Ol Bigbigfala Stori Haos Ol Man Esia Oli Stap Wokem Moa Yet

Niuspepa ya The Wall Street Journal i talem se: “I gat sikis bigbigfala stori haos we ol man oli stap mekem plan blong bildim. Olgeta ya oli hae moa i winim Wol Tred Senta, we hem i bin go antap 419 meta. Ol sikis stori haos ya evriwan bambae oli stap long Esia.” Niuspepa ya Journal i talem se: “Long ol 20 yia we i pas, ol man oli laekem tumas ol haos we oli hae, mo oli stap laekem olgeta yet.”

Ol stori haos ya we oli hae bitim mak bambae oli stap long ol bigfala taon long Jaena, Koria mo Taewan. Man ya Cesar Pelli, hem i bin droem plan blong tufala stori haos we oli hae moa long ol narafala haos long wol, hemia Petronas Taoa long Kuala Lumpur, Malesia. Man ya i talem se: “Tingting ya blong wantem tajem skae i stap strong long ol man. Stat long taem we oli wokem Taoa blong Babilon bifo, ol man oli wantem tumas blong bildim wan bigfala haos we i go antap kasem skae.”

Ol injinia oli stap ademap sam moa samting long plan blong ol haos ya blong mekem oli sef moa. Long evri ten no twelef stori blong wan haos oli wantem bildim wan stori we i no gat windo mo i olsem “ples blong haed.” Oli wantem se aean we i gotru long medel blong stori haos, stat daon i go antap, i mas strong moa. Mo oli wantem se i mas gat ol bigbigfala strong aean we oli joenem medel blong haos wetem afsaed, no ol bigfala aean we oli goraon long haos fulwan. Oli wantem tu se i mas gat moa lada we ol man oli save yusum blong ronwe sipos haos i bon long faea. Ol lada ya oli mas smol antap mo kam bigwan daon, blong mekem se plante moa man oli save ronwe wantaem.

Naoia, i gat samwe 24 stori haos long wol we oli hae bitim 300 meta. Bitim stret haf blong olgeta oli stap long Esia. Be niuspepa ya Journal i talem se: “Ol man we oli gat bigfala save long bisnes ya, oli talem se i no gat nid blong wokem ol haos we oli bitim 60 stori.”

[Tok blong pija long pej 20]

Petronas Taoa, we i go antap 452 meta, i hae moa long ol narafala stori haos long wol

[Tok/Image blong pija long pej 20]

(Lukluk niuspepa)

Building height includes decorative spires but not antennae.

143 meta 2500 B.K.T. Piramid blong Khafre long Giza, Ijip

300 meta 1889 Eiffel Taoa, Paris, Franis

348 meta 1997 T & C Taoa, Kaohsiung, Taewan

369 meta 1989 Bang blong Jaena, Hong Kong, Jaena

442 meta 1974 Sears Taoa, Chicago, Yunaeted Stet

452 meta 1997 Petronas Taoa, Kuala Lumpur, Malesia

[Credit Line]

All sketches: Courtesy SkyscraperPage.com