Plante Man Oli Ded Long Pot Ata—?From Wanem Samting Ya i Hapen?

MAN BLONG WEKAP! LONG OSTRELYA I RAETEM STORE YA

LONG Sande aftenun, Epril 28, 1996, weta i naes tumas long Pot Ata. Hemia wan ples we plante turis oli stap go long hem, long Tasmania, Ostrelya. Long medel dei, wan ples blong dring kofe, we nem blong hem Brod Ara Kafe, i fulap long ol man we oli stap kakae. Raonabaot long haf pas wan, wan yangfala wetem waet hea, we i gat 28 yia, i jes finisim kakae blong hem long vranda blong ples ya. Nao hem i girap, i go insaed, mo i stat sutum ol man oli ded.

Ol man mo woman oli foldaon ded long jea blong olgeta, we kakae i stap yet long maot blong olgeta. Ol polis we oli luk samting ya, oli talem se i olsem “ol dedbodi long taem blong bigfala faet.” Taem man ya i ting se olgeta evriwan oli ded finis, hem i wokbaot sloslou i go afsaed. Hem i kilim 20 man i ded finis. !Long sam seken nomo, hem i kilim moa man i ded, i bitim namba we olgeta narafala man oli bin kilim i ded long fulwan aelan blong Tasmania, long ol fo yia we oli jes pas!

Be i no finis yet. Man ya i gohed blong kilim man i ded, i olsem se hem i stap folem wan plan we hem i mekem finis. Eksampel, taem hem i wokbaot long rod blong goaot long ples ya we ol man oli stap kakae long hem, hem i luk Nanett Mikac wetem tufala smol gel blong hem. Hem i sutum Nanett i ded wetem smol gel blong hem we i gat tri yia. Ale, taem narafala smol gel we i gat sikis yia, i traem ronwe, hem i folem gel ya i go kasem wan tri we hem i haed biaen long hem, nao i sutum smol gel ya tu i ded.

Afta long samting ya, long get, we ol man oli stop blong pem blong kam insaed long ples ya, hem i kilim i ded tri man we oli stap insaed long wan BMW (hemia mak blong wan trak), mo i stilim trak blong olgeta. I no longwe tumas long ples ya, hem i faenem wan man mo woman long wan narafala trak. Hem i fosem man ya blong go insaed long biaen blong BMW trak we hem i stilim, mo i kilim i ded gelfren blong man ya. Nao, hem i draevem trak i go smol moa, kasem wan smol hotel we nem blong hem Siskep Kotej. Hem i kasem ples ya long 2 klok long aftenun ya. Long ples ya, hem i bonem BMW trak ya mo i holem man we hem i bin putum long biaen blong trak ya, wetem olfala man we hem i masta blong smol hotel ya, mo woman blong hem. Stat long taem we hem i aot long ples blong kakae, hem i kilim i ded 12 moa man, mekem se fulnamba blong ol man we hem i kilim i ded i go antap kasem 32. Plante narafala oli kasem kil tu.

Wok Blong Prij Long Sande Aftenun Ya

Long sem taem ya, Jenny Ziegler mo famle blong hem, we oli joen long Pot Ata kongregesena blong ol Wetnes blong Jeova, oli kam wanples long haf pas wan long aftenun ya, blong goaot long wok blong prij. Biaen, famle ya i folem rod we i go kasem ples blong kakae ya long Pot Ata. Jenny i wantem visitim David Martin, gudfala man ya we i masta blong smol hotel ya, Siskep Kotej. Samtaem bifo, hem wetem wan narafala Kristin sista oli bin storeyan gud wetem man ya long saed blong Baebol.

Jes afta 2 klok, Jenny, hasban blong hem, mo ol pikinini blong tufala, oli kasem hotel ya. Oli luk se smok i stap kamaot long wan trak we i stap long gras kolosap long haos ya. Ol polis oli stopem olgeta mo talem long olgeta blong tanraon mo gobak long rod we oli kam long hem. Jenny i talem se: “Mifala i haremsave se i gat wan nogud samting i bin kamaot. Mifala i luk se i narakaen we i no gat man nating long rod.”

