera sena ro diwa. Siswarepen monda ḇe roḇean ḇepyum san ro diwa na. Soḇe, ”Fyor iwara nggoro sup Masir anya, nggan ker in mboi nggokowes na ḇa, ma ampek, semangka, bawang ram, bawang ḇerik, ma bawang ḇepyoper!” (Bil. 11:5) Ḇape komam kaku kada, roḇean anna sikowes na ḇa ke? Oroḇa. Sikowes na kuker ḇaḇyak ḇekaki, isoine sfararur marḇak ḇe women faro snonggaku Masir sya. (Kel. 1:13, 14; 3:6-9) Mboi sefnder kandera sismai anya. Roi siswarepen monda iso roḇean ḇeyan pyum na bo smam faro roi ḇepyum insape Yahwe ifrur faro si na ḇa. Rari sfasnai nane nafrur fa Yahwe imsor kaku si.​—Bil. 11:10. w20.11 25 ¶5-6

Fafisu ono ido, imbude kofuken rosai ḇefnai fa kenem koḇenane nakwan ḇa ma nafo kuker kandera. (Ayb. 14:1) Fyoro mura roi nane nari nafnai fa koryaḇ wer ḇa ḇaido koḇesanekar. Yahwe manfamyan Ḇyesi ro fafisu naiwara sino sisya sakḇaḇir rarirya. Ḇepyum ḇa syadi, sia skara ipyum ya simar monda. (1 Raj. 19:2-4; Ayb. 3:1-3, 11; 7:15, 16) Imbape, Yahwe byuk sneprei ma syambraḇser si ḇesya kwar. Inja, sikyar Yahwe I pdef. Farfyar sena sfas na ro Refo fa nfarkor ma nsambraḇser ko. (Rm. 15:4) Imnis ra Yakub roma ḇyedi, Yusuf i. Kankenem ḇyedi nfadwer ḇeri, ḇyarek wer ḇa kuker kmari ḇemanmin kaku i ani, mboi ḇyewomen faro ḇebarara Masir ḇefawi Yahwe I ḇa. (Kej. 37:3, 4, 21-28; 39:1) Mura Potifar swari kyursof famfnom Yusuf bo doḇe Yusuf imbe ḇyeraro i. Potifar syewar fa ifawi roi ḇekaku ya ḇa bo isun Yusuf i ḇe bui, ma sfes wemin ḇyesuya kuker kabrai manggarmom. (Kej. 39:14-20; Mz. 105:17, 18) Roi nane nafnai fa Yusuf iryaḇ ḇa kaku ma ḇyesanekar! w20.12 16-17 ¶1-4

Inja, Yesus doḇe koḇenadi faro fasasren Allah snonsnon Ḇyedi. Inema rosairya kaku? Kofasren roi oso ido, ima kofrur roi ani fa isren. Mboi sia skara, ’Yahwe snonsnon Ḇyedi ima isren kwar ḇae. Inja, rosai ḇefnai fa kofrur I fa isren wer?’ Insama kofawi roi ine ido, ipyum fa kofawi rosai ḇeḇair ro snonsnon oso resari. Snonsnon ima roi ḇefandun kaku. Ima wos oso sfas ḇaido sap monda ḇa. Snonsnon ḇyeḇair faro snonggaku ani, isoine moḇ snonggaku ḇese smam i raya. Inja, ḇefandun ya iso nyan sfas ḇaido sap snonsnon ani ḇa, mboi rosai snonggaku sya skara fyor srower snonsnon ani. Iso ḇefnai fa Refo ya doḇe, ”Kona snonsnon ḇepyum ipyum syadi ro arasai ḇebor.” (Ams. 22:1; Pkh. 7:1) Snonggaku ḇebor sisewar fa sifrur snonsnon Yahwe iḇye ḇa. Sifrur na kuker sikofen roi ḇekaku ḇa ḇekur Yahwe I insama snonggaku sya skara sasar I. w20.06 3 ¶5-7

Komgakwarek syadi mura, nane nafrur fa kokara roi eḇesena wer ḇa. Imbude komgakwarek kukro kona pipi fa kobukikowes roi kofandun na ḇa. Ḇaido koduf rawo jadi fa kofararur wer ḇa. Komgak kako nari ras oso kosoasuser ḇa fafisu sifrowes ko fa koyuk Allah sasoser Ḇyena. Kero wer nari Ibiris ma ḇeso i sya siḇe smun Allah kawasa Ḇyesi. Inja, komgak rosai nari kofrur ro fafisu anya. Imbude kokara bo koḇe, ’Yamgakwarek faro roi nane nama nsasar ke?’ Yesus ikofen ḇe manfamyan ḇyesi radine, ”Mkomkakwarek awer.” (Mat. 6:25) Inja, Yesus doḇe kopok komgakwarek awer faro roi nakam ke? Roḇa! Koswarepen Yahwe manfamyan Ḇyesi ro fafisu naiwara sia sakna makakwarek kako, mboi Yahwe iswar si kaker. (1 Raj. 19:4) Ḇekaku ya, Yesus ikofen rarirya insama kokyar syadi. Imewer komgakwarek syadi kenem koḇena kukro nari nafnai fa komam ḇepon fararmyan koḇena ḇe Yahwe I ḇa. w21.01 3 ¶4-5

