OL KRAE
א [Aleph]*
1 !Taon ya we fastaem i fulap gud long ol man, naoia hem i olsem wan woman we i stap sidaon hem wan!+
!Fastaem, ol nesen oli save gud hem, be naoia hem i kam olsem wan wido!+
!Fastaem hem i olsem wan prinses long ol provins,* be naoia oli fosem hem blong mekem ol strong wok!+
ב [Beth]
2 Long naet hem i krae we i krae,+ mo wota blong ae blong hem i kavremap gud jiks blong hem.
I no gat wan long ol man we hem i lavem tumas i stap blong mekem hem i harem gud.+
Olgeta gudfala fren blong hem oli tanem baksaed long hem,+ oli kam ol enemi blong hem.
ג [Gimel]
3 Juda i go stap long narafala kantri,+ we hem i stap harem nogud tumas mo i stap wok slef.+
Hem i mas laef long medel blong ol nesen,+ hem i no gat ples blong spel.
Olgeta we oli stap ronem hem blong kilim hem, oli kasem hem taem hem i stap harem nogud.
ד [Daleth]
4 Ol rod we oli go long Saeon, oli stap krae, from we i no gat man i stap wokbaot i kam long lafet.+
Evri get blong hem oli stap nating nomo,+ ol pris blong hem oli stap pulum nogud win blong olgeta.
Ol yang woman blong hem* oli stap harem nogud, mo hem i harem nogud bitim mak.
ה [He]
5 Naoia ol badfren blong hem oli kam masta* blong hem, mo ol enemi blong hem oli no wari nating.+
From Jehova i karem trabol i kam long hem, from we sin blong hem i plante.+
Ol enemi blong hem oli tekem ol pikinini blong hem oli go kalabus.+
ו [Waw]
6 Olgeta gudgudfala samting oli gowe finis long dota blong Saeon.+
Ol prins blong hem, oli olsem ol man dia we oli no faenem wan ples we i gat gudfala gras,
Mo oli wokbaot fored long man we i stap ronem olgeta, we oli taed gud.
ז [Zayin]
7 Long ol dei we Jerusalem i stap harem nogud mo i no gat hom, hem i stap tingbaot
Olgeta gudgudfala samting we hem i gat bifo.+
Taem ol man blong hem oli go long han blong ol enemi mo hem i no gat helpa,+
Ol enemi oli luk hem mo oli laf* long hem from we hem i foldaon.+
ח [Heth]
8 Jerusalem i mekem fulap sin.+
From samting ya hem i kam olsem wan samting we i nogud olgeta.
Evri man we oli stap ona long hem bifo, naoia oli stap tritim hem olsem wan samting we i rabis olgeta, from we oli luk neked bodi blong hem.+
Hem i stap krae+ mo i tanemraon i gowe from i sem.
ט [Teth]
9 Doti fasin blong hem i stap long sket blong hem.
Hem i no tingbaot fiuja blong hem+
Taem hem i foldaon, ol man oli sapraes tumas, i no gat wan man blong mekem hem i harem gud.
O Jehova, yu luk trabol blong mi, from we enemi ya i leftemap hem wan finis.+
י [Yod]
10 Enemi ya i karem olgeta sas samting blong taon ya finis.+
From hem i bin luk ol nesen oli go insaed long tabu ples ya we i blong hem,+
Hemia ol nesen we yu givim oda se oli no mas kam joen wetem kongregesen blong yu.
כ [Kaph]
11 Olgeta man long taon ya oli stap pulum nogud win blong olgeta, mo oli stap lukaot bred.+
Oli givimaot ol gudgudfala samting blong olgeta jes blong kasem kakae, blong oli save stap laef.
O Jehova, yu luk, mi mi kam olsem wan woman* we i gud blong nating nomo.
ל [Lamed]
12 ?Yufala evriwan we i stap pas long rod, yufala i ting se trabol ya i nating nomo?
!Yufala i traem luk!
?I gat wan soa i olsem soa we mi filim,
Taem Jehova i mekem mi mi safa long dei blong bigfala kros blong hem?+
מ [Mem]
13 Hem i stap antap, i sanem faea i go insaed long ol bun blong mi,+ mo i bonem wanwan long olgeta.
Hem i putum wan net blong holem leg blong mi, mo i fosem mi blong mi tanemraon i gobak.
