Eksodas

3 Moses i kam wan man blong lukaot long ol sipsip blong palika blong hem Jetro,+ we i pris blong Midian. Wan dei, hem i stap lidim ol sipsip oli go long wan ples we i stap long wes blong draeples, nao hem i kamtru long bigfala hil blong tru God, long Horeb.+ 2 Nao enjel blong Jehova i kamtru long hem, long wan faea we i stap laet long medel blong wan smol tri we i gat nil.+ Moses i stap lukluk tri ya, mo hem i luk we faea i stap laet be tri ya i no bon. 3 Ale Moses i talem se: “Samting ya i narakaen. Bambae mi go klosap blong luklukgud se from wanem tri ya i no bon.” 4 Taem Jehova i luk we Moses i stap kam klosap, hem i singaot long hem we tok blong hem i kamaot long medel blong tri ya, mo hem i se: “!Moses! !Moses!” Nao Moses i talem se: “Mi hemia.” 5 Nao God i talem se: “Yu no kam klosap. Yu tekemaot sandel long leg blong yu from we graon ya we yu stap stanap long hem, i tabu.”

6 Mo hem i gohed i se: “Mi mi God blong papa blong yu, mi God blong Ebraham,+ mi God blong Aesak,+ mo mi God blong Jekob.”+ Nao Moses i haedem fes blong hem, from we hem i fraet blong luk tru God. 7 Jehova i gohed i talem se: “Mi mi luk finis trabol we ol man blong mi oli stap kasem long Ijip, mo mi harem bigfala krae blong olgeta from we ol man ya oli stap fosem olgeta blong wok strong. Mo mi savegud we oli harem nogud tumas.+ 8 Bambae mi godaon blong tekemaot olgeta long han blong ol man Ijip,+ mo blong tekemaot olgeta long kantri ya. Mo bambae mi tekem olgeta i go long wan gudfala kantri we i bigwan, wan kantri we i fulap long melek mo hani.+ Hemia teritori blong ol man Kenan, wetem ol laen blong Het, ol man Amoro, ol man Perij, ol man Hivi, mo ol man Jebus.+ 9 !Yu luk! Krae blong ol man Isrel i kasem mi finis, mo mi luk we ol man Ijip oli stap mekem i strong tumas long olgeta.+ 10 Yu kam, bambae mi sanem yu yu go long Fero, mo bambae yu yu tekemaot ol man blong mi long Ijip, hemia ol laen blong Isrel.”+

11 Be Moses i talem long tru God se: “?Mi mi hu blong mi go luk Fero mo tekemaot ol laen blong Isrel long Ijip?” 12 Nao God i talem se: “Mi bambae mi stap wetem yu,+ mo saen we i soemaot se mi nao mi sanem yu, hemia se: Afta we yu tekemaot ol man Isrel long Ijip, bambae yufala i mekem wosip long tru God long hil ya.”+

13 Be Moses i talem long tru God se: “Sipos mi go long ol laen blong Isrel mo mi talem long olgeta se: ‘God blong ol olfala blong yufala i sanem mi mi kam long yufala,’ nao oli askem long mi se: ‘?Wanem nem blong hem?’+ ?Bambae mi talem wanem long olgeta?” 14 Ale God i talem long Moses se: “Bambae Mi Kam Samting We Mi Jusum.”*+ Mo hem i gohed i se: “Bambae yu talem long ol laen blong Isrel se: ‘God ya we nem blong hem Bambae Mi Kam, i sanem mi mi kam long yufala.’”+ 15 Nao God i talem bakegen long Moses se:

“Bambae yu talem long ol laen blong Isrel se: ‘Jehova we i God blong ol olfala blong yufala, God blong Ebraham,+ God blong Aesak,+ mo God blong Jekob,+ i sanem mi mi kam long yufala.’ Hemia nem blong mi mo nem ya bambae i stap blong olwe,+ mo ol jeneresen we bambae oli kamaot biaen long yufala oli mas tingbaot nem ya. 16 Naoia yu go, mo yu singaot ol elda blong Isrel oli kam wanples mo yu talem long olgeta se: ‘Jehova we i God blong ol olfala blong yufala, God blong Ebraham, Aesak, mo Jekob, i kamtru long mi mo i talem se: “Mi mi luk trabol we yufala i stap fesem+ mo samting we ol man Ijip oli mekem long yufala. 17 Ale mi talem se bambae mi tekemaot yufala long han blong ol man Ijip we oli stap mekem trabol long yufala,+ mo bambae mi tekem yufala i go long wan kantri we i fulap long melek mo hani,+ hemia kantri blong ol man Kenan, wetem ol laen blong Het, ol man Amoro,+ ol man Perij, ol man Hivi, mo ol man Jebus.”’+

18 “Bambae oli lesin long yu,+ mo yu wetem ol elda blong Isrel, bambae yufala i go luk king blong Ijip, mo yufala i mas talem long hem se: ‘Jehova we i God blong ol man Hibru,+ i toktok wetem mifala. Taswe, plis, yu letem mifala i wokbaot tri dei i go long draeples blong mekem sakrefaes long God blong mifala Jehova.’+ 19 Be mi mi save gud se king blong Ijip bambae i no letem yufala i go, bambae hem i letem yufala nomo sipos wan strong han i fosem hem.+ 20 Taswe bambae mi stretem han blong mi, mo mi mekem ol bigbigfala samting blong sapraes blong kilim Ijip, nao biaen bambae hem i sanemaot yufala.+ 21 Mo bambae mi mi mekem se ol man Ijip oli glad long ol man blong mi, nao taem yufala i go, bambae yufala i no go emti han.+ 22 Evri woman oli mas askem long neba blong olgeta mo long woman blong narafala ples we i stap long haos blong olgeta, se oli mas givim ol samting we oli wokem long silva mo gol, wetem ol klos. Mo bambae yufala i putum olgeta long ol boe mo ol gel blong yufala, mo bambae yufala i tekemaot ol gudgudfala samting blong ol man Ijip.”+