Ol Hasban Mo Ol Waef—?Oli Rili Gat Defren Fasin Blong Toktok?

TRAEM tingbaot se Bill i wokbaot hareap i kam long ofis blong Jerry, hem i harem nogud tumas from ol wari blong hem. Wetem kaen fasin Jerry i lukluk long Bill mo i wet blong hem i toktok. Bill i pulum win strong mo i talem se: “Mi no save sipos mi save gohed long bisnes ya. I gat plante problem tumas long hem, mo bigfala bos i rili stap mekem i hevi tumas long mi.” Jerry i askem wetem fasin tras se: “?Yu yu stap wari long wanem, Bill? Yu save se yu yu gat gudhan long wok ya bitim ol narafala, mo ol bigfala bos oli save samting ya tu. Jes tekem taem blong yu. ?Yu ting se hemia wan problem? Yu luk, jes las manis nomo . . . ” Jerry i tokbaot ol smosmol fani samting we oli bin kamaot long wan trabol we hem i bin kasem, ale i no longtaem fren blong hem i lego ofis we hem i smael mo haremgud. Jerry i glad blong givhan long hem.

Traem tingbaot tu se taem Jerry i gobak long haos long aftenun ya, hem i luksave wantaem nomo se waef blong hem Pam, i harem nogud tu. Hem i glad tumas taem hem i talem halo long hem bitim we hem i stap mekem oltaem, mo i wet blong hem i talem wanem nao i mekem hem i harem nogud. Afta smol taem i pas, we i no gat toktok, mo filing insaed long rum ya i no stret, hem i talemaot strong se: “!Mi no moa save gohed olsem! !Nyufala bos ya i strong tumas!” Jerry i mekem hem i sidaon, putum han blong hem i goraon long hem, mo talem se: “Daling, yu no mas harem nogud tumas olsem. Tingbaot, hem i wan wok nomo. Ol bos oli olsem nomo. Sipos yu bin harem olsem wanem bos blong mi i tok kros long mi fuldei tede. Be sipos yu harem se i tumas long yu, yu jes lego wok ya nomo.”

Pam i ansa kwiktaem nomo: “!Yu no kea nating long filing blong mi! !Yu neva lesin long mi! !Mi no save lego wok ya! !Yu no stap winim naf mane!” Hem i resis i go long rum blong go krae bigwan. Jerry i stanap fored long doa, hem i sapraes, hem i stap traem blong save wanem i bin hapen. ?From wanem i gat tu defren fasin blong kasem ol tok we Jerry i talem blong leftemap tingting?

?Ol Man Mo Ol Woman Oli Defren?

Samfala bambae oli talem se i gat wan samting nomo i defren long tufala store ya: Bill i wan man; Pam i wan woman. Ol man we oli stadi long ol lanwis oli bilif se ol problem long fasin blong toktok tugeta long mared plante taem oli kamaot from ol man mo ol woman oli defren. Ol buk olsem You Just Don’t Understand mo Men Are From Mars, Women Are From Venus oli leftemap tingting ya se ol man mo ol woman, nating se oli toktok semfala lanwis, oli gat defren fasin blong toktok.

I tru, taem Jeova i wokem woman aot long man, woman i no wan samting we i olsem kopi blong man nomo. No gat. Jeova i tingtinggud fastaem long plan we i stretgud olgeta blong tufala i save givgivhan long tufala long saed blong—bodi, filing, tingting, mo long saed blong speret. Antap long ol fasin ya we tufala i gat taem tufala i bon blong mekem se tufala i defren, i gat ol defdefren fasin we wanwan man i kasem taem hem i stap gruap mo ol ekspiryens blong laef, mo fasin we wanwan man oli kasem from kastom mo ol samting raonabaot long hem, mo tingting blong ol man se wanem stret fasin blong wan man no woman. From ol samting ya we i pulum tingting blong olgeta, maet yumi save luksave sam fasin we ol man mo woman oli folem oltaem long saed blong fasin blong toktok tugeta. Be i hadwok blong talem se “ol fasin blong ol man oli olsem wanem” no “ol fasin blong ol woman oli olsem wanem,” ating toktok olsem i stap nomo long ol pej blong ol buk blong stadi long tingting mo fasin blong ol man.

