Wan Man Blong Faet i Kam Wan Soldia Blong Kraes

LOUIS LOLLIOT I TALEM STORI YA

Long Ogis 16, 1944, long taem blong Namba Tu Bigfala Faet blong Wol, mi stap wetem ol ami we oli agensem Hitler. Mifala i godaon long sanbij long Saot blong Franis. Afta wan wik blong faet long solwota blong Mediterenian, olgeta trak blong faet we mi mi lidim oli kam kasem wof blong Marsey mo mifala i faet go kasem hil klosap long bigfala jos haos blong Notre-Dame-de-la-Garde. Mak blong mifala i blong kasem ples blong ol soldia blong Jemani.

FAET i strong long taem ya. Wan bom i kasem wan long ol trak blong faet long grup blong mi, mo tri long ol fren blong mi oli ded. Afta long samting ya, wan bom we oli berem long graon, i bosta mo i brekem wil blong trak blong faet blong mi, mekem se trak i no moa save muf. Mifala i gat strong tingting blong no lego, taswe, mifala i faet plante aoa bakegen.

Long wan han, mi holem wan bigfala masket, mo long narafala han, mi holem flag blong Franis. Taem mi luk we i no gat faet smoltaem, mi tekem jans blong muf i go long fored wetem wan volontia blong Franis ami. Nating se mi taed tumas mo fes blong mi i blak from paoda blong ol bom, mi planem flag blong Franis long fored blong bigfala jos haos.

Mifala i Kam Fri

Long ol wik we oli kam biaen, mifala i go long not blong traem kasem ami blong Jemani we oli stap ronwe. Sam soldia blong Jemani oli stap sutum mifala. Oli fasem sam bigfala aean rop i gokros long rod blong mekem se mifala i mas satem smol aean doa we i stap antap long trak blong faet.

Long Oktoba, grup blong ami blong mifala i kam insaed long wan smol taon blong Ramonshan long ol hil blong Vosjes, not is blong Franis. I luk olsem se taon ya i no moa gat man long hem. Taswe, mi stanap afsaed long doa blong trak blong faet blong mi mo lukluk i goraon long mifala. Wantaem nomo, wan bom we ol man oli sutum i kam, i kasem trak blong faet blong mi, mo i bosta insaed. Tri long ol man blong mi oli ded, mo mi wetem wan narafala soldia i kasem bigfala kil. Naoia, trak blong faet i no moa muf. Nating se i gat seventin pis aean blong bom ya i stap long leg blong mi, mi holem stia blong trak blong faet taem wan narafala trak i pulum mifala.

From bisnes ya, mi kasem wan leta blong ol haeman we oli talem sam gudfala tok blong presem mi. Sam dei afta, Jenerol de Lattre blong Tassini, kapten blong faswan Ami blong Franis, i givim wan medel long mi from samting we mi bin mekem long Marsey. Hem i talem se: “Bambae mi luk yu bakegen.”

Smoltaem afta long samting ya, mi wok olsem sekretari blong Jenerol de Lattre. Biaen, taem ol man Jemani oli lusum faet, long Mei 8, 1945, mi go wetem Jenerol ya long Belin blong toktok long nem blong ol man Franis. Long ol fofala yia we oli kam biaen, mi mi obei mo halpem man ya long olgeta wok blong hem.

Be, ?olsem wanem mi joen long plante impoten wok ya long taem blong Namba tu Bigfala blong Wol?

Trening We Mi Kasem Long Jos Mo Long Faet

Taem mi gruap, mi gat strong bilif long skul Katolik, mi wantem tumas blong mekem wok blong God mo mi wantem givhan long kantri blong mi. Long Ogis 29, 1939, jes sam dei bifo we kantri blong Franis i joen long Namba Tu Bigfala Faet blong Wol, mi putum nem blong mi blong joen long ami. Mi gat 18 yia nomo. Mi kasem wan trening blong faef manis long wan spesel skul blong soldia long Paris. Taem mi kam ofisa, oli sanem mi long ples we i gat faet long hem, long Is blong Franis.

Oli kolem faet ya se giaman faet, from we mifala i westem taem nomo blong wet long ol soldia blong Jemani we oli stap faet long narafala ples. Ale, long Jun 1940, taem ol man Jemani oli kamtru blong faet agensem mifala, oli tekem mi mi go kalabus. Tu manis biaen, mi ronwe, mo mi joen long Franis ami we i stap long Not blong Afrika.

Long Tunisia, long wan spesel kampen we nem blong hem ‘Wael Dog blong Draeples,’ mifala i faet agensem ami blong ol man Jemani we oli stap aninit long Jenerol Erwin Rommel. Long taem ya mi harem nogud bigwan from we 70 pesen blong bodi blong mi i bon, mo mi stap naen dei we mi no moa save wan samting. Mi spenem tri manis long hospital blong Sidi-bel-Abes, long not wes blong Aljeria, ples ya we hedkwota blong Franis Foren Lejion (Légion Étrangère) i stap long hem. Taem mi stap yet long Not blong Afrika, mi kasem wan medel from wok we mi mekem long ami (Kros blong Ami).

