?Jisas i Olsem Wanem Naoia?

I TRU se yumi intres blong save se fes mo bodi blong Jisas i olsem wanem, be i impoten moa blong luksave se hem i olsem wanem naoia, mo se hem i stap wea. ?Wanem bigfala wok we hem i mekem long stamba tingting blong God blong givhan long ol man?

Histri blong man i no save givim ansa long kwestin ya. Yumi save faenem ansa long wan buk nomo we God i i wokem blong givhan long ol man we oli traem faenem trutok. Buk ya hemia Tabu Baebol. Hem i wan buk we oli seremaot moa i bitim eni narafala buk long fulwol.

Baebol i no jes wan buk we man i raetem. I tru se, man i raetem, be God i rili stamba blong hem: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 Timoti 3:16, 17.

Aposol Pol i luksave se Baebol i kamaot long wea, from we hem i raetem se: “Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret. Mo God i stap wok yet long laef blong yufala ya we i bilif long hem.”—1 Tesalonaeka 2:13.

God hem i bigfala paoa ya we i wokem heven mo wol, wetem olgeta bilyan galaksia mo bilyan sta blong hem. !Hem i rili gat bigfala paoa blong wokem olgeta samting ya! Yumi sua se, Man ya we i gat Olgeta Paoa, we i wokem ol nambawan samting ya, hem i naf tu blong wokem wan buk blong lidim olgeta we oli stap traem faenem trutok.

Wanem We Baebol i Talem

Tok blong God i soemaot klia se olgeta bilif mo tingting we man i gat long saed blong Jisas, oli rong. Makem sam long ol poen ya we Baebol i talem long saed blong Jisas:

• Jisas hem i faswan man we God hem wan i wokem long heven, longtaem finis, bifo we hem i wokem ol enjel mo ol narafala samting long heven. From samting ya Jisas i karem nem ya se ‘Pikinini blong God, wan nomo we hem i gat.’ Olgeta narafala samting we God i wokem, hem i wokem wetem Pikinini ya blong hem we i olsem “man we i mekem ol plan we hem i stap folem,” bifo we hem i kam long wol ya.—Jon 3:16; 6:38; 8:58; Proveb 8:30; Kolosi 1:16.

• Raonabaot 2,000 yia bifo, God i karem laef blong Jisas mo i putum i go long bel blong wan woman Jyu we i neva slip wetem man samtaem. Ale, Jisas i bon long wol olsem wan man. Tede tu, ol man oli save mekem semfala samting tru long wan spesel rod we oli kolem artificial insemination.—Matiu 1:18; Jon 1:14.

• Jisas hem i no jes wan gudfala man. Hem i wan bigman we i soem ol nambawan fasin ya lav, sore, mo stret fasin olsem we Papa blong hem long heven, Jeova God, i stap mekem.—Jon 14:9, 10; Hibrus 1:3; 1 Jon 4:7-11, 20, 21.

• Long wol ya, Jisas i wok long nem blong God taem hem i mekem i gud long ol puaman mo olgeta we oli harem nogud, be tu, hem i neva daonem ol rijman. Wetem paoa blong tabu spirit blong God, Jisas i mekem merikel long ol sikman blong oli kamgud bakegen mo hem i mekem ol dedman oli laef bakegen. Taem Jisas i mekem ol nambawan wok ya, hem i soemaot wanem we bambae hem i mekem long fulwol afta we hem i laef bakegen long ded blong go long heven mo kam King long Kingdom blong God long heven.—Matiu 11:4-6; Luk 7:11-17; Jon 11:5-45.

• Jisas i tijim ol man blong hem blong prea from Kingdom ya blong God we i stap long heven, mo blong putum Kingdom ya long fasples long laef blong olgeta. Bambae Kingdom ya “i flatemgud paoa blong ol narafala king [we oli stap long wol tede], nao bambae hem i rul oltaem gogo i no save finis.” Ale, bambae i gat wan gavman nomo, hemia Kingdom ya, we i rulum wol. Kingdom ya nao, hem i hop blong olgeta man we oli trabol.—Daniel 2:44; Matiu 6:9, 10.

• God hem i Papa blong Jisas, mo Jisas hem i stap tru long God. Taswe, taem Jisas i ded, hem i wan stret man. Hem wan i rere blong lego laef blong hem we i stretgud olgeta i go long God olsem wan ransom sakrefaes blong karembak wanem we Adam i lusum taem hem i rebel agensem God. Taem hem i mekem olsem, Jisas i openem rod long olgeta man we oli bilif long hem blong oli kasem laef we i no save finis.—Jon 3:16; Rom 3:23, 24; 1 Jon 2:2.

