?From Wanem Yu Mas Stap Longwe Long Wok Blong Ol Rabis Spirit?
SIPOS oli bin tijim yu se wok blong ol rabis spirit, hem i rod blong toktok long ol gudfala spirit, ating bambae yu sapraes long tok blong Baebol long saed ya. Wan samting we Baebol i talem, hemia: “Bambae yufala i no mas go luk ol man we oli stap toktok wetem ol devel blong dedman mo ol narafala devel. Sipos yufala i mekem fasin ya, bambae yufala i kam doti long fes blong mi.”—Levitikas 19:31; 20:6, 27.
Yes, Baebol i talem se “[“Jeova,” NW] i no laekem nating ol man” we oli trastem ol rabis spirit. (Dutronome 18:11, 12) ?From wanem? Blong ansarem kwestin ya, bambae yumi lukluk moa long wan wok blong ol devel ya, hemia fasin blong traem toktok wetem dedman.
?Ol Dedman Oli Laef i Stap Samples?
Tok blong God, Baebol, i talem samting we i defren long tingting blong plante man. Hem i talem se yumi no save toktok wetem wan famle no fren blong yumi we i ded finis. ?From wanem i olsem? Traem tingbaot: Sipos yumi save toktok long wan dedman, ale, dedman ya i mas laef i stap samples. Hemia i min se i mas gat wan haf blong dedman we i no ded. Samfala oli ting se spirit no sol blong man i gohed blong laef samples afta we bodi i ded. ?Tingting ya i stret?
Baebol i tokbaot taem we God i wokem faswan man, i se: “Hae God i tekem graon, i mekem wan man long hem, mo i blu long nus blong hem blong mekem hem i gat laef. Nao long fasin ya, [“man ya i kam wan laef sol,” NW].” (Jenesis 2:7) ?Vas ya i soemaot wanem? Hem i soemaot se man hem wan i wan sol, be hem i no gat wan sol we i laef i stap afta we bodi i ded. Antap long hemia, Baebol i talem se: “Sol we i stap mekem sin, hem nao bambae i ded.” (Esikel 18:4, NW) “Ol man we oli laef yet oli save se bambae oli ded, be ol man we oli ded finis oli no moa save wan samting. . . . bambae i no gat wok, mo tingting, mo save, mo waes long [“Seol,” NW],” beregraon blong ol man.—Prija 9:5, 10.
Taswe, Baebol i soemaot se sol i no save laef afta we bodi i ded. From samting ya, ol man we oli laef oli no save toktok wetem dedman. I gat tu man we oli skulgud long saed blong Baebol, we tufala i luksave se sol i mas ded. Wan, hem i man Kanada we i stap stadi long ol tijing blong skul, Clark H. Pinnock. Hem i talem se: “Tingting ya [se sol i no save ded] i bin gat paoa long tijing blong ol skul longtaem finis i kam. Be hem i no stanap long Baebol. Baebol i no tijim se sol i stap gohed blong laef samples.” Narafala man, hem i man Inglan we hem tu i skulgud long saed ya, John R. W. Stott. Hem i se: “Bilif ya se sol i gohed blong laef olwe, mo se i no gat samting i save spolem hem, i kamaot long tingting blong ol man Gris, i no long Baebol.”
Be, samfala oli bin harem ol voes mo kasem ol mesej, we i luk olsem se oli kamaot long dedman. ?Hu nao i stap toktok long olgeta?
?Toktok Long Hu?
Baebol i talem se wan spirit i bin toktok long faswan woman, Iv, blong lidim hem blong no moa obei long God. Spirit ya i mekem voes blong hem i kamaot long wan snek. Hemia i samting olsem trik we sam man tede oli save mekem taem oli toktok be voes blong olgeta i no kamaot long maot blong olgeta, i kamaot long wan doli no wan narafala samting. (Jenesis 3:1-5) Baebol i kolem spirit ya, no enjel ya we i toktok long Iv se, “snek ya blong bifo we nem blong hem ‘Setan’ no ‘Man we i agensem man,’ we i stap giaman long olgeta man long wol, i lidim olgeta oli go krangke.” (Revelesen 12:9) Setan ya, hem i pulum plante narafala enjel tu blong girap agensem God. (Jud 6) Ol rabis enjel ya oli ol devel, we oli enemi blong God.