Sam lida blong Katolik skul, we oli wok long ami, oli leftemap tingting blong mifala blong mekem “Kristin” wok blong mifala. Toktok blong olgeta i mekem mi mi rere blong lego laef blong mi, mo blong halpem kantri blong Franis. Taem mi gat jans, mi tekem Komunion bifo we mi go long faet. Mo taem mi stap long medel blong wan strong faet, mi prea long God mo long Vejin Meri.

Mi respektem ol soldia we oli enemi blong mifala from we olgeta tu oli memba blong Katolik jos. Sam long olgeta oli werem wan strap we long aean blong hem oli raetem Gott mit uns (God i stap wetem mifala). Be i narakaen blong ting se wan God i save ansa long prea blong ol soldia we oli stap faet agensem olgeta, nating se oli gat sem skul ?no?

Sam Samting i Jenis Afta Long Faet

Afta long faet, long Epril 10, 1947, mi mared wetem Reine, wan yangfala gel we hem i blong sem taon wetem Jenerol de Lattre de Tassini, nem blong taon ya Muieron-en-Pare, long Vende. Jenerol i witnes blong mi long mared blong mi. Afta we hem i ded, long Janewari 1952, mi holem flag blong hem taem oli berem hem.

Wan Sande moning long en blong 1952, mi mo waef blong mi, wetem smol gel blong mitufala, i rere blong go long Lames. Be tu Witnes blong Jeova i kamtru long haos blong mifala. Samting we oli talem long saed blong Baebol i pulum intres blong mifala. Nating se mi mo waef, mitufala i strong long Katolik skul, mitufala i no gat tumas save long saed blong Baebol from we jos i no leftemap tingting blong mifala blong ridim Tok blong God. Witnes ya we i askem long mitufala blong stadi Baebol, i Léopold Jontès. Long taem ya hem i elda long branj ofis blong ol Witnes blong Jeova long Franis. Tru long Baebol stadi we mifala i mekem, mi kasem ansa blong ol kwestin we mi stap askem long mi wan taem mi yangfala yet.

Wan eksampel, oltaem mi bin wantem save mining blong prea blong Masta. From we mi mi wan Katolik, mi bilif se olgeta gudfala man bambae oli go long heven taem oli ded, be mi no kasem save from wanem nao mifala i prea long God se: “Mekem olgeta samting we yu yu wantem oli kamaot long wol ya.” (Matiu 6:9, 10, Douay Version; mifala nomo i putum italik.) Taem mi toktok wetem ol pris long saed blong prea ya, oltaem oli traem faenem rod blong no ansa long kwestin blong mi, no oli talem se prea ya bambae i kamtru nomo taem olgeta man oli kam Katolik. Be mi no glad long ol ansa ya.

Ol pris oli no givim klia ansa tu long mi long saed blong Triniti. Tijing blong Katolik skul i talem se, ‘Papa hem i God, Pikinini hem i God, mo Tabu Spirit hem i God. Mo olgeta ya oli no tri God, be wan God.’ Taem mi mo waef blong mi i kasem save gud tijing blong Baebol we i eksplenem se Jisas i Pikinini blong God be hem i no God ya we i gat olgeta paoa, samting ya i mekem mitufala i harem gud tumas.—Mak 12:30, 32; Luk 22:42; Jon 14:28; Ol Wok 2:32; 1 Korin 11:3.

Hemia faswan taem we mitufala i harem olsem se ae blong mitufala i open. I olsem we mitufala i faenem wan sas perel, nao mitufala i rere blong lego evri samting blong holemtaet perel ya. (Matiu 13:46) Mi mo waef blong mi i save se mitufala nao i mas jusum blong kasem samting ya we i sas moa i bitim olgeta narafala samting. Kwiktaem nomo mitufala i karem tingting blong aposol Pol we i talem se: “Olgeta samting blong laef blong mi bifo [oli] olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi save Jisas Kraes.” From samting ya mitufala i mekem laef blong mitufala i laenap wetem Baebol blong mekem wok blong God.—Filipae 3:8.

Mi Mekem Disisen

Long Epril 1953, sam manis nomo afta we mitufala i stat stadi Baebol wetem ol Witnes, mi kasem oda blong joenem ami blong Franis we i mas go faet long Indojaena. Long taem ya, mi stap wok wetem wan haeman long Senat blong Paris. From we mi kasem save rul blong Baebol finis long fasin blong no joen nating long faet, mi kasem save tu se, naoia, mi nidim blong mekem wan disisen. (Jon 17:16) Mi talemaot long ol haeman blong ami se mi no wantem obei long oda blong go faet long Indojaena, from we mi no moa wantem joen long enikaen faet.—Aesea 2:4.