• Jisas hem i King ya we God i jusumaot blong mekem olgeta stamba tingting blong Hem oli kamtru. Bambae hem i karemaot ol rabis fasin long wol ya mo bambae hem i mekem ol gudfala man oli kam stretgud olgeta long tingting mo bodi blong olgeta. Nao bambae olgeta man long wol oli laef long pis mo oli glad long paradaes long wol. Bambae i gat ol gudfala haos mo plante kakae we i naf blong olgeta man. Ol sik, krae, mo ded, bambae oli lus blong olwe. Ol dedman bambae oli laef bakegen mo olgeta tu bambae oli gat jans blong laef gogo i no save finis long wol ya.—Jenesis 1:26-28; 2:8; Ol Sam 37:10, 11, 29; Ol Proveb 2:21, 22; Aesea 25:6; 65:21-23; Luk 23:43; Ol Wok 24:15; Revelesen 21:3, 4.

Taswe, Baebol i talem klia long yumi se Jisas hem i gat impoten wok long stamba tingting ya blong God blong stanemap wan niufala wol we stret fasin nomo i stap long hem. From impoten wok ya we Jisas i gat, i stret nomo we hem i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.”—Jon 14:6; 2 Pita 3:13.

Wan Rula We i Gat Sore

Ol man we tingting blong olgeta i stap daon, oli wantem se Jisas i rul antap long olgeta long niufala wol. !Yes, hem i wan nambawan rula! Hem i soemaot samting ya long ol nambawan wok we hem i bin mekem taem hem i stap long wol. (Matiu 15:30, 31) Be tu, makem se bambae hem i wanem kaen rula.

Fastaem, tingbaot stori blong ol rula blong wol. Histri i soem se long olgeta yia we oli pas, plante long ol rula ya oli rabis, oli no gat sore, oli lidim ol man blong olgeta i go blong faet, kilim man i ded mo mekem i nogud bigwan. Long ol yia 19 handred, bitim 100 milyan man oli ded long ol faet.

Skelem fasin mo histri blong ol rula ya blong wol, wetem fasin mo histri blong ol wok blong Jisas long saed blong ol puaman, olgeta we oli harem nogud, mo we oli no gat paoa: “Taem hem i luk ol man we oli plante tumas, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” Taswe, Jisas i talem long olgeta ya se: “Yufala evriwan we yufala i stap hadwok tumas mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. . . . Yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”—Matiu 9:36; 11:28-30.

!Jisas i rili gat sore long ol man! Long fasin ya hem i soemaot se hem i stap folemgud eksampel blong Papa blong hem long heven. Jisas i stret pija blong lav, mo hem i tijim ol disaepol blong hem blong gat trufala lav ya we i stanap long stret rul. Long rod ya, bambae oli no letem kala, kantri, mane, skul blong olgeta bifo, no enikaen narafala samting i spolem fasin joengud we oli gat long fulwol. (Jon 13:34, 35; Ol Wok 10:34, 35) Yes, Jisas i laekem ol man tumas, taswe hem i lego prapa laef blong hem from olgeta. (Efesas 5:25) Hem i rula ya we wol i rili nidim mo we bambae wol ya i gat i no longtaem.

Jisas, Naoia Hem i Wan “Naesfala” King

Profet tok blong God i halpem yumi blong kasem save se, naoia, Jisas hem i gat bigfala paoa olsem King long heven. Man blong raetem Ol Sam i givim wan profet tok long saed blong hem i se: “King, yu yu naes moa, yu winim olgeta man . . . Yu raed long hos blong yu, yu go long paoa blong yu blong yu winim ol enemi blong yu. Yu mas faet from fasin ya we man i gat sore long narafala man mo from trutok mo stret fasin, blong ol fasin ya oli save stanap oltaem. . . . Yu yu laekem ol fasin we i stret, be ol fasin we i nogud yu agens long olgeta. Nao from samting ya, God, we i God blong yu, hem i jusumaot yu finis, mo i mekem yu yu glad moa, i winim we i mekem long ol narafala king.”—Ol Sam 45:2, 4, 7.

Jisas, King ya blong heven we God i makemaot, bambae i mas tekem aksin blong soemaot se hem i laekem stret fasin mo we hem i no laekem nating ol rabis fasin. Taswe, Baebol i tokbaot se hem i wan man blong win we i no save ded samtaem, hem i “King blong olgeta king,” we i no longtaem bambae hem i kilim olgeta enemi blong God oli ded. Mo tu, bambae hem i mekem wol ya i kam wan paradaes mo i mekem ol man we hem i pemaot olgeta, oli kam stret gud olgeta.—Revelesen 19:11-16.

Niufala wok we Jisas i mekem bambae i no olsem hemia blong wan ‘Mesaea we i safa’ we ol man oli traem hem oli wipim hem mo kilim hem i ded. No gat. Niufala wok ya blong hem i olsem wok blong wan “God we i Gat Paoa,” rula blong wol. (Aesea 9:6) Hemia i no wan gudfala nius blong olgeta rula blong wol tede, from we hemia i min se i no longtaem ol kingdom blong olgeta bambae oli lus fulwan, olsem Daniel 2:44 i talem. God bambae i yusum Kraes olsem man blong stretem ol nogud fasin, mo bambae hem i “jajem ol man blong ol narafala kantri, mo bambae i mekem ples blong faet i kam fulap long ol dedman. Hem bambae i daonem ol king long olgeta ples long wol.”—Ol Sam 110:5, 6.