Hem i mekem mi mi kam olsem woman we i stap hem wan.
Mi sik fuldei.
נ [Nun]
14 Hem i fasem ol sin blong mi olsem wan yok, yes hem i fasem olgeta wanples long han blong hem.
Oli putum olgeta long nek blong mi, nao paoa blong mi i finis.
Jehova i putum mi finis long han blong olgeta we mi no save faet agensem olgeta.+
ס [Samekh]
15 Jehova i pusumaot ol strong man we oli stap long mi.+
Hem i singaot wan asembli i kam agensem mi blong smasem ol yang man blong mi.+
Jehova i stanstanap long dota blong Juda we i no save man yet, long ples blong mekem waen.+
ע [Ayin]
16 Ol samting ya oli mekem se mi stap krae,+ wota blong ae blong mi i ron.
From ol man we oli save mekem mi mi harem gud o mekem mi* glad bakegen, oli stap longwe long mi.
Ol boe blong mi oli no moa gat hop, from enemi ya i win finis.
פ [Pe]
17 Saeon i leftemap han blong hem.+ I no gat wan man blong mekem hem i harem gud.
Jehova i givim wan oda long olgeta enemi blong Jekob we oli stap raonabaot, blong oli agensem Jekob.+
Oli luk Jerusalem olsem wan samting we i nogud olgeta.+
צ [Tsade]
18 Jehova i stret olgeta,+ from taem mi rebel, mi stap agensem loa* blong hem.+
Olgeta man, yufala i lesin, mo yufala i luk soa we mi stap filim.
Ol yang woman* mo ol yang man blong mi oli go kalabus finis.+
ק [Qoph]
19 Mi singaot i go long ol man we mi lavem olgeta tumas, be oli tanem baksaed long mi finis.+
Long taon, ol pris mo ol elda blong mi oli ded,
Long taem we oli stap lukaotem kakae blong mekem se oli stap laef.+
ר [Resh]
20 O Jehova yu luk, mi mi harem nogud tumas.
Ol samting insaed long mi oli* stap tantanem.
Hat blong mi i kam nogud, from we mi mi rebel fulwan.+
Aotsaed, naef blong faet i stap kilim ol pikinini blong mi.+ Mo insaed long haos i olsem ded.
ש [Shin]
21 Ol man oli harem we mi stap pulum nogud win blong mi. I no gat wan man blong mekem mi harem gud.
Olgeta enemi blong mi oli harem nius blong trabol blong mi.
Oli glad tumas, from we yu yu mekem i kamtru.+
Be bambae yu yu mekem se dei ya we yu bin talemaot i kamtru,+ hemia taem we bambae olgeta tu oli kam olsem mi.+
ת [Taw]
22 I gud yu luk ol rabis fasin blong olgeta, mo i gud yu mekem i strong long olgeta,+
Stret olsem we yu bin mekem i strong long mi from olgeta sin blong mi.
From mi mi harem nogud tumas, mo hat blong mi i sik.
א [Aleph]
2 !Jehova i mekem se kros blong hem we i olsem klaod i kavremap dota blong Saeon!
Hem i sakemaot finis samting we i mekem Isrel i naes, i sakemaot long heven i kam long wol.+
Hem i no moa tingbaot stul blong leg blong hem,+ long dei blong kros blong hem.
ב [Beth]
2 Jehova i solemdaon olgeta ples we Jekob i stap long hem, we i no gat sore nating.
Hem i kros tumas, nao i brekemdaon ol strong ples blong haed blong dota blong Juda.+
Hem i pulumdaon kingdom ya+ mo ol prins blong hem+ i go long graon mo i mekem oli kam doti.
ג [Gimel]
3 Hem i kros bitim mak nao i flatemgud olgeta paoa* blong Isrel.
Hem i tekemaot raethan blong hem taem ol enemi oli kam,+
Mo long Jekob, hem i stap laet olsem faea we i stap kakae evri samting raonabaot.+
ד [Daleth]
4 Hem i benem bonara blong hem finis* olsem wan enemi, mo raethan blong hem i rere finis olsem wan enemi,+
Hem i gohed blong kilim olgeta we oli sas tumas long ae blong yumi.+
Mo hem i kafsaedem kros blong hem olsem faea,+ i go insaed long tent blong dota blong Saeon.+
ה [He]
5 Jehova i kam olsem wan enemi,+
Hem i solemdaon Isrel finis.
