Desember

Ro ras ḇe ras, na kofawi pyum Allah Wos Ḇyena kam ḇa. Roḇaido Yahwe na kyarem nadi koḇena ḇa imnis ra marisen koḇena. Inja nafrur fa koḇeḇirḇar. Koḇeḇirḇar faro roi nane ker ido, na nafrur fa kakyar koḇena nsambraḇ wer ḇa ma wis koḇena kuker Yahwe napyum ḇa kako. (Yak. 1:7, 8) Na nafrur fa saneraro koḇena faro ras ḇarpon nayama napromesbur ko. Manwawan Paulus byukimnis saneraro koḇena kuker yore. (Ibr. 6:19) Sbuk yor fa sikserepen wai oso fyor wam doḇer myun ma ikserepen wai ani insama dek ro karui nabori ḇa. Ḇoi yor ani ikserepen pyum rofyor rante sikyawek yor ma wai ani imuk ḇa. Imnis praf ḇefrur rante ani inako ḇa, ko kako fyor koḇeḇirḇar ker ido na nafrur kakyar koḇena nako wer ḇa. Fyor snonggaku oso ismai roi ḇedwarek, ma ḇyeḇirḇar ker ido na ikyar faro Yahwe asas Ḇyena wer ḇa. Kakyar koḇena napromes ido, saneraro koḇena kako napromes. Snonggaku oso ḇyerarirya ido, na ismai raryaḇ noḇaḇeri! w21.02 30 ¶14-15

Abraham fafisu dun kina ḇyesi fa sibur mnu Ur anya, umur ḇyeja taun ri 70 kwar. (Kej. 11:31–12:4) Ro swaf taun utin oser syadi, Abraham ḇyarek ro rum kruḇen ma imbran sup Kanaan ḇesiper. Abraham imar fafisu ḇyeumur taun ri 175. (Kej. 25:7) Imbape myam ḇaim Yahwe ifrur asas Ḇyena ndarirya, isoine ḇyuk sup anya ḇe Abraham kpu up ḇyesi. Oso wer ido, ikenem kawan ḇa fa myam fafisu mnu ani, isoine Karajan Allah, dores. Rarirya mboi, Refo doḇe Abraham ”ḇyemansar ma iryaḇ”. (Kej. 25:8) Samswen ḇekur i na nabor fafaya, mboi ikyar nako ma iwaf Yahwe I ḇesya kwar. Isusu ḇa kukro? Snar Yahwe kyadaunwarek i ma ifrur pyum i ḇe bati Ḇyedi isof imar. (Kej. 15:1; Yes. 41:8; Yak. 2:22) Raris Abraham i, kowaf kako ”mnu ḇena araref ḇenako”. (Ibr. 11:10) Imbape, koma kowaf mnu ani fa Allah ḇyawes na ḇa. Karajan Allah dores kwar ro taun 1914 ma ḇyepoik ro nanggi kwar. (Why. 12:7-10) Koisya kowaf Karajan ani ḇyepoik kaku faro supswan ine. w20.08 4-5 ¶11-12

Insama korower pyum snonggaku ḇesesya, fandun fa kona sne ḇerun ma kokḇaḇ. Ine roi ḇepyan ḇa, ḇape na kosmai fainda ri kyor. Ḇepon ya, na kokara sasar ker snonggaku ḇesesya ḇa. Ḇesuru ya, bisa kofawi mnis naek srar koḇesi roi sḇaḇir na ma roi ḇefnai fa sifrur roi oso insama bisa kofasnai sawarwar faro si. Ḇekyor ya, kofnoḇek snonggaku oso fa myambir pyum manggundi. Fyorno ido, na kofawi mnis roi koḇaḇir na fyor kofawar kwar roi ḇekur ko na ḇe snonggaku ḇese. Naek srar ḇeḇeso imbude samswen fa sikofenḇair roi sḇaḇir na kukro roi ḇekur si ro fafisu naiwara, moḇ siba ro ya, ḇaido rari sena. Imbude sfandun swaf kawan insape sfawar roi sḇaḇir na ḇe ko. Komarisen kofawi roi ḇero sisnesna ido fandun fa koso Yahwe I kuker kokḇaḇ faro si kada. Rarirya nari simarisen sfawar roi sikram ro sisnesna ḇe ko. Ma fafisu sfawar yoḇ ko, ipyum fa korower pyum si. w20.04 15-16 ¶6-7

In sya na sisya ro moḇ roḇean na naisya ma sro war ḇefamfnom ḇa. Mandaswan sya ipyum fa sifawi swaf ḇesrow fa sra sraswan. Kokarapan fawar ro Saksi oso ḇeraker aimando Pasifik. Ras oso, dor misionaris fa sura suraswan. Misionaris ani doḇe, ”Meser arwo kusrow ku ro oras siw ya in.” Mboi naek ani doḇe, ”Bo naek na jadi ḇa. Kura ro oras kumarisen na awer mboi kura kumun pam ro oras na kusmai in sya sibore.” Mandaswan snonggaku ro awar randak siwara kako sra ḇe moḇ nari sisrow snonggaku sibor. Sisewar kako fa sifawi oras ḇepyum fa na sisrow si. Imnis raris, Yesus manfamyan ḇyesi sra sbaryas ro bait, rum ari, pasar, ma ro rum ḇe rum. (Kis. 5:42; 17:17; 18:4) Rarirya kako, fandun fa kofawi snonggaku ḇero moḇ kobaryas ro ya, roi sifrur ro ras-ras na. Komarisen kofadwer oras ma moḇ kobaryas raya insama kosrow snonggaku sibor syadi.​—1 Kor. 9:19-23. w20.09 4 ¶8-9