Yumi save makem ol woman long fasin we ol filing blong olgeta oli sofsof, be plante man tu oli gat gud fasin blong soem filing taem oli toktok wetem ol narafala. Ol man oli gat fasin blong skelemgud ol samting long tingting blong olgeta, be plante taem ol woman tu oli gat gudfala fasin blong skelem mo luksave samting. Taswe yumi no save makem stret ol fasin we oli blong ol man nomo no blong ol woman nomo, be i gat wan samting we yumi sua long hem: Taem yumi traem kasem save long tingting mo filing blong narafala, samting ya i save halpem yumi blong laef tugeta long pis bitim we yumi faet, mo samting ya i tru moa insaed long mared.

Traem ya we i kamaot evri dei long mared long saed blong fasin blong tufala blong toktok tugeta, i had. Plante hasban we oli gat fasin luksave oli talem se samting we i luk olsem wan isi kwestin nomo blong waef blong hem olsem “?Yu yu laekem nyufala stael blong hea blong mi?” i gat plante denja i stap insaed long hem. Plante waef we oli gat waes fasin oli save finis se oli no mas askem long hasban blong olgeta oltaem se “?From wanem yu no askem wan man blong soemaot rod long yu?” taem ol hasban blong olgeta oli mestem rod long wan trep. Ol hasban mo waef we oli laeklaekem olgeta oli no daonem hasban no waef blong olgeta from ol smosmol poen blong hem, be long semtaem, holemtaet ol smosmol poen blong olgeta wanwan from we oli talem se “Mi mi olsem ya nao,” be oli traem blong lukluk dip moa. Hemia i no blong stadi nomo long fasin blong toktok blong narawan, be blong lukluk wetem filing insaed long hat mo maen blong narafala.

From we ol man wanwan oli defren long ol narafala, ale olgeta mared wanwan we oli joenem wan man mo wan woman oli kam wanples, oli defren long ol narafala mared. From sin we i stap long ol man i mekem se i no isi. Taswe, i nidim fasin traehad blong trufala fasin blong maen mo hat oli joen. Eksampel, i isi nomo blong tingting se ol narafala oli stap tingbaot ol samting olsem we yumi stap tingbaot. Oltaem yumi wantem givhan long nid blong narafala long fasin we yumi wantem se olgeta oli givhan long nid blong yumi, maet yumi stap traem blong folem Golden Rul ya se, “Yufala i mas mekem long ol narafala man, olsem we yufala i wantem blong ol narafala man oli mekem long yufala.” (Matyu 7:12) Be, Jisas i no minim se wanem we yu yu wantem i mas gud blong narafala. Defren nao, yu wantem ol narafala blong givim wanem we yu yu nidim no wantem. Ale yu mas givim wanem we oli nidim. Samting ya i impoten moa insaed long mared, from we wanwan long tufala oli mekem promes blong givim wanem hasban no waef blong hem i nidim long fasin we hem i naf blong mekem.

Pam mo Jerry oli bin mekem wan promes olsem. Mo oli bin glad long mared blong tufala we i stap tu yia finis. Be, nating se oli ting se oli savegud wanwan long tufala, samtaem sam samting oli hapen we i soemaot se i gat wan samting we i stap blokem fasin blong toktok tugeta, we fasin blong tingtinggud long narawan nomo i no naf blong winim. Proveb 16:23 i talem se, “Hat blong waesman i mekem se maot blong hem i soemaot se hem i kasem save.” Yes, bigfala samting long saed blong fasin blong toktok tugeta, i blong luksave nid blong narafala. Nao yumi save luk olsem wanem samting ya i givhan long Jerry mo Pam.

