Wan Kudu i Mekem Ol Laeon Oli Sem
LAS yia long Saot Afrika, wan bigfala anamol antelop—wan man kudu—i stanap fored long wan turis hotel long naesfala flat ples ya Lovel. Hem i smat mo fes blong hem i strong we i strong, taswe yumi no sapraes se wan narafala man kudu long ples ya i kros tumas long fasin ya we narafala kudu i kam insaed long teritori blong hem. Wan man we i luk samting ya i tokbaot faet we namba tu man kudu ya i mekem: “Hem i pulum win bigwan, i purumpurumbut strong long graon mo i stanap rere blong faet. Hem i mekem wan kwik faet taem hem i putum hed blong hem i godaon. Taem hem i kilim faswan man kudu, hem i sek mo i fraet.” Kudu we i kam insaed long ples ya i no muf nating. Bakegen man kudu blong ples ya i mekem atak. Be i no gat wan samting i hapen. Wetem bigfala kros mo plante smok blong graon, man kudu long ples ya “i brekemdaon olgeta tri we i stap raonabaot long ples ya, afta hem i aot i go.” Hem i no moa kambak, i klia se hem i no save winim nyufala kudu ya we i jes kam.
Ol king blong bigfala bus oli no save winim hem tu. Man ya Carlson Mathebula, we hem i lukaot long bigfala graon we ol anamol ya oli stap long hem, i talem se 12 laeon oli kam raon long kudu. Hem i tokbaot taem ya we oli traem winim kudu se: “Kwiktaem nomo tu woman laeon, tufala i stat blong wokbaot i go from kudu. Wan i singaot bigfala mo i jyam i go antap long baksaed blong kudu mo narawan i ron i go long saed blong hem mo i kakae nek blong hem. . . . Tufala tugeta i foldaon i go slip long graon wetem fraet mo bodi blong tufala i strong olsem aes. Wan narafala woman laeon i joenem faet. Hem i ron i go long kudu mo i pusum tufala leg blong hem i strong, blong traem mekem hem i foldaon, be kudu i stanap nomo i stap.” Ol 12 laeon ya oli kros tumas from oli no kilim bigfala kudu ya. Nao “oli spolem wan tul blong makem hamas ren i foldaon, wan samting blong wotarem garen mo ol gudfala jea mo tebel we oli stap afsaed, afta oli aot i go we oli sem.”
Kudu ya we i no muf nating, i mekem se ol kudu blong ples ya oli ronwe long teritori blong olgeta mo hem i daonem fasin flas blong ol laeon. Ripot long magasin ya Sunday Times blong Joanesbeg, Saot Afrika, i tokbaot kudu ya olsem wan anamol we i strong bitim mak, i gat 300 kilo blong hem mo oli wokem long kopa. Masta Keith Calder, man we i wokem kopa kudu ya i talem se: “Mi haremgud se ol laeon mo ol kudu, oli ting se kudu ya i tru wan.”