Nyan oser fa kobebati kuker Yesus iso koso roi sfasos ro sidang Kristen ya dori. Na koḇebati fanam syadi kuker ḇebukor ro sidang Kristen, isoine Yesus i, rofyor kofararur kayam fnoḇek naek ḇesmai ramrem ḇefarkin ko kuker saswar ya. (Ef. 4: 16) Raris ro baboine, kosewar fa kobuk pyum Balai Kerajaan koḇena kam. Iso ḇefnai fa sidang ḇeḇeso sḇe si fa seḇeryur kuker sidang ḇese. Inja, organisasi na sisasyar kumpam nabor ḇa. Ḇape, ine nafnai fa manbaryas ḇeḇeso fandun fa siso fararwei nane. Manbaryas ansi imbude sifarmyan ro sidang oso ro swaf taun ḇe taun kwar ma sfanam kuker naek srar ro diwa. Mboi kirine sor si fa sfarmyan ro sidang ḇese. Rofyor Yesus myam manfamyan ḇyesine siso pyum fasasos nane ido, na imarisen kaku! w20.04 24 ¶14

Raja bar wambrur ma raja bar wamires sufamfaḇri ker kukro oso syewar fa ḇyepoik syadi ro sumin ya. Komampan rosai ḇeḇejadi rofyor Mamun Dunya II imnai kwar, Uni Soviet ma ḇesowarpu i sya sḇepoik ro moḇ ḇebor ḇero sup Eropa. Ine nadif raja bar wamires i fa ḇyeoser kuker er ḇese insama sna militer ḇesambraḇ syadi ma sifrur organisasi oso sor ḇe NATO. Raja bar wambrur ma raja bar wamires susasyar pipi nabor fa susambraḇser militer suḇena. Sumamun kako kuker susaramper raryur ḇembroḇyae ro Afrika, Asia, ma Amerika Selatan. Taun ḇarpur ine, Rusia ma ḇesowarpu i sya papoik sena neryewen isof supswan ine ḇesiper. Oso wer ido, raja bar wambrur ma raja bar wamires sumbroḇ su roro program komputer. Oso kyursof sumin ya byuk kwar program komputer fa kyaraw pipi ma ifrur napnap polotik na. Raris Daniel ḇardadi ḇyena, raja bar wambrur iwayam ker Allah kawasa Ḇyesi.​—Dan. 11:41. w20.05 13 ¶5-6

Ro fafisu Nabi Yesaya ikenem ya, Yahwe byuk fakfuken ine ḇe kawasa Ḇyesi, ’Na awin oso ḇyefnder romawa ḇyedi ḇeyinem sus kaker ke?’ Yahwe ikofen wer, ”Ḇyefnder ido, Ayama yapok yaḇefnder au ḇaḇeri.” (Yes. 49:15) Ro Refo, mnuk kermgun monda ḇeyoḇe Yahwe ḇyair manggundi imnis ra sna oso. Mboi ro mnuk ine, Yahwe ifrur rarirya. Sna oso na iswar kaku kapira ḇyedi. Inja, Yahwe ḇye roi ine fa fyasnaiḇair ima iswar kaku manfamyan Ḇyesi. Sna sibor sya na sakkara raris bin ḇenir ḇe Jasmin, doḇe, ”Fafisu kosasus kapira, inema swaf fa kofanam yoḇ i. Ma fanamnam ḇeradine na kyain isof fyoro.” Yahwe ifawi kaku fafisu romawa Ḇyedi oso ḇyaryas wer ḇa ma dakso fananjur ya wer ḇa. Naek ma srar ḇeḇinggwanbur sidang ansine sibor sisya skaḇer wer ḇe sidang, ma ine nafnai fa koryaḇ kaku. Yahwe imarisen fa skaḇer, ma kakmarisen.​—1 Ptr. 2:25. w20.06 18 ¶1-3

Kopok komam arasai nakam ro komgasna ḇa. Ḇekaku ya, arasai ḇepyum syadi ima kopok komam na ḇa. Fafisu Yesus dawos faya ḇyedi ro bon, dapḇair arasai ḇero nanggi ḇe roi ḇepyum syadi ro arasai ḇero dunya ine. Na koryur arasai ro nanggi kuker kosewar fa kosmai kyaremso ro Yahwe I. Yesus doḇe arasai anna napok namuk ḇa ḇaido skaraw na ḇa. Ikofen kako bo doḇe, ”Ro moḇ [arasai] ḇena naisya roya, ro dia snembri isya kako.” (Mat. 6:19-21) Komam roi oso ḇyesyowi kaku ido, na kosewar kaku fa kosmai na. Manwawan Paulus danun ḇe ko fa ’komamepen roi komam ḇa na’. (2 Kor. 4:17, 18) Roi komam ḇa nane kako isoine payamyum nari kosmai ro dunya babo Allah ḇyeasas kwar na. Moḇsa kofasnai koma koḇesyowi kaku arasai komam ḇa nane? w20.05 26 ¶1-2