Be, famle ya i no save samting we i bin hapen, ale, oli folem wan narafala smol rod i go kasem solwora, blong gohed long wok blong prij we oli plan blong mekem. Long ples ya, i luk olsem se i no gat wan samting i rong: Ol pikinini oli stap swim, ol man oli stap wokbaot long sanbij, mo wan olfala man mo woman tufala i stap sidaon long trak blong tufala mo ridim buk. Jenny i talem se: “Hasban blong mi i go luk tufala mo oli storeyangud. Hem i talem long tufala se i luk olsem we i gat wan problem i kamaot long big rod, mo se maet i moagud sipos tufala i folem wan narafala rod taem tufala i gobak. Mi toktok kwiktaem wetem wan yangfala man, nao mifala i aot long ples ya smoltaem nomo biaen.”

Famle Ziegler ya i gohed folem rod we i go kasem ples blong kakae ya long Pot Ata. Jenny i talem se: “I gat sam trak we oli blokem rod we i go insaed long ples blong kakae ya. Biaen, ol man oli talem long mifala se ol trak ya oli blokem ol man blong oli no save lukluk ol dedbodi. Wan man i talem long mifala se: ‘I gat wan krangke man ya i stap sutum ol man wetem wan masket. !Ating 15 man oli ded finis!’ Nao oli talem long mifala se i waes blong aot long ples ya kwiktaem.”

En Blong Trabol Ya i Nogud Tumas

Trabol ya i no finis yet, olsem Jenny i talem: “Taem mifala i stap draevem trak blong gobak long haos, tingting blong mifala i trabol tumas, from we mifala i no save nating se krangke man ya i stap long weples. Evri taem mifala i luk wan narafala trak long rod, mifala i tingting se maet man ya i stap long trak ya. Taem mifala i kasem haos tu, mifala i no harem se mifala i sefgud. Haos blong mifala i stap hem wan, longwe long ol narafala haos, mo wan man we i savegud ples ya, i save kam haed isi nomo long hem. Ol Kristin brata sista blong mifala oli save weples mifala i bin go long hem long aftenun ya, taswe kwiktaem nomo oli telefon i kam long mifala, blong luk sipos mifala i sef.

“Taem mifala i tingbaot wanem i bin hapen, mifala i luksave se sipos mifala i bin kasem smol hotel ya sam menet nomo bifo, ating mifala tu i stap wetem olgeta ya we krangke man ya i kilim i ded. !Mifala i seksek tu, taem mifala i tingbaot se maet man ya i bin stretem masket blong hem long mifala, taem mifala i stap toktok wetem ol polisman kolosap long haos ya!”

Long Sande naet ya, bitim 200 polis oli raonem smol hotel ya. Oli haedgud blong man ya i no save kasem olgeta, from we sam samtaem hem i stap sutum ol bolet oli go olbaot. Man ya i askem olgeta blong sanem wan helikopta i kam blong hem i save ronwe long hem, be long naet ya, ol plan ya oli foldaon. Long raonabaot 8 klok long Mande moning, smok i kamaot long hotel. Krangke man ya i ronwe we hem i kasem smol kil nomo taem faea i bonem hem. Ol trifala man we hem i holem olgeta long hotel ya, oli ded insaed long haos ya we i bon evriwan. Wan long olgeta i masta blong ples ya we famle Ziegler i bin traem blong visitim. Namba blong ol man we oli ded i go antap kasem 35.

?From Wanem Samting Ya i Hapen?

Raonabaot seven wik bifo long samting ya, long Maj 13, long Dunblen, Skotlan, wan man we i karem wan masket, i go insaed long wan skul we ol pikinini oli stap mekem spot long hem, nao i sutum 16 smol pikinini wetem tija blong olgeta i ded. Kwiktaem, nyus ya i kasem olgeta ples blong wol. Olsem wan tok we oli yusum bifo long televisen i talem, se, “Sipos blad i ron, hem i bigfala nyus.” Sam man we oli stadi long risen we i stap biaen long aksin blong ol man, oli ting se maet man Ostrelya ya we i sutum plante man i ded, i wantem kilim moa man i bitim man ya long Dunblen. Samting ya i mekem yumi tingbaot wan narafala man long Yunaeted Stet we oli kolem hem ‘Zodiac killer.’ Blong plante yia, hem i mekem ol man long Nyu Yok oli seksek bigwan. Hem i talem se hem i kilim i ded plante man, from we hem i wantem bitim sam narafala man we oli kilim man i ded, we hem i bin ridim store blong olgeta long ol buk.