Baebol i soem se ol devel ya oli save gat paoa long ol man. (Luk 8:26-34) I klia from wanem Loa blong God i talem se: “Bambae yufala i no mas . . . folem fasin blong olgeta blong go luk ol kleva, mo blong makemgud ol smosmol saen we oli luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.” (Dutronome 18:10-12) ?Wanem trabol i save kamaot sipos yumi no obei long loa ya?
Wan samting we i bin kamaot long King Sol long Isrel bifo, bambae i givim ansa long kwestin ya. King Sol i fraet long ol enemi blong hem, ale hem girap, i go luk wan woman we i save singaot ol spirit. Hem i askem long woman ya blong traem toktok wetem profet ya Samuel we i ded finis. Wan olfala man i kamtru long woman kleva ya, nao taem woman ya i eksplenem olfala ya long Sol, Sol i ting se hemia nao Samuel. ?Wanem mesej we Sol i kasem? Hemia, se ol enemi bambae oli winim Isrel, mo Sol wetem ol boe blong hem bambae oli go stap wetem “Samuel,” i min se bambae oli ded. (1 Samuel 28:4-19) ?God i tingting olsem wanem long Sol taem hem i go luk kleva ya? Baebol i talem se: “King Sol i ded from we hem i no putum tingting blong hem i stap strong long Hae God, . . . hem i girap, i go luk wan kleva blong faenemaot rod long ol devel.” (1 Kronikel 10:13) !Wan bigfala panis ya we hem i kasem!
Sem mak tede, olgeta we oli joen long wok blong ol rabis spirit, oli save kasem bigfala trabol. Baebol i givim woning se “ol man blong mekem posen mo kleva” bambae oli kasem “seken ded [ded blong olwe].” (Revelesen 21:8; 22:15) Taswe, sipos yumi waes mo yumi wantem stap laef, i klia se yumi mas stap longwe long olgeta kaen wok blong ol rabis spirit.
?Olsem Wanem Blong Blokem Paoa Blong Ol Rabis Spirit?
?Olsem wanem sipos yu yu joen finis long wok blong ol rabis spirit? I gud yu mekem sam samting naoia nomo blong blokem ol rabis spirit ya, oli no kam spolem yu mo famle blong yu. ?Yu yu save mekem wanem? Hemia wan pijatok: ?Wan man i save mekem wanem blong blokem ol bebet oli no kam fulap long haos blong hem mo mekem trabol long famle blong hem? Ating fastaem, bambae hem i kilimaot ol bebet ya long haos blong hem. Biaen, bambae hem i sakemaot eni samting long haos we i stap pulum ol bebet ya oli kam. Bambae hem i blokem ol hol long wol mo nilim sam moa kapa long haos. Sipos ol bebet ya oli stap kam yet, maet bambae hem i singaot ol man we oli wok long saed ya, blong oli kam kilimaot ol bebet ya.
Yumi save mekem samting olsemia blong blokem ol rabis spirit mo blong kamaot long paoa blong olgeta. Tingbaot sam Kristin long Efesas long faswan handred yia. Bifo we oli kam Kristin, oli bin joen long wok blong ol rabis spirit. Afta we oli mekemap tingting blong olgeta blong lego wok ya, oli mekem tri samting blong blokem ol rabis spirit ya oli no moa kam mekem trabol long olgeta. ?Oli mekem wanem?