Roi Moses fyarkor yoḇ snonggaku Israel sya nafrur fa kakyar sena nsambraḇ ma dun sneprei faro si, raris mekem ḇemis-mis ḇefrur fa rokaker na nasur pyum. Moḇsa na nyan kobukifarkor imnis ra Moses i? Ro ḇaḇebaryas koḇena, komarisen kofasnai ro Refo faro snonggaku kosrow sya snar Allah snonsnon Ḇyedi iso Yahwe. Kobuk syap ḇe si, kofasnai vidio, ma roi ḇero situs koḇedi ḇesandik Yahwe I. Ro moḇ kofararur, rumfarkor, ḇaido fafisu kofrur marandan, kona swaf fa kawosḇair Allah ḇesaswar koḇedi ma rosai imarisen na. Kokofenḇair ḇe snonggaku kosrow sya roi ḇepyum nari Yahwe ifrur faro ko ma supswan ine. Srower na ido, insape na sifawi Yahwe iswar kaku ko. Rofyor kokofen roi ḇekaku ḇekur Kma ḇesaswar koḇedi, koisya kofrur fa Allah snonsnon Ḇyedi isren. Kofnoḇek snonggaku sya fa sifawi roi sfarkor kwar ro bondi ḇekur Allah, nama anggarkar nairi. Roi kofarkor si nama neknam ro Refo ma nun sneprei faro si.​—Yes. 65:13, 14. w20.06 10 ¶8-9

Koḇe kofnoḇek ḇemarisen ḇekaḇer ḇe Yahwe ido, rari risai fandun fa kona ya? Komam rosai kofarkor ro Yesus wos sarḇer ḇyena ḇekur romawa ḇeḇor. (Luk. 15:17-24) Romawa ani fyafko faro rosai ifrur na ma kyara fa kyaḇer wer ḇe rum. Kmari myam ḇepon i mura ifrar ma fyorepen i, inja ifawi kmari iswar i kaku. Romawa ani sneri iknon ḇa ma ḇyaḇir isyus ḇa fa kmari dor i ḇe romawa ḇyedi wer. Fyor ikofenḇair roi ḇyaḇir na yoḇ kmari, kmari iswar kaku romawa ḇyanine. Ramnai, kmari fyasnai imarisen romawa ḇyedine ibur kaḇer. Myam i ḇe romawa iswar kaku, inja fyasos munara oso ma syatu ḇepyum faro romawa ḇembror kwar anine. Yahwe imnis ra kma ḇero sarḇer ani. Iswar kaku naek srar ḇeḇinggwanbur sidang kwar sya, ma imarisen insama skaḇer wer yoḇ I. Kakfrur raris Yahwe ido, na kofnoḇek si fa skaḇer. Fandun fa kokḇaḇ, koswar, ma kofrur pyum si. w20.06 25-26 ¶8-9

Yesus doḇe ono sisya sismai kakaku ya ”kuker raryaḇ”, ḇape sismai samswen mura, sidworen ro kakyar sena ḇa. (Mat. 13:3-6, 20, 21) Imbude sifawi pyum ḇa snar mansei imbe ḇeso Yesus i, nari sismai samswen. (Mat. 16:24) Ḇaido skara sḇe snonggaku Kristen kwar ido, nari sipok sismai samswen ro kenem sena ḇa. Imbape, kokenem ro dunya ḇero baboine nari kosmai roi ḇedwarek nabore. Roi ono nafrur fa kenem koḇena nfadwer mura, kona raryaḇ wer ḇa. (Mz. 6:6; Pkh. 9:11) Naek srar sibor sfasnai sikyar sima sismai kakaku ya kwar. Moḇsa sfasnai na rai? Fafisu min sesi ono sifrur pyum si ḇa ḇaido sikenem mnis ḇa, sima suf nako kakyar sena pdef. (Mz. 119:165) Rofyor sismai samswen, kakyar sena napromes ḇa ḇoi nadworen syadi. (Yak. 1:2-4) Fandun fa kakna kakyar ḇedworen ḇeradirya. w20.07 8 ¶1; 9 ¶4-5

Rofyor wawasya Refo ḇaim, wor fafnoḇek ro Yahwe fa wasmai fainda ro roi wawasya na. Imnis ra, rofyor wasewar anun fa wafrur mnis samswen bena ido, wor fafnoḇek ro Yahwe fa wasrow wos farkin ro Refo bisa ḇefnoḇek Au. (Flp. 4:6, 7) Yahwe byuk ḇe ko samambraḇ fa kowasen roi oso. Inja, fyor wawasya farfyar snonggaku oso ro Refo, wawasenpan Auso ḇero farfyar ani. Wawasenpan rosai ḇeḇejadi ya, rosai myam ya, ma rosai ḇyaḇir fafisu ani. Wafrur na ido, na wasmai fainda nabor syadi ro farfyar ani. Raimnai kwarauser na. Fandun fa wakarauser ḇaido kwara pyum kaku rosai wawasya ma moḇsa wasouser na. Kukro? Fyor wakarauser roi wawasya ro Refo ḇa ido, imnis ra mam sonin ḇemukmuk srir famfnom na. Kokarauser na ido na nafnoḇek ko fa komam sonin ani ḇesiper. w21.03 14-15 ¶3-5