Aesea i talemaot se taem Kraes bambae i mekem samting ya, “ol man blong plante kantri oli sek long hem, mo ol king bambae oli sapraes tumas long hem, we oli no save tok.” ?From wanem? “Ol samting we man [blong jos] i no talem long olgeta, bambae oli luk, mo ol samting we oli no harem, bambae oli haremsave, nao bambae oli sapraes tumas from.”—Aesea 52:15.

‘Oli Sakem Smol Win Be Bambae Oli Kasem Hariken’

Aesea i talemaot wan bigfala mastik we ol lida blong skul bambae oli mestem blong mekem. Eksampel, ol lida ya oli no bin tijim ol trutok blong Baebol. Oli tijim ol giaman tijing long ol sipsip blong olgeta olsem panis long helfaea, triniti we i gat tri man long wan god, mo sol we i no save ded—olgeta tijing ya oli kamaot long hiten man. Mo tu, ol lida ya blong skul oli sapotem olgeta faet blong ol nesen, nating se samtaem oli mas kilim narafala man we i blong semfala skul olsem olgeta. Hemia i go stret agensem loa blong God.—1 Jon 2:3, 4; 3:10-12; 4:8, 20, 21.

Mo tu, ol lida blong skul oli soem ol naesfala pija, oli werem ol naesfala klos, oli wokem ol bigbigfala haos wosip, mo oli pentem ol pija we oli flasgud wetem ol bilif blong hiten man—olsem laet ya we i goraon long hed blong ol tabu man, we i kamaot long god blong san we ol hiten man oli wosipim. Olgeta samting ya oli pulum ae blong ol sipsip blong olgeta, be long ae blong God, oli no gat mining nating. Oli soemaot klia se oli no folem oda blong God we hem i talem long ol man blong hem se: “Yufala ya we yufala i stap karem ol samting blong yusum long haos blong Hae God, yufala i mas aot gud nomo . . . yufala i no mas tajem ol samting we i doti long fes blong hem, yufala i mas mekem we yufala i klin long fes blong hem, nao yufala i mas aot.”—Aesea 52:11; 2 Korin 6:14-18.

Ol man we oli talem se oli wok long nem blong God, be we oli stap brekem ol loa blong Hem mo oli stap tijim ol man blong mekem olsem olgeta, bambae oli kakae frut blong sid we oli planem. Bambae oli kasem strongfala jajmen, mo bambae oli pem praes blong ol samting ya taem rabis wol ya i lus. Olsem profet Hosea i talem, “oli sakem smol win, be bambae oli kasem hariken.”—Hosea 8:7, King James Version; lukluk tu Revelesen 17:1-3, 15, 16.

Ol Man We Oli Gat Gudhat Oli Lanem Trutok

Ol giaman bilif we ol lida blong skul oli givim long saed blong God mo Jisas bambae i no save blokem ol man we oli gat gudhat blong lanem trutok long saed blong Jisas. Hemia wanem we i bin hapen long faswan handred yia. Paul Barnett, we i raetem The Two Faces of Jesus, i talem se: “Kraes i no jyam aot long skae, i kamdaon long wol ya wetem wan parasut, ale, histri i tokbaot hem. No gat. Hem i no kamtru we i no gat tok i talemaot hem fastaem.” Tru tumas, long taem ya bifo, ol profet tok blong Baebol oli bin ‘talemaot’ Mesaea finis, mekem se ol disaepol blong hem oli save finis se bambae hem i mas kam. Tede, i gat moa pruf we oli talemaot klia se God i givim paoa finis long Jisas blong i rul olsem “King blong olgeta king” long heven.—Matiu 24:3-13; 2 Timoti 3:1-5, 13.

Yes, “bambae ol man oli stap talemaot gud nius blong kingdom [blong God we Kraes i rul long hem]. Bambae oli talemaot long olgeta ples long wol, blong oli witnes long fes blong olgeta man. Nao biaen, bambae en i save kam.” (Matiu 24:14, NW) Hemia wanem we ol Witnes blong Jeova oli stap mekem. Namba blong olgeta i kasem bitim faef milyan man finis raon long wol. Taswe, ol man we oli wantem save se Jisas hem i rili hu, oli gat jans blong mekem olsem. (Jon 10:14; 1 Jon 5:20) Mo i impoten tumas blong save hem mo blong obei long hem sipos yumi wantem stap sef tru long “bigfala trabol,” we bambae i kamaot i no longtaem blong klinim wol.—Revelesen 7:9-14; Jon 17:3; 2 Tesalonaeka 1:6-10.

Taswe, ol Witnes blong Jeova bambae oli glad tumas blong halpem yu blong lukluk moa long wanem we Baebol i talem long saed blong Pikinini blong God.

[Futnot]

[Tok blong pija long pej 9]

Kraes i kasem paoa long Kingdom blong hem i ravemaot ol rabis fasin

[Tok blong pija long pej 10]

Aninit long rul blong Kraes, wol ya bambae i kam wan paradaes