Wan narafala samting we plante man oli agri se i pusum ol man blong kilim i ded ol narafala man, hemia seks mo raf fasin we oli luk long ol sinema mo video. Nyuspepa ya blong Ostrelya, Herald Sun, i givim ripot ya se: “Polis i karemaot 2,000 video kaset blong raf fasin mo doti fasin long saed blong seks, long haos blong man ya Martin Bryant, we i kilim plante man i ded long Pot Ata. . . . Ol polis oli faenem ol video kaset ya long sem taem we plante toktok i kamaot se, maet raf fasin long ol video i gat paoa long man ya we i kilim ol man i ded long Pot Ata.” Long sem fasin, nyuspepa ya Daily News blong Nyu Yok, i talem se, “oli faenem tu bokis blong ol rabis video kaset long saed blong seks, oli stap antap long bed” blong ‘Zodiac killer,’ man ya we i kilim plante man i ded long Yunaeted Stet.

Taem nyus long saed blong trabol we i kamaot long Pot Ata i kasem plante ples, samfala stesen blong televisen oli jenisim kwiktaem program blong olgeta. Biaen, wan woman we i stap raet long nyuspepa, Penelope Layland, i raetem wan store we nem blong hem se, “Tu Fes Blong Televisen Long Saed Blong Raf Fasin Mo Sore.” Hem i talem se: “Long wan rod, taem ol televisen stesen oli jenisim ol program long saed blong raf fasin, i olsem we oli stap kwaet blong wan menet nomo blong tingbaot ol dedman ya. Tumora, nekis wik, mo nekis manis, bambae oli gohed bakegen blong soem ol rabis program ya blong raf fasin.”

Be, blong kasem moa klia, risen blong ol raf fasin we oli fulap tumas naoia, yumi mas lukluk i go long Baebol. Longtaem finis, hem i talemaot se ‘long taem blong ol las dei blong wol, laef long wol ya bambae i kam strong tumas. Bambae ol man oli . . . lusum hed, mo oli wael olgeta. Bambae oli no wantem ol fasin ya we i gud nomo, oli agens long hem.’ (2 Timote 3:1-5) Taswe, tede ol raf fasin ya we oli kam antap bigwan, oli pruvum moa se yumi stap long ol las dei, mo se i no longtaem, bambae rabis wol ya i lus.—Matyu 24:3-14.

Sem mak olsem plante man oli save finis, ol devel—ol rabis speret man we oli gat bigfala paoa—oli joen wetem ol raf mo wael fasin ya we oli bitim tingting blong man. (Efesas 6:12) Afta we Baebol i tokbaot se Jisas i sakem Setan wetem ol rabis enjel blong hem oli aot long heven, hem i gohed se: “Sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.” (Revelesen 12:7-9, 12) Yumi stap long taem blong sore ya finis. Mo Setan wetem olgeta rabis enjel blong hem, oli stap yusum enikaen rod blong pusum ol man blong mekem moa raf fasin.

Be, i no longtaem, Setan mo ol rabis enjel blong hem, wetem rabis wol ya blong hem, bambae oli lus. Nao bambae rul blong Kingdom blong God i stanemap wan nyufala wol wetem stret fasin long hem. (Daniel 2:44; Matyu 6:9, 10; 2 Pita 3:13; 1 Jon 2:17; Revelesen 21:3, 4) Jenny i talem se: “Naoia, mifala i stap ‘krae wetem ol man we oli krae.’ Be tingting blong mifala i strong blong serem hop we mifala i gat long Kingdom wetem olgeta man raonabaot long mifala, we oli stap harem nogud tumas from trabol ya.”—Rom 12:15.

[Futnot]

[Tok Blong Pija Long Pej 17]

Brod Ara Kafe, we man ya i stat kilim ol man oli ded

[Credit Line Long Pej 16]

Mountain High Maps® Copyright © 1995 Digital Wisdom, Inc.