Manwawan Paulus fyafko ḇa fyor dun snemuk fa ḇye snonggaku Kristen ḇeraryaḇ ma ifawi snemuk dun ine nafrur isun ro bui. I kako imsor ker ḇa faro snonggaku ḇero Provinsi Asia ḇebur i sya. Ma kyara ḇaḇeri bati ḇese ḇesya kako na siburi. Ḇape, Paulus ikyar kaku bati ḇyesi nari sisouser i ma nari Yahwe ḇyebarakas i. Paulus ifawi kero wer nari ismai samamyai marmari, mboi iswarepen ḇesya kwar roi ḇefandun ifrur kaku iso isandik Yahwe I. I kako kyara ker moḇsa syambraḇser snonggaku ḇesesya raya. Ma ikyar pdef faro Yahwe kuker ḇyenadi ḇesya kwar. Paulus imewer kyara ker snonggaku ḇebur i sya. Ḇape ikofen kasumasa ḇe bati ḇesaramper ker i ma ḇefnoḇek i kuker souser. Oso wer, Paulus fyarkor Refo ya ḇesya kwar. (2 Tim. 3:16, 17; 4:13) Inja, ḇefandun kaku ḇe i iso ikyar kaku Yahwe ma Yesus suswar i. w21.03 18 ¶17-18

Fafisu taun 100 M ya, snonggaku Kristen ḇekaku ḇa sisun mundum ḇe sidang Kristen. Sbuk farkarkor ḇekaku ḇa ma kakaku ḇero Refo siyokef na. Ro taun anya isof ro indokada taun 1870, Allah kawasa Ḇyesi sḇe raryur oser ro supswan ine ḇa. Raris ampyampumber, snonggaku Kristen ḇekaku ḇa sisur fasaw kaku. Rarirya, samswen fa smambir manseiso snonggaku Kristen ḇekaku sya. (Mat. 13:36-43) Inema roi fandun fa kofawi kaku na kukro ro Daniel fasal 11 ine kyurfasnai ro swaf taun 100 M isof ro taun 1870, raja bar wambrur ma raja bar wamires suisya fa suḇepoik ḇa. Allah kawasa Ḇyesi sḇe raryur oser sisya fa suḇewayam si ḇa. Imbape, fyoro ḇa ro taun 1870 ya, raja bar wambrur ma raja bar wamires sufasnai su wer. w20.05 3 ¶5

Yoel ḇyardi kampam sya nari skakok sup Israel, sanpres rokaker ḇero sup Israel! (Yl. 1:4) Ro taun ḇe taun kwar, kofawi ḇardadi ine ḇyeḇair ḇe Yahwe kawasa Ḇyesi ḇefrur fararur ḇaḇebaryas pdef. Simnis ra kampam, oso ḇaḇeri ḇepok fa ḇedwarek si. Kofawi fararur ine dun roi ḇemun kwar faro ”sup”, ḇaido kawasa manfarkin agama sya sḇepoik si. Ḇape fafisu kokara pyum ḇardadi ani ḇesiper ido, insape kofawi fandun fa kofadwer fawawi koḇena. Komam kada roi Yahwe ikofen ḇekur kampam ansi: ”Nari Yayaw snonggaku ḇeraker bar wambrur [kampam] sya fa sḇinggwanbur mko.” (Yl. 2:20) Kampam ansi skurfasnai ḇe Saksi Yahwe ḇesouser Yesus parenta ḇyena fa sbaryas ma sbuk farkarkor ido, rosai ḇefnai fa Yahwe doḇe na iyaw si? (Yeh. 33:7-9; Mat. 28:19, 20) Nasnai kwar, Yahwe na ipok iyawbur manfamyan ḇesoasuser Ḇyesi ḇa, mboi iyaw roi oroḇaido snonggaku ḇembroḇ faro kawasa Ḇyesine. w20.04 2-3 ¶3-5

Koḇaḇir Yahwe kyarem ḇeri nadi koḇena ḇa ido rarso? Yakobus doḇe ’kor’ ḇesya kwar. Yahwe imsor ḇaido fyafayaf ḇa rofyor kor fawawinanem ro I. Kma koḇedi ro nanggi nari ”byuk nabor kaku” fyor koḇenadi bo kor fawawinanem ḇefnoḇek ko fa kofarmku. (Mz. 25:12, 13) Myam samswen koḇena, ifawi sneḇair koḇena, ma imarisen kaku fa ifnoḇek ko. Na komarisen kukro kofawi roi ine! Inja, moḇsa Yahwe byuk fawawinanem ḇe ko rai? Roro Wos Ḇyedi. (Ams. 2:6) Imbe kona fawawinanem ido, kofarkor kaku Allah Wos Ḇyedi ma syap-syap ḇeknam ro Refo. Imboi kofarkor mondama namnis ḇaime. Kofrur kako rosai kofarkor na. Yakobus fyas: ”Mkuffarmyan wos ani ma mkorower monda awer.” (Yak. 1:22) Koso Allah ananun Ḇyena ido, na kokain pyum kuker snonggaku ḇesesya, swaruser koḇena napyum, ma kofasnai sawarwar ya. (Yak. 3:17) Rari-rari ḇepyum nane na nafnoḇek ko fa kofarmku ma koryaḇ pdef fafisu kosmai samswen. w21.02 29 ¶10-11