Hem i solemdaon olgeta taoa blong hem finis,
Hem i distroem olgeta strong ples blong haed blong hem finis.
Mo long dota blong Juda, hem i mekem ol man oli stap harem nogud mo oli stap krae bigwan.
ו [Waw]
6 Hem i stap tritim nogud wansaed haos blong hem,+ olsem wan smol haos long garen.
Hem i finisim* lafet blong hem.+
Jehova i mekem se ol man long Saeon oli fogetem lafet mo sabat finis,
Mo from we hem i kros bitim mak, hem i no moa tingbaot king mo pris.+
ז [Zayin]
7 Jehova i tanem baksaed long olta blong hem finis,
Hem i gowe long tabu ples blong hem finis.+
Hem i letem ol stonwol blong ol strong taoa blong hem, oli go finis long han blong enemi.+
Oli singaot bigwan insaed long haos blong Jehova,+ olsem long dei blong wan lafet.
ח [Heth]
8 Jehova i mekem tingting blong hem i strong finis blong distroem stonwol blong dota blong Saeon.+
Hem i pulum teplaen finis.+
Hem i no holembak han blong hem blong i no mekem trabol.*
Mo hem i mekem ol hip graon we i goraon mo stonwol oli harem nogud.
Nao olgeta evriwan oli no moa gat paoa.
ט [Teth]
9 Ol get blong hem oli draon i godaon finis long graon.+
Hem i distroem mo i brebrekem finis ol longlongfala aean blong hem.
King blong hem mo ol prins blong hem oli stap long medel blong ol nesen.+
I no gat loa,* mo ol profet blong hem tu oli no kasem ol vison long Jehova.+
י [Yod]
10 Ol elda blong dota blong Saeon oli sidaon long graon, we oli stap kwaet nomo.+
Oli sakem das long hed blong olgeta, mo oli werem klos we oli wokem long bag.+
Ol yang woman Jerusalem* oli bodaon we hed blong olgeta i kasem graon.
כ [Kaph]
11 Ae blong mi i no moa klia from mi stap krae oltaem.+
Ol samting insaed long mi oli* stap tantanem.
Oli kafsaedemaot leva blong mi i go long graon, from we dota blong ol man blong mi* i foldaon,+
From we ol pikinini mo ol smol bebi, ae blong olgeta i dak nao oli foldaon olbaot long ol pablik ples long taon.+
ל [Lamed]
12 Oli stap gohed blong askem long mama blong olgeta se: “?Wehem ol sid mo waen?”+
Taem ae blong olgeta i dak nao oli foldaon olsem wan man we i kasem kil long ol pablik ples long taon,
Mo taem oli stap long han blong mama blong olgeta, we laef* blong olgeta sloslo i stap go blong finis.
מ [Mem]
13 ?O dota blong Jerusalem, mi save yusum wanem olsem wan witnes,
O mi save talem se yu sem mak long wanem?
?O dota blong Saeon we yu no save man yet, mi save skelem yu wetem wanem blong mekem yu harem gud?
From kil we yu kasem i bigwan we i bigwan olsem solwota.+ ?Hu i save hilim yu?+
נ [Nun]
14 Ol vison blong yu we ol profet blong yu oli stap luk, oli giaman mo oli nating nomo,+
Mo oli no talemaot ol rong blong yu, blong mekem se yu no go kalabus,+
Be oli gohed blong luk ol vison blong yu we oli giaman, mo ol tok blong hem oli lidim man i gorong.+
ס [Samekh]
15 Olgeta evriwan we oli stap pas long rod, oli stap klapem han blong olgeta blong jikim yu.+
Oli wesil from oli sapraes+ mo oli saksakem hed blong olgeta long dota blong Jerusalem, oli se:
“?Hemia nao taon ya we oli stap tokbaot hem se: ‘Hem i naes tumas, i mekem ol man long fulwol oli glad’?”+
פ [Pe]
16 Olgeta enemi blong yu oli stap openem maot blong olgeta from yu.
Oli wesil mo oli stap kakae tut blong olgeta oli se: “Mifala i solemdaon hem finis.+
!Hemia nao dei we mifala i stap wet from!+ !I kamtru finis, mo mifala i luk finis!”+
ע [Ayin]
17 Jehova i mekem finis samting we hem i plan blong mekem,+ yes, hem i mekem samting we hem i talem i kamtru finis,+
Hemia samting we hem i talem bifo olgeta.+
Hem i brekemdaon finis, we hem i no gat sore nating.+
Hem i letem ol enemi oli glad from samting we i kasem yu, hem i leftemap paoa* blong ol enemi blong yu finis.