Tingting Blong Wan Man

Jerry i stap long medel blong wan wol we ol man oli traem winim narafala, we wanwan man i mas tekem prapa posisen blong hem long medel blong ol narafala man, maet samtaem wan ples we i stap daon no samtaem wan hae ples. Fasin blong toktok i mekem se hem i holemgud ples olsem, i soem se hem i gat gudhan, gat bigfala save, hem i naf. Fasin independen i wan samting we i impoten long hem. Taswe taem wan man i givim oda long Jerry long strong fasin, Jerry i harem se i no wantem mekem. Mesej we i stap haed we i olsem se “Yu no stap mekemgud wok blong yu” i save mekem Jerry i rebel, nating se oda we hem i kasem i stret nomo.

Jerry i stap storeyan taem hem i wantem givim mo kasem sam save. Hem i laekem blong tokbaot ol samting we oli stanap long tru samting, ol tingting, mo ol nyufala samting we hem i bin lanem.

Taem hem i stap lesin, Jerry i no stap katem toktok blong wan man, nating se i blong talem wan smol tok nomo, olsem “a-ha, yer,” from hem i stap traem blong tekem ol save i go insaed long tingting blong hem nomo. Be sipos hem i no agri, bambae hem i no fraet blong talemaot, antap moa taem hem i toktok wetem wan fren. Samting ya i soemaot se hem i intres long samting we fren blong hem i stap talem, mo hem i stap traem blong luk olgeta poen we oli save givhan.

Sipos Jerry i gat wan problem, hem i laekem moa blong traem blong faenem wan ansa hem wan. Ale maet hem i go longwe long ol narafala man mo ol narafala samting. No maet hem i traem blong spel, mekem sam samting blong fogetem problem blong hem blong smoltaem. Bambae hem i tokbaot nomo sipos hem i wantem kasem advaes.

Sipos wan man i gat wan problem mo i kam luk Jerry olsem Bill i bin mekem, Jerry i luksave se i wok blong hem blong givhan, be hem i lukaotgud blong no mekem fren blong hem i harem olsem se hem i no naf blong winim problem ya. Plante taem hem i traem talem sam trabol blong hem wan wetem sam advaes blong mekem se fren blong hem i no harem se hem wan nomo i gat trabol.

Jerry i laekem blong mekem sam samting wetem ol fren blong hem. Long tingting blong hem, fasin fren i minim mekem samting tugeta.

Long tingting blong Jerry, haos i wan sefples long ol narafala samting, wan ples we hem i no moa nidim blong toktok blong pruvum hem wan, wan ples we oli akseptem hem, trastem hem, lavem hem, mo gat fasin tangkyu long hem. Nating se i olsem, samtaem Jerry i faenem se hem i nidim blong stap hem wan nomo. Samting ya i no joen nating wetem Pam no eni samting we Pam i bin mekem. Hem i jes nidim smol taem blong stap hem wan nomo. Jerry i faenem se i had blong talemaot long waef blong hem, ol samting we hem i fraet long hem, we i mekem hem i harem se i no naf, mo ol samting we oli mekem hem i harem nogud. Hem i no wantem se waef blong hem i wari. Wok blong hem i blong protektem mo keagud long waef blong hem, mo hem i nidim we Pam i trastem hem blong mekem olsem. Jerry i wantem sapot, be hem i no wantem se Pam i sore long hem. Samting ya i mekem hem i harem se hem i no naf blong mekem samting no hem i no save givhan nating.

Tingting Blong Wan Woman

Pam i tingbaot hem wan olsem wan woman long medel blong ol narafala we hem i mas joengud wetem olgeta. Long tingting blong hem i impoten blong statem mo mekem ol fasin fren ya oli kam strong. Fasin blong toktok i wan impoten rod blong wokem mo pruvum fasin blong frengud long narawan.