Snonswa sya na sbuk kankarem ro ḇarpon Yahwe ma Yesus faro nyan sifrur pyum kina sesya. (1 Ptr. 3:7) Yahwe iso ḇebukor faro kina ḇyesi ro nanggi ma supswan, nya papoik fa ifrur sasoser faro romawa ḇyesi. Ma dor kaku si fa sisouser sasoser anna kam. (Yes. 33:22) Yesus ḇyebukor ro sidang Kristen, i kako nya hak fa ifrur sasoser ma dor ko fa kosouser faro i. (Gal. 6:2; Kol. 1:18-20) Imnis ra Yahwe ma Yesus su, ḇeḇebukor ro kina Kristen sya sna papoik fa sbuk sasoser faro kina sesi. (Rm. 7:2; Ef. 6:4) Ḇape, papoik sena nasyadi ḇa. Imnis raris, sasoser sifrur nakam neknam ro wos farkankin ḇero Refo ya. (Ams. 3:5, 6) Ma, sna papoik noḇa fa sifrur sasoser faro snonggaku ḇesun ro kina sena ḇa. (Rm. 14:4) Oso wer ido, fyor romawa sesi siba ma sḇarek ḇese kwar, romawa ansya na sfasnai syowi pdef ḇe sinan sya, boi sḇebukor faro romawa sesya wer ḇa.​—Mat. 19:5. w21.02 2-3 ¶3-5

Nyan ḇepon kaku ḇebukor ro kina oso fyasnai iswar kina ḇyedi iso fyasos roi sfandun ro ras-ras na. Ḇape na ḇepon syadi fa iswarepen ya iso isaramper kina ḇyesi fa sna wis ḇepyum kuker Allah. (Mat. 5:3) Fafisu spai Yesus ro ai kandera ma fanam imbe imar anya, imbe ifawi oso isya na ḇemam pyan Maria fandun ḇyena ro ras-ras. Ḇyekandera kaku mboi dor Yohanes i fa myamwarek Maria i. (Yoh. 19:26, 27) Mambesrar oso ḇebukor ro kina imbude duf fararur ḇefandun nabore. Fandun fa fyararur myaren ro moḇ fyararur ya insama naser sanandik faro Yahwe snonsnon Ḇyedi. (Ef. 6:5, 6; Tit. 2:9, 10) Imbude nya fararur ḇese wer ro sidang, imnis raris myamfar naek srar sya, syambraḇser si, ma fandun fa iryaḇ ro ḇaḇebaryas. Oso wer ido, fandun fa fyarkor myaren Refo ya fnoḇek swari ma romawa ḇyesi. Nari sesyowi kaku rosai ifrur kwar insama sismai payamyum, marisen, ma sfanam pdef ḇe Yahwe I.​—Ef. 5:28, 29; 6:4. w21.01 12 ¶15, 17

Refo ikofenḇair binswa ḇekir oso nari myamwarek fararur ḇero rum ya dori, roi kyowes na ma ḇeyuf fararur ḇero yaf na, ma farḇaḇyan na. (Ams. 31:15, 16, 18) Ima binfyan risya ḇa ḇepok fa ḇebuk kakara ḇyena ḇa. Swari ikyar faro i ma iḇe ryower kakara ḇyena. (Ams. 31:11, 26) Rofyor snonswa oso ifrur pyum swari rarirya ido, nari swari imarisen ikunem faro i. Yesus ifrur roi ḇeba nabore. Mboi ikunem pdef faro Yahwe kuker kyara ḇa Yahwe myamkyof i. (1 Kor. 15:28; Flp. 2:5, 6) Bin oso imbude nya ḇaḇekir nabore. Mboi iso Yesus nyan ḇyena ido, nari ikunem pdef faro snon byuk ya bo ipok kyara ḇa na swari myamkyof i. Imarisen isonem eḇe snon ya snar iswar i. Imbape ḇepon kaku ya, ifrur roi ani snar iswar ma ḇyesyowi Yahwe I. Binswa Kristen oso ikunem faro swari raryano, nari ipok isonem swari ḇa fyor dor i fa ḇyeyuk sasoser ma wos farkankin ro Refo ya. w21.02 11 ¶14-15; 12 ¶19