צ [Tsade]
18 O stonwol blong dota blong Saeon, hat blong ol man i stap krae i go long Jehova.
I gud wota blong ae i stap ron olsem bigfala wota long dei mo long naet.
Yu no mas spel smol, yu no mas letem ae blong yu* i spel.
ק [Qoph]
19 !Yu girap! Yu krae long naet long stat blong ol aoa blong waj.
Yu kafsaedem hat blong yu olsem wota long fored blong Jehova.
Yu leftemap han blong yu i go long hem from laef* blong ol pikinini blong yu,
We ae blong olgeta i dak, oli stap folfoldaon long evri kona blong rod, from hadtaem blong kasem kakae.+
ר [Resh]
20 O Jehova, yu traem luk man we yu bin tritim nogud hem.
?Ol woman oli mas gohed blong kakae ol stret pikinini blong olgeta, we bodi blong olgeta i fulwan?+
?Ol man oli mas kilim ol pris mo ol profet long tabu ples ya blong Jehova?+
ש [Shin]
21 Yang boe mo olfala man oli ded, oli foldaon long graon olbaot long ol rod.+
Ol yang woman* mo ol yang man blong mi, oli ded long naef blong faet.+
Yu yu kilim i ded ol man long dei blong kros blong yu, yes, yu kilim i ded ol man, we yu no gat sore nating.+
ת [Taw]
22 Yu singaot ol samting blong fraet oli kam long evri saed,+ olsem we yu singaot ol man oli kam from wan dei blong lafet.
Long dei blong kros blong Jehova, i no gat wan man i ronwe o i laef i stap.+
Olgeta we mi bonem olgeta* mo mi lukaot long olgeta, enemi blong mi i finisim olgeta.+
א [Aleph]
3 Mi nao man ya we i bin luk man i safa from stik blong kros blong Hem.
2 Hem i bin ronemaot mi mo i mekem mi mi wokbaot long tudak, i no long laet.+
3 Yes, long fuldei hem i stap sakem han blong hem agensem mi bakegen mo bakegen.+
ב [Beth]
4 Hem i mekem bodi blong mi mo skin blong mi i kam olfala,
Hem i brekem ol bun blong mi.
5 Hem i bin blokem mi long evri saed. Hem i mekem se posen we i konkon+ mo hadtaem i raonemgud mi.
6 Hem i fosem mi blong mi sidaon long ol ples we i tudak, olsem ol man we oli ded longtaem finis.
ג [Gimel]
7 Hem i blokem mi olsem wan stonwol, blong mi no save ronwe.
Hem i lokem mi long ol hevi hankaf we oli wokem long kopa.+
8 Mo taem mi krae bigwan from help, hem i no wantem harem* prea blong mi.+
9 Hem i blokem ol rod blong mi long ol ston we oli katemrere finis.
Hem i mekem ol rod blong mi oli kruked.+
ד [Daleth]
10 Hem i stap haed rere blong kilim mi olsem wan bea, mo olsem wan laeon we i stap haed.+
11 Hem i fosem mi mi kamaot long rod, mo i terterem mi long ol smosmol pis.*
Hem i mekem we mi stap mi wan nomo.+
12 Hem i benem bonara blong hem finis,* mo i putumap mi olsem mak blong ara blong hem.
ה [He]
13 Hem i stikim ol kidni blong mi long ol ara* we oli stap long basket blong ara blong hem.
14 Mi mi kam olsem wan samting we ol man oli stap laf long hem, mo fuldei mi mi olsem topik blong singsing blong olgeta.
15 Hem i fulumap ol samting we oli konkon insaed long mi, mo i mekem mi mi wetwet gud long plant ya womwud.+
ו [Waw]
