Ol Man Blong Ridim Wekap! Oli Talem

Gud Helt Stori ya “Gud Helt Blong Olgeta Man—?Bambae i Kamtru Samtaem?” i mekem mi mi harem gud mo i leftemap tingting blong mi bigwan. (Oktoba-Disemba, 2001) Mi mi gat wan sik long tingting blong mi, mo mi bin wantem blong kilim mi wan i ded. Evri dei mi tingbaot se: ‘?Olsem wanem bambae mi naf blong gotru long dei ya?’ Magasin ya i mekem mi mi tingting bakegen long promes blong Jeova long Revelesen 21:4 se ‘bambae hem i ravemaot wota blong ae blong yumi.’

C. T., Japan

Tangkiu from ol nambawan stori ya. Mi mi wan dokta, mo mi yusum ol meresin we oli wokem long ol lif nomo. Mi mi stap tingbaot taem ya long fiuja we bambae i no moa gat sik. !Long taem ya bambae mi save stopem wok blong mi, mo mekem namba tu wok we mi laekem tumas—hemia wok long garen!

B. C., Amerika

Wan i No Laekem Narawan Mi bin ridim stori ya “Ol Yangfala Oli Askem . . . ?Olsem Wanem Mi Save Talem ‘No’?” (Oktoba-Disemba, 2001) Taem mi ridim, mi harem bakegen soa we i bin kamaot long prapa laef blong mi. Mi no bin lesin long filing blong mi, mo from samting ya, mared blong mi i fulap long trabol nomo. Olsem stori ya i talem: “Filing ya blong no wantem spolem narafala i no wan strong fandesen blong wan gudfala mared.”

A. M., Amerika

Wan yangfala man i askem long mi blong goaot wetem hem. Be hem i no stap traehad from ol semfala samting long laef olsem mi, taswe mi talem ‘no’ long hem. Biaen, hem i talemaot filing blong hem long mi bakegen. Nao tingting blong mi i fasfas, mi fraet se sipos mi talem ‘no’ bambae i no moa gat wan narafala i askem mi. Be taem mi ridim stori ya tingting blong mi i kam kwaet. Mi save se mi mekem stret disisen.

S. N., Japan

Ol Bataflae Blong Naet Mi mi gat 14 yia, mo mi laekem tumas stori ya “Ol Naes Bataflae Blong Naet.” (Oktoba-Disemba, 2001) Bifo mi bin fraet long ol bataflae blong naet from we mi ting se oli no naes nating. !Be naoia we mi ridim stori ya finis, bambae mi no moa hareap blong kilim olgeta!

D. S., Amerika

Taem mi stap ridim stori ya, wan bataflae blong naet i sidaon klosap long leg blong mi. !Mi neva luk wan bataflae we i naes olsem! Ol samting we God i wokem oli nambawan tumas, mo sipos yumi lukluk gud long olgeta, bambae yumi mas laekem God moa.

G. P., Itali

Bifo, mi no luk se ol bataflae blong naet we Jeova i wokem oli naes. Mi mi no intres long olgeta nating. Be, jes afta we mi ridim stori ya, mi stap wasem ol flaoa blong mi, nao wan naesfala bataflae blong naet i kam klosap long mi. Mi talem tangkiu long Jeova from ol samting we hem i wokem mo from stori ya we i mekem mi mi lukluk moa long ol samting ya.

C. S., Amerika

Taem Solwota i Kam Red Mi mi wan tija, mo mi bin tijim wan kos we i tokbaot olsem wanem blong yusum gud mo lukaot gud long ol samting long solwota. Klosap mi ting se i no gat sam save we i eksplenem from wanem solwota i stap kam red. Be mi sek long stori ya “Taem Solwota i Kam Red.” (Oktoba-Disemba, 2001) Tangkiu tumas blong raetem stori ya.

J.O.P., Filipin