Ḇefarkor Refo kuker konsya imbude nari sismai dafdif fa sisur ma sebaptis fyor sismai fafnoḇek ro manbaryas ro sidang sya. Manbaryas syakam bisa sifnoḇek ḇefarkor Refo fa sakḇebaptis ma saksun ro sidang ya. (Ef. 4:16) Perintis oso ikofen wos sarḇer oso bo doḇe: ’Snonggaku ḇero mnu ansya kam na sfaduru romawa oso ra iba.’ Doḇe ine imnis kako faro ḇefarkor Refo sya. Fyorno ido, sfandun manbaryas ro sidang sya kam fa sifnoḇek ḇefarkor anya fa daksun ro kakaku ya. Imnis ra insa romawa oso bisa ḇye snonggaku kuf na kina ḇyesi, bati ḇyesi, ma guru ro rumfarkor ḇyesi sifnoḇek i. Sifnoḇek romawa ani isoine sifrur i fa iryaḇ ma sfarkor roi ḇefandun na faro i. Rupa rairi, manbaryas ḇero sidang sya kam bisa sakfnoḇek ḇefarkor Refo anya fa daksur ma dakḇebaptis isoine sbuk wos anun, sifrur iryaḇ ma sfasnai nyan ḇepyum faro i. (Ams. 15:22) Rosai ḇefrur fa ḇebuk farkarkor Refo ya fyandun fanfnoḇek ro manbaryas ḇesesya? Snaro manbaryas ḇesesya na sakfnoḇek ḇefarkor ya fa isur ro ḇaḇerur ya. w21.03 8 ¶1-3

Snonggaku Kristen koine kam, kobabo ke koḇesinan kwar ke, komewer kaku kona nyan kankenem ri suru isoine kofarmyan ḇe Yahwe I mboi kofrur roi ḇesasar kako. Manwawan Yohanes ikofen bos kopok kombran awer ro kakaku ya bo ro fafisu anya kako kofrur roi ḇepyum ḇa na. (1 Yoh. 1:6) Insama Yahwe imarisen faro ko ro fafisu ine ma ras ḇarpon iyama ido, koswarepen kaku Yahwe isya myam roi kofrur nakam. Inja, snonggaku sya smam roi kofrur na ḇa yo, Yahwe ifawi na. (Ibr. 4:13) Kofrur awer raris moḇ dunya ine myam sasar ya. Ro fafisu Yohanes ikenem ya, snonggaku ḇebur kakaku sya soḇe snonggaku oso bisa ifrur roi ḇesasar bo ḇyebati pdef kuker Allah. Baboine, kokenem ro fandu snonggaku ḇena mamam ḇeradine. Ḇebor sya soḇe sikyar faro Allah, mboi moḇ smam sasar ya iḇese ro moḇ Yahwe myam na rai, ḇepon syadi roi ḇekur ḇe fararur farḇuk ya. Yahwe myam fararur farḇuk ono ḇe roi ḇesasar, mboi snonggaku ansi soḇe oser-oser ifrur marisen ḇyena. w20.07 22 ¶7-8

Rofyor imbesrar sya sfandun fafnoḇek Bedi ido, na wamarisen wafnoḇek si ke? Kwarapan fawar ine. Manbaryas ḇeḇeso smam imbesrar oso, swari dakḇe Saksi Yahwe ḇa. Imbesrar ine isaryar ker ryama ḇe fananjur ma ibur ḇeri fyor fananjur ya imnai. Smam fafisu ono imbesrar ine dun romawa ḇyesi kako. Inja sisasurem i bo soḇe dor kaku swari kada insama dun ker romawa ḇyesi fa siso fananjur. Imbape, sifawi ḇa bo imbesrar ine syewar kaku kwar. Nya samambraḇ oḇa fa ifrur roi nakam imnis oras ḇyena. Oso wer ido, ifawi derer monda na ḇemamwarek romawa ḇyesi ḇa. Swewar kaku insama sisasurem famfnom imbesrar ani awer kuker wamanen frur pyum ḇyena. Ma wakofenḇair ḇe snonggaku ḇesasurem ansya bo woḇe imbesrar ani fyararur marḇak kwar. Penatua sya sifawi inema roi Yahwe imarisen fa sifrur ḇe imbesrar sya nairi. (Yak. 1:27) Inja siso Yesus fa sfasnai kakara ḇemnis faro si. Penatua na sipok sor nabor ro imbesrar ansi ḇa, mboi ipyum fa sfasnai frur pyum. (Mat. 15:22-28) Penatua ḇesewar ḇepon fa sbuk fafnoḇek ido, imbesrar sya na sḇaḇir Yahwe ma organisasi Ḇyedi siswar si. w20.09 24-25 ¶17-19

Nabi Daniel fyasnai sne ḇerun pdef ma dor farkankin ro Yahwe I ḇesya kwar. Rupa ra, fafisu Yahwe ḇye Daniel i fa fyasnaiḇair Nebukhadnezar mafafu ḇyeja, syewar sanandik faro manggundi ḇa. Imboi, kuker sne ḇerun byuk sanandik nakam faro Yahwe I. (Dan. 2:26-28) Farkarkor rosai kun ro fawar ine? Rofyor naek srar sya simarisen srower faya koḇena, ḇaido kosmai bon ḇepyum ro fararur ḇesren koḇena, fandun fa kobuk sanandik nakam faro Yahwe I. Kofasnai sne ḇerun ido, na koḇe kofrur roi anna kam kukro Yahwe I ḇefnoḇek kondi. (Flp. 4:13) Kofrur roi ine ido, kofasnai koisya koso Yesus nyan ḇepyum ḇyena kako. Yesus isnefer faro Yahwe I. (Yoh. 5:19, 30) Syewar fa dunbur Kmari papoik Ḇyena ḇa. Filipi 2:6 doḇe Yesus ipok kyara fa dun Allah karapesa Ḇyedi ḇaido imbe imnis ra Allah ḇa. Yesus ifawi samambraḇ ḇa ḇyena ma ḇyesyowi Kmari papoik Ḇyena. w20.08 11 ¶12-13