16 Hem i brebrekem ol tut blong mi long ol smosmol ston.
Hem i pusum mi mi godaon long asis.+
17 Yu tekemaot pis long mi.* Mi mi fogetem finis ol gudfala samting.
18 Nao mi talem se: “Ol gudfala samting blong mi wetem samting we mi stap wet blong luk long Jehova, oli lus finis.”
ז [Zayin]
19 I gud yu tingbaot trabol blong mi, taem we mi no gat hom,+ plant ya womwud, mo posen we i konkon.+
20 I sua se bambae yu* tingbaot mo yu bendaon ova long mi.+
21 Long hat blong mi, mi tingbaot samting ya, taswe bambae mi gat fasin ya blong wet.+
ח [Heth]
22 From we fasin blong Jehova blong lavem man oltaem nao i mekem se yumi no lus olgeta,+
From fasin blong hem blong gat sore i neva finis.+
23 Evri moning, oli kam niu bakegen.+ Fasin blong yu blong holem promes i bigwan we i bigwan.+
24 Mi mi* talem se: “Jehova i olsem olting blong mi,*+ from samting ya bambae mi mi gat fasin ya blong wet long hem.”+
ט [Teth]
25 Jehova i mekem i gud long man we i stap putum hop long hem,+ long man* we i stap gohed blong lukaotem hem.+
26 I gud blong stap kwaet nomo mo wet*+ from rod blong Jehova blong sevem man.+
27 I gud tumas we man i karem yok long yangtaem blong hem.+
י [Yod]
28 I gud hem i sidaon hem wan mo i stap kwaet, taem Hem i putum yok long hem.+
29 I gud hem i putum maot blong hem long das.+ Maet i gat hop yet.+
30 I gud hem i givim jiks blong hem long man we i stap slavem hem. I gud hem i akseptem evri nogud tok we oli sakem long hem.
כ [Kaph]
31 From we Jehova bambae i no sakemaot yumi olwe.+
32 Nating se hem i mekem man i harem nogud, be bambae hem i gat sore long man tu, folem fasin blong hem blong lavem man oltaem we i bigwan tumas.+
33 From fasin blong mekem ol pikinini blong man oli harem nogud o oli safa, i no stap long hat blong hem.+
ל [Lamed]
34 Fasin ya blong smasem nogud ol prisena blong wol, aninit long leg,+
35 Mo blong mekem se wan man i no kasem jastis long fes blong Hae God,+
36 Mo blong mekem kruked fasin blong mekem man i lusum kot kes blong hem,
Jehova i no akseptem nating ol fasin olsem.
מ [Mem]
37 Ale, sipos Jehova i no givim oda fastaem, ?hu i save toktok mo i save mekem i hapen?
38 Ol rabis samting mo ol gudfala samting, oli no save kamaot wantaem
Long maot blong Hae God.
39 ?From wanem wan man we i laef, i sud komplen from ol samting we hem i kasem from ol sin blong hem?+
נ [Nun]
40 I gud yumi jekemgud mo luklukgud ol fasin blong yumi,+ mo i gud yumi gobak long Jehova.+
41 I gud yumi leftemap hat blong yumi wetem han blong yumi i go long God we i stap long heven, yumi se:+
42 “Mifala i bin mekem sin mo mifala i rebel,+ mo yu yu no bin fogivim mifala.+
ס [Samekh]
43 Yu yu kros, nao yu blokem rod blong mifala i no kam klosap long yu.+
Yu stap ronem mifala mo yu kilim mifala we yu no gat sore nating.+
44 Yu yu putum wan klaod blokem rod we i kam long yu, blong mekem se prea blong mifala i no save kamtru long yu.+
45 Yu yu mekem mifala i olsem makas mo doti nomo long medel blong ol man.”
פ [Pe]
46 Olgeta enemi blong mifala oli openem maot blong olgeta agensem mifala.+
47 Fraet mo ol denja oli kam long mifala oltaem,+ mo mifala i lus mo kam nogud olgeta.+
48 Wota blong ae blong mifala i ron olsem reva, from oli brekemdaon dota blong ol man blong mi finis.+
ע [Ayin]
49 Ae blong mi i krae olwe nomo, i no stop nating,+
50 Gogo kasem we Jehova i stap long heven i lukluk i kamdaon mo i luk.+
51 Ae blong mi i mekem se mi* harem nogud tumas, from olgeta dota blong taon blong mi.+
צ [Tsade]