I isi long Pam blong soem se hem i nidim narafala. Hem i harem se Jerry i laekem hem sipos Jerry i faenemaot tingting blong hem bifo i mekem wan disisen, nating se hem i wantem yet we Jerry i lidim hem. Taem hem i mas mekem wan disisen hem i laekem blong toktok wetem hasban blong hem fastaem, i no blong hem i talem long Pam wanem blong mekem, be blong Pam i soem se hem i laekem hem tumas mo hem i stap dipen long hem.

I had tumas blong Pam i talem stret se hem i nidim wan samting. Hem i no wantem toktok tumas blong mekem Jerry i kros no mekem Jerry i harem se waef blong hem i no glad. Long defren fasin, hem i wet nomo blong Jerry i luksave no maet Pam i talem sam smosmol toktok we i no givim klia mining.

Taem Pam i storeyan, hem i intres long ol smosmol samting long wan storeyan mo i stap askem plante kwestin. Samting ya i isi long hem from hem i haremsave filing blong narafala mo i intres bigwan long pipol mo fasin fren bitwin ol man.

Taem Pam i stap lesin, hem i stap katem tok blong wan man wetem ol smosmol toktok, no i saksakem hed blong hem blong soem se hem i agri no i askem kwestin blong soem se hem i stap folem man we i stap toktok mo blong soem se hem i wantem save wanem i stap talem.

Hem i traehad blong haremsave wanem we ol pipol oli nidim. Taem hem i givhan we oli no askem hem from, long tingting blong hem, hemia i wan nambawan rod blong soemaot lav. Antap moa hem i wantem halpem hasban blong hem blong kam antap mo kamgud moa.

Taem Pam i gat wan problem, maet hem i harem se samting ya i kavremap hem fulwan. Hem i mas toktok, i no rili blong faenemaot ansa, be blong talemaot ol filing blong hem. Hem i nidim blong save se i gat man we i kasem save long hem mo i kea long hem. Taem ol filing blong hem oli kam antap, Pam i stap sakem sam tok olbaot nomo. Hem i no minim taem hem i talem se: “!Yu neva lesin!”

Gudfala fren blong Pam taem hem i smol i no wan we hem i bin stap mekem sam samting wetem hem be wan we hem i tokbaot evri samting wetem hem. Ale long mared hem i no intres tumas blong mekem ol samting afsaed long famle, be hem i wantem wan blong lesingud long hem blong traem kasem save long hem, wan we Pam i save serem filing blong hem wetem hem.

Haos i wan ples we Pam i save tok we oli no save jajem hem from. Hem i no fraet blong talemaot ol fraet mo ol trabol blong hem long Jerry. Taem hem i nidim help, hem i no sem blong soemaot, from hem i trastem se hasban blong hem i stap blong givhan long hem mo i kea inaf blong lesin.

Kolosap oltaem Pam i harem se hasban blong hem i laekem hem mo i stap sefgud long mared blong hem. Be samtaem, taem i luk olsem se i no gat risen blong hem, Pam i stat blong harem se hem i no moa sef mo hasban blong hem i no moa laekem hem mo hem i nidim kwiktaem we hasban blong hem i stap kolosap long hem mo i soem bakegen se hem i laekem hem tumas.

Yes, Jerry mo Pam, we tufala i blong givgivhan long tufala, oli no sem mak. Samting we i mekem tufala i defren i save mekem sam bigfala problem long saed blong fasin blong kasem save, nating se tufala i wantem tumas blong soem lav mo sapotem tufala. Sipos yumi save lesin long toktok blong tufala long ol samting we yumi tokbaot antap, ?bambae tufala i talem wanem?