Faswan Samting
Baebol i eksplenem se: “Plante long olgeta we bifo oli gat posen mo oli stap mekem majik, oli tekem ol buk blong ol samting ya i kam, nao oli bonem long fes blong ol man.” (Ol Wok 19:19) Taem ol niufala Kristin ya oli bonem ol buk blong olgeta we oli tokbaot majik, oli soemaot rod long yumi tede we yumi wantem blokem paoa blong ol rabis spirit. Yu mas sakemaot olgeta samting we oli joen wetem wok blong ol rabis spirit. Hemia i minim ol buk, niuspepa, komik buk, video kaset, posta, pleplei blong video, mo ol kaset blong miusek we oli tokbaot wok blong rabis spirit. Mo tu, yu mas sakemaot ol ston blong laki mo ol narafala samting we yu stap holem blong “lukaot” long yu.—Dutronome 7:25, 26; 1 Korin 10:21.
Wan man long Saot Amerika we hem i bin joen plante yia finis long wok blong ol rabis spirit, hem i folem advaes ya blong Baebol. Hem i tingtingbak long taem ya, i se: “Wan dei, mi karem ol samting we mi stap yusum blong mekem majik, mi hivimap olgeta long fored blong haos blong mi, mi tekem wan akis, nao mi katkatem olgeta long plante smosmol pis.” Nao hem i bonem olgeta gogo oli lus olgeta. Afta long samting ya, hem i gohed gud long saed blong bilif. I no longtaem biaen, hem i kam wan strong man blong wok long wan kongregesen blong ol Witnes blong Jeova.
Be, faswan samting ya i no naf. ?From wanem? Plante yia afta we ol Kristin long Efesas oli bonem ol buk blong olgeta long majik, aposol Pol i raetem se: “Yumi stap faet agens long ol devel we oli stap olbaot long wol ya.” (Efesas 6:12) Ol devel ya oli no lego olgeta yet. Oli stap traehad yet blong winim olgeta. ?Wanem narafala samting we ol Kristin ya oli mas mekem?
Namba Tu Samting
Pol i givim advaes ya long ol Kristin long Efesas long faswan handred yia, se: “Yufala i mas putum olgeta klos blong faet, we God i givim long yufala, blong bambae yufala i save stanap strong agens long ol giaman trik blong Devel [Setan].” (Efesas 6:11, NW, futnot) Advaes ya i gud yet tede. Olsem wan man we i stap traehad blong blokem ol bebet oli no kam insaed long haos blong hem, ol Kristin tu oli mas kam strong moa long ol rod blong blokem Setan. Olsem nao, ol rabis spirit oli no save gat paoa long olgeta. ?Wanem i joen wetem namba tu samting ya?
Pol i talem klia se: “Oltaem yufala i mas bilif strong long God. Fasin ya i olsem sil, we yufala i save yusum blong blokem ol ara ya blong Setan, we faea i laet long hem.” (Efesas 6:16) Yumi nidim sil ya tumas. Moa yumi bilif, moa yumi save blokem paoa blong ol rabis spirit.—Matiu 17:20.
?Olsem wanem yu save kam strong moa long ol rod blong blokem Setan? Gohed blong stadi Baebol oltaem. ?Olsem wanem stadi blong Baebol i joen wetem bilif? Wan wol blong haos i save stanap strong sipos fandesen blong hem i strong. Bilif blong yumi tu bambae i stap strong, sipos samting we bilif ya i stanap long hem, i strong. ?Bilif i stanap long wanem samting?
Stret save blong Baebol. Aposol Pol i talem se: “Ol man oli stap bilif long God, taem oli harem gud nius ya. Mo oli stap harem gud nius ya long ol tok blong Kraes.” (Rom 10:17) Mifala i leftemap tingting blong yu blong askem wan Witnes blong Jeova blong stadi Baebol wetem yu, long wan taem mo wan ples we i stret long yu. Stadi olsem bambae i mekem bilif blong yu i strong. (Rom 1:11, 12; Kolosi 2:6, 7) ?Wanem frut bambae i kamaot? I no longtaem, bambae yu luk we bilif blong yu i strong gud, olsem wan sil we i naf blong blokem paoa blong ol rabis spirit.—Ol Sam 91:4; 1 Jon 5:5.
