Ol Famle We Oli Gat Papa No Mama Nomo Oli Stap Kam Plante

MAN BLONG WEKAP! LONG BRITEN I RAETEM STORE YA

NYUSPEPA ya The Times long London i talem se: “Namba blong ol famle we oli gat papa no mama nomo, i bigwan moa long Briten i bitim ol narafala kantri long Yurop. Long Briten, kolosap wan long evri faef famle wetem ol pikinini we oli no gat 18 yia yet, oli gat papa no mama nomo blong lukaot long olgeta. Be long Denmak, wan long evri seven famle i olsem, mo long Jemani mo Franis, wan long evri eit famle.”

Long evri ten famle long Briten we oli gat papa no mama nomo, naen long olgeta, mama nomo i lukaot long olgeta. Fasin blong famle we i stap longtaem finis, we naoia oli kolem nyuklia famle, i gat wan papa mo wan mama wetem ol pikinini blong tufala. Be naoia i luk olsem we plan ya i jes wan nomo long “ol defren kaen famle.” ?From wanem ol famle we oli gat papa no mama nomo oli stap kam plante naoia?

Bigfala risen, hemia se naoia plante hasban mo waef oli divos no seraot. Long Yunaeted Stet, samwe long stret haf blong olgeta man mo woman we oli mared oli divos biaen, mo Briten i kolosap sem mak. Mo tu, tingting blong ol man long saed blong mared i jenis. Woman ya Zelda West-Meads, we i wok long wan grup blong givim advaes long saed blong mared, nem blong grup ya ‘Relate’, i talem se 20 no 30 yia bifo, “wok blong man mo woman insaed long mared i moa klia. Man i wok blong kasem ol samting we famle i nidim, mo woman i lukaot long famle.” ?Be olsem wanem long taem blong yumi? “Tede, maet ol man mo woman we oli mared oli pleplei moa, mo mekem plante samting we oli intres long hem. Be long plante rod, mared i moa had naoia. Ol woman oli wantem kasem moa from mared blong olgeta, i bitim ol mama mo bubu blong olgeta bifo. Oli wantem stap sem mak olsem man blong olgeta, oli wantem we man i laekem olgeta tumas, we hem i frengud wetem olgeta, oli wantem wan wok blong olgeta​—mo oli wantem pikinini tu.”

Samting we i stap spolem plan blong famle we i stap longtaem finis, hemia fasin blong slip olbaot we televisin mo ol sinema oli stap soemaot. Plante yangfala we oli slip olbaot, oli no save ol nogud frut we oli save kamaot. Oli ting se mared i had tumas, bambae i blokem olgeta tumas, mo i wan hadwok we oli no nidim long laef blong olgeta.

Sam papa no mama we olgeta nomo oli lukaot long ol pikinini blong olgeta, oli jusum blong mekem olsem. Be samfala oli stap olsem from trabol we i bin kamaot, nating se oli no wantem. Plante man mo woman we oli mared, oli no glad nating taem wan samting i hapen we i mekem se olgeta nomo oli mas lukaot long ol pikinini blong olgeta. Sam long olgeta, oli gat wan gudfala mared bifo, be hasban no waef blong olgeta i lus.

Sam narafala oli bin gat ol bigfala trabol insaed long mared blong olgeta. Oli haremgud moa taem oli stap olgeta nomo blong lukaot long ol pikinini blong olgeta. Plante long olgeta, oli talem se naoia oli frengud moa wetem ol pikinini blong olgeta.

I gat plante risen from wanem ol famle we oli gat papa no mama nomo, oli stap kam plante. Nating se i olsem, olgeta ya oli gat ol spesel wari long saed blong wok mo ol traem we oli kamaot evri dei. ?Wanem ol wari ya? ?Olsem wanem papa no mama we hem wan nomo i lukaot long ol pikinini blong hem, i save mekemgud wok blong hem?