Wan Tul Blong Tijim Narafala Long Raet Blong Ol Man

GEL ya Rut Jiménez Gila, i wan studen we i gat 17 yia blong hem. Hem i stap long Granada, Spen. Tija blong hem i askem long hem blong raetem wan stori long saed blong raet blong ol man. Ale, hem i raetem, nao sam wik biaen, grup blong man we oli stap jekem ol stori ya long Brussels, Beljiom, oli sanem toktok i kam se oli jusum stori blong hem wetem sam narafala studen blong Spen olsem beswan stori long kantri blong olgeta. Nao gel ya i raetem leta i kam long Wekap!

“Mi bin lukaot ol save long saed blong raet blong ol man. ‘Wekap!’ blong Novemba 22, 1998 i givim stret save ya we mi nidim. Hem i karem stori ya, ‘?Bambae i Gat Wan Taem We Ol Man Oli Respektem Raet Blong Narafala?’ Blong soem olsem wanem ol man oli no respektem raet blong narafala, mi yusum sam save we i kamaot long ol narafala ‘Wekap!’ long saed blong fiuja blong ol woman mo Holokos. [Lukluk ‘Wekap!’ long Inglis blong Epril 8, 1998, mo Ogis 8, 1998.] Taem mi stap lukaot ol save ya, mi jes luksave se mi no save faenem ol save ya long ol narafala buk, ‘Wekap!’ nomo. Mi laekem ol pija tu, mo mi putum sam long olgeta long stori blong mi.

“Mi kasem wan praes from stori blong mi, hemia blong go stap wan wik long Finlan. Long ples ya, mi givim sam moa tok long saed blong raet blong ol man, mo mi soem olsem wanem ‘Wekap!’ i givhan bigwan taem i givim save long ol impoten kwestin olsem hemia.

“Tangkiu tumas we yufala i faswan blong givim save long mifala long ol samting we oli kamaot long wol. Jeova bambae i gohed blong blesem yufala, blong plante milian man oli save gohed blong kasem gudfala samting from ol save ya.”

[Tok blong pija long pej 13]

Rut wetem stefeket blong hem