?Wanem namba tri samting we ol Kristin long Efesas oli mekem?
Namba Tri Samting
Olgeta we oli jes kam Kristin long Efesas bifo, oli mekem sam samting finis blong blokem ol rabis spirit. Be oli stap yet long wan taon we i fulap long paoa blong ol rabis spirit. Oli nidim sam samting moa blong givhan long olgeta blong blokem ol rabis spirit ya. Taswe, aposol Pol i raet i go long ol Kristin brata sista ya blong hem, i talem wanem we oli mas mekem. Hem i se: “Yufala i mas prea, yufala i mas askem long God blong i givhan long yufala. Oltaem nomo yufala i mas prea long paoa blong Tabu Spirit. Yufala i mas prea from ol Kristin man, we bambae yufala i no kam slak, mo we tingting blong yufala i klia gud.”—Efesas 6:18.
Tru ya, yumi mas prea oltaem wetem fulhat blong yumi, blong askem Jeova blong blokem Setan. Longtaem bifo mo naoia tu, hemia wan bigfala samting we yumi nidim blong mekem, blong faet agensem ol rabis spirit. Mo yumi harem gud blong save se Jeova bambae i ansa long prea ya we i kamaot long hat blong yumi. Bambae hem i lukaotgud long yumi, maet hem i yusum ol enjel blong hem blong sapotem yumi. (Ol Sam 34:7; 91:2, 3, 11, 14; 145:19) Taswe, i impoten tumas blong gohed blong prea long God se, “Yu blokem Setan i no kam spolem mifala.”—Matiu 6:13; 1 Jon 5:18, 19.
Wan man Brasil, we nem blong hem Antônio, fastaem hem i wan kleva. Be biaen, hem i luksave se prea i impoten tumas. Hem i agri blong stadi Baebol, nao hem i lanem nem blong God, Jeova. Ale, hem i stat prea long Jeova God wetem fulhat blong hem. Hem i askem long Jeova blong givhan long hem blong ronwe long paoa blong ol rabis spirit. Naoia, hem i tingtingbak long taem ya, i se: “Prea long Jeova i bin stap olsem wan strong haos we mi mi save haed long hem. I sem mak long plante narafala tu we paoa blong ol rabis spirit i bin holem olgeta.”—Ol Proveb 18:10.
Yu Save Win
Afta we yu kasem save long Jeova, i impoten tumas we yu trastem hem fulwan, stap aninit long paoa blong hem, mo obei long ol tok blong hem. Sipos yu mekem olsemia, bambae hem i lukaotgud long yu taem yu singaot hem long nem blong hem blong givhan long yu. Hem i bin lukaotgud long Antônio. Naoia, Antônio i wan Kristin elda long wan kongregesen blong ol Witnes blong Jeova long São Paulo. Hem i glad tumas we hem i kasem save long trutok ya we i mekem hem i kam friman.—Jon 8:32.
Yu tu yu save win olsem Antônio mo plante taosen narafala, we fastaem oli joen long ol wok blong rabis spirit, be naoia oli kamfri long paoa blong olgeta mo oli stap mekem wok blong Jeova. Taswe, yu mas sakemaot olkaen samting we yu yu stap holem we oli joen wetem ol rabis spirit, mo yu mas stadi Baebol blong mekem bilif blong yu i kam strong, mo prea long Jeova blong blokem Setan. !Yu mas mekem trifala wok ya, from we laef blong yu i dipen long samting ya!
[Tok makem poen blong pija long pej 5]
Baebol i soemaot se ol man we oli laef oli no save toktok wetem ol dedman
[Tok blong pija long pej 6]
1. Sakemaot olgeta samting we oli joen wetem wok blong ol rabis spirit
[Tok blong pija long pej 7]
2. Gohed blong stadi Baebol oltaem
[Tok blong pija long pej 8]
3. Prea oltaem wetem fulhat blong yu