Sam Nius Blong Wol

Wan leta we Pop Benedict 16 i raetem long ol haeman blong jos, i talem se: “Plante long yumi i gat strong tingting . . . se i mas gat sam jenis long Yunaeted Neson blong mekem i kam gud moa. Mo i mas gat sam jenis tu long ol grup we oli wok blong traem mekem wol i kam rij, mo long saed blong mane blong ol kantri blong wol. Samting ya i mas hapen blong mekem we tingting ya se ol neson oli wan famle nomo, i gat paoa.”—L’OSSERVATORE ROMANO; olgeta nomo oli jenisim sam long ol raeting ya.

“Long kantri ya Yukren, wan long evri tri man oli smok wan paket sigaret evri dei.”—EXPRESS, YUKREN.

Long Yunaeted Stet, klosap stret haf (44 pesen) blong ol boe we oli no gat 20 yia yet, we ol man blong stadi oli askem kwestin long olgeta, oli talem se oli luk finis “wan foto, no bitim wan foto, blong wan gel long klas blong olgeta we i neked. Oli luk foto ya long Intenet no long mobaelfon.”—TIME, YUNAETED STET.

“Mak Ya We i Soemaot Bigfala Trabol”

Wan niuspepa (Associated Press) i talem se, ol trabol olsem faet, drae taem, trabol long saed blong politik, praes blong kakae i antap tumas, mo fasin pua, oli kasem “mak ya we i soemaot bigfala trabol” long ol man. Naoia i gat bitim wan taosen milian man long wol we oli no gat kakae. Misis Josete Sheeran, we i wok blong Program blong Yunaeted Neson Blong Givim Kakae Long Ol Man Long Wol, i talem se: “Ol man we oli hanggri oli denja. . . . Taem ol man oli no gat kakae, oli mekem wan long trifala samting ya: Oli faet, oli muv i go long narafala kantri, no oli ded. Trifala evriwan i nogud.” Antap long samting ya, ol man we oli no gat kakae oli stap kam plante moa, i bitim ol pikinini we oli bon. Long ol rij kantri tu, namba blong ol man we oli no gat naf kakae i go antap 15.4 pesen.

I Gud Blong Ridim Stori Long Pikinini

Taem papa no mama i ridim wan stori long pikinini blong hem, hemia i no blong mekem pikinini i slip nomo. Ol man we oli stadi long saed ya, oli faenemaot se hemia i save givhan long pikinini blong i toktok gud, i halpem hem blong lanem blong yusum ol haf blong bodi blong hem, olsem taem i holem pepa blong tanem pej, mo i mekem se hem i save rimemba ol samting. Wan niuspepa (The Guardian) i talem se: “Samting we i moa impoten . . . se, taem papa no mama i rid long bigfala voes long pikinini, tufala i serem wan taem we tufala i lesin gud mo lukluk gud long tufala, nao filing blong tufala i joen. Samting ya i tijim pikinini se sipos hem i rid, bambae hem i harem gud.” Tija Barry Zuckerman we i lidim stadi ya, i talem se, “ol pikinini oli lanem blong laekem ol buk, from we oli ridim [olgeta] wetem wan we oli lavem.”

Mama Buluk We i Harem Gud i Givim Moa Melek

Ol saentis long Newcastle Yunivesiti long Inglan, oli faenemaot se “mama buluk we i gat prapa nem blong hem, i givim moa melek i bitim wan we i no gat nem blong hem.” Yes, sipos ol man oli mekem i gud mo spenem taem wetem ol mama buluk, evri yia bambae oli kasem 280 lita melek moa, long wanwan long ol buluk ya. ?From wanem i olsem? Dokta Catherine Douglas, we i wok long haf blong Yunivesiti we i stadi long Agrikalja, Kakae, mo Developmen blong Rurol Eria, i talem se: “Man i harem gud taem narafala i intres long hem. Mama buluk tu i harem gud mo i no kros taem man i intres long hem. Samting we mifala i faenemaot, i sem mak long wanem we plante gudfala fama we oli kaen long ol anamol blong olgeta, oli luksave longtaem finis. Sipos yumi mekem i gud long wan mama buluk, i min se yumi singaot hem long prapa nem blong hem, yumi toktok long hem mo kaen long hem taem i stap kam bigwan, ale yumi save mekem se hem i harem gud mo i laekem ol man. Mo bambae hem i givim moa melek tu.”