Ol haeman blong ami oli askem long mi se: “?Yu save se fasin blong yu bambae i mekem yu yu gat badnem long fes blong ol man mo bambae yu save lusum jans blong faenem wan wok long fiuja?” Stat long taem ya, oli no moa wantem save long mi. Be, hemia i halpem mi from we i mekem se oli no moa singaot mi blong go long faet. Plante memba blong famle blong mi mo ol fren tu, oli no kasem save from wanem mi sakemaot wok ya we i givim haenem long mi antap long ol narafala man.

From we mi bin joen long ami bifo, ol haeman blong gavman oli mekem i gud long mi, mo oli respektem mi nomata long bilif we mi gat. Ami i givim spel long mi blong tu yia, we mi no mekem wan wok. Oli talem risen blong samting ya, hem i from sam problem long helt blong mi, be long rod ya nao, mi no nid blong karembak wok blong mi. Long semtaem, mi mo waef blong mi i go long ol miting blong ol Witnes blong Jeova long kongregesena we i stap klosap long mifala, mo mitufala i serem niufala bilif blong mitufala wetem ol man.

Naoia—!Wan Soldia Blong Kraes!

Biaen, long stat blong 1955, mi kam fri olgeta long ol wok blong ami. Feftin dei afta, long Maj 12, long wan asembli long Versay, mi mo waef blong mi i tekem baptaes blong soemaot se mitufala i givim laef blong mitufala i go long Jeova God. From we mi no moa wok long ami, mi mas faenem wan narafala wok blong lukaot long famle blong mi. Blong fo yia, mi wok olsem man blong klinim ol ples long wan bigfala maket haos blong Paris. Niufala wok ya i no isi fastaem, be Jeova i blesem ol traehad blong mi.

Long ol yia we oli pas, mi mo waef blong mi i halpem plante man blong akseptem mesej blong Baebol. Mi bin gat jans blong toktok wetem sam haeman blong ami mo gavman, mo eksplenem tingting blong ol Kristin long saed blong fasin blong no joen nating long faet. From we mi wok long ami bifo, samting ya i halpem mi blong agensem ol rong tingting we sam man oli gat long saed blong ol Witnes blong Jeova. Mi eksplenem gud Kristin fasin ya blong no joen nating long faet, mo mi soemaot we ol faswan disaepol blong Kraes oli folem sem tingting. Wan eksampel, long buk ya The Early Church and the World, Tija C. J. Cadoux, i raetem se: “Kam kasem rul blong Marcus Aurelius [161-180 K.T.b] no samwe biaen, i no gat wan Kristin we i kam wan soldia afta we hem i baptaes.”

Wan long ol bigfala traem we mi bin fesem, i hapen long 1977. Waef blong mi i bin sik wan yia finis, nao hem i ded. Go kasem ded, hem i no fraet mo i holemstrong bilif blong hem. Nambawan hop blong laef bakegen long ded, i leftemap tingting blong mi. (Jon 5:28, 29) Wan narafala samting we i halpem mi blong stanap strong, hemia wok blong fultaem paenia. Mi statem wok ya long 1982, afta we mi finis long wok blong mi blong winim mane. !Biaen, long 1988, mi glad tumas blong mekem wok blong tija long skul blong trenem paenia!

Afta we waef blong mi i ded, mi mas faet plante taem agensem sam nogud filing we i mekem tingting blong mi i foldaon olgeta. Be, sam fren we oli strong long saed blong spirit, oli halpem mi blong stanap strong. Taem mi kasem ol traem ya, oltaem mi harem save paoa, lav mo kaen fasin blong Jeova, we hem i soemaot blong lukaotgud long olgeta we oli trastem hem. (Ol Sam 18:2) Mi kasem save tu se, ol traem we yumi fesem oli trenem yumi long wan faet long saed blong spirit. (1 Pita 1:6, 7) Naoia we mi wan elda long kongregesen blong mi, mi gat jans blong halpem sam brata we tingting blong olgeta i foldaon.—1 Tesalonaeka 5:14.

Taem mi wan pikinini, mi wantem tumas blong kam wan soldia. Mo maet mi save talem se, mi stap olsem wan soldia kam kasem naoia. Mi lego wan ami blong kam insaed long wan narafala ami, from we naoia mi kam wan “soldia blong Jisas Kraes.” (2 Timoti 2:3) Tede, nomata se helt blong mi i nogud, mi traehad blong stap faet oltaem olsem wan soldia blong Kraes long ‘gudfala faet ya’ go kasem we hem i win blong givim ona mo leftemap nem blong Jeova, God blong yumi.—1 Timoti 1:18.

Louis Lolliot i ded long Maj 1, 1998, taem stori ya i klosap finis blong prentem long buk.

[Futnot]

[Tok blong pija long pej 13]

Jenerol de Lattre de Tassini i stap long mared blong mi

[Tok blong pija long pej 15]

Louis Lolliot mo waef blong hem, Reine, long 1976