Ḇefrar ro fanandi faro kankenem sismai samswen ro manggunsi ḇardi, snonggaku ḇese sipok smam ma sfawi mnis na ḇa. Nwa raryar ḇa ma ḇaḇir skara sasar Au ido, na Mefibosyet fawar ḇyena nafrur fa swambraḇ. (2 Sam. 4:4) Mefibosyet ima snon ḇepapipen diri, ma ras oso Raja Daud kyara sasar i. Imbape, imewer nya kakara ḇesasar, ḇyesyowi roi ḇepyum ismai ro kenem ḇyena. Fyasnai kasumasa snar Daud frur pyum ḇyena ro fafisu iwara. (2 Sam. 9:6-10) Inja fafisu Daud kyara sasar i, Mefibosyet myam faro roi anna monda ḇa. Mefibosyet byuk sasar ḇe Yahwe I ḇa ma faro rosai Daud ifrur na kako. Mboi kyara monda rosai bisa ifrur fa isaramper raja Yahwe ryem kwar ine. (2 Sam. 16:1-4; 19:24-30) Yahwe imarisen faro roi Mefibosyet ifrur nane, inja ḇye fa sfas fawar ḇyena ro Refo fa byukifarkor ko.​—Rm. 15:4. w20.04 26 ¶3; 30 ¶18-19

Ḇeḇeso ro sidang imbude sḇe si fa suffarmyan ḇe misionaris, perintis istimewa, ḇaido perintis biasa. Skinfir fa sbuk oras sena nasiper fa sra sbaryas ma sbuk farkarkor faro snonggaku sya. Komam ido, ḇefarmyan ro oras nakam ansine sna pipi ma nana nabor ḇa, imbape Yahwe ḇyebarakas si kuker byuk roi ḇepyum nabore. (Mrk. 10:29, 30) Koswar kaku naek srar ansine, ma komarisen sakro sidang koḇedi kako. Naek ḇesmai ramrem ma ḇefarmyan ro oras nakam sya serer monda ḇesmai fararur ro sidang ke? Oroḇa! Allah Yahwe ma sidang smam manbaryas binbaryas abar ḇepyum syakam sesyowi kaku. (Rm. 10:15; 1 Kor. 3:6-8) Ine rarirya kukro roi ḇefandun kaku faro sidang iso, imbe kofnoḇek snonggaku sya fa sakḇe manfamyan faro Yesus Kristus i. (Mat. 28:19, 20; 1 Tim. 2:4) Manbaryas binbaryas ḇebaptis kwar ma ḇebaptis ḇaim syakam, sisewar fa smam ḇepon fararur ḇaḇebaryas ro kenem sena.​—Mat. 24:14. w20.08 21 ¶7-8

Rofyor kosmai samswen ido, nari Yesus ifnoḇek ko, imnis raris wos ikofen ro mnuk ḇero ras ine. Wos ḇyenane nafrur fa kosambraḇ kaku. Rosai ḇefnai ya? Kukro imbude koisya kosmai samswen ḇemarḇak. Rupa ra, fafisu snonggaku koswar sya simar sibur ko, na koḇesaneso kaku ro ras oser monda ḇa, mboi imbude isof swaf taun riḇeso. Sia wer na sekandera kukro se mansar binsar kwar. Ḇesesya wer, sekandera kukro skara roi nabor rawo siḇor sḇerari. Mboi na kosambraḇ kukro kofawi Yesus na ’ryous ko besya kwar’, isyadi wer ro fafisu koḇoryae kaku. (Mat. 11:28-30) Refo ya ikofenḇair ḇe ko Yahwe nari iwan malaikat Ḇyesi fa sifnoḇek ko. (Ibr. 1:7, 14) Imnis raris, malaikat sya sisya sfarkin ma sisaramper ko fafisu kora kobaryas angginem ḇepyum Karajan faro snonggaku ḇeraker ’er, keret, wos, ma kawasa’.​—Mat. 24:13, 14; Why. 14:6. w20.11 13-14 ¶6-7

Komarisen ḇefarkor kuker ko ifawi rosai fyarkor na neknam ro Refo. (1 Tes. 2:13) Moḇsa kofnoḇek i rai? Kor i fa ikofenḇair roi ifawi kwar na. Komewer ko iso ḇefasnai ker knam ro mnuk ro Refo, mboi ipyum ya kor i fa fyasnaiḇair pyan mnuk anya ḇe ko. Kofnoḇek i fa myam ro manggundi rariso Allah Wos Ḇyena nafnoḇek kenem ḇyedi rai. Kofuken i wer fa ikofenḇair rosai kyara ma ḇyaḇir na kuker mnuk iwasya kwar na. (Luk. 10:25-28) Rupa ra kofuken i radine, ”Ro mnuk ine, rari rosai wafarkor ro Yahwe I?” ”Payamyum rosai nari wasmai rofyor waso pyum wos anun ro mnuk ine?” ”Wafawi kwar na ido, moḇsa ḇaḇir rai?” Kofnoḇek si fa sna fawawi ro Refo nabor monda ḇa, mboi ḇefandun syadi ya iso kofnoḇek si fa simyof roi sfarkor kwar na ma sifrur na ro kenem sena. Farkarkor Bena neknam ro Refo. Wamarisen wakir syadi ro buk farkarkor ido, nwa sne ḇerun kada. w20.10 15 ¶5-6