Saswar faro Allah nafnoḇek Yahwe manfamyan ḇyesi fa sfarmku fyor sismai ḇaḇewayam. Imnis ra, rofyor manwawan sya ssun siḇe ḇarpon kankain karkara agama Yahudi bo siwan si fa simnai sbaryas, saswar sena faro Allah nadif si fa ’siso syadi faro Allah ro siso snonggaku’. (Kis. 5:29; 1 Yoh. 5:3) Saswar ḇesambraḇ ḇerarirya kako ḇesambraḇser naek srar koḇesi ro baboine, ḇebor ro fandu si sores nako fa spampum pamarenta ḇerarmomen ma ḇepoik sya. Samaido koḇeḇirḇar ḇa, komam naḇe fakamaman fa kofarmku fyor kosmai ayayin ro dunya ine. (Kis. 5:41; Rm. 5:4,  5) Rofyor kina manggun koḇesi sidwarek ko, ine nbe roi ḇesamswen kaku dirya ḇe ko. Fyor sifawi komarisen kofarkor kakaku ro Yahwe I, ḇero kina riḇeso imbude skara sawninyan ko kwar. Snonggaku ḇese imbude skara kosawo kwar. (Mam kako Mrk. 3:21.) Imbude sidwarek ko kuker rarmomen. Roi sifrur nane nafrur kokandor ḇa. Yesus doḇe, ”Kina ro rum oso nari sembroḇ yaesi.”​—Mat. 10:36. w21.03 21 ¶6-7

Rofyor waso manbaryas ḇebuk farkarkor Refo oso ido, warower pyum kaku fafisu ḇebuk farkarkor Refo ma ḇefarkor ya suyawos kaker. Wafrur rarya ido, na bisa fa wakfnoḇek ḇeri fyor nasrow. Fyor wawos ḇaim, kwara ḇepon kaku resari. Imnis ra, mam pyum insama wasunuk awer ḇebuk farkarkor Refo ani fyor dawos kaker, wawos roi ḇese ḇa, ḇaido wawos kawan kaku. Wawos kermgun monda, buk sarber, ḇaido fakfuken ḇefasnaibos rosai mgofarkor na. Fyorno ido, imbude ḇaḇir roi ono naisya nabor fa wakofenḇair na. Raryano, bisa manen ḇefarkor Refo ani ma fasnai syowi faro i. Wafrur roi anna ido, bisa wakfnoḇek i fa isur fasaw ro rur ya. Ipyum ido, fawar kermgun pengalaman Bena faro ḇefarkor Refo ani. Imnis ra, fawaro randak wakfarkor kakaku ya, samswen wasmai na, ḇaido fanfnoḇek wasmai ro Yahwe I. (Mz. 78:4, 7) Imbude, roi fawar ani nasrow kuker fandandun ro ḇefarkor ani. Fawar ani imbude nasambraḇser i ma bisa nafrur iryaḇ fa isur ma ḇyebaptis. w21.03 10 ¶9-10

Mansei ḇefrur kaku fa kosmai bon ro fararmyan ya? Manwawan Paulus kyarem fakfuken anya rofyor fyas syapram ḇe sidang Korintus. Doḇe, ’Ayai ḇeker ya ma Apolos i ḇeruḇ ya, mboi Allah manggundi ḇardi ḇeḇuk fa rokaker ḇyena nasur ya. Inja Allah iso ḇeḇefandun ya, snar i ḇeḇuksur ya. Ḇeker ya ma ḇeruḇ ya suḇefandun manggun ḇa.’ (1 Kor. 3:6, 7) Raris Paulus i, fandun fa kobuk sanandik ḇe Yahwe I kukro iso ḇebuk bon ro fararmyan koḇena. Moḇsa kofasnai kasumasa faro syowi ḇeba kosmai fa kofararur fnoḇek Allah, Kristus, ma malaikat sya? (2 Kor. 6:1) Kofrur na kuker komyaren kosewar swaf fa kobaryas abar ḇepyum faro snonggaku ḇesesya. Koine fararur koḇena iso kokef mor Karajan monda ḇa. Fandun fa koruḇ na kako. Inja oso imarisen ido, na kosewar kaku fa korama kaḇer yoḇ i, kosrow i fa korandak farkarkor Refo kuker i. Fafisu fyarkor Refo, na komam moḇsa Yahwe ifnoḇek i fa fyadwer nyan kakara ma sne ḇyedi. Nane nafrur fa komarisen kaku. w20.05 30 ¶14, 16-18