Ol Pasta Oli Traehad Blong Kasem Ol Yangfala

“Wan grup blong ol stronghed yangfala we oli putum oel long hea blong olgeta mo werem ol kot we oli wokem long skin blong buluk, . . . oli kam insaed long jyos long Yunivesiti blong McGill.” Hemia ripot blong The Gazette long Montriol, Kanada. Be, ol “stronghed yangfala” ya, oli defren. Oli ol lida blong skul—ol pasta blong yunivesiti ya—mo oli folem samting we nyuspepa i kolem “wan nyufala fasin blong ol lida blong skul, blong wok stret wetem ol studen blong yunivesiti, we oli stap lukaot save long saed blong speret.”

Ol pasta ya oli putum klos olsem ol “stronghed yangfala,” ale oli tekem foto blong olgeta blong yusum olsem pablisiti, blong soem wok we oli mekem raonabaot long yunivesiti ya. Wan long olgeta ya, wan pasta blong Presbiterian, Roberta Clare, i eksplenem se: “Mifala i mekem disisen blong tekem wan pija wetem ol klos olsem, from we mifala i wantem jenisim tingting blong ol man we oli ting se mifala i tabu moa long ol narafala, mo mifala i stap jajem ol narafala.”

Hem i talem se, naoia plante moa studen bitim bifo oli wantem stadi long saed blong ol skul long yunivesiti. Plante oli stap traehad blong faenem ansa long ol dip kwestin, mo oli go luk ol tija mo pasta long yunivesiti blong givim ansa long olgeta. Wan man blong nyuspepa i toktok wetem wan studen, we hem i wantem save from wanem skul i gat bigfala paoa long ol man, from wanem i gat plante tumas skul, mo from wanem i luk olsem we ol skul ya oli stampa blong plante trabol long wol. Mo tu, hem i no gat klia tingting long saed blong Jisas Kraes se hem i rili hu, mo olsem wanem wol i stat.

?Ol pasta ya oli yusum Baebol blong givhan long ol studen blong faenemaot tingting blong God long ol dip kwestin olsem? I luk olsem we kolosap oli neva yusum Baebol. Ol pasta ya we oli tekem wan Nyufala Fasin, oli agri blong no traem jenisim skul blong ol studen ya. Oli talem se hemia i olsem fasin blong “stilim ol sipsip.”

Nating se oli gat tingting blong givhan, ol lida ya oli go longwe tumas long ol fasin blong tij we Kraes mo ol man blong hem oli bin yusum. Ol faswan Kristin oli no wari long saed blong “stilim ol sipsip.” Mo tu, oli no fraet blong tijim Tok blong God long ol man, mo blong halpem olgeta we oli rili lukaot trutok blong kasem save long hem. (Luk 24:44, 45; Ol Wok 20:20) Yes, blong kasem laef we i no save finis, ol man oli nidim stret save long saed blong Jeova God mo Pikinini blong hem, Jisas Kraes. (Jon 17:3) God i wantem we olkaen man oli ‘kasem stret save long trutok,’ blong oli save kasem laef.—1 Timote 2:3, 4.

Haf blong wok blong ol Wetnes blong Jeova, i blong mekem ol Baebol stadi, i fri nomo, long haos blong olgeta we oli wantem faenem ansa long ol kwestin long Baebol. Ol Wetnes blong Jeova long ples blong yu bambae oli glad blong givhan long yu.