Kokyar kaku fararur ḇaḇebaryas angginem Karajan nari namnai ro oras ḇeyap kwar. Kokarapan roi ḇejadi ro fafisu Nuh ikenem ya. Yahwe ifrur fararur nakam imnis oras dap kwar. Swaf taun ri 120 fyor Fabruḇ Ḇeba myun ḇaim, Yahwe dap oras ḇyena kwar. Ḇarpur mura ido, Yahwe iwan Nuh i fa ḇyawes wai ḇeba. Swaf taun ri 40 ḇaido 50 fanam ḇe Faḇruḇ ya, Nuh fyararur pdef. Fafisu Nuh byaryas anun swarapepen ro Yahwe I, kawasa sya simewer srowerndi. Mboi, Nuh byaryas pdef isof ras Yahwe ikofen fa sisun ḇe wai anya dori. Raimnai, ro oras Yahwe dap kwar, kyen kedwa ya. (Kej. 6:3; 7:1, 2, 16) Kero wer Yahwe nari fyasnai fa kofawi fararur ḇaḇebaryas abar ḇepyum Karajan namnai kwar. Raimnai, nari Allah Yahwe kyakok Setan dunya ḇyedine ma dun ko ḇe dunya babo ḇefo kuker snonggaku ḇesouser faro I. Mboi ro swaf kowaf kaker ine, iḇye fa koso nyan ro Nuh i ma snonggaku ḇeryaḇ ḇesesya. Rarirya kada komam monda faro fararur ḇaḇebaryas, kokaḇaḇaḇ, ma komamwarek kakyar koḇena fa nsambraḇ faro Yahwe I ma asas Ḇyena. w20.09 13 ¶18-19

Rofyor Yahwe dapbos mansei na ḇeḇebukor ya ḇa ido, kina ḇyesi ro nanggi ma supswan ine sesapurnak ma sismai aski noḇa. Imnis raris, fyor snemuk oso sifrur ḇeri, na ono sisya sifawi ḇa mansei kaku na ḇefrur snemuk ani ma mansei na ḇebuk farkankin fyor sifrur na. Fasasos faro ḇeḇebukor ima ipyum ido, rosai ḇefnai fa baboine bin ḇebor sya sisya sḇaḇir sifrur mnis si ḇa? Snar snon ḇebor sya sisouser faro Yahwe sasoser Ḇyena ḇa ma simarisen skinfir syadi fa sisouser roi ḇero moḇ siba rona ḇaido moḇ sisur ro kina sesya dori. Ḇaido imbude sifrur siswasi imnis marisen sena fa sfasnai roi sifrur nane roi ḇepyum nairi. Imnis ra snonswa oso imbude imarisen swari iso marisen ḇyena snar kyara fyandun kaku ma imarisen fyasnai ḇe snonggaku ḇesesya ima snon ḇesambraḇ kaku dirya. Imbude kyara na jadi fa idif swari fa iswar i ḇa, ḇape na ifrur swari imgak faro i. Ma ḇyaḇir fyor swari imgak i ido, napyan fa iso marisen ḇyena. Snon ḇena kakara ma kenem ḇerarirya ḇyesyowi bin sya ḇa, ḇefandun syowi ya. Inja nyan kakara ma kenem sena namnis kuker rosai Yahwe imarisen na ḇa.​—Ef. 5:25, 28. w21.02 3 ¶6-7

Komgakwarek faro samswen oso ido, koḇenadi kor fafnoḇek ro Yahwe I. Nari Yahwe kyarem nadi koḇena ma kosmai kananon ḇesyadi ro snonggaku sya kakara sena kam. (Flp. 4:6, 7) Yahwe nari byuk kananon ro swaruser koḇena roro rur ḇesren Ḇyedi. (Gal. 5:22) Fafisu kawos ḇe Yahwe I ro nadi, kokofenḇair roi koḇaḇir kaku na. Kofar samswen koḇena ḇe I ma kokofenḇair moḇ kokara samswen anna rai. Komam mboi bisa kosasyar ro samswen anna ido, kor fawinanem ma samambraḇ ro Yahwe I fa kofrur na radiri. Imbape jadi ḇa ido, kor Yahwe I fa isaramper ko insama komgak syadi awer ma koḇoryae ḇa. Kokofen kaku roi kofandun na ro nadi koḇena ido, nari komam kaku moḇ Yahwe kyarem nadi koḇena raya. Mboi konadi kwar fama komam rya kyarem nadi koḇena ḇaim ido, kosusu awer. Yahwe imarisen kokofen mnis samswen ḇekur ko na monda ḇa, mboi konadiwarek na ḇesya kwar kako.​—Luk. 11:8-10. w21.01 3 ¶6-7