52 Ol enemi blong mi oli stap hanting from mi olsem wan pijin, nating se mi no mekem wan rong.
53 Oli sakem mi long hol blong finisim laef blong mi. Oli stap gohed blong stonem mi long ol ston.
54 Wota i kavremap hed blong mi, nao mi talem se: “!Mi finis ya nao!”
ק [Qoph]
55 O Jehova, mi singaot nem blong yu, taem mi stap long hol we i dip olgeta.+
56 Yu harem voes blong mi. Yu no satem sora blong yu taem mi krae from help, blong yu mekem mi mi harem gud.
57 Yu bin kam klosap long mi long dei we mi singaotem yu. Yu se: “Yu no mas fraet.”
ר [Resh]
58 O Jehova, yu yu difendem kes blong mi,* mo yu pembak laef blong mi finis.+
59 O Jehova, yu yu luk finis ol fasin nogud we oli mekem long mi. Plis yu mekem se mi kasem jastis.+
60 Yu yu luk finis olgeta samting we oli mekem blong givimbak, mo olgeta plan we oli mekem agensem mi.
ש [Sin] o [Shin]
61 O Jehova, yu yu harem finis ol rabis tok blong olgeta, mo olgeta plan we oli mekem agensem mi,+
62 Mo maot blong olgeta we oli stap agensem mi, mo yu harem we oli stap tok smosmol agensem mi fuldei.
63 Yu luk olgeta. !Nating se oli sidaon no oli stanap, be oli stap jikim mi long ol singsing blong olgeta!
ת [Taw]
64 O Jehova, bambae yu yu givimbak long olgeta, stret folem ol wok blong olgeta.
65 Bambae yu singaot trabol i kam long olgeta, yes bambae yu mekem hat blong olgeta i kam strong.
66 Bambae yu kros, yu ronem olgeta mo yu finisim olgeta aninit long heven blong Jehova.
א [Aleph]
4 !Gol ya we i stap saen, yes hemia gudfala gol, naoia i no moa saen tumas!+
!Ol tabu ston,+ naoia oli folfoldaon olbaot long evri kona blong rod!+
ב [Beth]
2 !Be ol gudfala boe blong Saeon we oli skelem olgeta wetem* gol we oli bonem i klin gud,
Naoia ol man oli luk olgeta olsem ol jag we oli wokem long graon,
We man blong wokem graonpot nomo i wokem!
ג [Gimel]
3 Nating se ol wael dog ya jakol, be oli stap givim titi mo lukaot gud long ol pikinini blong olgeta,
Be dota blong ol man blong mi i kam raf olgeta+ olsem ol ostrij long draeples.+
ד [Daleth]
4 Bebi we i stap titi yet, tang blong hem i fas insaed long maot blong hem from we i tosta.
Ol pikinini oli stap asaskem bred olbaot,+ be i no gat man i givim wan long olgeta.+
ה [He]
5 Olgeta we bifo oli stap kakae ol gudfala kakae, naoia oli stap ledaon olbaot long ol rod, we oli hanggri bitim mak.*+
Olgeta we taem oli gruap i kam oli stap werem klos we i laet red,+ naoia oli fasgud long ol hip blong asis.
ו [Waw]
6 Panis* blong dota blong ol man blong mi, i bigwan i bitim panis* blong Sodom,+
We i foldaon kwiktaem nomo, we i no gat wan han blong halpem hem.+
ז [Zayin]
7 Ol Nasiraet+ blong hem oli klin bitim sno, oli waet bitim melek.
Oli red bitim ol korel, oli olsem ol safaea we oli saen gud.
ח [Heth]
8 Fes blong olgeta i kam blak i bitim sakol,*
Ol man oli no luksave olgeta long ol rod.
Skin blong olgeta i kam drae, i fas long bun blong olgeta.+ Oli kam olsem drae wud.
ט [Teth]
9 Olgeta we oli ded long naef blong faet, oli gud moa i winim olgeta we oli ded long hadtaem blong kasem kakae,+
Hemia olgeta we sloslo laef blong olgeta i finis, from i no gat naf kakae long garen, yes i olsem we ol man oli sperem olgeta.
