Ol Yangfala Oli Askem . . .

?Olsem Wanem Mi Save Givhan Long Olgeta We Oli Nidim Help?

“Taem mi finis long skul, mi wantem mekem wok blong lektrik. Mi wantem givhan blong bildim ol niufala Haos Kingdom.”​—Tristan, we i gat 14 yia blong hem.

“Mi sanem 20 dola (bitim 2,000 vatu) blong givhan blong pem niufala mesin blong printim ol buk. Hemia smol mane we papa mama i givim long mi blong pem samting blong mi, be mi wantem givim long yufala.”​—Abby, we i gat 9 yia blong hem.

LONG taem blong yumi, samfala oli tingting nogud long ol yangfala, oli stap talem se ol yangfala oli tingbaot olgeta nomo. Be plante yangfala, olsem olgeta ya antap, oli soemaot se oli gat fasin we i defren. Plante yangfala man mo woman we oli Witnes blong Jeova, oli yusum taem, paoa, mo olting blong olgeta blong givhan long ol narafala. (Ol Sam 110:3) Tingbaot sam narafala we oli mekem olsemia.

Jirah we i stap long Ostrelia, i gat seven yia blong hem. Smoltaem afta we bubu woman blong hem i ded, bubu man blong hem i givim 50 dola (samwe long 4,000 vatu) long hem. ?Jirah i yusum mane ya olsem wanem? Long nekis miting blong kongregesen, hem i putum olgeta mane ya long bokis blong presen mane. ?From wanem? Jirah i talem long mama blong hem se: “Mi mi gat plante pleplei, be mi gat wan bubu woman nomo. Mi save se hem bambae i wantem we mi putum mane ya long bokis blong presen mane, from we hem i lavem Jeova tumas.”

Hannah we i stap long Yunaeted Stet, i gat faef yia blong hem. Hem i laekem tumas ol hos, taswe hem i wantem pem wan giaman hos we praes blong hem i 75 dola (bitim 7,000 vatu). Papa mama blong Hannah tufala i wantem tijim hem se hem i mas putumgud mane blong hem i stap sipos hem i wantem pem samting. From samting ya, sam samtaem oli givim smol mane long hem blong i putumgud. Smoltaem i pas nao Hannah i luk se mane blong hem i stret blong pem hos ya.

Be long taem ya, hariken Katrina i flatemgud ol ples klosap long solwota blong Galf blong Meksiko. Hannah i wari long ol man we oli kasem trabol ya, ale hem i givim olgeta mane blong hem blong halpem olgeta. Hannah i sanem bitim 100 dola (samwe long 10,000 vatu) wetem wan leta i go long hedkwota blong ol Witnes blong Jeova. Hem i se: “Mi mi wantem givim mane ya long yufala from we mi mi lavem Jeova mo mi wantem givhan long ol man blong hem.” ?Olsem wanem? ?Jeova i stap luk gudfala fasin blong hem blong givim presen? Baebol i talem se: “Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.”​—Hibrus 13:16.

Long yia 2004, tu hariken i kilim Florida. Afta, wan yangfala gel blong Yunaeted Stet we nem blong hem Tiffany, i raet i go long hedkwota blong ol Witnes blong Jeova. Hem i se: “Mi mo brata blong mi Timothy, mitufala i wantem givim 110 dola (bitim 11,000 vatu) olsem wan presen. Haos blong mifala i no brobrok tumas, be mitufala i luk we tufala hariken ya i spolemgud plante narafala haos. Mitufala i wantem givhan, ale mitufala i putumgud ol mane blong mitufala i stap. Timothy i kasem 10 dola (bitim 1,000 vatu) taem hem i givhan blong tekemaot wol blong wan haos, mo mi mi putum mane blong mi i stap, gogo mi mi gat 100 dola.” !Tiffany i gat 13 yia blong hem mo brata blong hem Timothy i gat 7 yia nomo! ?Wanem i save kamaot taem yumi tingbaot ol narafala fastaem? Ol Proveb 11:25 i talem se: “Man we i stap givhan long ol man, oltaem ol man oli stap givhan long hem.”

Wan grup blong ol yangfala Witnes long Yunaeted Stet we oli gat 4 yia kasem 15 yia, oli harem nius se plante Kristin brata sista blong olgeta long Afrika oli no gat wan Haos Kingdom blong olgeta. Ale oli girap oli mekem wan samting blong halpem olgeta. Oli talem se: “Mifala i salem ol kek long yad blong mifala nomo, mo mifala i kasem bitim 106 dola (bitim 10,000 vatu). Mifala i talem long ol man se mane we mifala i winim bambae i go long Afrika blong bildim ol haos miting blong ol man we oli wantem stadi Baebol. Plante man oli glad long samting ya. Nating se mifala i stanap naen aoa blong salem ol kek ya, be mifala i win gud. !Mifala i mekem wok ya blong Jeova nomo!