Wanem We Oli Luk Stret Long Ae Blong Tufala Wanwan

Jerry i save talem se: “Taem mi kamtru long doa blong haos, wantaem nomo mi luksave se Pam i harem nogud. Mi stap tingting se taem hem i rere, bambae hem i talem long mi from wanem hem i harem nogud. Mi luk olsem se problem ya i no bigwan tumas. Mi ting se sipos mi jes halpem hem blong luksave se i no nid blong hem i harem nogud mo se i isi nomo blong winim trabol ya, bambae hem i haremgud from. Be i rili mekem mi mi harem nogud, taem hem i talem afta we mi bin lesin long hem se, ‘!Yu neva lesin long mi!’ !Mi harem olsem se hem i stap blemem mi se mi nao mi stampa blong kros blong hem!”

Pam i save eksplenem se, “Dei ya i fulap long trabol nomo. Mi save se i no fol blong Jerry. Be taem hem i kambak we hem i glad nomo, mi harem se hem i no stap kea se mi harem nogud. ?From wanem hem i no askem long mi wanem i rong? Taem mi talem problem ya long hem, i olsem se hem i talem long mi se mi mi no gat hed, mo se ol samting ya oli no impoten nating. Hem i no talem se hem i kasem save long filing blong mi, be Jerry, man we i stap stretem ol problem, i talem long mi olsem wanem blong stretem problem ya. !Mi no wantem wan ansa, mi wantem we hem i sore long mi!”

Nating se i gat smol trabol ya bitwin tufala, Jerry mo Pam tufala i laeklaekem tufala bigwan. ?Wanem sam fasin blong luksave nid blong narawan we bambae i halpem tufala blong soemaot lav ya i klia moa?

Lukluk Tru Long Ae Blong Narawan

Jerry i harem se i bitim mak blong askem long Pam wanem i rong, ale hem i mekem long Pam wanem we bambae hem i wantem ol narafala oli mekem long hem wan. Jerry i wet blong Pam i toktok. Naoia Pam i harem nogud i no from problem nomo, be from i luk olsem se Jerry i no wantem givhan long hem taem hem i nidim. Pam i no luk fasin blong Jerry blong stap kwaet olsem wan fasin blong soem respek wetem fasin kaen—hem i luk samting ya olsem se hem i no kea long hem. Taem Pam i stat toktok, Jerry i lesin long hem we i no katem tok blong Pam nating. Be Pam i filim se Jerry i no stap kasem save long filing blong hem. Nao Jerry i givim, i no wan fasin blong kasem save long filing blong hem, be wan ansa blong problem ya. I olsem se samting ya i talem long hem se: ‘Ol filing blong yu oli no tru; yu stap bitim mak. ?Yu luk olsem wanem i isi blong stretem problem ya?’

!Ol samting bambae oli defren tumas sipos wanwan long tufala oli bin luk ol samting olsem we narafala i luk! Maet i save kamaot olsemia:

Jerry i kambak long haos mo i faenem se Pam i harem nogud. Hem i askem wetem kaen fasin se, “?Wanem i rong, dia?” Wora blong ae i stat ron, mo hem i stat toktok. Pam i no talem se, “!I fol blong yu!” no hem i mekem olsem we Jerry i no traem blong givhan. Jerry i holem hem i kam kolosap long hem mo i wet blong lesin long hem. Taem Pam i finis, Jerry i talem se: “Mi sore we yu harem nogud. Mi luksave from wanem yu harem nogud.” Pam i ansa: “Tangkyu tumas blong lesin long mi. Mi haremgud moa nao taem mi save se yu kasem save long mi.”

Sore tumas, be plante mared man mo woman oli no traem winim ol trabol blong olgeta, plante oli jusum blong finisim mared blong olgeta long divos. Taem i no gat fasin blong toktok tugeta, samting ya nao i rabis tumas we i spolem plante famle. Ol bigfala rao oli kamaot we oli seksekem faondesen blong mared. ?Olsem wanem samting ya i kamaot? Nekis atikol bambae i talem long yumi olsem wanem i hapen mo olsem wanem blong blokem.