י [Yod]
10 Ol woman ya we oli gat sore, han blong olgeta nomo i boelem ol prapa pikinini blong olgeta.+
Oli kam olsem kakae blong olgeta taem oli stap harem nogud, long taem ya we dota blong ol man blong mi i foldaon.+
כ [Kaph]
11 Jehova i soemaot kros blong hem finis,
Hem i kafsaedem finis kros blong hem we i olsem faea.+
Mo hem i statem wan faea long Saeon, i bonem ol fandesen blong hem.+
ל [Lamed]
12 Ol king blong wol mo olgeta man we oli stap long gudfala graon ya, oli no bilif
Se man we i agensem olgeta mo enemi i save kam insaed long ol get blong Jerusalem.+
מ [Mem]
13 Hemia i hapen from ol sin blong ol profet blong hem, mo ol mastik blong ol pris blong hem,+
We oli mekem blad blong ol stret man i ron insaed long hem.+
נ [Nun]
14 Oli stap wokbaot olsem ol blaenman olbaot long ol rod.+
Oli doti gud long blad,+
Mekem se i no gat man i save tajem klos blong olgeta.
ס [Samekh]
15 Ol man oli singaot i go long olgeta se: “!Yufala i gowe! !Yufala i no klin! !Yufala i gowe! !Yufala i gowe! !Yufala i no tajem mifala!”
From oli no moa gat hom mo oli stap wokbaot olbaot.
Ol man blong ol nesen oli stap talem se: “Oli no save stap long ples ya wetem yumi.*+
פ [Pe]
16 Fes blong Jehova i mekem se oli go wanwan olbaot,+
Bambae hem i no moa glad blong luk olgeta.
Ol man bambae oli no moa soem respek long ol pris,+ mo oli no kaen long ol elda.”+
ע [Ayin]
17 Ae blong mifala tu i kam nogud finis from mifala i stap gohed blong lukaotem help, be blong nating nomo.+
Mifala i stap lukluk mo lukaotem help long wan nesen we i no naf blong sevem mifala.+
צ [Tsade]
18 Oli biaenem mifala long evri ples,+ mekem se mifala i no save wokbaot long ol pablik ples blong mifala.
En blong mifala i kam klosap finis. Ol dei blong mifala oli finis finis, from en blong mifala i kam finis.
ק [Qoph]
19 Ol man we oli stap ronem mifala, oli kwik moa i winim ol igel long skae.+
Oli stap ronem mifala antap long ol bigfala hil, mo oli haed rere long ol draeples blong kilim mifala.
ר [Resh]
20 Man ya we Jehova i makemaot, we i olsem win we i kamaot long nus blong mifala,+ ol man oli kasem hem finis long bigfala hol we oli digim,+
Hemia man we mifala i stap tokbaot hem se: “From sado blong hem, bambae yumi laef wetem ol man blong ol nesen.”
ש [Sin]
21 O dota blong Edom,+ yu glad mo yu harem gud, yu laef olsem bifo we yu stap long ples ya Uj.
Be bambae oli pasem kap ya tu i kam long yu,+ mo bambae yu drong mo yu soemaot neked bodi blong yu.+
ת [Taw]
22 O dota blong Saeon, ol panis we yu stap kasem from rong blong yu, naoia i kam long en blong hem.
Bambae hem i no karemaot yu yu go stap long narafala kantri bakegen.+
Be bambae hem i tingbaot ol rong blong yu, O dota blong Edom.
Bambae hem i mekem ol sin blong yu oli kam long klia ples.+
5 O Jehova, plis yu tingbaot samting we i kasem mifala.
Yu luk, naoia mifala i sem tumas.+
2 Olting blong mifala oli go finis long han blong ol strenja, mo ol haos blong mifala oli go long han blong ol man blong narafala kantri.+