Yu Yu Save Givhan

Ol yangfala ya we yumi tokbaot antap, oli kasem save long trutok ya we Jisas i talemaot se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Yu tu yu save kasem glad ya taem yu givim presen long narafala. ?Yu save givim wanem?

?Yu yu harem nius se sam Kristin oli nidim sam samting? Maet i gat wan bigfala hariken no narafala disasta we i spolemgud wan ples. Traem tingbaot sipos trabol ya i kasem yu, nao yu lusum haos blong yu, olting blong yu, mo maet wan famle blong yu tu i ded. Long wan leta blong aposol Pol, hem i talem se ol Kristin oli mas ‘givgivhan long olgeta long laef blong olgeta, i nogud oli stap lukaot long laef blong olgeta wan nomo.’ (Filipae 2:4) Nating sipos yu stap longwe long ples we disasta i kamaot, be maet yu save sanem presen mane i go blong givhan long wok we ol Witnes blong Jeova oli stap mekem blong halpem olgeta we oli kasem trabol.a

I gat sam narafala rod tu blong givhan long olgeta we oli nidim help. Sipos yu yu wan Witnes blong Jeova, i gud blong lukluk raon long yu taem yu stap long Haos Kingdom. ?Yu yu luk sam olfala no sam narafala we oli nidim help? ?Yu ting se yu save mekem sam smosmol wok blong olgeta? Aposol Pol i raet i go long ol Kristin long Rom se: “Yufala i mas lavlavem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.” (Rom 12:10) Taem yu luk se narafala i nidim help, yu no mas wet blong hem i kam askem long yu, be yu mas go givhan long hem. Yu mas rere blong mekem enikaen wok nating se wok ya i no impoten. Tingbaot se taem yu mekem wok blong narafala, i olsem we yu mekem wok blong God stret. Baebol i talem se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.”​—Ol Proveb 19:17.

Beswan rod blong givhan long ol narafala, hemia blong serem ol save wetem olgeta long saed blong Baebol. Jisas i talem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Naoia bitim olgeta taem bifo, ol man oli nidim trutok long Baebol we i save givim laef long olgeta. Taswe yu mas gohed blong joen oltaem long wok blong prij wetem strong tingting se “wok ya bambae i mas gat frut blong hem.”​—1 Korin 15:58.

[Futnot]

SAM SAMTING BLONG TINGBAOT

◼ ?Yu yu save tingbaot wan narafala we i nidim help?

◼ ?Yu save mekem wanem blong halpem hem?

[Tok blong makem poen long pej 17]

“Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.”​—Hibrus 13:16

[Bokis blong pija long pej 16]

?FROM WANEM YU MAS LANEM FASIN YA BLONG GIVIM PRESEN?

“Taem mi luk we papa mama blong mi, tufala i yusum plante taem mo paoa blong tufala blong mekem wok blong Jeova mo blong halpem ol man raonabaot long olgeta, mi tu mi wantem mekem sem mak long laef blong mi. Papa blong mi i talem long mi se: ‘Nomata sipos wok we yu mekem blong Jeova i smol nomo, be bambae i stap blong olwe. Jeova i laef olwe, taswe hem bambae i tingbaot wok blong yu gogo i no save finis. Be sipos yu wok blong mekem yu wan nomo i haremgud, hemia i westem taem. Taem yu yu ded, wok we yu mekem bambae i ded tu.’”​—Kentaro blong Japan, we i gat 24 yia blong hem.

“Blong talem stret, mi no bin wantem nating blong yusum Sarede aftenun blong halpem ol olfala blong mekem sam smosmol wok long haos blong olgeta. Mi bin wantem blong pleplei nomo, mo blong joen wetem ol fren blong mi. Be taem mi stat blong spenem taem wetem ol olfala, mi haremgud. Mi luksave se olgeta oli sem mak long mi. Bifo, olgeta tu oli yangfala. Samting ya i mekem se mi mi wantem tumas blong halpem olgeta.”​—John blong Inglan, we hem i gat 27 yia blong hem.

“Taem mi mi yangfala, mi joen long wok blong klinim Haos Kingdom mo plante narafala wok. Mi haremgud tu blong mekem wok blong ol narafala long kongregesen. Taem yu givhan long narafala, yu luk bigfala glad we oli kasem. Wan taem, mi wetem sam narafala, mifala i go pentem haos blong wan olfala sista. !Sista ya i glad we i glad! Taem yu mekem narafala i glad, yu tu yu glad.”—Hermann blong Franis, we i gat 23 yia blong hem.

[Tok blong pija long pej 16]

Plante yangfala oli givim presen mane blong halpem olgeta we oli kasem trabol long ol disasta