Baebol i Talem Wanem

?I Stret Blong Mekem Wosip Long Jisas?

LONG plante handred yia we oli pas, fulap man long Krisendoma oli bin mekem wosip long Jisas Kraes olsem we hem i God we i gat Olgeta Paoa. Be Jisas hem wan i givim ona mo wosip i go long Jeova God nomo. Tingbaot: Taem Setan i traem blong pulum Jisas blong mekem wan samting blong wosip long hem, Jisas i talem se: “Yu mas mekem wosip long Hae God [“Jeova,” NW ], we i God blong yu, mo bambae yu mas mekem wok blong hem nomo.” (Matiu 4:10) Biaen, Jisas i talem long ol disaepol blong hem se: “Bambae yufala i no singaot wan man long wol ya se ‘Papa,’ from we yufala i gat wan Papa nomo blong yufala, we hem i stap long heven.”—Matiu 23:9.

Jisas i eksplenem long wan woman Sameria, wanem kaen wosip we yumi mas givim i go long God. Wosip blong yumi i mas stanap long spirit mo trutok. Yes, “fasin ya nao, Papa blong yumi i wantem blong yumi mekem wosip long hem.” (Jon 4:23, 24) Dip ona we i joen wetem wosip i mas go long God nomo. Sipos yumi mekem wosip long wan narafala man no samting, hemia wosip blong ol adeol, be tufala haf blong Baebol, Hibru mo Grik haf, oli agensem wan kaen wosip olsem.—Eksodas 20:4, 5; Galesia 5:19, 20.

Be maet samfala oli no agri, oli talem se: ‘Baebol i talem se yumi mas mekem wosip long Jisas tu. From we long Hibrus 1:6 Pol i talem se: “Ol enjel blong God oli mas mekem wosip long hem [Jisas].” ’ (King James Version) ?Wanem mining blong vas ya? ?Olsem wanem hem i laenap wetem ol tok blong Baebol long saed blong wosip blong ol aedol?

Fasin Blong Wosip Mo Baebol

Fastaem, yumi mas kasem save long mining blong tok ya wosip we Pol i yusum long vas ya. Hem i yusum wan Grik tok, pro·sky·neʹo. Buk ya Unger’s Bible Dictionary i talem se tok ya i minim ‘kisim han blong wan man blong soem ona mo respek.’ Buk ya An Expository Dictionary of New Testament Words, we W. E. Vine i raetem, i talem se tok ya “i soem wan fasin blong ona, maet long wan man . . . no long God.” Long taem blong Baebol, plante taem tok ya pro·sky·neʹo i minim blong bodaon long fored blong wan haeman.

Tingbaot pijatok we Jisas i yusum long saed blong slef we hem i no save pem bigfala kaon blong hem long masta blong hem. Long ples ya, Jisas i yusum Grik tok ya. Long Baebol ya, King James Version, oli tanem tok ya se “slef ya i foldaon long fes blong hem [king], mo i mekem wosip [pro·sky·neʹo] long hem, i se, Masta, plis yu no kros long mi, bambae mi pembak mane ya long yu.” (Matiu 18:26; mifala nomo i putum italik.) ?Man ya i mekem samting we i olsem wosip blong ol aedol? !No gat! Hem i stap soem ona mo respek nomo we i stret blong soem long wan king, masta blong hem we i hae moa long hem.

Ol fasin ya blong soem ona mo respek, plante man Esia long taem blong Baebol oli mekem. Taem Jekob i luk brata blong hem Esao bakegen, hem i bodaon seven taem. (Jenesis 33:3) Ol brata blong Josef oli bodaon kasem graon, no oli givim ona long hem, from we hem i haeman long haos blong king blong Ijip. (Jenesis 42:6) From ol stori ya, yumi kasem save long samting we ol man blong talemaot fiuja from ol sta oli mekem taem oli kam luk smol pikinini Jisas, we oli luksave hem olsem “king blong ol laen blong Isrel.” Baebol ya King James Version i talem se, “oli foldaon, oli mekem wosip [pro·sky·neʹo] long hem.”—Matiu 2:2, 11.

Taswe, i klia se tok ya pro·sky·neʹo, we long sam Baebol oli tanem i kam “mekem wosip,” i no minim nomo wan kaen wosip we yumi mekem i go long Jeova God. Hem i save minim tu, bigfala ona mo respek we yumi soem long wan narafala man. Blong mekem i moa klia, sam Baebol oli tanem tok ya pro·sky·neʹo long Hibrus 1:6 i kam “soem respek” (New Jerusalem Bible), “ona long hem” (The Complete Bible in Modern English), “bodaon long fes blong hem” (Twentieth Century New Testament), mo “givim ona long hem” (New World Translation).

I Stret Blong Ona Long Jisas

?Olsem wanem? ?I stret blong givim ona long Jisas? Yes. Long leta blong aposol Pol we i go long ol Hibru man, hem i eksplenem se bambae “olgeta samting ya blong wol oli blong hem [Jisas] nomo.” Hem i stap “sidaon long raet saed blong God ya we i gat olgeta paoa.” (Hibrus 1:2-4) Taswe, “olgeta long heven, mo long wol, mo long Hom blong ol Dedman, bambae oli bodaon oli ona long nem blong hem, mo olgeta man bambae oli talemaot we Jisas Kraes, hem i . . . Masta blong olgeta, blong leftemap nem blong God, Papa blong yumi.”—Filipae 2:10, 11.

I no longtaem, Kraes bambae i yusum bigfala paoa mo haenem blong hem blong mekem wol ya i kam wan paradaes. God bambae i lidim hem blong yusum paoa blong sakrafaes blong hem, blong tekemaot soa, sore, mo trabol long wol ya. Samting ya bambae i mekem i gud long olgeta we oli wantem obei long stret rul blong hem. From samting ya, i stret nomo we yumi ona, respek, mo obei long hem.—Ol Sam 2:12; Aesea 9:6; Luk 23:43; Revelesen 21:3, 4.

“Hem i No Save Letem We Yufala i Mekem Wosip Long Narafala God”

Baebol i soemaot klia se wosip long saed blong skul i mas go long God nomo. Moses i tokbaot God se hem i “no save letem we yufala i mekem wosip long narafala god.” Mo Baebol i talem long yumi blong ‘mekem wosip long Hemia we i mekem skae mo wol mo solwota mo springwota.’—Dutronome 4:24; Revelesen 14:7.

Tru tumas, Jisas i gat wan wok we i impoten tumas long saed blong trufala wosip, taswe i stret nomo we yumi givim ona mo respek long hem. (2 Korin 1:20, 21; 1 Timoti 2:5) Hem nomo i rod blong kam klosap long Jeova God. (Jon 14:6) From ol save ya, yumi luk se ol trufala Kristin oli mas mekem wosip i go nomo long Jeova God, we Hem i gat Olgeta Paoa.

[Futnot]