3 Mifala i kam ol pikinini we oli stap olgeta nomo, oli no gat papa. Ol mama blong mifala oli olsem ol wido.+
4 Wota we i blong mifala nomo, be mifala i mas pem blong dring,+ mo ol wud we i blong mifala nomo, be mifala i mas pem.
5 Olgeta we oli stap ronem mifala, oli stap klosap nomo long nek blong mifala,
Mifala i taed tumas, be oli no letem mifala i spel.+
6 Mifala i pusum han blong mifala i go long Ijip+ mo long Asiria,+ blong kasem naf bred blong mifala i kakae.
7 Ol olfala blong mifala bifo we oli bin mekem sin, naoia oli no moa stap, be mifala i mas fesem ol rong blong olgeta.
8 Naoia ol man blong wok oli stap rul long mifala. I no gat wan man blong pulumaot mifala long han blong olgeta.
9 Mifala i putum laef* blong mifala long denja blong kasem bred+ blong mifala, from naef blong faet blong draeples.
10 Mifala i hanggri gogo skin blong mifala i kam hot olsem oven.+
11 Oli mekem ol waef long Saeon oli sem,* wetem ol yang gel long ol taon blong Juda we oli no save man yet.+
12 Oli hangem ol prins long wan han nomo,+ mo oli no soem respek long ol elda.+
13 Ol yang man oli karem ston blong granem wit, mo ol boe oli stambol from oli stap karem ol hevi wud.
14 Ol elda oli gowe finis long get blong taon.+ Ol yang man oli no plei ol miusik blong olgeta.+
15 Glad i gowe finis long hat blong mifala. Taem blong danis i jenis i kam taem blong sore.+
16 Hat blong king i kamaot long hed blong mifala, i foldaon finis. !Sore tumas long mifala, from we mifala i mekem sin!
17 From samting ya, hat blong mifala i sik,+
Mo from ol samting ya, ae blong mifala i no moa klia gud,+
18 From Hil Ya Saeon, we i emti i stap,+ naoia ol foks oli stap wokbaot olbaot long hem.
19 Be yu, O Jehova, yu stap sidaon yu stap rul olwe.
Tron blong yu bambae i stap oltaem long olgeta jeneresen.+
20 ?From wanem yu fogetem mifala olwe, mo yu lego mifala longtaem olsem?+
21 O Jehova, yu tekem mifala i kambak long yu, mo bambae mifala i glad nomo blong kambak long yu.+
Yu mekem ol dei blong mifala oli kam niuwan bakegen olsem ol dei ya bifo.+
22 Be yu yu tanem baksaed long mifala fulwan.
Yu yu stap kros yet long mifala, we yu kros bitim mak.+
Japta 1-4 hem i ol singsing sore we i folem alfabet blong Hibru lanwis.
NT: “ol distrik.”
PT: “Ol gel blong hem we oli no save man yet.”
PT: “hed.”
NT: “glad.”
Tok ya woman i pija blong Jerusalem.
NT: “mekem sol blong mi i.”
PT: “maot.”
PT: “Ol gel blong mi we oli no save man yet.”
PT: “Gat blong mi i.”
PT: “katemaot evri hon.”
PT: “i stanap long bonara blong hem, i fasem finis.”
NT: “spolem.”
PT: “blong i no solemdaon ol samting.”
NT: “tijing.”
PT: “Ol gel Jerusalem we oli no save man yet.”
PT: “Gat blong mi i.”
Tok ya “dota blong ol man blong mi” hem i wan tok we oli yusum blong soemaot se man i harem nogud tumas mo i sore.
NT: “sol.”
PT: “hon.”
PT: “dota blong ae blong yu.”
NT: “ol sol.”
PT: “Ol gel blong mi we oli no save man yet.”
NT: “Olgeta we mi tekem olgeta i kam we oli helti gud.”
NT: “i blokem; i satem doa long.”
MNT: “Hem i mekem mi mi stap nating olsem wan graon we oli no planem samting long hem.”
PT: “i stanap long bonara blong hem, i fasem finis.”
PT: “ol boe.”
NT: “sol blong mi.”
NT: “sol blong yu bambae i.”
NT: “Sol blong mi i.”
PT: “i haf blong olting we oli givim long mi.”
NT: “sol.”
NT: “blong wet wetem longfala tingting.”
NT: “sol blong mi i.”
NT: “difendem ol kot kes blong sol blong mi.”
NT: “we oli sas olsem.”
PT: “oli stap ledaon olgeta nomo long ol rod.”
PT: “Rong.”
PT: “sin.”
PT: “bitim samting we i blak olgeta.”
NT: “wetem yumi long ples ya olsem ol man blong narafala kantri.”
NT: “sol.”
NT: “Oli repem ol waef long Saeon.”