Ro baboine, ḇeyaksun ro sidang siso naek srar ḇefarḇuk kwar ma ḇena romawa sya monda ḇa. Naek srar ḇefarḇuk ḇaim sya kako sisya. Moḇsa komam ḇefarḇuk ḇaim ansine rai? Kokarapan moḇsa Yesus myam si rai. Rofyor Yesus ifarmyan ro supswan ine, dakfarḇuk ḇa ma byuk oras ma swaruser ḇyena faro fararur ḇesren ya. Yesus iwan ḇa faro snonggaku Kristen fa sfarḇuk ḇaido sfarḇuk awer. Imbape doḇe snonggaku Kristen ono sisya skinfir fa sfarḇuk ḇa. (Mam fasfas kasun ro Matius 19:11, 12.) Yesus ḇyesyowi snonggaku ḇefarḇuk ḇa sya. Myam ḇefarḇuk ḇa ansine sipyum syadi ro ḇefarḇuk kwar sya ḇa ḇaido myamkyof si ḇa. Raris Yesus i, Manwawan Paulus dakfarḇuk ḇa insama ifararur pyum ro fararur ḇesren. w20.08 27-28 ¶7-8

Manwawan Yohanes ikenem kawan ma nya fawar nabore. Samswen ḇekur i na nabor rawo bisa nafnai fa kakyar ḇyena nsambraḇ ḇa. Fama syewar monda ker fa isouser Yesus parenta ḇyena, ine kako parenta fa iswar naek srar sya. Iso ḇewar fa Yohanes ikyar kaku Allah Yahwe ma Yesus suswar i ma nari susambraḇser i fa kyamar samswen na. (Yoh. 14:15-17; 15:10) Ibiris ma dunya ḇyedine idwarek Yohanes i ḇa fa imnai iswar naek srar ḇyesi ma fyasnai na ro rosai ikofen ma rosai ifrur na. Raris Yohanes i, kokenem ro dunya Ibiris ḇyepoik ro ya. Ima dakfawi dakfasnai saswar ḇa. (1 Yoh. 3:1, 10) Ibiris imarisen komnai koswar naek srar koḇesi, mboi kobuk swaf ḇe i ḇa ido, ine nari ndarirya ḇa. Rarirya kosewar fa koswar naek srar koḇesi ma kofasnai na ro rosai kokofen ma rosai kofrur na. Kofasnai saswar ido, na kosmai payamyum ro fandu naek srar koḇesi ma na kosmai marisen pdef.​—1 Yoh. 4:7. w21.01 13 ¶18-19

Koisya kokenem ro dunya Setan ḇyepoik ya. Iso ḇefrur fa kosmai samswen ker, ma fyorno ido nafrur fa kosambraḇ ḇa. (2 Tim. 3:1) Ḇape komgak ḇaido koḇeḇirḇar awer. Yahwe ifawi samswen koḇena kam. Rofyor kofandun fafnoḇek, Yahwe ḇyeasas nari dufepen nako bramin koḇena kuker bramin raku ḇesambraḇ Ḇyedi. (Yes. 41:10, 13) Kokyar kaku Yahwe nari ifnoḇek ko, ma Refo na byuk samambraḇ ḇe ko fa kokamar samswen sarirya monda. Vidio ma drama audio organisasi sifrur na ma seri artikel ”Tirulah Iman Mereka”, bisa nafnoḇek Au fa wawasen farfyar ḇero Refo na. Rofyor mam, rwower ḇaido wawasya farfyar anna ḇaim, ḇenadi faro Yahwe insama wasrow farkarkor ḇepyum ḇe manggundaw. Wawasenpan manggundaw iso ḇero farfyar ro Refo ani. Kwarauser rosai Yahwe manfamyan ḇesouser byansi sifrur ya ma moḇsa Yahwe ifnoḇek si ro samswen sismai na. Raimnai wasouser rosai wafarkor kwar na. Wakofen kasumasa faro Yahwe snar ifnoḇek Au kwar. Ma fasnai kaku ḇesyowi fafnoḇek ani kuker swewar swaf fa wafnoḇek ma swambraḇser snonggaku ḇesesya. w21.03 19 ¶22-23

Ausya farḇuk kwar ma kwara fa swambri muyakna romawa ido, ipyum fa wafuken radine: ’Nuna sne ḇerun bo nuswar Yahwe I ma wos Ḇyena Refo ya kwar ke? Nufawi pyum kwar Yahwe kyinfir nu fa numamwarek kapira babo iswar ya ke?’ (Mz. 127:4) Insama wafawi fasos kwar fa wakḇe kma ḇaido sna ido, kwarapan: ’Na yafarkor romawa ayesi fa sifawi sakfararur marḇak ke?’ (Pkh. 3:12, 13) ’Roi ḇepyum risai na yafrur fa yakadaunwarek roma inai ayesi ro fafrowes ḇemnis ḇa nari ḇekur baken ma kakara sena?’ (Ams. 22:3) Na wapok fa wadwarek roi ḇesamswen nakam ḇa. Imboi, nyan ḇepyum wafrur fa fasos si ro samswen nari ḇekur si iso, farkor pyum si fa siswar Yahwe I kuker siso pyum wos Ḇyena ro Refo ya. (Ams. 2:1-6) Imnis ra, roma inai Besya srower sia soḇe siḇe simnai sfarmyan ḇe Yahwe ido, wasaramper si kuker farkor si ro Refo fa sifawi roi ḇefnai fa kosouser pdef faro Yahwe I. (Mz. 31:23) Ḇaido snonggaku waswar oso imar ido, fasnai nyan faro roma inai Besi fa sisrow mnuk ro Refo ḇebuk sneprei ma payamyum.​—2 Kor. 1:3, 4; 2 Tim. 3:16. w20.10 27 ¶7